1. Drei hmekuje hi la ka atreine qaja la aqane troa hmi koi Akötresie?

NYIMUTRE la itre hmi ka qaja ka hape, ka nyipici la ini hnei angatre hna hamëne göi Akötresie. Ngo tha mama kö, ke ka isazikeu la itre ini angatr, memine la aqane hmi koi Akötresie. Tro sa atre tune ka la aqane tro sa hmi koi Nyidrë? Iehova hmekuje hi la ka atreine troa qaja koi së.

2. Tro sa atre tune ka la hmi hnei Akötresieti hna kapa?

2 Hnei Iehova hna hamëne la Tusi Hmitrötr matre xatua së troa trotrohnine la nyipi aqane troa hmi koi Nyidrë. Haawe, inine jë la Tusi Hmitrötr, nge tro Iehova a amanathithi epun ke, tru la ihnimi Nyidrëti koi epun.—Isaia 48:17.

3. Nemene la hnei Akötresieti hna ajane tro sa kuca?

3 Önine la itre xa atr, Akötresieti a kapa asë la nöjei hmi. Ngo tha celë kö la hnei Iesu hna ini së. Öni nyidrë: “Tha angat’asë kö angete qeje ni, ka hape, joxue, joxue, ka troa hane lö kowe la baselaia ne hnengödrai; ngo loi la ate kuca la aja i Angakaka e hnengödrai.” Nyipiewekë tro sa atre la aja i Akötresie, me trongëne ej. Hnei Iesu hna aceitunën la itre ka xele ma drei Akötresie me itre ka ihumuth, memine lo itre “ka kuca la ngazo.”—Mataio 7:21-23.

4. Nemene la hnei Iesu hna qaja göne la hmi hnei Akötresieti hna kapa?

4 Hnei Iesu hna hmekëne la itretre drei nyidrë laka, tha ka hmaloi kö troa kuca la aja i Akötresie. Öni nyidrë: “Löjë kowe la qanahage ka ilit; ke atraqate la qanahag, me ishaisha la gojenyi ne tro kowe la hnëjin, nge ala nyimu angete  löth. Ngo ilite la qanahag, me co hi la gojenyi ne tro kowe la mel, nge ala xalaithe hi angete öhne lai.” (Mataio 7:13, 14) Ame la gojenyi ka ilitr tre, ene la hmi hnei Akötresieti hna kapa, nge celë hi ka troa eatrongë së kowe la mel ka tha ase palua kö. Ame la gojenyi ka isaisa tre, ene la hmi hna tha kapa hnei Akötresie nge ka troxomi së kowe la mec. Ngo tha aja i Iehova kö troa meci la ala cas. Celë hi kepine matre Nyidrëti a nue ijine kowe la nöjei atr asë troa atrepengöi Nyidrë.—2 Peteru 3:9.

HMI HNA KAPA HNEI AKÖTRESIE

5. Tro sa wangatrehmekune tune ka la itre ka nyihlue nyipici koi Akötresie?

5 Öni Iesu, ijije hi tro sa wangatrehmekune la itre ka nyihlue nyipici koi Akötresie. Tro sa wangatrehmekune qa ngöne la aqane lapaune i angatr me itre thiina i angatr. Öni nyidrë: “Tro nyipunie a wangate hmekunyi angate ngöne la ite wene i angat.” Öni nyidrëti hmaca jë kö: “Ame la nöjei sinöe ka loi, kola wa loi.” (Mataio 7:16, 17) Tha kolo kö lai a hape, ka pexeje la itre ka nyihlue nyipici koi Akötresie. Ngo angatre pe a thele troa kuca la loi. Tro sa ce wange la aqane troa wangatrehmekunyi angatr.

6, 7. Pine nemene matre hna nyitrepene la nyipi hmi hnene la Tusi Hmitrötr? Nemene la aqane tro sa xötrethenge la tulu i Iesu?

