Skip to content

Skip to table of contents

 ABALU CCANGPALI

Zisu Khrih Tuh A Hungmou?

Zisu Khrih Tuh A Hungmou?

1, 2. (a) A min thangpaw kha a min hung ny kyalya te akaw aleih ny paw thua tou? Ho tua. (b) Zisu te asekuhte ccungccaw hae nynh pawtemou a zyn hae?

LAEPHI vaw lang mih min thangpaw ccungccaw patae a ung hae. A min thangpaw lukhakheih min kha na nyh kho. Thuasalama a min kyalya ny paw tuh akaw aleih ny paw thua khyh. Pawccecize a ungtu ziazae te pawte cih paw ccungccaw mou a thua cipaw na ny kaleih khyh keiccu nynh a thua.

2 A thangvaepaw kum 2,000 hang kya laevaw lang a la hingpaw Zisu Khrih kong hynh thae mah na thae boi kho. Thuasalama ccungccaw alunghua nynh Zisu tuh pawte cih paw ccungccaw cipaw nyh khyh hae. Abang nynh ccungccah hoypaw, profeh cite ho hae zah abang nynh tuh Pachia cite a zyn hae. Nang soh pawtemou na tua?—Piachihpaw 12 kya do.

3. Zahova Pachia kong te Zisu Khrih kong merarih te ny lang pawccemou azici?

3 Zisu kong hynh merarih te ny lang azi myarya ci. Pawccemou? Baebu nynh hynhte a ho: ‘Zungzae hingnaw tuh e hynh nynh thua, amepaw Pachia nang kyalya te nang nynh na saw paw Zisu khrih hynh miming nynh a ny hae paw kha nynh thua.’ (Johan 17:3) Ame, Zahova te Zisu kong merarih te na ny lang thua ze, laephi Paradais kya zungzae na hing kho cih. (Johan 14:6) Tupiaze, aening pawtemou hing lang, mingccang paw hae so pawtemou ccuepe lang hae cipaw te asekuhte Zisu tuh dosuinku lang ahoyhua paw nynh thua. (Johan 13:34, 35)  Abalu 1 kyaze Pachia te asekuhpaw amepaw kong kha ah ccangkuh vae oh. Atu tuh Zisu te asekuhpaw Baebu nynh yn ccangpya paw kha nynh ccangku lang vae.

MESSIAH A LANGKUH VAE!

4. “Messiah” te “Khrih” baccang hynh paw suilang mou?

4 Zisu a puimaw kum hynhsepi lya mawte, Zahova nynh Baebu kya Messiah thuakhyhze Khrih tuh laevaw lang ka saw cih cite bya a la kingku vae. “Messiah” cipaw baccang tuh Hebruhae bya thua zah, “Khrih” cipaw baccag tuh Greek bya nynh thua. Tuh-e asuilang hae tuh Pachia nynh yn po pyapaw, bakingpaw cipaw nynh thua. Messiah nynh Pachia bakingnaw miakaw kha yng ccing sah vae cih. Atulya soh Zisu nynh pawtemou yn bung kho cipaw kong ccangku lang. Thuasalama Zisu a pui maw ze ccungccaw patae hae nynh, ‘Messiah tuh a hungmou thua cih?’ cite a la ny ry hae.

5. Zisu tuh Messiah nynh thua cite azuitu hae nynh zyn hae tou?

5 Zisu tuh bakingpaw Messiah nynh thua cipaw kha a zuitu hae nynh rary mamaw ung khyh hae. (Johan 1:41) Tousenawze, Simon Piter nynh Zisu kha, “nang tuh Khrih nynh na thua,” a ci. (Matthai 16:16) Aening soh Zisu tuh Messiah nynh thua cipaw pawtemou ah zynngang oh?

