1. Ocava orasaun ni naunuku vari ana upe?

Ocava maʼarlauhanat muʼa taʼa-taʼane acitaʼat har orasaun ninaen nim tava karune. (Salmo [Mazmur] 65:2) Mais, Ocava akam orasaun ni naunuku vari. Naceana uni, nami un jen hin jeu kapa-kaparcaʼa, i orasaun akam uhulen masucuale, Ocava akam i orasaun ni vari. (1 Pedro 3:7) Nauvara tarut Israel i maʼarlauhana fai-fain ikaparana fai o, Ocava akam tavar i orasaun ni vari. Aitana ivaʼane, nanip maʼar it kail lafai-fai ia jen hiar nereneceremun helupai akam ivi hai naʼapai ia, Ocava i orasaun ali vari. Tapi, afa orasaun ni naen Ocava apur luku-luku, enia nacun iraun unit afa navare nau jene.Isaías (Yesaya) 1:15; 55:7 lere.

2. Tevaʼan laʼat afita orasaun ni fai?

Orasaun it afi adorasaun i nemana uni, ivihin afa orasaun ne, afa halam Ocava Jeová tafi fai nanucute. (Mateus 4:10; 6:9) Nauvara, afa maʼarlauhanat afa kail cori hinta, afa orasaune afa halam Jesus ine neret Ocava ta afi orasaun ni ali vari. (João 14:6) Ocava Jeová keluhet afa tapa afi orasaunit nemana ukani vari nei-neicaʼa, ali livru ere naen elere.Tarut afa orasaun fai, Ocava eluhet afi har inait afi heceremun ho afi uan mucune malupemaʼun em anucute.Mateus 6:7; Filipe 4:6, 7 lere.

Ocava tafi fai eluhen afi ucutanat afi uan ho afi heceremun naen maʼu vari. (1 Samuel 1:12, 13) Nauvara afi acitaʼat afi har orasaun fait afita taia, cure, mace nauvara afa problema unu aci ali nehenta afa eluhen fai halataʼa.Salmo (Mazmur) 55:22; Mateus 15:36 lere.

3. Tevaʼane hinta kristaun i maʼarlauhana ere ta nitam horupelaʼa?

Maʼarlauhana lafanen afi poron ne akam Ocava fiare, nauvara akam i heluhanat nop-tatun tava fai fiare hinta, nim Ocava  karune akam mafehe. (2 Timóteo 3:1, 4; 2 Pedro 3:3, 13) Ivihin afita afi lanura ere apur horupelaʼa, navar tavar i fiaranat pihete ia, afi hinim piheten pai nauvara afiro afa tavar ihinim pihetem pai.Ebreu 10:24, 25 lere.

Se afa tavarit Ocava eceremu ere apur vari horupelaʼa, afi tolunet afa nim Ocava karune. Afa Testemuña ba Jeová ere apur i reuniaun ere mara, afa tavarit i fiarana pihete ere toto, afiro afi mucu tali eluhe.Roma 1:11, 12 lere.

4. Tevaʼan laʼat afita uhulen nim Ocava karune?

Afa inait Ocava i luku-lukun nae aprende, em rau-raun nereneceremu afita uhulen nim Ocava karune. Afa tava i hiʼa raun, nauvara i promesa nereneceremu. Afa orasaun faim rau-raun nereneceremu, afi tolunet afa Ocava i icatutun ho i navaranam hiravalpai.Josué (Yosua) 1:8; Salmo (Mazmur) 1:1-3 lere.

Se afa Ocava fiare afa uhulen ni varim tava karune. Afa uhulen hin fiaranat hai ane varim lauhpai. Tarut afa em evaʼapai nae, afa uhulen tempu uzan afi fiarana i ara alim rau-raun nereneceremu.Mateus 4:4; Ebreu 11:1, 6 lere.

5. Tevaʼane hinta afa nim Ocava karune ta rau?

Ocava Jeová uhulen tavarit tava eceremu nerecoto. Eluhen inait maʼu tavar i fiarana ho i esperansat laʼan nohorata mara molupai ivi vari puhucoto. (Salmo [Mazmur] 91:1, 2, 7-10) Ocava fai-fainit uhulen afi saúde kaparpai nauvara afi icarau-rauni molupaim afi acitaʼa. Jeová iʼa iraunim afi fanavet afi har lauhen icarau-rau.Salmo (Mazmur) 73:27, 28; Tiago 4:4, 8 lere.