6 Loi e tro sa nyitrepene la hmi së hnene la Tusi Hmitrötr. Tusi Hmitrötr a qaja ka hape: “Qa thene la Ua i Akötesie la hna cinyihan’ asë, nge nyipi ewekë troa inin, me nyine amekötin, me nyine eamo, me nyine ihajine ngöne la thina ka meköt; mate nyipi meköti la ate i Akötesie, mate hnëkëne jë angeice thatraqane la nöjei huliwa ka loi asëjëihë.” (2 Timoteo 3:16, 17) Hnei Paulo aposetolo hna cinyihane kowe la itre Keresiano ka hape: “Celë hi mate tha mano kö huni troa olene koi Akötesie, ke hnei nyipunie hna kapa la wesi ula i Akötesie lo hnei nyipunie hna  denge qa thei hun, tha hnei nyipunie hna kapa kösë tenge ewekë i ate, ngo wesi ula i Akötesie.” (1 Thesalonika 2:13) Hna nyitrepene hmekuje hi la nyipi hmi hnene la Wesi Ula i Akötresie, ene la Tusi Hmitrötr. Tha hna nyitrepene kö hnene la itre mekuna i atr, maine itre qenenöj, maine itre xa ewekë pena.

7 Tusi Hmitrötr la ka nyitrepene la nöjei ini hnei Iesu hna hamën. (E jë la Ioane 17:17.) Hnei Iesu palahi hna amexeje la Itre Hna Cinyihan. (Mataio 4:4, 7, 10) Hnene la itre ka nyihlue nyipici koi Akötresie hna xötrethenge la tulu i Iesu. Ame la itre ini hnei angatre hna hamën, tre, hna nyitrepen asë hi hnene la Tusi Hmitrötr.

8. Ame koi Iesu, drei hmekuje hi la hne së hna troa hmi kow?

8 Loi e tro sa thili hmekuje hi koi Iehova. Hna qaja ngöne Salamo 83:18 ka hape: “Nge tro nöjei ate a ate laka cilieti la Kasisitia hmekuje hune la fene hnengödrai asëjëihë, nge Iehova la atesiwa i cilie.” Aja i Iesu tro la itre atr a atre hnyawa la pengöi Akötresie. Hnei nyidrëti fe hna amamane la ëje i Akötresie. (E jë la Ioane 17:6.) Öni Iesu: “Tro eö a thili koi Joxu, Akötesi ’ö, me nyi hlue i anganyidëti hmekuje hi.” (Mataio 4:10) Tro la itre hlue i Akötresie a xötrethenge la tulu i Iesu. Angatre hmekuje hi a thili koi Iehova. Angatr a qaja la ëje i Nyidrë me amamane koi itre xan. Angatre fe a qejepengöne la hnei Akötresieti hna troa kuca elanyi koi së itre atr.

9, 10. Nemene la aqane tro sa amamane laka, easa hnime la itre xan?

9 Tro sa hetrenyi la nyipi ihnim koi itre xan. Hnei Iesu hna inine la itretre drei nyidrë troa ihnimikeu. (E jë la Ioane 13:35.) Ngacama isa nöje së kö, me isa aqane ini së kö, maine pena trenamo ju hë së maine pë ewekë, ngo tro sa ihnimikeu. Tro la ihnimi trejin a acasi së. (Kolose 3:14) Celë hi kepine matre tha easë kö a hane isi me ihumuth. Tusi  Hmitrötr a qaja ka hape: “Mamapi la ite nekö i Akötesie, me ite nekö i diabolo ngöne laka tha qa thei Akötesieti kö la ate tha kuca kö la thina ka meköt, memine la ate tha hnime kö la tejine me angeic.” Hna qaja fe ka hape: “Tha tro kö a tui Kaina lo qa ngöne la ka ngazo, ate humuthe la jini angeic.”—1 Ioane 3:10-12; 4:20, 21.

10 Easa xome la traeme së me trenge catre së, me itre hne së hna hetreny, troa ithuecatrekeu me itö ixatua. (Heberu 10:24, 25) Easa “kuca la loi kowe la nöjei ate asëjëihë.”—Galatia 6:10.