6. Zahova nynh miding hae kha Messiah tuh hungmou thua cipaw nythyanaw lang pawtemou la bung hae?

6 Zisu a puimaw kum hynhsepi lya mawte ccungccaw hae nynh Messiah kong nythyanaw lang Pachia profeh hae nynh a la zei ty vae hae. E nynh pawtemou yn bung cih? Vaekheih sang mah na muih boi leipaw lukheih kha ccungccaw a suhnaw, mawtaw dangnaw kya na cciadue cih oh sih. Lukhakheih nynh kha-e paw kha nythyanaw lang syntawnaw hangkhakheih ae ho pya ze thang nynh amaw kha na muih kho cih. Tuh hawte nynh aloku, Zahova nynh profeh hae mangte Messiah nynh a cyi lang  paw te a tung lang paw kong kha yn ho pya. Profeh hae bya accingnaw liate Zisu tuh Messiah nynh thua cipaw miding hae nynh nythyanaw lang a bung hae.

7. Zisu tuh Messiah nynh thua cipaw profeh bya ccangning hae nynh pawtemou ccaeteccae lang a lang sah?

7 Profeh bya ccangning hynh dotua oh sih. Ccangkheihnaw, Zisu a puimaw kum 700 lya ze, Messiah tuh Bethlehem khohtaraw kyate nynh yng pui cih cite profeh Mikah nynh a la hoty vae. (Mikah 5:2) Tuhte lang ze Zisu tuh pawkyamou a pui! (Matthai 2:1, 3-9) Ccangningnaw, C.E. 29 kya Messiah yng langkuh cih cite profeh Daniel nynh mah a la hoty. (Daniel 9:25) Profeh bya patae lungkhu ze e ccangning hae nynh Zisu tuh bakingpaw Messiah nynh thua cipaw ccaeteccae lang a lang sah.—Piachihpaw 13 kya do.

Zisu tuipi he a ing kou tetuh Messiah tukhyhze Khrih nynh thua vae

8, 9. Zisu tuipi a ing lya ze pawte a cyikupaw kha nynh mou Messiah cipaw a lang sah?

8 Zahova nynh Zisu tuh Messiah nynh thua cipaw ccaerarih lang a lang sah. Tuipi pyatu Zawhan nynh Pachia byakingpaw Messiah tuh a hungmou thua cipaw kha a ny. C.E. 29 kum lya, Zawhan nynh Zisu kha Jordan Vaw kya tuipi a ing sah lya ze Zawhan nynh muihsanaw kha a muih. Baebu nynh hynhte a ho: “Tuipi a-ing koute Zisu tuh tui kyate taloi a pou. Te dotua, amaw hanglang vawrang tuh hungkuh zah Pachia muihsaw nynh vafu hawte yng rungbung zah Zisu tungvaw a ccu paw kha Zawhan nynh a muih. Te vaekheihmawte vawrang kyate roi ccangkheih nynh, ‘E paw tuh ka sungsapaw ka ccapaw nynh thua, amaw kya ka lungrythua,’” a ci. (Matthai 3:16, 17) Zawhan nynh muihsanaw hae kha  a muih, a thae keiccuze Zisu tuh Messiah nynh a thua cipaw a ny. (Johan 1:32-34) Kha-e nin khe, Zahova nynh a tungvaw thyamuihsaw a ccaw sah tuh, Zisu tuh Messiah lang a tang vae. Siapharang te cciakhaetu lang Pachia nynh a po vae.—Isaiah 55:4.

9 Baebu profeh bya hae, Zahova bya hae te tuipi a ing lya-e muihsanaw hae nynh Zisu tuh Messiah nynh thua cipaw kha a lang sah. Thuasalama Zisu tuh paw kyatemou yng thua?, pawte cih paw mou? Baebu nynh a ho paw kha dotua oh sih.

 ZISU TUH PAWKYATEMOU YNG THUA?

