HANE fe hë epuni dreng la ketre boliko a ithanata? Ma öni epuni jë hi, ‘Pëkö öni a ithanata.’ Ngo Tusi Hmitrötr a qaja la pengöne la ketre boliko, ka ithanata ekö tune la atr. Tro sa ce wang la ewekë ka traqa.

Ketre angela

Traqa ha angetre Isaraela easenyine la nöje Kanana. Nge hanawang, kola xoue angatr hnei Balaka, joxu ne Moaba. Ame hnei angeic hna iup troa thei Balaama, ketre atre nyi haze, me nyithupe i angeic matre troa eji angetre Isaraela. Kola ahnithe koi Balaama hnei Balaka la ketre itrenge manie ka tru, haawe, ame hna sadrelëne jë hnei Balaama la boliko i angeic, me tro troa wai Balaka.

Thaa ajane kö Iehova, tro Balaama a ejin la nöje i Nyidrë. Ame hnei Nyidrëti hna upe la ketre angela, matre troa cile ngöne la nyipine gojeny fë taua, me thingejë i Balaama. Öhne hnyawa hi boliko la angela, ngo thaa öhne fe kö Balaama. Celë hi matre, boliko a thele jën troa kötre bëeke hmaca, kola xouene lai angela, uti hë la thu agö ej me meköl ngöne la gojeny. Elë catre jë hi la hni Balaama, matre angeic a hna la sine sinöe kowe la boliko.

Thupene lai Iehova a aewekëne jë la boliko, matre troa dreng hnei Balaama. Kola hnying hnene la boliko me hape, ‘Nemene la hnenge hna kuca koi eö matre eö a lepi ni ju pë hë tune la?’

Balaama a ti boliko

Kola qaja hnei Balaama ka hape: ‘Eö a xomeceitu ni me ketre hmo. Maine hetre taua i eni ju, tro ni a kuluhmathi eö!’

Kola hnying hnene la boliko ka hape: ‘Hapeu, ase hë ni hane kuca tune lai koi eö ekö?’

Kola sa hnei Balaama me hape: ‘Ohea.’

Ame hnei Iehova hna fe la lue meke i Balaama, nge angeic a öhne la angela i Iehova, kola cile fë la taua ngöne la gojeny. Kola qaja hnene la angela ka hape: ‘Pine nemen matre eö a lepe la boliko i eö? Hnenge hna tro e kolemi matre troa ajolë eö, ke thaa loi kö e tro eö a eji Isaraela. Maine thaa jea ju la boliko, ase hë ni humuthi eö, ngo thaa tro jë kö ni a lepe la boliko i eö.’

Kola qaja hnei Balaama ka hape: ‘Ngazo la thinang. Thatre kö ni ka hape, hnei cilieti hna cile troa ajolë ni e kuhu gojeny.’ Ame hna nue Balaama hnene la angela, ene pe angeic a tro pi troa wai Balaka. Ngo hna thele hmaca kö hnene lai atre nyi haze troa ahnëjinë Isaraela, ngo hnei Iehova hna sewe angeic, me akönia amanathithin la nöje i Nyidrë jëne Balaama.

Numera 21:21-35; 22:1-40; 23:1-30; 24:1-25.



Itre Hnying

  • Drei lae Balaka, nge pine nemen matre kola iupi troa thei Balaama koi angeic?
  • Pine nemen matre kola thu agö me meköle la boliko ngöne la gojeny?
  • Nemene la hna qaja hnene la boliko koi Balaama?
  • Nemene la hna qaja hnene la ketre angela koi Balaama?
  • Nemene la ewekë ka traqa ngöne la kola thele hnei Balaama troa ëji Isaraela?

Itre xaa hnying

  • E jë la Numera 21:21-35.

    Pine nemen matre ngaane pi hnei angetre Isaraela la joxu i angetre Amora ene Sihona me Oga joxu ne Basana? (Num. 21:21, 23, 33, 34)

  • E jë la Numera 22:1-40.

    Nemene la aja ka eje e kuhu hni Balaama nge ka upi angeic troa ëji Isaraela, nge nemene la itre ini hne së hna xome qa ngöne lai? (Num. 22:16, 17; Ite edomë 6:16, 18; 2 Pet. 2:15; Iuda 11)

  • E jë la Numera 23:1-30.

    Ngacama ame la aqane ithanata i Balaama, tre kösë pi lo ketre hlue i Iehova, ngo hna jele thoi angeic tune kaa hnene la itre huliwa i angeic? (Num. 23:3, 11-14; 1 Sam. 15:22)

  • E jë la Numera 24:1-25.

    Hnene lai itre hna qaja hnei Tusi Hmitrötr hna acatrene tune kaa la lapaune së, laka eje hi troa eatr la itre mekuana i Iehova? (Num. 24:10; Is. 54:17)