Skip to content

Skip to table of contents

 ABALU CCANGPANGAW

Sawnawme—Pachia Yn Pya Paw Alehua Paw Lasung

Sawnawme—Pachia Yn Pya Paw Alehua Paw Lasung

1, 2. (a) Aening hanglang aphute hua paw lasung tuh pawmou? (b) Sawnawme tuh Pachia nynh yn pyapaw lasung lungkhuze pawccemou alehua paw a thua?

NA mue paw lasung lungkhuze ahoyhua ccepaw lasung tuh pawmou? Ame rupaw thua khyh ze mah aphu kou na te sah. Lasung na mue lya kha na lung kou paw zah na hanglang kou ahoo hua paw athualangze aphu houh na te sah maming cih.

2 Pachia nynh yn pyapaw lasung lungkhuze aening hanglang ahoo hua paw lasung ccangkheih a ung. Tuh-e tuh ccungccaw hae yn pyapaw lasung lungkhu ze alehua paw Pachia lasung nynh thua. E abalu kya, Zahova nynh yn saw pyapaw a Ccahpaw, Zisu Khrih liate zungzae hingnaw mue lang paw kong kha ccangku tua oh sih. (Matthai 20:28 ria.) Zahova nynh Zisu kha laevaw lang sawnawme lang yn sawpyanaw liate aening kha myarya yn sungsah cipaw a lang sah.

SAWNAWME TUH PAWMOU?

3. Ccungccaw hynh pawccemou ah chii oh?

3 Sawnawme tuh ccungccaw hae kha seinaw te chiinaw kyate lue kho nawlang Zahova nynh yn paccyng pyapaw langpi nynh thua. (Efesahae 1:7) Sawnawme ah hoo oh cipaw thaethya nawlang, a kum athung te aro vae paw Edin khokhu kya a la cyihkuh paw kong kha ny ahoo cih. Masaty nungpaaw a thua hae paw Adam te Evua nynh seinaw a la rae hae keiccuze miming tuh sei hae zah a la chih vae hae. Adam te Evua kyate seinaw ro kha ah ccou vae oh keiccuze aening mah pung ah chih bua vae oh.—Piachihpaw 9 kya do.

4. Adam tuh a hungmou, pawmou a hoi?

 4 Zahova nynh masaty ccungccahpaw, Adam a rae lya kha myarya aphutepaw a pya. Adam kha a ccingpaw ccungccaw hingnaw kha a pya. A ccingpaw pyng te tuanaw ccingpaw a hoi. Zahova nynh cciinaw, tawnaw te chiinaw a tung leilang te a la rae. Zahova nynh Adam kha a rae keiccuze Pachia tuh Adam hanglang Paaw hawte nynh a loku. (Luka 3:38) Zahova te Adam tuh pei a ccuepekuh hae. Pachia nynh Adam kha a kyate pawmou a ngaehoi cipaw te myarya hoypaw ryalaw a pyapaw kha ccaerarih lang a ho pya.—Genesis 1:28-30; 2:16, 17.

5. Adam tuh “Pachia muinsang lo lang” rae paw nynh thua cite Baebu ho paw hynh paw suilang mou?

5 Adam tuh “Pachia muinsang lo lang” rae paw nynh thua. (Genesis 1:27) Zahova Pachia a ziazae hae a cih kuh paw sungsahkunaw, hawnaw, dingnaw te thungnaw hae kha a pya. Adam kha rythathyh pokunaw kaw a pya. Adam tuh set a zuh (robot) thua khyh. Amaw tuh atha ahoy rya lawlang paw kha a pokuh kho. Pachia bya kha ngaelang a la poku ze tuh paradais kya zungzae a ung cih paw nynh thua.

6. Adam nynh Pachia kaw a ngae khyh keiccuze pawmou a shung? Aening so pawmou ah tung oh?

6 Adam tuh Pachia kaw a ngae khyh keiccuze detahnaw mue zah aphu myarya tepaw lasung kha phe a shung vae. Zahova te ahoypaw ccuepekunaw, a ccingpaw hingnaw te paradais kya unglang paw kha phe a shung vae. (Genesis 3:17-19) Adam te Evua nynh Pachia kaw ngae leilang a poku hae keiccuze mih hanglang pawpaw ngaehoinaw ung vae khyh. Baebu nynh hynhte a ci: “Seinaw tuh ccungccaw lukheih thungte laephivaw lang oun thuaza tuh e seinaw nynh chiinaw oun thuakhae. Chiinaw nynh ccungccaw balyng tuh marya a zee kou.” (Romhae 5:12) Adam nynh amaw te aening kha seinaw te chiinaw see lang pung yn la “zua” vae. (Romhae 7:14) Aening hanglang soh ngaehoinaw ung ung tou? A ung ung.