10. Zisu laevaw lang yng rungmaw a hingnaw kong kha Baebu nynh pawtemou yn ccangpya?

10 Zisu tuh laevaw lang yng rungmaw ze vawlang khua hynhsepi phe la ung vae paw cite Baebu nynh yn ccangpya. Mikah nynh mah Messiah tuh ‘langmaw lya mawte phe la ung vae paw’ cite a ho. (Mikah 5:2) Zisu maw nynh mah ccungccaw lang ka pui maw vawlang khua hynhsepi ka ung vae paw cite a ho. (Johan 3:13; 6:38,62; 17:4, 5 ria.) Laephi vaw yng rungmaw ze, Zisu tuh Zahova te a ccuepekunaw hae myarya a la hoy.

11. Zisu tuh Zahova hanglang pawcce a phute?

11 Zisu tuh Zahova hanglang myarya a phute paw nynh a thua. Pawccemou? Pawccecize Pachia nynh atyng are a rae maw ze, a hungsang arae maw ze a raety paw nynh thua. Tukeiccuze nynh Zisu kha “rae paw balyng kyaze ccahtawccaw” cite a ko. * (Kolosa‛ae 1:15, BI) Zahova amaw ccahccei nynh a raepaw lukheih kyalya paw a thua keiccuze Zahova hanglang Zisu tuh a phute. “A hoithypaw a Ccapaw” thua keiccuze nynh hynhte a konaw paw thua. (Johan 3:16, BI) Zahova nynh atyng are miakaw kha Zisu ryte rou nynh a rae. (Kolosehae 1:16) Zisu tuh “Bya” cite mah ko a thua, pawccecize Zahova nynh vawccungccaw hae te ccungccaw hae kha thungpangbya ho sah pya lang Zisu kha a mang keiccuze nynh thua.—Johan 1:14.

12. Pachia te Zisu tuh ngangkuh khyh hae cipaw pawtemou ah ny oh?

12 Pachia te Zisu tuh lukheihpaw nynh thua hae cite ccungccaw abang nynh a zyn hae. Thuasalama tuh-e tuh Baebu ccangpyanaw thua khyh. Baebu nynh Zisu tuh raepaw  nynh thua, a ho ry paw tuh a thonaw a ung cinawpaw nynh thua. Thuasalama Zahova tuh atyng are raetu thua zah, athonaw athangnaw ung leipaw nynh thua. (Sam 90:2) Pachia ccahpaw Zisu nynh mah Pachia te ngangku lang zuakuh boi khyh. Baebu nynh Paaw tuh ccaaw laeze a lehua cite ccaeteccae lang yn ccangpya. (Johan 14:28 ria; 1 Korinhae 11:3.) Zahova kyalya nynh “Athunghua ccepaw Pachia” a thua. (Genesis 17:1) Amaw tuh vawlaepi kya alehuapaw te athung huaccepaw nynh a thua.—Piachihpaw 14 kya do.

13. Baebu nynh Zisu tuh “muihkho leipaw Pachia muinsang nynh thua” cite pawccemou a ci?

13 Zahova te a ccapaw Zisu tuh vaw te laephi a raemaw hae kum hynhsepi lyamaw te pyngkheih lang rya khaw a la lakheih vae hae. Lukheih te lukheih myarya a sungsah kuh hae. (Johan 3:35; 14:31) Zisu tuh Pachia ziazae kha a dosuinku keiccuze Baebu nynh “muihkho leipaw Pachia muinsang nynh thua” a ci.—Kolosehae 1:15.

14. A phute paw Zahova ccapaw hynh pawtemou ccungccaw lukheih lang yn pui?

14 Zahova nynh a sungsahpaw a ccapaw kha vawlang te yng rung sah bung zah ccungccaw lukheih lang te laephivaw lang yng pui sah. Tuh-e tuh pawtemou thua? Athya paw Meri vue lungkhu lang khe vaw lang e a ccapaw hingnaw kha Zahova nynh ngae-angnaw te a nue. Zisu yng pui nawlang laephivaw Paaw hoi hoo khyh. Te Meri nynh a ccingpaw ccaw kha yn sah zah Zisu cite min a phu.—Luka 1:30-35.

ZISU TUH PAWTE CIH PAW CCUNGCCAW MOU?

