Skip to content

Skip to table of contents

 Lesson 13

Beihnaw hae Takua hynh Aromawze Pawlangmou Tang Cih Hae?

Beihnaw hae Takua hynh Aromawze Pawlangmou Tang Cih Hae?

1. Beihnaw miakaw pung mehae tou?

Beihnaw takyh kya miding patae ung hae. Mihming kha Pachia nynh muih haeza pe aki hae cipaw tuh thehoipaw nynh thua. Ngaethya langpaw ccangkheih tuh beihnaw phung kya mang ung haezema hoileinaw cci nynh arae hae. (2 Korin 4:3, 4; 11:13-15) Beihnaw abang tuh ziaku buakunaw, chiaku baekunaw, rawtuhkunaw, imua hae tungvaw hoileinaw arae hae cipaw a thae oh. Pachia azyn ccahccing paw ccungccaw tuh ou e a muihvaeze a thinglung myarya a ccih.Matthai 24:3-5, 11, 12 kha ria tua.

Ame paw beihnaw nynh Pachia kha khing ungsahza, amelei paw beihnaw nynh tuh Pachia kha the athya sa. Amelei paw beihnaw hae nynh Baebu kya ungleipaw zynnaw kha leih ccang pya hae. E lungkhuze Pachia kong te achih hae paw kong, athualeipaw accahkaepaw cci nynh leih ccangpya hae. Pachia nynh tuh amaw te asekupaw ame paw kong kha ynny sah ry.Phunghotu 9:5, 10; 1 Timote 2:3-5 haekha ria tua.

2. Beihnaw hae takua hynh aromaw pawlangmou tang cih hae?

Pachia kasungsah cihza hawkheihlang te Setan rynaw arae paw beihnaw hae takua nynh Pachia kha ling kho vaelang khyh hae. (James 4:4) Baebu kyaze beihnaw melei hae paw hynh “Babilon Khohlapi” te atou se. Babilon Khohlapi hynh langmaw khohryngpaw thuaza, Noah tuipayng kou te nynh beihnaw melei paw hae hynh ynlangku hae. Ccungccaw a ling a phepaw beihnaw hae hynh aromawze tualei roihlei pite Pachia nynh ynroh vae cih hae.Byaphy 17:1, 2, 5, 16, 17; 18:8 kha ria tua.

Tukoute thehoipaw vaeleih bua a ung ung. Laephi pi beihnaw melei paw kya a ung hae paw miding hae kha Pachia nynh ningkhyh hae. Miming kha phungding ccangpah haeza a kuisung hae.Mikah 4:2, 5 kha ria tua.

Ame paw beihnaw nynh ccungccaw lung anging sah

 3. Miding ccungccaw nynh pawmou cilang a ccang?

Phungding kha nyhza hoinaw rya alahry paw ccungccaw kha Pachia nynh pe aki. Amelei paw beihnaw kyate toikulang atuh-ou hae. Pachia a sungsahpaw ccungccaw nynh tuh ozia rulae kulang apahccyng kuh hae.Byaphy 18:4 kha ria tua.

Seekheih naw kya e miding hae tuh zuitu hae kya te thehoipaw bya he athae hae tuh milung myarya zuaza, Pachia rynaw ozia thawpaw kha a ccangku hae. Hynhcih hynhte mihingnaw tuh asuilang ungpaw ngaehoinaw hoihaeza lungpawnaw amue hae. Miming nynh thehoipaw bya kha thaehaeza Pachia rynaw kha ccangkheih naw lang anunghae paw hynh aening dosuinku langpaw nynh thua.1 Thesalon 1:8, 9; 2:13 kha ria tua.

Zahova Pachia nynh amelei paw beihnaw kyate yntoikuh hae paw kha a innbyng lang atang sah hae. Pachia cciaduenaw pawkha leh na khang zetuh Pachia vaeccaw lang tangnaw kaw, sungsakunaw hoy hae paw innbyng lang tangnaw kaw te zungzae hingnaw kha solei na mue cih.Marka 10:29, 30; 2 Korin 6:17, 18 haekha ria tua.

4. Laephi pyngpi e ccungccaw balyng milung marya pawlang pawcihte mou ynrae pah cih?

Amelei paw beihnaw balyng hynh aromawze Pachia nynh ynroh vae cih cipaw tuh thehoipaw nynh thua. Ccungccaw hynh ruunaw kyate luelang vae. Amelei paw beihnaw nynh lingku phekunaw, lung phiakunaw rae kho vaelang khyh hae. Ccungccaw miakaw nynh ame paw Pachia lukheih kele kha nynh lungngingte beihlang vae.Byaphy 18:20, 21; 21:3, 4 kha ria tua.