Skip to content

secondary menukhah lue

Skip to table of contents

Zahova Ccaeccei Hae

Chin (Zotung)

Pachia Kyate Ynthuapaw Thehoipaw!

 Lesson 5

Laephi hynh Pachia nynh Paw Eenaw Temou A rae?

Laephi hynh Pachia nynh Paw Eenaw Temou A rae?

1. Laephi hynh Pachia nynh pawcce a rae?

Pachia nynh laephi tuh ccungccaw ungnawlang nynh a rae. A rae ty haepaw zuhvaw hae Adam te Evua kha vawlang khua ungkhylang a rae haepaw thua khyh. Vawlang tuh vaw ccungccaw hae pahtae a rae vae hae. (Job 38:4, 7) Tukeiccuze piseihpaw Adam kha myarya puithyapaw Edin khokhu kyakhe a ung sa. (Genesis 2:15-17) Adam te a ci-hang hae balyng kha E laephi vaw athang kho leipaw hingnaw te hoisa kho naw kaw a pya hae.Sam 37:29; 115:16 kha ria tua.

Atakaw lya tuh Edin khokhu kya rou nynh ala hoi. Zuhvaw luning hae nynh ccaw patae sahte laephi pyngpi pungbiate apuithyapaw laephi paradise lang tangsah lang kaw apya hae. (Genesis 1:28) Laephi hynh mahzi ro leite ccungccaw nynh zungzae ungnaw langpaw nynh ala thua.Sam 104:5 kha ria tua.

2. Laephi hynh Paradise khokhu lang pawcce atangkhyh?

Adam te Evua nynh Pachia bya kha angae khyh hae keiccuze Paradise khokhu kyate phe lade hae. Tetu Paradise khokhu kha kharouh ala zo vae. Atakawlya e hawkhate a hung ccungccaw nynhmah a rae kho paw ungvae khyh. Tuh e kyate thoza laevaw ccungccah hoileipaw takyh takyh ynpungthung vae.Genesis 3:23, 24 kha ria tua.

Zahova Pachia nynh atakaw lya e a ee naw kha aroh vae cih tou? Rohlang khyh. Aci kho nawkha athang kho leipaw athua keiccuze aci kho leipaw pawpawmah ung khyh. (Isaiah 45:18) Atakawlya e hawkhate bua yn rae pathui cih.Sam 37:11, 34 kha ria tua.

3. Paradise khokhu lang pawcihtemou bua yn tang cih?

Pachia nynh laephi Siapharang lang akhangpaw Zisu ccozah yn thua tuh ynrulaekuh vae cih. Armageddon rawtuhkunaw  kyatuh Zisu nynh avaw ccungccaw hae ryte Pachia raw miakaw pung yn roh vae cih. Setan kha kum 1,000 thung yn sah vae cih. Pachia abeihpaw ccungccaw tuh alue cihza laephi vaw zungzae hingnaw amue vae cih.Byaphy 20:1-3; 21:3, 4 kha ria tua.

4. Riathae vawsawnaw hynh hotuhmou yn zo cih?

Riathae vawsawnaw hynh hohtuhmou yn ro pah cih? Athangnaw ccyh ynthuavaecih cipaw ny kho nawlang Zisu nynh ‘syngtawnaw’ yn ho pya. Laephi ccungccaw hoikhyhnaw hynh pazae sawbialang zetuh ccungccaw ci-hang phe zo cih. Laephi ungtuzia hoikhyhnaw nynh “Seethangnaw” ccyh kya nynh a ung vae oh cipaw alang sa.Matthai 24:3, 7-14, 21, 22 kha ria tua.

Zisu vawlang te laephi kum 1,000 uhnaw kyatuh riathae vawsawnaw miakaw pung yn ro pah vae cih. (Isaiah 9:6, 7; 11:9) Siapharang rya Rangpibawi rya lawte Pachia a sungsah haepaw misei nawkha pung avua pah vae cih hae. Hynhcihte Pachia nynh Zisu liate cciinaw, tawnaw, chiinaw balyng pung yn ro pah vae cih.Isaiah 25:8; 33:24 kha ria tua.

5. Laephi Paradise kya a hunghaemou a ung cih hae?

Pachia kha sungsah zah arynaw hawte unglang a ccangkuh haepaw kha mih Beihnaw Inn kya nynh muihlang hae

Pachia bya a ngae haepaw nynh a ung cih hae. (1 Johan 2:17) Zakaw a sangsahkuh paw ccungccaw kha ccungza Pachia rynaw ccangpyalang azuitu haekha Zisu nynh a saw hae. Atunin e ccungccaw riataelei haetuh Laephi thawpaw kya unglang Pachia nynh apaccyng pya hae. (Zefaniah 2:3) Vawpa hoipaw, Paw hoipaw thua kho nawlang te Zuh hoipaw Nung hoipaw thuakho nawlang kha Zahova Ccaeccei hae mih Beihnaw inn kya a ccangkuh hae. Ccawry nungpawry Pachia beihkheih haeza Baebu kya e hawnaw te hoinaw mue kho nawlang a ccangkuh hae.Mikah 4:1-4 kha ria tua.