ˈÖ sü ˗kwɛ 2025 Ʒuɛn ˈˈsu ˗bha, Jin-seong Lee ˗yö ˗kaso ˈgü Koodhe di sidö.

Zoova ˗bha ꞊Gbɛkiö ˗nu ˈwo ˗an ˗da ˗kasho ˈgü ˗an ˗bha ˗zoyödhe ˗wɔn ˈgü: ˈˈSɛ ˗dhɛ ˈö ˈdhö waa˗ ˗bha

-A "WƖ -DHƐ

˗Kwɛ 2026 ˈMɛn ˈˈsu ˈgü kö Zoova ˗bha ꞊Gbɛkiö ˗nu ˈwo ˗ʒiö 276 ˗ta ꞊nën ˈwo ˗kaso ˈgü, ˗an ˗bha ˗zoyödhe ˗wɔn ˈgü ˈˈkpɔnŋtaadhɛ ˗todhʋ̈sü ˈgü.

ˈˈKpɔnŋtaamɛn ˗nu ˗bha ˗kɔlokota ˈkpii˗ do ˈö mɛnbhɩɩdhe ˗nu ˗bha ˈwɔn ˗nu ˗faan sü ˗a ˗bha ˈtɔŋ˗ 18 ˗bha ˗naan ˈgü, ˗wa ˗pö: «Mɛn ˈö ˈdhö, ˗potaadhe ˗ya ˗gɔ kö ˗zotakɔ ˈö ˗dhi ˗a ˗dhɛ, ˈwɔn ˈö ꞊yaa˗ kë ˈö˗ zuʋ̈ˈˈ dho za dɔ ɛɛnˈˈ ˈö yö ˈti ˗dho za dɔ ˗a ˗bha, ɛɛnˈˈ ˈzü ˗zlanwo ˈö ˗dhi ˗a ˗dhɛ, ˗yö ö ˗kɔ ˈˈyɛ ˗a ˗bha.» ˈˈKɛɛ ˈˈsɛ ˈbha ˗nu ˈgü, mɛn ˗nu ˗wo ˈtɔŋ˗ ˈö bhë ˗a ˗lögü, ˈö ˈwo Zoova ˗bha ꞊Gbɛkiö ˗nu ˈö wo ˈti ˈwɔn yaa gbɛ˗ kë ˗an ˗da ˗kasho ˈgü, ˈö ˈwo˗ mɛn ˈbha ˗nu ˗wëëdhɛ bho. ˗Wo ˗an ꞊vadhɛ ˗da ˗kasho ˈgü ˗an ˗bha ˗Zlan ˗dhɔkësü ˗wɔn ˈgü. ˗Wo ˗a mɛn ˈbhaa ˗nu ˗da ˗kasho ˈgü ˗an zuʋ̈ˈˈ ˈö yö ˈti ˈˈwɩ ˗kë ˈˈsɔdha ˈka ˗sü ˗bha, ˗a ˗wɔn ˈgü.

Eritre

˗Kwɛ 1994 ˈgü, Eritre ˗mɛn ˗nu ˗bha ˈˈsɛgɔdhiʋ̈mɛn Isaiasö Afuɛki ˗ya ˗pö Zoova ˗bha ꞊Gbɛkiö ˗nu ˈwo bhɔ Eritre bhë ˈwaa Eritre ˈnën ˗nu ˈka ˈzü. ˗Ya ˗pö ˈˈdhʋ̈ ˈyö ˗tɔ ꞊dhɛ Zoova ˗bha ꞊Gbɛkiö ˗nu ˈwo mü wo ˈti ˈˈwɩ˗ ˗bha kö ˗wo wo ˗kɔ ˗da referandɔmö ˈö kë ˈmü ˗kwɛ 1993 ˈgü ˗a ˈgü, ˈgo mü ˈzü ˈwaa ˈˈwɩ˗ ˗bha kö ˗wo kë ˈˈsɔdha ˈka. ˈÖ sü ˈˈtʋ̈ŋ ˈö bhë ˗a ˗bha ˈö yö˗ ˈka ꞊dɛɛ ˗bha, ˈˈsɛgɔdhiʋ̈mɛn ˗nu ˈwo Eritre ˗wo dhoŋ ˗nu, mɛn zii ˗nu, ˗a ˗de ˗ʒian ˈnën ˗nu ˗wëëdhɛ ꞊dede ˗bho ˈö ˈwo pë yaa ꞊dede ˗kë ˗an ˈka, ˈˈkɛɛ ˈkö wo ˈti za dɔ ˗an ˗bha ꞊köŋ. ꞊Dɛɛ Zoova ˗bha ꞊Gbɛkiö ˗nu 64 ˈnën ˈwo ˗kaso ˈgü ˈˈsɛ ˈö bhë ˗a ˈgü. ˈˈKɛɛ ˈwii za dɔ ˗an ˈbha ˗bha.

