Skip to content

secondary menukhah lue

Skip to table of contents

Zahova Ccaeccei Hae

Chin (Zotung)

Pachia Kyate Ynthuapaw Thehoipaw!

 Lesson 2

Pachia Tuh A Hungmou?

Pachia Tuh A Hungmou?

1. Pachia hynh pawcce beih lang a ccang?

Ame paw Pachia tuh a tyng a re raetu nynh thua. Athonaw athangnaw cite ung khyh. (Sam 90:2) Baebu kya e thehoipaw tuh Pachia kyate nynh yn thua. (1 Timote 1:11) Pachia liate hingnaw a mue oh keiccuze amaw rou nynh beih lang a ccang.Byaphy 4:11 kha ria tua.

2. Pachia tuh paw cihhaw paw pyng mou?

Pachia tuh mih te muih kho thua khyh. Pawccecize ccungccaw laeze a hang hua paw muihsaw pyng athua kei ccu. (Johan 1:18; 4:24) Arae haepaw uccaw hae muih naw liate Pachia ozia ny kho a thua. Thingthae a phuinphuin, haetapaw a phuinphuin hae hynh dolangze Pachia tuh sungsahkunaw te hawnaw a hoy paw cipaw ny kho a thua. Myarya kopaw vawlaepi dolang zema Pachia tuh a thungpaw cipaw ny kho a thua.Rom 1:20 kha ria tua.

Baebu ccaw ria naw liate Pachia ozia houh ny kho a thua. Pachia nynh ary paw te ary lei paw, ccungccaw hae te a vaeccawku naw hae, a liaru naw hae kong kha mah Baebu nynh yn ho pya.Sam 103:7-10 kha ria tua.

3. Pachia hynh min hoy tou?

‘Vawlang khua ung paw keening Paw, na min sawtuanaw ung sah’ cite Zisu nynh a ci. (Matthai 6:9) Pachia tuh Bueh a phuinphuin a hoy zema a min tuh ccangkheih rou nynh a hoy. Amaw min tuh bya takyhte konaw a lae. Baebu kyatuh ‘Zahova’ acih kuh.Jeremiah 33:2 kha ria tua.

Baebu leihtu hae takua nynh Pachia min kha vua haeza Bawipaw (or) Pachia cite azei ru hae. Thuasalama atakaw e Baebu kya tuh Pachia min a vae 7,000 hang a zei kuh.  Pachia kong kha Zisu nynh a ccangpya haeze Pachia a min kha aho pya bia hae.Johan 17:26 kha ria tua.

Sungsahkunaw hoipaw Paw hawte Pachia nynh hynh sepi hoinaw e lang rya yn law pya

4. Aening kha Zahova nynh pe ynki tou?

Riathae vawsawnaw a phuinphuin a tung oh paw hynh Pachia nynh pe ynki khyh keiccuze tou? Riathae vawsawnaw a tung oh paw hynh Pachia nynh yn syntaw naw paw cite ccungccaw abang nynh leih ci hae. Tuh e tuh me khyh.James 1:13 kha ria tua.

Pachia nynh ccungccaw hynh ry thathyh poku naw kaw yn pya. Poku naw kaw yn pya keiccuze a maw tungvaw lungtua lang a ccang. (Joshua 24:15) Thuasalama ccungccaw a lunghua tuh hoileinaw raelang apoku hae keiccuze vawsaw riathaenaw hynh houh houh a lung nawpaw a thua. Hoileinaw hynh Pachia nynh amuihze a ngae myarya a thah.Genesis 6:5, 6 kha ria tua.

Zahova tuh pe ynki paw Pachia nynh a thua. Aening hynh lungpaw te ung haesah ci yn ry. Tukeiccuze aromaw riathae vawsawnaw ynro pah vae cih. Atu ccyh lya riathae vawsawnaw a ung paw hynh a kong ccang khahkheih a ung keiccuze nynh thua. Tuh e kong tuh a kong ccangtarya naw kya muih kho a thua.2 Piter 2:9; 3:7, 13 kha ria tua.

5. Bawipaw Pachia te sahngangku ry langze pawtemou ci lang?

Pachia nynh a maw te sahngangku kho nawlang saw ynsang oh ynci. Ccungccaw miakaw Pachia nynh pe ynki. (Sam 65:2; 145:18) Seinaw ngaethyalang paccyng kute nynh a ung. Alung ry tunglang azuaku naw oh thuasah mang azua kuhpi ohte athua kho khyh naw balyng hynh pung yn ny pya kou. Tukeiccuze mihccinglei hae thua oh sih lazema Pachia te a sahngangku kho oh.Sam 103:12-14; James 4:8 haekha ria tua.

Pachia tuh hingnaw yn pyatu paw athua keiccuze pawpaw laeze sungsah hualang a ccang. (Marka 12:30) Pachia kong kha houh ccang kulah ynci sah rypaw cinaw liate Pachia ka sungsah cipaw thuazah a maw temah houh sahngangku kho lang vae.1 Timote 2:4; 1 Johan 5:3 haekha ria tua.