15. Zahova kong kha pawtemou houh ny kho lang?

15 Zisu a hingnaw te a ziazae hae kong kha Matthai, Marka, Luka te Zawhan hae Baebu ccah-uh na rianaw liate patae na nyh kho cih. Tuh-e ccah-uh hae kha Thehoypaw ccah-uh cite ko a thua. Zisu a ziazae hae tuh a Paaw  ziazae te a loku keiccuze kha-e ccaw hae na rianaw liate Zahova kong houh nythyanaw lang ae bung cih. Tukeiccu Zisu nynh, “Hungzema kae ounmuih vaepaw tuh ka Paaw kha amuihvae,” cite a ci khonaw paw a thua.—Johan 14:9.

16. Zisu ccangpyanaw tuh pawmou? Zisu ccangpyanaw tuh paw kyate mou yng thua?

16 Ccungccaw patae nynh Zisu kha “Sazae” cite a ko hae. (Johan 1:38; 13:13) Abapi lang a ho huaccepaw akong tuh “Penaw thehoypaw kong” nynh thua. E Penaw tuh pawmou? E Penaw tuh Pachia accozah kha nynh thua, vawlang khua te laephipi kha yng uh cih zah Pachia kaw a ngae hae paw miakaw tuh hythua a pya cih hae. (Matthai 4:23) Zisu nynh a ho paw miakaw tuh Zahova kyate yng thua paw nynh thua. Zisu nynh hynhte a ho: “Ka ccangpyanaw tuh kamaw kya-e thua khyh, thuasalama kamaw yn sawtupaw kya-e nynh thua.” (Johan 7:16) Pachia Penaw nynh laephi pyngpi hynh marya yng uh vae cih cipaw thehoypaw kong hynh Zahova nynh ccungccaw miakaw thae hae sah ci a ry cipaw Zisu nynh a ny.

17. Zisu nynh pawkyamou a ccangpya hae? Mingccang paw hae ccangpya lang pawccemou a zuaku?

17 Zisu nynh pawkyamou a ccangpya hae? Ccungccaw a muihnaw miakaw kya a ccangpya hae. Zisu nynh khopi, khotaw, kungkunaw, beihnaw inn te ccungccaw hae inn kya balyng a ccangpya hae. Ccungccaw hae nynh a kalang yng cceih hae sah cite tua khyh. Amaw nynh ccianua te a ccangpya hae. (Marka 6:56; Luka 19:5, 6) Zisu nynh Ccungccaw hae ccangpya lang a ccyh, a thawzung balyng kha mangte a zuaku. Pawkeiccumou? Pawccecize e ryalaw tuh Pachia nynh yn law sah ry cipaw nyh zah a Paaw kaw zungzae a ngae keiccu nynh thua. (Johan 8:28, 29) Zisu nynh ccungccaw hae kha thaw a cci hae keiccuze phung a ho pya hae. (Matthai 9:35, 36 ria.) Beihnaw  cciakhaetu hae nynh Pachia te a Penaw kong kha merarih lang ccangpah khyh hae cipaw kha a ny. Tukeiccuze thehoypaw kha houh a ny kho nawlang hae bung a ry hae.

Zisu nynh ccungccaw a muihnaw miakaw kya khe phung kha a ho

18. Zisu ozia hae kya ze pawkhamou kou na ry hua?

18 Zisu nynh ccungccaw hae kha sungsah hae zah pe aki hae. Thawccinaw hoi zah naeku a zoi. Imua hae balyng nynh a sahngang hae. (Marka 10:13-16) Zisu tuh mae do khyh. Ozia hoyleinaw te dingleinaw kha a hua. (Matthai 21:12, 13) Nopi hae dothatheihnaw te a nyasahua ccyh lya hae khe nynh a la hing. Thuasalama Zisu tuh nopi hae kha sawtuanaw te zungzae a la ccuepe hae. (Johan 4:9, 27) Zisu tuh zakaw myarya a sangsakuh paw mah a thua. Tousenawze, Zisu nynh zete kheih tuh see lukheih hawte a zuitu hae ccu kha a sing pya hae.—Johan 13:2-5, 12-17.