˗Bhö ü ˗kɔ ꞊nënŋ yö kö Zoova ˗bha ꞊Gbɛkiö ˗nu ˈwo ˗kaso ˈgü ˈˈtʋ̈ŋ yö˗ ˈgü Eritre, ˈü˗ ˈsëëdhɛ ˈˈgan.

Rusi

˗Kwɛ 2017 Avlidhö ˈˈsu ˈgü, zakandhɛ ˈkpii˗ ˈö Rusi ˗yö Zoova ˗bha ꞊Gbɛkiö ˗nu ˗bha yö ˈˈpɛpɛ ꞊kɛɛ˗ ˗kan ˈˈsɛ ˈö bhë ˗a ˈgü ˈyö ˗tɔ ꞊dhɛ ˗wa ˗pö ꞊dhɛ ˗gban ˈˈsɛ ˗gɔ ˗mɛn ˗nu yaa ˗mü ˗an ˈka. ˗Ya ˗kë ˈö ˈwo ˗an ˗bha ˗bhɔkwëëkëgükɔ ˗nu ˈˈdhiʋ̈ta ˈö ˈwo wo ˗kɔ yö ˗an ˗ta, ˈgo mü ˈzü ˈö ˈwo˗ pö ꞊dhɛ ˗an ˗bha ˈsëëdhɛ ˈbha ˗bha ˈyaa ˈdho ʒiö ˈzü Rusi. ˗Dhɛ ˈö ˗kë ˈˈdhʋ̈, ˈˈsɛgɔdhiʋ̈mɛn ˗nu ˗wo ˗ya Zoova ˗bha ꞊Gbɛkiö ˗nu mɛɛnˈˈ ˗sü ˗bha do do ˈö ˈwo˗ pö ꞊dhɛ ˗wo ˗kɔlokota do ˈö bhë ˗a ˈgü. ˈˈSɔdha ˗nu ˗wo ˗da ˗an ˗gɔ ˈkɔɔ, ˈwo dhɛɛˈˈ ˈˈgblʋ̈gblʋ̈ ˗nu kpɔ ˗an ˗gɔ, ˈwo ˗an ˗wëëdhɛbho, ˈö ˈwo ˗an kun. ꞊Dɛɛ Zoova ˗bha ꞊Gbɛkiö ˗nu 163 ˈnën ꞊waa ˗an ˈkun ˈˈsɛ ˈö bhë ˗a ˈgü, ˈö ˈwo yö ˈˈgbɩɩ˗ ˗nu kë ˗ni ˈgü ˈˈsɛ ˗dhɛ.

˗Bhö ü ˗kɔ ꞊nënŋ yö kö Zoova ˗bha ꞊Gbɛkiö ˗nu ˈwo ˗kaso ˈgü ˈˈtʋ̈ŋ yö˗ ˈgü Rusi, ˈü˗ ˈsëëdhɛ ˈˈgan.