11. Pine nemene matre loi e tro sa drengethenge Iesu hmekuje hi?

11 Tro sa drengethenge Iesu ke hna jëne nyidrë matre mele pi së. Önine la Tusi Hmitrötr: “Nge pëkö iamele thei kete, ke pëkö kete ëjene e celë fene hnengödrai hna hamëne kowe la ate, ka ateine troa amele shë.” (Ite Huliwa 4:12) Hne së hna wange ngöne lo Mekene 5 laka, hnei Iehova hna upi Iesu kowe la fen, troa huujëne la mele i nyidrë nyine thupene mel kowe la itre atr ka drengethenge. (Mataio 20:28) Hnei Iehova hna acili Iesu troa Mus kowe la fen. Celë hi kepine matre Tusi Hmitrötr a qaja ka hape, maine aja së troa mel epine palua, ke nyipiewekë tro sa drengethenge Iesu.—E jë la Ioane 3:36.

12. Pine nemene matre tha easë kö a hane lö hnine la kuci politik?

12 Tha tro kö sa hane kuci politik. Tha hane fe kö Iesu kuci politik. Ame la kola ameköti nyidrë hnei Pilato joxu ne Roma, öni nyidrë: “Tha qa kö la fene la baselaiang.” (E jë la Ioane 18:36.) Tui Iesu, easë fe a mele nyipici kowe la Baselaia i Akötresie e koho hnengödrai. Celë hi kepine matre, ngacama isa götrane ju hë hne së hna mele ngön, ngo tha easë kö a hane lö hnine la kuci politik. Ngo Tusi Hmitrötre pe a upi së troa drengethenge “la itre musi atraqatr,” kolo lai a hape, itre musi ne fen. (Roma 13:1) Easa drengethenge la itre wathebo ne la itre nöje hne së hna  mele ngön. Ngo e icilekeu jë la ketre wathebo ne fen memine la wathebo i Akötresie, ke tro sa tui ange aposetolo. Öni angatr: “Ijiji huni troa denge thenge Akötesie hune la at.”—Ite Huliwa 5:29; Mareko 12:17.

13. Nemene la hne së hna cainöjëne göne la Baselaia i Akötresie?

13 Xecie koi së laka, Baselaia i Akötresieti hmekuje hi la nyine la itre jole ne la fen. Hnei Iesu hna qaja ka hape, troa cainöjëne “la maca ka loi celë ne la baselaia” e cailo fen asë. (E jë la Mataio 24:14.) Pëkö musi ne fen ka atreine troa kuca tune la Baselaia i Akötresie. (Salamo 146:3) Hnei Iesu hna ini së troa thith göne la Baselaia, me hape: “Epi traqa pi la Baselaia i Cilie. Epi tro fe a eje la aja i Cilie e celë fen tune e koho hnengödrai.” (Mataio 6:10, MN) Tusi Hmitrötr a qaja ka hape, tro la Baselaia i Akötresieti a apatrene la nöjei musi ne fen, “nge tro ej’ a cile hut’ epine palua.”—Daniela 2:44.

14. Drei hmekuje hi la ka melëne la hmi hna kapa hnei Akötresie?

14 Haawe, isa hnyinge jë së ka hape: ‘Drei la ka xome la itre ini qa hnine la Tusi Hmitrötr matre nyitrepene la mele i angatr? Drei la ka qaja amamane la ëje i Akötresie koi itre xan? Drei la hmi laka, ka ihnimikeu la itre atren? Drei la ka lapaune ka hape, hnei Akötresieti hna upi Iesu kowe la fen matre amele së? Drei la itre ka tha hane kö kuci politik? Drei la ka cainöjëne ka hape, Baselaia i Akötresieti hmekuje hi la nyine la itre jole e celë fen?’ Itretre Anyipici Iehova hmekuje hi.—Isaia 43:10-12.

NEMENE LA NYINE TRO EPUNI A KUCA?

15. Nemene la nyine tro sa kuca matre tro Akötresieti a kapa la hmi së?

15 Tha ene hmekuje kö la troa lapaune laka, hetre Akötresie. Atre fe hi la itre dremoni laka, hetre Akötresie, ngo xele angatre ma drengethenge Nyidrë. (Iakobo 2:19) Tro Akötresieti a kapa la hmi së, e hne së hna trongëne la aja i Nyidrë.

