Tro jë kowe la alien

Tro jë kowe la itre mekune ka co

Tro jë kowe la itre alien

Itretre Anyipici Iehova

Drehu

Trenge Edomë Qa Hnine La Tusi Hmitrötr

Edromë 6: Lue Trahmany Caa Ka Loi Thiina Nge Caa Ka Ngazo

Edromë 6: Lue Trahmany Caa Ka Loi Thiina Nge Caa Ka Ngazo

HANAWAI Kaina me Abela. Lue ka tru hë nyidro. Ame Kaina Ka eëny. Angeic a traa feja.

Kaina me Abela a huuje koi Akötresie

Ame Abela, ka thupë mamoe. Pi tro catre angeic a axöj la itre neköi mamoe. Kola kökötre trootro la itre mamoe i Abela, nge ketre hna axö öni ka tru hë, nge qa i angeic troa thupën hnyawa itre ej.

Ame ngöne la ketre ijin, kola isa traqa fë hnei Kaina me Abela la itre ahnahna i nyidro koi Akötresie. Kaina a fetra fë la xeni ne la hlapa i angeic. Nge ketre Abela a xulu fë la itre mamoe ka pipixenyë, ne la hna axö mamoe i angeic. Hna kepe Abela hnei Iehova, me madrin la ahnahna hnei angeic hna traqa fë. Ngo thaa hna kapa kö hnei Nyidrë la ahnahna i Kaina. Atre fe hi nyipunieti la kepin?

Thaa qa ngöne hmekuje kö laka, ka sisitria me tru la ahnahna i Abela hui Kaina. Ngo hnene fe laka, ame Abela, tre, ketre thupëtresij ka loi thiina. Ka trene ihnimi koi Iehova, me kowe fe la trejin me angeic. Ngo ame Kaina, tre, ngazo la thiina i angeic; pëkö ihnimi koi Abela.

Celë hi matre hnei Akötresieti hna sipo Kaina, troa saze la aqane ujë i angeic. Ngo thaa kapa kö Kaina. Kolo hmaca pena ha elëhni catr hnei angeic, ke mama ha laka, sisitria catre kö la ihnimi Akötresie koi Abela. Haawe, Kaina pë hë a qaja jë koi Abela, ka hape: ‘Tro so kowe la hna eëny.’ Nyidroti caasi hë ngöne la hlapa, ene pe lepe humuthi Abela ju hi hnei Kaina. Drei la ketre ewekë ka ngazo catr hna kuca hnei Kaina!

Kola kötre hnei Kaina thupene la hna humuthi Abela

Paatre hë Abela, ngo hna meku angeice pala hi hnei Akötresie. Ketre atr ka loi thiinan, nge thatreine kö Akötresie troa thëthëhmin la itre atr ka tune lai. Troa traqa la ijine tro Akötresie, a amele angeice hmaca. Ame e cili, thaa tro hmaca kö Abela a mec. Tro hë angeic a mel epine palua, ngöne la ihnadro. Drei jë kö la madrine së elany, e tro sa iöhnyi memin la itre atr hna troa amelen hmaca, tui Abela!

Ngo thaa aja i Akötresieti kö, la itre atr ka tui Kaina. Celë hi la kepin matre, thupene la hnei Kaina hna humuth la trejin me angeic, Akötresie a upe triji angeice jë matre ananyin la lapa i angeic. Ce tro pi Kaina troa mel ngöne la ketre götran, memin la ketre xa i angeic, matre nyine föi angeic.

Hetre nekö i nyidroti jë hi. Ketre tune mina fe lo itre xaa nekö i Adamu me Eva, trahmany me jajiny, angatr a itö ixom me hnahon la itre nekönatr. Ene pe mana trootro pi la etrun la itre atren la ihnadro. Tro sa ce wang la pengön la itre xaa atr ne la hneijine cili.

Genese 4:2-26; 1 Ioane 3:11, 12; Ioane 11:25.



Itre Hnying

  • Nemene la itre huliwa hna kuca hnei Kaina me Abela?
  • Nemene la itre ahnahna hna traqa fë koi Iehova hnei Kaina me Abela?
  • Pine nemen matre hna kapa madrin hnei Iehova la huuje i Abela, nge nemene kepin matre thipetrije ju pë hë la huuje i Kaina?
  • Nemene la pengö i Kaina, nge tune kaa la aqane thele Iehova troa haji angeic?
  • Nemene la hnei Kaina hna kuca ngöne lo angeice caasi pe hi memine la jini angeic ngöne la hlapa?
  • Qaja jë la ewekë ka traqa koi Kaina thupene la hnei angeic hna humuthe la trejine me angeic.

Itre xaa hnying

  • E jë la Genese 4:2-26.

    Tune kaa la aqane qaja Iehova la mekune ka ngazo ka eje thei Kaina? (Gen. 4:7)

    Tune kaa la aqane amamane Kaina la mekune ka eje e kuhu hni angeic? (Gen. 4:9)

    Nemene la mekuna i Iehova göne la itre atr ka anenine la madra ne la ketre atr ka pëkö ngazo hna kuca? (Gen. 4:10; Is. 26:21)

  • E jë la 1 Ioane 3:11, 12.

    Pine nemen matre kola kökötre atraqatre trootro la elëhni i Kaina, nge kolo lai a hmekë së enehila troa u? (Gen. 4:4, 5; Ite edomë 14:30; 28:22)

    Tune kaa la aqane amamane hnei Tusi Hmitrötr laka ngacama kola icilekeu asë la itre atrene la hnepe lapa koi Iehova, ngo atreine hi tro sa cile catr ngöne la lapaun? (Sal. 27:10; Mat. 10:21, 22)

  • E jë la Ioane 11:25.

    Nemene la ewekë ka xecie hnyawa hnei Iehova hna qaja göne la itre atr asë ka meci pine la thiina ka meköt? (Ioane 5:24)