HETRE ketre götran hna hane jilapan hnene la itre atr, thupen lo iwë, Ure la ëjen. Ure la Ketre traon ka sisitria catr, itre uma ka mingöming a cil. Ngo ame pe la itre atren, ka thili angatr koi itre haze, tune lo e Babela. Thaa hnene kö la itre atren hna tui Noa, me Sema nekö i angeic, lue ka nyipi nyihlue i Iehova.

Hna meci hnei Noa ngöne la 350 lao macatre thupene lo iwë, kösë lue macatre qëmeken troa malan la trahmany, hna amaman ngöne cahu iatr. Atr hna madrine kow, hnei Iehova Akötresie. Aberahama la ëjen, ka mele ngöne la traon e Ure memine la hnepe lapa i angeic.

Aberahama a goeëne la itre wëtresij

Ame ngöne la ketre ijin, Iehova a qaja koi Aberahama ka hape: ‘Mejë jë memine la lapa i eö qaa Ure, nge tro jë kowe la nöje tro ni a amamai eö.’ Hapeu, hnei Aberahama kö hna drengethenge Akötresie me nue pe la nöjei lolo ne la traon? Eje hi. Nge pine laka hnei Aberahama pala hi hna drengethenge Akötresie, matre hë angeice ju pë hë ka hape, sinee i Akötresie.

Hetrenyi qa ngöne la lapa i Aberahama, la itre sina tronge i nyidrë qaa Ure. Tera keme i nyidrë, me lota utha e nyidrë, me Sara föi nyidrë. Qea ha thupen la hnei angatr hna tro, traqa pi hi angatr ngöne la ketre traon, Harana la ëjen. Hna meci pe hi e cili hnei Tera. Nanyi hë qaa Ure.

Ame hnei angatr hna pane lapa ju ngöne la traone cili, thupene jë hi lai, Aberahama a ce tro pi me lapa i angeic qaa Harana a tro Kanana. E cili hi la Iehova a qaja koi angeic ka hape: ‘Tro ni a hamëne la nöje celë kowe la itre matra i eö.’ Hnei Aberahama hna mele pe hi hnine la itre uma maano, e Kanana.

Hna xatua Aberahama hnei Akötresie, matre kola mana la hna axö öni hnei angeic, nge tru mina fe hnei hlue i angeic. Ngo ame pe Sara föi angeic, ka safëj nyiidro.

Ame hë la kola 99 lao macatre i Aberahama, Iehova hi lai a thingehnaean koi angeic ka hape: ‘Tro ni a kuca matre tro eö a keme ne la nöjei nöje ka kösau.’ Ngo troa eatr tune kaa la hna thingehnaean cili nge lue qatre hë Aberahama me Sara, thaa ijij hmaca kö tro nyidroti a hnaho?

Genese 11:27-32; 12:1-7; 17:1-8, 15-17; 18:9-19.



Itre Hnying

  • Nemene la aqane mele ne la itre atr ngöne la traon e Ure?
  • Drei cahu trahmany ngöne la iatr, nemene macatre la kola hnaho angeic, nge hnei angeice hna mele ekaa?
  • Nemene la hnei Akötresieti hna upi Aberahama troa kuca?
  • Pine nemen matre kola hë Aberahama, ka hape, ketre enehmu i Akötresie?
  • Drei la ka ce tro me Aberahama ngöne lo angeic a tro qaa Ure?
  • Nemene la hnei Akötresie hna ahnithe koi Aberahama ngöne la angeic a tro kowe la nöje Kanana?
  • Nemene la hnei Akötresieti hna thingehnaean koi Aberahama ngöne lo kola 99 lao macatre i angeic?

Itre xaa hnying

  • E jë la Genese 11:27-32.

    Drei la itre xötrapane i Aberahama me Lota? (Gen. 11:27)

    Ngacama kola qaja, ka hape, qaathei Tera la mekun, ene la kola mejë la hnepe lapa i angeic a tro Kanana, ngo tune kaa la aqane atre së laka Aberahama la qaane la mekune cili, nge pine nemen matre axeciëne jë angeice tune lai? (Gen. 11:31; Ite hu. 7:2-4)

  • E jë la Genese 12:1-7.

    Nemene la pengön ka tru ne la isisinyikeu i Akötresie me Aberahama lo angeice hë e Kanana? (Gen. 12:7)

  • E jë la Genese 17:1-8, 15-17.

    Nemene la aqane saze la ëje i Aberama ngöne la nyidrëti a traqa kowe la 99 lao macatre, nge nemene kepine lai? (Gen. 17:5)

    Nemene la itre manathith hnei Iehova hna thingehnaean koi Sara? (Gen. 17:15, 16)

  • E jë la Genese 18:9-19.

    Ame ngöne Genese 18:19, Nemene la itre hnëqa hna athipe kowe la itre kem? (Deu. 6:6, 7; Efe. 6:4)

    Nemene la hna kuca hnei Sara ka amaman, ka hape, thatreine kö tro sa juetrëne la ketre ewekë koi Iehova? (Gen. 18:12, 15; Sal. 44:21)