Ccungccaw uhnaw nynh piahccanaa phishingkho khyh cipaw ariaccaw cite phezaw lang ccyh a pya

1. Hoileinaw hynh pawcihtemou yntho?

Setan he ynhyng takaw ninte laevaw hoileinaw yntho takaw bia vae. Setan hynh atakaw lyatuh accingpaw thuasalazema ‘ame paw phungkya latyng khyh.’ (Johan 8:44) Pachia kelerou nynh muelang accangpaw beihnaw kha mue myarya ary. Te tuh Evua kha Pachia bya ngaeleite kamaw bya ngaesah cite ala phe. Adam ma Evua kalang pangza Pachia byakha langae vae khyh. Adam bapae kunaw keiccuze ryachi vawsawnaw te chiinaw kha yntho vae.Genesis 3:1-6, 19 kha ria tua.

Pachia bya ngae nangsah cite Setan nynh Evua atuh ou pawkha thangccang tuh Pachia uh naw ccoza rawse paw nynh a thua. Ccungccaw a lung hua nynhma Setan kalang pang haeza Pachia tuh ynuhtupaw cite lehkhang vaekhyh hae. Hynhcih te nynh Setan tuh “laephi uhtupaw” lang latang vae.Johan 14:30; 1 Johan 5:19 haekha ria tua.

2. Raehaepaw hynh raeseipaw ung tou?

Pachia nynh araepaw uccaw hae hynh araeseipaw ccangkheih sang ung khyh. Pachia nynh araepaw lae ccungccaw te vaw ccungccaw nynh amaw byakha phe ccinglang ngaekho a thua. (Deuteronomi 32:4, 5) Ahoipaw ryate athahpaw rya lawlang paw hynh rythathyh pokuh haesah cite ynla raedepaw nynh ala thua. Tuh e liate Pachia kasungsah cinawpaw kha langsahkhonaw kaw amue oh.James 1:13-15; 1 Johan 5:3 haekha ria tua.

3. Pachia nynh ryachiccinaw hynh pawcce atu cia ungnaw kaw a pya?

Pachia nynh a uhnaw ccoza arawse haepaw palou detah leite atucia a ungsahpaw hynh pawkeiccu mou? Pachia paleipaw uhkunaw hae hynh ccungkia khyh cipaw ynny sahry keiccu. (Phunghotu 7:29; 8:9) Tu e tuh ame ccahccing  cipaw kha kum 6,000 lungkhu ccungccaw uhkunaw hae nynh accae sah. Ccungccaw ccoza nynh tuh doukunaw, chiaku baekunaw, dingleinaw te cciihawnaw hae balyng hynh ynro pahkho khyh hae.Jeremiah 10:23; 2 Piter 3:7-9 haekha ria tua.

Pachia uhnaw lehkhangpaw ccungccaw tuh hoyrungnaw amue cih hae. (Isaiah 48:17, 18) Aromaw ccungccaw uhnaw miakaw ynroh vae cih. Pachia uhnaw lehkhang paw ccungccaw rounynh e laevaw lang khua asah vae cih hae.Isaiah 11:8-12; Phungtangbya 27:11 haekha ria tua.

Pachia tuh yn uhtupaw Bawi cite kary khyh kary cipaw apokunaw nynh alang sa

4. Pachia lungsaenaw liate paw ryalawnaw kaw mou amue oh?

Ccungccaw hae nynh Pachia abeih haepaw tuh hoinaw mueryhae za tenynh abeih hae cite Setan nynh yn ci. E kahyng kaleipaw bya hynh mekhyh cite nalang sahkho cih tou? Langsah kho a thua. Pachia lungsaenaw keiccuze Pachia uhnaw te ccungccaw uhnaw hynh ry poku kho a thua. A ungtu ziazae nynh ah poku pawkhah alang sa.Job 1:8-12; Phungtangbya 27:11 haekha ria tua.

5. Pachia tuh yn uhtupaw cite pawtemou langsah kholang?

Baebu kya e beihnaw ame paw ccungte ame paw beihnaw kya ungbuanaw liate poku kho a thua. (Johan 4:23) Zisu hawte nainganzi kya doukunaw kya a ungbua khyhnaw lia ohte Setan uhnaw tuh kary khyh cipaw alang sah oh.Johan 17:14 kha ria tua.

Setan nynh acikhonaw huhang mangte ahoi leipaw ziazae raelang thaw ynpya. Ziazae hoileipaw sungkunaw liate puiziate bangrui hae nynh ynsahrya cih haeza ynrawse cih hae. (1 Piter 4:3, 4) Tetuh ah pokuh vae cih oh. Pachia asungsah haepaw te mungku langza, Pachia hawnaw te sungsahnaw kawbya zuilang ah poku ohze tuh vawsawnaw atung ohzema Setan nynh hunghungmah Pachia hohawte zuikho khyh hae yncipaw byakha mekhyh cipaw alang sah ohpaw nynh thua.1 Korin 6:9, 10; 15:33 kha ria tua.

Pachia nynh accungccaw hae eih ynsungsah keiccuze hoilei nawte ryachiccinaw balyng hynh kaeropah cih oh cite aa mah ynkhang pya ku. Pachia bakingnaw hynh kazyn cite alang sah paw ccungccaw tuh e laevaw zungzae hingnaw a mue cih.Johan 3:16 kha ria tua.