Sɛngapu

ˈˈSɛgɔdhiʋ̈mɛn ˗nu ˈwo Sɛngapu ˗wo ˈˈgbɩɩdhɛ ˗wɔ mɛn ˗nu ˗ta kö ˗wo ˗da ˈˈsɔdhadhɛ ˈgü. Mɛn ˈü˗ pö ˈbhaa ˈˈwɩ˗ ˗bha, ˗wo ü ˗da ˗kaso ˈgü. ˈYö ü ꞊mɔɔn˗ ˗bha ˈü ˈˈsu 30 ˗kë mü. Nashiɔn zuni ˗mɛn ˗nu ˗wa ˈdho ˈwɔn ˈö bhë ˗a ˈka zakanmɛn ˗nu ˗kuu ˈˈdhiʋ̈ kö ˗wo ˗dhɛga ˗a ˈgü ˈbhaawo ˗ya ꞊mɔɔn ˗kwɛ ˗kɔŋ ꞊va ˗bha, ˈˈkɛɛ Sɛngapu ˗mɛn ˗nu ˈˈtʋ ˈyaa mü. ˈWaa ˗potaadhe ˈö mɛnbhɩɩdhe ˗nu ˗gɔ ˗a ꞊bhlëë ˗ya. ꞊Dɛɛ Zoova ˗bha ꞊Gbɛkiö wlüünën ˗nu ˗kɔŋ do ö ga do ˈnën ˈwo ˗kaso ˈgü ˈyö ˗tɔ ꞊dhɛ ˈwaa ˈˈwɩ˗ ˗bha gboŋgboŋdhö kö ˗wo kë ˈˈsɔdha ˈka. ˗An kpö ˈgü mɛn ˈˈsoodhu ˗bha ˗kaso ꞊plɛ ˗naan ꞊nën ˈö bhë.

˗Bhö ü ˗kɔ ꞊nënŋ yö kö Zoova ˗bha ꞊Gbɛkiö ˗nu ˈwo ˗kaso ˈgü ˈˈtʋ̈ŋ yö˗ ˈgü Sɛngapu, ˈü˗ ˈsëëdhɛ ˈˈgan.

Kodhe di sidö

˗Kwɛ 2020 Ɔtɔblö ˈˈsu ˈgü, ˈˈsɛgɔdhiʋ̈mɛn ˗nu ˈwo Kodhe di sidö ˗ya ˗pö ꞊dhɛ mɛn ˗nu ˈö ˈwaa˗ ˈˈpiʋ̈ kö ˗wo kë ˈˈsɔdha ˈka, ˗wo ꞊mɔɔn˗ ˗bha ˈwo yö ˈˈwɛɛ nu ˗an ˗dhɛ. ˈˈKɛɛ yö ˈö ˈwo ˗an nu ˗an ˗dhɛ bhë, mɛn ˗nu ˗wa pö ˈwɔn ˗bho mɛn ˈgü ˗yö ˗mü ˈyö ˗tɔ ꞊dhɛ ˈˈsu 36 ꞊nën ˈö˗ ˗kë. ˗Yö ꞊gblɛɛn ˈö ˗ʒiö ˗a ˈka ˈˈsɔdha ˗nu ˗bhaa ta ˗gɛnɲan ˈka ꞊plɛ. ˈKö ˗kë ꞊dhɛ zakandhɛ ˈbha ˗nu ˗wa ˗pö ˗a kë ˈˈdhʋ̈ ˗sü ˈyaa ˗së, Kodhe ˗bha zakandhɛ ˈkpii˗ ˗ya ˗pö ˗kwɛ 2024 ˈgü ꞊dhɛ këwɔn ˗mü. ˗Yö ˈˈgbɩɩ˗, ˈˈkɛɛ pë ˈö Zoova ˗bha ꞊Gbɛkiö ꞊vadhɛ ˈwo wo ˗kɔ ˗yɛ ˗a kë ˗sü ˗bha, ˈyö bhë! ˈˈKɛɛ kwa ꞊dhegblünën ˗nu 15 ˈwaa ˈˈwɩ˗ ˗bha ˗ʒiaanwo kö ˗wo yö ˗dhɛ ˈö bhë ˗a kë. ˗An kpö ˈgü mɛn do ˗yö ˗kaso ˈgü. ˗Wa za dɔ ˗a mɛn ꞊vadhɛ ˗bha kö ˗wo ˗an ˗da ˗kaso ˈgü.