19. Zisu nynh ccungccaw hae kha pawmou ahoo abou hae cipaw nyh zah bung a ry hae cipaw paw tousenaw nynh mou a lang sah?

19 Zisu nynh ccungccaw hae kha pawnynh ahoo abou hae cipaw nyh zah miming kha bung a ry hae. Pachia thyamuihsaw thungnaw liate ngeccih hae kha zoibaheih te a dang sah hae. (Matthai 14:14) Tousenawze, vaethyakae paw ccungccaw lukheih nynh Zisu kalang yng cceih zah, “Na ry athuaze tuh nae thyasah kho,” cite a ho pya. Zisu nynh kha-e paw atungvaw-e ccinaw te vawsawnaw kha azo sah pya. Ngaethya ung sah zah bung a ry. Zisu nynh akuih te tung zah, “Thyasah kae ry thyaccahvae,” cite a ci pya. Tetuh ccungccahpaw tuh phe dang vae! (Marka 1:40-42) Kha-e ccungccahpaw kha pawtemou ung cih cipaw kha na mihmaevaw kya ung sah ku tua?

A PAAW KYA ZUNGZAE ZYN A TYNG

20, 21. Pachia kaw ngaenaw kya Zisu tuh pawtemou dosuinku lang ahoy huaccepaw a thua?

20 Zisu tuh Pachia kaw ngaenaw kya dosuinku lang ahoy huaccepaw nynh thua. Pawpaw ruunaw a tung ze  mah a Paaw tungvaw zyn varyng a tyng. Tousenawze, Setan nynh atuh-ou lya mah Zisu seinaw rae khyh. (Matthai 4:1-11) Zisu tuh Messiah nynh thua cipaw a innbyng abang nynh a zyn khyh hae apiaze “a ngae vae” cite cia a ci hae. Thuasalama Zisu nynh Pachia rya kha nynh pou a law. (Marka 3:21) Zisu tuh pawpaw vawsawnaw a pya hae ze mah mimaw kha cyiru leite Pachia tungvaw kya nynh zyn houh a tyng.—1 Piter 2:21-23.

21 Zisu tuh vawsawnaw te ngaethyanaw kha a chih ryacia a tung ze mah Zahova kya zyn vahryng a tyng. (Filipihae 2:8 ria.) Zisu a chi nin kha pawcihciatemou a vawsaw cih cipaw na mimaevaw kya ung sah ku tua. Zisu tuh ame leipaw ccaeccei te tazae ccuainaw, adinglei hae paw bapiatu hae seibenaw, ccungccaw hae saryanaw, rawkaw  hae nynh zianaw buanaw te thintung kya khiadenaw kha a tung. A chiimaw taraw lya khe “Athangvae” a ci! (Johan 19:30) Zisu a chih te ninthungnaw khe Zahova nynh muihsaw pyngte atho sah thui. (1 Piter 3:18) Nin sungpali yn cih tuh vawlang kae zah, “Pachia ranglang khe ha ung zah,” Siapharang a mue lang paw ccyh kha a ngaw.—Hebruhae 10:12, 13.

22. Zisu nynh a Paaw kya zyn atyngnaw liate aening pawmou mue lang?

22 Zisu nynh a Paaw kya zyn atyngnaw liate aening kha Zahova nynh bya yn king paw laephi Paradais kya zungzae hingnaw yn mue sah cih. Zisu a chiinaw nynh aening zungzae hing kho nawlang pawtemou yn bung cipaw kha a mahlang-e abalu kya bua ho ku lang.

^ par. 11 Zahova tuh Raetu thua keiccuze Paaw cite ko a thua. (Isaiah 64:8) Zisu kha Zahova nynh a raepaw thua keiccuze Pachia Ccapaw cite ko a thua. Tuhawte vawccungccaw hae te ccungccahpaw Adam kha mah Pachia ccaaw hae cite ko a thua.—Job 1:6; Luka 3:38.