Skip to content

secondary menukhah lue

Skip to table of contents

Zahova Ccaeccei Hae

Chin (Zotung)

Pachia Kyate Ynthuapaw Thehoipaw!

 Lesson 3

Thehoipaw hynh Pachia kyate Ynthuapaw Thua tou?

Thehoipaw hynh Pachia kyate Ynthuapaw Thua tou?

1. Baebu Azeisahtu paw tuh a hungmou?

Ccungccaw hynh laephi vaw zungzae hing kho athua cipaw thehoipaw hynh Baebu kya a ung. (Sam 37:29) Baebu ccaw hynh abalyng a uh 66 a cih. Baebu zeitu lang hae zyntyng paw pihse milu 40 hang Pachia nynh lamang hae. Amasaty Baebu uh-pangaw hae kha athangvaepaw kum 3,500 hangkhe Mosi nynh a lah zei. Nyathyakou e Baebu kha athangvaepaw kum 1,900 lae kya khe Zuitu Zan nynh a lah zei. Baebu zeitu hae paw hynh ahung tuanaw lungthing liate mou alahzei hae? Pachia thyamuihsaw liate nynh a lah zei hae. (2 Samuel 23:2) Hynh e liate Baebu zeitu hae paw hynh mimaw lungthing tuanaw te thua leite Pachia lungthing tuanaw kya e nynh a lah zei hae. Tukeiccuze azeisahtu pawtuh Pachia nynh thua.2 Timote 3:16; 2 Piter 1:20, 21 haekha ria tua.

2. Baebu hynh Pachia kyate ynthuapaw cite pawcce hokho a thua?

Pawcce aho kho oh cizetuh malang yn cihkuh langpaw kong hynh sahsi mahme ala hoty kho keiccuze nynh thua. Hung ccungccaw nynhmah hoty kho lang khyh. (Joshua 23:14) Athung naw athang kho leipaw Pachia rou nynh malang e kong aho ty kho.Isaiah 42:9; 46:10 kha ria tua.

Pachia kyate ynthuapaw ccah-uh athua zetuh a lae naw a ung cih, lae mah a lae hah he. Baebu tuh bahphuin patae te a-uh riatae leite atho vae hae. Baebu hynh myarya ryngvae salazema thyahawnaw (science) te phe alo kuh. Apiaze, Baebu zeitu hae hynh milu 40 hang laci hae zema ccangkheih sangmah arawseku naw ung khyh. Baebu kya Pachia tuh sungsakunaw ahoy cipaw kong azeiku keiccuze atunin ccyh kyacia ccungccaw hae hingnaw ozia kha pei a rulae kho ung. E liate ccungccaw patae hae nynh Baebu tuh Pachia bya cite azyng kho naw haepaw a thua.1 Thesalon 2:13 kha ria tua.

 3. Baebu kya paw kong mou a ung?

Baebu nynh abahpi lang aho paw tuh ccungccaw hae hanglang Pachia nynh malang ynraepya langpaw kong nynh a thua. Myarya puithyapaw laephi kya hingnaw kha pawte nynh phe alasung oh cipaw te, e laephi hynh myarya a puithyapaw paradise khokhu lang bua yntangthui cih cipaw kong kha abahpi te ala ho.Byaphy 21:4, 5 kha ria tua.

Baebu kya hynh kawbya, uhpadi haete tuanaw pyapaw kong mah apya kuh. Pachia tuh amaw minphuin haete pawcihte mou avaeccawku hae cipaw khamah apya kuh. E liate Pachia tuh paw tahaw paw Pachia cipaw ynny sa. Tukeiccuze Pachia kong nykho nawlang Baebu nynh ae bung kho. Pachia vaeccaw thua kho nawlang pawmah ae ccaesah pah cih.Sam 19:7, 11; James 2:23, 4:8 haekha ria tua.

4. Baebu bya thaethya nawlang pawnynh mou ynbungcih?

E ccah-uh nynh Baebu bya thaethya nawlang ae bung cih. E cca-uh nynh Zisu a lamangpaw phuin hawkhate nynh a mangbua. Zisu nynh Baebu kawkheih aho takyhte “ccahthya suilang” kha a ccaesah pya hae.Luka 24:27, 45 kha ria tua.

Pachia kyate ynthuapaw thehoipaw tuh a ccangpaw thehoipaw laeze ahoi hua.Thuasalama ccungccaw abang tuh ngaerykhyh hae. Mithing langte pohria pahleih hae. Miming keiccuze nalung thangnang sah. Zungzae hingnaw na ngaehoinaw te Pachia kong lang nany pawkhah nynh abahpi hua.Johan 17:3 kha ria tua.