7, 8. Sawnawme tuh pawmou?

 7 Sawnawme tuh pawmou? Sawnawme cipaw thaethyanaw lang akong ccangning a ung. Ccangkheihnaw, sawnawme tuh lukhakheih luenaw hanglang pyapaw ame tukhyhze hangkhakheih kha bua sawthuipaw cipaw nynh a thua. Ccangningnaw, sawnawme tuh hangkhakheih kha fusung tukhyhze hangkhakheih hanglang thangku paw, rungkhawpaw cipaw nynh thua.

8 Adam keiccuze ah tung oh paw seinaw te chiinaw kyate lue kho nawlang aphu ame kha hung ccungccaw nynh mah pya kho khyh. Thuasalama Zahova nynh seinaw te chiinaw kyate lue kho nawlang yn paccyng pya. Sawnawme nynh aening hanglang pawmou yn cyipya cipaw te thanenaw pawtemou ah mue oh cipaw kha ccangku tua oh sih.

ZAHOVA NYNH SAWNAWME YN PACCYNG PYA

9. Sawnawme tuh pawte pyapaw phuin mou a thua?

9 Adam nynh a ccingpaw hingnaw a shung paw kha bua muethui nawlang hung ccungccaw sang nynh mah sawnawme ah pya kho khyh oh. Pawkeiccumou? Aening tuh ah balyng te a ccing leipaw ccungccaw ah thua oh keiccu nynh thua. (Sam 49:7, 8) Sawnawme tuh a ccingpaw hingnaw hanglang pyapaw nynh thua. Tukeiccuze “a ngangkuh paw sawnawme” cite ko a thua. (1 Timote 2:6) Sawnawme tuh Adam nynh la shungpaw aphutepaw hingnaw kha bua mue kho nawlang pya rupaw nynh thua.

10. Zahova nynh sawnawme kha pawtemou yn la paccyng pya?

10 Zahova nynh sawnawme kha pawtemou yn paccyng pya? Zahova nynh myarya a sungsah paw a ccahpaw kha laevaw lang yn saw pya. Tuh-e a ccahpaw tuh masaty a raetypaw Zisu kha nynh thua. (1 Johan 4:9, 10) Zisu tuh a Paaw te vawlang-e a inn kha lunghoy te a cciataw. (Filipihae 2:7) Zahova nynh Zisu kha vawlang te laevaw lang yng saw zah seinaw hoi leipaw a ccingpaw ccungccaw lang te a la pui sah.—Luka 1:35.

Zahova nynh a sungsah paw a Ccapaw kha sawnawme lang yn pya

11. Ccungccaw lukheih nynh ccungccaw miakaw hanglang pawtemou sawnawme kha a la pya?

 11 Masaty ccungccahpaw Adam nynh Zahova kaw a ngae khyh keiccuze ccungcaw miakaw tuh zungzae hingnaw pung ah shung kou vae oh. Adam ci-hang hae nynh ah tung oh paw chiinaw kha a zo sah kho lang paw ccungccaw lukheih sang ung khyh tou? Mang a ung. (Romhae 5:19 ria.) Zisu tuh seinaw hoi leipaw thuakeiccuze, a ccingpaw pyng hingnaw kha sawnawme lang a la pya. (1 Korinhae 15:45) Zisu nynh Adam ci-hang miakaw nynh ah tung oh paw chiinaw kyate lue kho nawlang a ccingpaw apyng hingnaw kha sawnawme lang yn pyapya vae.—1 Korinhae 15:21, 22.

