Esau

HANAWANG cahu lue nekö trahmany, hapeu ka ceitu kö la lue iqëmeke i nyidro? Atre fe hi nyipunieti la lue ëje i nyidro? Esau la ka weje öni, nge atre thupë mamoe Iakobo.

Lue fini nyidro, hna hnahon hnei Rebeka la thin nge Isaaka la kem. Ame Esau hnimina i Isaaka keme i angeic, qa ngöne laka, ka atreine weje öni, nge ka traqa fë miitr pala hi kowe la hnalapa. Ngo ame Rebeka, ka nekö hnimë Iakobo, pine laka, ka pë mejen, nge ka menyik la aqane ujë.

Ame la ijine cili, mele petre kö Aberahama qaaqai nyidro; nge ame Iakobo, ka pi dreng la tro qaaqaa hmunë a lapaa qejepengöi Iehova. Ngöne la kola 175 lao macatre i Aberahama, kolo ha e la 15 lao macatre ne la lue fini.

Ame hë la kola 40 lao macatre i Esau, hnei angeice hna xome nyine föi angeic, la lue föe ne Kanana. Hace catre pi hë Isaaka me Rebeka, ke thaa ka hmi kö la itre föe cili koi Iehova.

Ame ngöne la ketre drai, hna elëhni atraqatr hnei Esau kowe la jini angeic, ene Iakobo. Traqa ha la ijin troa hamën la manathith hnei Isaaka, kowe la nekö i nyidrë trahmany haetra. Pine laka, ka tru kö Esau hui Iakobo, angeic la ka ijij troa kapa la manathithi cili. Ngo thëthëhmine hë ka hape, hna salemëne hë koi Iakobo lo lai edrö ne iamanathithi thatraqai angeic. Ketre mina, qëmeken troa hnahon la lue fini, hnei Akötresie hna thingehnaean ka hape, tro ha hamën koi Iakobo la edrö i neköne haetra. Nge hna eatrën la hna amekötine cili. Hnei Isaaka hna hamën la edrö koi Iakobo, ketre nekö i nyidrë.

Iakobo

Atre hë hnei Esau la ewekë cili, ame hnei angeic hna elëhni koi Iakobo. Hnene laka, atraqatre pala ha la trenge elëhni angeic, matre angeic a thel troa humuthi Iakobo. Ame la kola atre lai hnei Rebeka, haawe, nyidroti a hleuhleu. Ene pe hnei nyidroti hna qaja jë koi Isaaka föi nyiidro, ka hape: ‘Ketre ewekë ka ngazo hmaca elany, e tro Iakobo a ixom memine la ketre föe ne Kanana.’

Celë hi matre hnei Isaaka hna hë Iakobo me qaja koi angeic ka hape: ‘Tha tro kö eö a xome la ketre föe ne Kanana. Tro jë eö kowe la hnalapa i Bethuela qaaqa i eö, e Harana. Tro eö a öhnyi Labana nekö i nyidrë, xome jë la ketre nekö i angeic jajiny matre nyine föi eö.’

Hnei Iakobo hna dreng la keme i angeic, me canga nyiqaan troa trongën la gojenyi ne tro Harana, nöj gaa nany, nge zi ne la itre sin la madra i angeic.

Genese 25:5-11, 20-34; 26:34, 35; 27:1-46; 28:1-5; Heberu 12:16, 17.



Itre Hnying

  • Drei lae Esau me Iakobo, nge nemene la eisapengöi nyidro?
  • Ije macatre i Esau me Iakobo ngöne lo kola meci hnene la qaaqa i nyidro ene Aberahama?
  • Nemene la hna kuca hnei Esau ka ahacene la hni ne la thine me keme i angeic?
  • Nemene kepine la kola elëhni atraqatr hnei Esau koi Iakobo trejine me angeic?
  • Nemene la ini hna hamën hnei Isaaka koi Iakobo nekö i nyidrë?

Itre xaa hnying

  • E jë la Genese 25:5-11, 20-34.

    Nemene la hna perofetane hnei Iehova göne la lue nekö i Rebeka trahmany? (Gen. 25:23)

    Nemene la eisapengöne la aqane ujë i Iakobo me Esau göne la edrö ne haetra? (Gen. 25:31-34)

  • E jë la Genese 26:34, 35; 27:1-46; me 28:1-5.

    Nemene la aqane mama hnyawa laka thaa hna wanga atrune kö hnei Esau la itre ewekë ngöne la götrane la ua? (Gen. 26:34, 35; 27:46)

    Thenge la manathith qaathei Akötresie hna troa kapa hnei Iakobo, nemene la hnei Isaaka hna upi angeic troa kuca? (Gen. 28:1-4)

  • E jë la Heberu 12:16, 17.

    Nemene la hna amamane hnene la tulu i Esau göne la pune ka ngazo kowe la itre atr ka methinëne la itre ewekë ka hmitrötr?