Skip to content

secondary menukhah lue

Skip to table of contents

Zahova Ccaeccei Hae

Chin (Zotung)

Pachia Kyate Ynthuapaw Thehoipaw!

 Lesson 15

Baebu Hynh Pawccemou Pei Ccangku A Ho?

Baebu Hynh Pawccemou Pei Ccangku A Ho?

1. Baebu ccangku paw nynh paw thanenaw mou ynpya?

Baebu kong ccangkute tuapaw roihpaw tuh Pachia a sungsahnaw ohkha houh yntyn sah. Tuh e sungsahnaw tuh le sahthung a ho. (1 Piter 2:2) Zungzae hingnaw ka ngaehoi cipaw tuh Baebu kha ccangkuhza, Pachia te houh sahngangku kho naw lang karae karae khyh cipaw nynh thua.Johan 17:3; Jude 21 haekha ria tua.

Pachia te asekuhpaw hawnaw kha ynlung chih vaeze tuh a zynnaw kha mah houh yntyng chih vae cih. Na zynnaw nynh Pachia lungry tunglang solei aebung cih. (Hebru 11:1, 6) Apiaze ngaesikute aziazae kha mah ynrulae sahkuh vae cih.Locceihtu 3:19 kha ria tua.

Zahova Pachia te houh na vae ccawkuh kho

2. Pachia kong nanynaw nynh ming hae hanglang so thanenaw ung tou?

Nanypaw akong lang hae kha mingccangpaw haemah na hopah kheihry maming cih hae. Baebu ccangku la liate Pachia kong azynnaw thehoipaw bya kha mingccangpaw hae hopya thyanaw te Baebu hynh pawtemou mang lang cipaw khamah solei naenyh vae cih.Rom 10:13-15 kha ria tua.

Ccungccaw alunghua tuh puite zia, mihry vaeccaw hae kyakhe, thehoipaw bya kha kou aho pyaty hae. Hothya aho. Nae zynnaw me khyh cite ccaelei haete Pachia bakingnaw palia kha hopa hae. Tuhpiaze na hopaw na bya laeze na ungtuzia kha nynh ccungccaw hae nynh adohua hae cipaw kha ning nang.2 Timote 2:24, 25 kha ria tua.

3. Paw hythuanaw mou na mue cih?

Baebu na ccangkunaw liate Pachia te sahngangkunaw houh houh nae mue cih. Nyalang tuh Pachia te houh kyngkunaw nae hoi cihza, Pachia Innbyng lang te Pachia uccawlang nae tang vae cih.2 Korin 6:18 kha ria tua.

 4. Nang pawtemou houh na kaethung kho cih?

Baebu pei na ccangkunaw liate na kaethung kho. (Hebru 5:13, 14) Baebu Ccangpya Ccahccing Pawtuh Pawmou? ccah-uh te Baebu ccangku lang Zahova Ccaeccei hae lukhahkheih na ngia kho. Baebu bya houh na ny liate na lung houh ynpaw hua vae cih.Sam 1:1-3, 73:27, 28 kha ria tua.

Thehoipaw tuh lungtuapaw Pachia kyate nynh yn thua. Pachia abeih hae paw ccungccaw haete sahngangkunaw liate amaw te mah houh sahngangku lang vae. (Hebru 10:24, 25) Pachia lungry tunglang pei nazuakuze tuh zungzae hingnaw solei nae mue cih. Pachia te sahngangku lang zuakupaw tuh ryalaw lungkhuze ahoihua paw ryalaw nynh thua.1 Timote 1:11; 6:19 kha ria tua.