12. Zisu tuh pawccemou myarya ruupaw vawsawnaw a te-ing?

12 Baebu kya Zisu a chii maw vawsawnaw kha pawcihciatemou a tung cipaw a zei kuh. Amaw tuh zorui te bua naw, thingtung kya khiadenaw te vawsaw riathae tung te nynh a chii. (Johan 19:1, 16-18, 30) Zisu nynh pawccemou tuhcihcia te ruunaw kha a te-ing? Pawccecize ccungccaw miakaw tuh myarya ruupaw vawsaw a tung hae ze tuh Pachia kya zyntyng kho lang khyh hae cite Setan nynh a la hopaw bya a ung. Myarya ruupaw vawsawnaw tung ze mah Pachia kya zyntyng kho a thua cipaw kha a ccingpaw Zisu nynh a la lang sah. Zisu a zyntyngnaw nynh Zahova pawcihmou a rykuh cih cipaw kha na mimaevaw kya ung sah ku tua!—Phungtangbya 27:11; Piachihpaw 15 kya do.

13. Sawnawme kha pawtemou pya a thua?

13 Sawnawme kha pawtemou pya a thua? Zisu nynh a ccingpaw hingnaw kha a Paaw a pya. A.D. 33, Zudah saw, Nisan 14 nin kya Zahova nynh Zisu kha raw hae nynh chianaw kaw a ua. (Hebruhae 10:10) Zisu a chih koute ninthungnaw khe tuh Zahova nynh muihsaw pyng te a tho sah thui. Zisu tuh a Paaw kalang vawlang bua kae zah a ccingpaw hingnaw kha sawnawme lang Zahova kha a pya vae. (Hebruhae 9:24) Atu tuh sawnawme liate  seinaw te chiinaw kyate lue kho naw ah mue vae oh.—Romhae 3:23, 24 ria.

SAWNAWME LIATE AH MUE OH PAW THANENAW

14, 15. Seinaw yn ngaeethya nawlang pawtemou cyi lang?

14 Pachia nynh alehuapaw lasung yn pyapaw kyate thanenaw ah mue oh. Atulya pawtemou thanenaw ah mue oh cipaw te malang she kya so pawtemou thanenaw mue lang cipaw kong kha do tua oh sih.

15 Seinaw ngaeethyakunaw. Mihccing leipaw ah thua oh keiccuze nintakyh adingpaw rya zungzae law lang cipaw tuh a ruu. Ah munglae te thua sah, ah ozia te mah thua sah, pei ah meesei thya oh keiccu nynh thua. (Kolosehae 1:13, 14) Pawtemou ah seinaw yn ngaeethya cih? Aening ah cyisei, ah meeseinaw oh hanglang nyaasaku te Zahova kha beih yng ngaeethya cite ngiaku lang. Tuhte ah ngiaku oh lang thua ze ah seinaw kha yn ngaeethya maming cih cite zynngang a ung.—1 Johan 1:8, 9.

16. Athah ahoy phiathyanaw thinlung thyapaw hoi kho nawlang pawmou cyi hahe lang?

16 Athah ahoy phiathyanaw thinlung thyapaw ah hoi kho oh. Athah ahoy phiathyanaw thinlung nynh ccangkhakheih cyisei vae ze seinaw ka hoi vae, ngaehoinaw ung vae khyh, paw ccung ka kia vae khyh cite ah tuakuh kho oh. Thuasalama tuhte tuaku lang paw thua khyh. Zahova kha beih yng ngaeethya cite ah ngiaku oh ze tuh solei yn ngaeethya maming cih. (Hebruhae 9:13, 14) Zahova nynh ah tung oh paw ruunaw vawsawnaw te ah bou oh paw kong kha yng ho pah hae sah ci a ry. (Hebruhae 4:14-16) Tuhte ah cyi oh ze tuh Pachia te aening lahku daenaw solei a ung cih.

17. Zisu nynh aening hanglang yn chii pyanaw liate paw hythuanaw mou mue lang?

17 Zungzae hingnaw ah ngaehoi kho oh. “Seinaw me tuh chiinaw nynh thua; thuasalama Pachia kya-e lasung tuh ah Bawipaw Zisu Khrih liate zungzae hingnaw nynh thua.” (Romhae 6:23) Zisu nynh aening hanglang yn chii  pyanaw liate a ccingpaw ngedangnaw te zungzae hinglang vae. (Byaphy 21:3, 4) Thuasalama tuh-e hythuanaw hae mue khylang pawmou cyi lang?