16. Pine nemene matre nyipiewekë tro sa nuetrije la hmi ka thoi?

 16 Tro Akötresieti a kepe së, e hne së hna nuetrije la hmi ka thoi. Hnei Isaia perofeta hna cinyihane ka hape: “Tropi qa hnin’ej; wiëpi nyipunie.” (Isaia 52:11; 2 Korinito 6:17) Celë hi matre loi e tro sa thipetrije la itre hna majemine kuca, nge ka ce tro memine la hmi ka thoi.

17, 18. Nemene la “Babulona Atraqatr,” nge pine nemene matre nyipiewekë troa canga kötrene la hmi ka thoi?

17 Nemene la aliene la hmi ka thoi? Kola qaja la nöjei hmi asë ka inine la itre atr troa hmi koi Akötresie, ngo ka isazikeu pe memine la Wesi Ula i Nyidrë. Tusi Hmitrötr a hëne la itre hmi ka thoi ka hape, “Babulona Atraqat.” (Hna Amamane 17:5) Pine nemen? Pine laka, thupene lo Iwë Atraqatr, hna fetra e cili ngöne la traon e Babulona, la nöjei hmi ka thoi. Hnene la nöjei hmi cili hna haöthe la fen asë. Ame ekö e Babulona ke, hnene la itre atr hna thili kowe la köni haze. Matre ame enehila, nyimutre la itre hmi ka kapa la ini hna hape, Tirinite maine A.I.U. (Akötresie, Iesu, uati hmitrötr) Ngo Tusi Hmitrötr a qaja hnyawa ka hape, caasi hi la nyipi Akötresie, Iehova, nge Iesu la Nekö i Nyidrë. (Ioane 17:3) Hnene fe la angetre Babulona ekö hna lapaune laka, ame la kola meci la atr, ke mele pe kö la u, maine pena troa dreuth ngöne hu eë. Ngo itre trengathoi lai.—Wange ju la Ithuemacany 14, 17 me 18.

18 Hnei Akötresieti hna thingehnaeane laka, easenyi hë matre lepe apatrene pi Nyidrëti la hmi ka thoi. (Hna Amamane 18:8) Trotrohnine kö epuni laka, ijine hi la, troa trotrije la hmi ka thoi? Iehova Akötresieti a hmekë epuni ka hape, canga kötre pi, e ijine petre kö.—Hna Amamane 18:4.

Maine tro epuni a nyihlue i Iehova memine la nöje i Nyidrë, tro hë epuni lai a hane sine la ketre hnepe lapa ka tru

19. Hapeu, tro kö epuni a luelue ngöne la epuni a mekune troa nyihlue i Iehova?

19 Ame la epuni a tro trije la hmi ka thoi matre nyihlue  i Iehova, ke maine jë, tha tro kö la hnepe lapa i epuni a trotrohnin, nge tro angatr a thele troa sewe epun. Ngo the luelue kö, ke atreine hi Iehova xatua epun. Tro hë epuni a hane sine la ketre hnepe lapa ka tru, laka itre milio la etrun e cailo fen, nge itre ka ihnimi nyipici. Ketre, hetre mejiune i epuni fe hë kowe la mel ka tha ase palua kö ngöne la fene ka hnyipixe elany. (Mareko 10:28-30) Nge maine jë ngöne la ketre ijin, tro la itre sinee i epuni ka icilekeu, a hane ini Tusi Hmitrötr.

20. Pine nemene matre, nyipiewekë troa lö hnine la hmi hna kapa hnei Akötresie?

20 Easenyi catre hë matre apatrene pi Akötresieti la ngazo, me acilëne la Baselaia i Nyidrë, matre musi kowe la fen. (2 Peteru 3:9, 13) Ketre ijine ka mingöminge catr! Ame hë e cili, tro la fen asë a thili koi Iehova, thenge la aja i Nyidrë. Haawe, nyipiewekë troa kuca asë la ka ijiji enehila, matre troa lö hnine la hmi hna kapa hnei Akötresie.