˗Bhö ü ˗kɔ ꞊nënŋ yö kö Zoova ˗bha ꞊Gbɛkiö ˗nu ˈwo ˗kaso ˈgü ˈˈtʋ̈ŋ yö˗ ˈgü Kodhe si sidö, ˈü˗ ˈsëëdhɛ ˈˈgan.

Üklɛnö

˗Ya ꞊mɔɔn ˗kwɛ ˗kɔŋ ˗yaaga ˗bha ꞊dɛɛ, ˈtɔŋ˗ do ˈbhaa ˗ya ˗pö ꞊dhɛ Zoova ˗bha ꞊Gbɛkiö ˗nu ˈwo Üklɛnö ˗wo ꞊mɔɔn˗ ˗bha ˈwo yö ˈˈwɛɛ ˗kë ꞊ya kë ꞊dhɛ ˈwaa˗ ˈˈpiʋ̈ kö ˗wo ˗da ˈˈsɔdhadhɛ ˈgü ˈˈgbɩɩdhɛ ˈka. ˈˈKɛɛ ˗gblü ˈö ˗da ˈˈsɛ ˈö bhë ˗a ˈgü ˗kwɛ 2022 Fevlie 24 ˈka bhë, ˗ya ˗zɔn ꞊dhɛ ˈtɔŋ˗ ˈö bhë ˈˈsɛgɔdhiʋ̈mɛn ˗nu ˈwaa˗ ꞊bhlëë ˗ya. ˗A ˗kë ˈˈdhʋ̈ ˗sü ˗ya ˗kë ˈö ˈwo ˗ya kwa ꞊dhegblü ˗nu ˈˈpiʋ̈ kë ˗sü ˗bha. ˈˈTʋ̈ŋ yö˗ ˈgü Zoova ˗bha ꞊Gbɛkiö ˗kɔŋ do ö ga do ˈnën ˈwo ˗kaso ˈgü ˈmü, ˈyö ˗wa ˗an ˗kɔŋ do ö ga ˗yaaga ˈkun ˈˈkɛɛ ˗wo ꞊tun ꞊köŋ ˈˈkpɛnŋ. ˈˈKwi ˗gɔmɛn ˈˈgblʋ̈gblʋ̈ ˗nu ˗yaaga ˈwo ONU ˗wo wo ˗de dhɛɛˈˈ ˈkpɔ ˗ni ˈgü ꞊ya kë ꞊dhɛ yö ˈö ˈwo˗ ˗ya ˗kë ˈˈsɔdha ˈka ˗sü ˈˈgblʋʋ ˈgü bhë, ˗yö mɛn ˗nu ˗takun.

˗Bhö ü ˗kɔ ꞊nënŋ yö kö Zoova ˗bha ꞊Gbɛkiö ˗nu ˈwo ˗kaso ˈgü ˈˈtʋ̈ŋ yö˗ ˈgü Üklɛnö, ˈü˗ ˈsëëdhɛ ˈˈgan.

«Ka ˗zʋ ˗yö ˗bö ˈmɛ ˈwo ˗kaso ˈgü ˗a ˗nu ˈka, ꞊dhɛ ˈpë ka ꞊në ˈka ˗kaso ˈgü ˗a ˈdhö.»—Eblö 13:3.

Zoova ˗bha ꞊Gbɛkiö ˗nu ˈwo ˗an ˗da ˗kasho ˈgü ˗an ˗bha ˗zoyödhe ˗wɔn ˈgü: ˈˈSɛ ˗dhɛ ˈö ˈdhö waa˗ ˗bha

Ü -kɔ "yɛ ü -wo -bha