SAWNAWME KHA APHU NA TE SAH TOU?

18. Zahova nynh yn sungsah cipaw pawtemou ah ny oh?

18 Lukhakheih nynh myarya aphute paw lasung ae pya lya kha pawtemou na ung? Sawnawme tuh lasung miakaw kya a phute huaccepaw nynh thua. Tukeiccuze e-lasung hanglang Zahova tungvaw ah lung myarya tua lang a ccang. Johan 3:16 kya, “Pachia nynh laephi hynh eih a sungsah keiccuze a hoithypaw a Ccapaw oun pya,” cite a ho. Athua, Zahova nynh eih yn sungsah keiccuze a sungsah paw a Ccahpaw, Zisu kha yn pya. Zisu nynh mah aening hanglang yn chii pyanaw liate yn sungsah cipaw kha ah ny oh. (Johan 15:13) Sawnawme paccyng pyanaw nynh Zahova te Zisu nynh yn sungsah ccahccing hae cipaw ah ny oh.—Galatihae 2:20.

Zahova kong ccangkunaw liate, amaw te houh vaeccawku lang zah ah sungsahnaw oh kha mah houh yng tyng vae cih

19, 20. (a) Zahova vaeccaw lang pawtemou thua kho lang? (b) Zisu sawnawme silawkunaw kha ka zyn cipaw pawtemou lang sah lang?

19 Pachia nynh yn sungsahnaw hynh hotuh te mou ale cipaw ah ny vae oh, athualangze pawtemou amaw te vaeccawku kho lang? Ah ny lei oh paw lukhakheih kha sungsah lang cipaw tuh zoi khyh. Johan 17:3 kya Zahova kha ny kho a thua cite a zei kuh. Zahova kha ny lang na zuaku ze tuh amaw kha kou nae sungsah thya cih zah a vaeccaw lang mah kou nae tang kho vae cih. Tukeiccuze Baebu kya Zahova kong kha pou ccangkuh.—1 Johan 5:3.

20 Zisu sawnawme sithoinaw kha zyn. Baebu nynh, “Ccapaw a zynpaw miakaw tuh zungzae hingnaw ah hoi hae,” cite a ho. (Johan 3:36) Zynnaw kha pawtemou lang sah lang? Zisu nynh yn ccangpyapaw kha zuinaw liate lang sah kho a thua. (Johan 13:15) Zisu kha ka zyn cite ho kyalya te zaw khyh. Sawnawme kha aphute sah lang zah ah zynnaw kha ah cyisanaw liate lang sah lang.  James 2:26 kya, “Zynnaw zema cyisanaw leite tuh a chih,” cite ah ria oh.

21, 22. (a) Kum takyh Khrih chiinaw Tuathuinaw Puai kya pawccemou pungku lang a ccang? (b) Abalu 6 te 7 kya paw kong mou ah hokuh cih oh?

21 Khrih chiinaw Tuathuinaw Puai kya pung kuh. Zisu a chii dyng zetekheih tuh a zuitu hae kha ka chiinaw nin hynh ning khyh nawlang hynhte zungzae na lah tuaa cih oh cite a tawsya hae. Kum takyh te pei leih ah tuaa oh, e tuh Tuathuinaw Puai tukhyhze “Bawipaw Zerya” cite ah ko oh. (1 Korinhae 11:20; Matthai 26:26-28) Zisu nynh sawnawme kha ningnang hae sah ci yn ry. Amaw nynh hynhte a ho: “Kamaw liathui nawlang e hynh mang oh.” (Luka 22:19 ria, BI) Tuathuinaw Puai kya na pungkunaw liate Zahova te Zisu nynh yn sungsah hae cipaw te sawnawme kha na ning khyh cipaw na lang sah paw nynh thua.—Piachihpaw 16 kya do.

22 Sawnawme tuh ah mue oh paw lasung lungkhuze ale huaccepaw nynh thua. (2 Korinhae 9:14, 15) Tuh-e tuh a chih vae hae paw ccungccaw patae hanglang mah a thane paw lasung nynh thua. Tuh-e tuh pawtemou a thua kho cih cipaw kha Abalu 6 te 7 kya bua hoku lang.