Skip to content

Skip to table of contents

 ABALU HAWLAETARYA

Pachia Kalang Tuipi-Ing Te Pyng Pyaku Lang Ccang Tou?

Pachia Kalang Tuipi-Ing Te Pyng Pyaku Lang Ccang Tou?

1. E ccah-uh a hoyte na ccangkuh koute pawmou na tua kho?

E CCAH-UH na ccangku lungkhu kya, Pachia nynh yn kingpaw zungzae hingnaw, michii hae kong te thothuinaw ngaehoinaw kong citahawpaw amepaw Baebu ccangpyanaw kha na ny vae. (Phunghotu 9:5; Luka 23:43; Johan 5:28, 29; Byaphy 21:3, 4) Zahova Ccaeccei hae pungkunaw kya nae pungkuh bua tetuh mih beihnaw hynh ame cite na tua kho. (Johan 13:35) Zahova te na ccuepekunaw oh a kaethung nawlang na zuaku ze  tuh amaw rya lawlang bya nae paekuh ry vae cih. Tukeiccuze hynhte na tua kho, ‘Pachia rya lawlang atulya pawmou cyi lang ka ccang?’

2. Ethiopia paw nynh pawccemou tuipi-ing lang a ry?

2 Tuh-e tuh Zisu she lya a la hingpaw Ethiopia paw mah a la tua boi. Zisu a thothui koute ccyh kheih tuh, Zisu zuitupaw Filip nynh ccungccahpaw kha phung la ho pya. Filip nynh kha e paw kha Zisu tuh Messiah nynh thua cite la ccaesah pya. Ethiopia ccungccahpaw tuh a la ccangkupaw nynh a lung kha phe tung zah, hynhte vaekaleih a ho: ‘Hingkya tui mang ung. Tuipi-ing lang hynh pawnynhmou yn khaw?’—Zuituhae 8:26-36.

3. (a) Zisu nynh a zuitu hae kha paw ryalaw mou a pya hae? (b) Ccungccaw lukhakheih nynh pawtemou tuipi-ing lang a ccang?

3 Baebu nynh Zahova rya na law ry lang ze, tuipi-ing lang a ccang cite ccaeteccae lang yn ccangpya. Zisu nynh a zuitu hae kha hynhte a ho pya hae: “Nangning la cceih oh lah minphuin hae balyng kha zuitu hae lang la rae oh, tuipi-ing sah oh.” (Matthai 28:19) Zisu amaw toulou nynh tuipi a ingnaw liate dosuinku lang yn naung pya. Aluvaw lang tuite hung bupaw thualeite, tuilungkhu a pyng balyng phe phungku tenynh a ing. (Matthai 3:16) Atushe Khrihccaw lukheih nynh tuipi a ing lang thua ze, tui kya phe phungku te a ing cih.

4. Tuipi na ingnaw nynh pawmou a lang sah?

4 Tuipi he na ing te vae tuh, Pachia vaeccaw lang na tang ry ccahccing cipaw te a rya na lah ry ccahccing cipaw na lang sah paw nynh thua. (Sam 40:7, 8) Tukeiccuze tuipi-ing kho nawlang paw rya mou law ahoo cih?’ cite na tua kho.

NYNAW TE ZYNTYNGNAW

5. (a) Tuipi na ing kho nawlang pawmou na cyih ty cih? (b) Khrihccaw pungkunaw hynh pawccemou azici?

5 Tuipi na ing maw ze Zahova te Zisu konglang ny ty  ahoo cih. Baebu na ccangkupaw nynh tuipi-ing kho nawlang ae bung cih. (Johan 17:3 ria.) Thuasalama tuhte cyi kyalya te zaw khyh. Baebu nynh Zahova rynaw te “muisaw langte thaethyanaw te phe na bia nawlang oh” sawsang kuh oh a ci. (Kolosehae 1:9) Zahova Ccaeccei hae pungkunaw kya na pungku bua paw nynh Zahova te vaeccawku kho nawlang ae bung cih. Tuh-e tuh pei pungku bua kho nawlang azicipaw akong ccangkheih nynh thua.—Hebruhae 10:24, 25.

Tuipi-ingmaw, Baebu na ccangkuh cih

6. Tuipi na ing maw Baebu kong hohzeihmou ny ty lang ahoo?

6 Zahova nynh tuipi na ing maw Baebu kong karyh ny kou lang ae ngaehoi khyh. Ethiopia paw mah tuipi a ing maw Baebu kong karyh ny kou lang ngaehoi khyh. (Zuituhae 8:30, 31) Pachia kong tuh zungzae ccangku lang paw nynh thua. (Phunghotu 3:11) Thuasalama tuipi na ing maw, Baebu ccangpyanaw hae kha ny te na nawccaw ty tuh ahoo cih.—Hebruhae 5:12.

7. Baebu na ccangkupaw nynh pawtemou ae bung?

7 Baebu nynh, “Zynnaw leite hung nynh sangma Pachia lungccingsah kho thua khyh,” a ci. (Hebruhae 11:6) Tukeiccuze tuipi na ing maw zynnaw hoity lang ahoo. Baebu nynh langmaw Korin khua-e ccungccaw abang hae tuh, Zisu a zuitu hae nynh a ho hae paw thae hae zah, “a zyn hae keiccuze tuipi a ing hae,” a ci. (Locceihtu‛ae 18:8, BI) Tuhawte, Baebu na ccangkunaw nynh Pachia bakingnaw te Zisu silawnaw nynh seinaw te chiinaw kyate yn lue sah kho cipaw na zyn kho nawlang ae bung.—Joshua 23:14; Zuituhae 4:12; 2 Timote 3:16, 17.

AMEPAW BAEBU KONG KHA MING HAE MAH HO PAH HAE

8. Na ccangkupaw kong kha ming hae ho pya lang pawnynhmou ae bung cih?

8 Baebu kong houh na ccangkunaw liate, na zynnaw yng tyng cih zah na hingnaw kya pawtemou yn bung  cipaw nae nyh thya vae cih. Na ccangkupaw kong kha ming hae mah nae ho pah ry vae cih hae. (Jeremiah 20:9; 2 Korinhae 4:13) Hung hae khamou na ho pah cih?

Zynnaw nynh ming hae kha na zynnaw kong hopya lang ae bung cih

9, 10. (a) Baebu kong kha hung hae mou na ho pyaty ry hae? (b) Abu ryte pyngkheih lang phung na ho bua ry vae ze pawmou na cyih ty cih?

9 Baebu kong kha na innbyng hae, na vaeccaw hae, innpaw hae, tukhyhze rya na lakheih hae paw kha na ho pah ry maming cih hae. Tuh-e tuh ahoy, thuasalama sungsakunaw te lungnenaw te zungzae ho lang. Nyalang tuh, abu hae ryte phung nae ho thya bua vae cih. Phungho bua na ry vae lang thua ze, abu hae ryte pyngkheih lang phung ka ho bua ry vae cipaw kha Baebu ae ccangpahtu paw kha ho pah. Baebu ae ccangpatu paw nynh phung na ho kho bua vae cipaw te Baebu thyhte na hing vae cite ae tua lang thua ze, bu kya-e piccang hae luning te tungku lang ae pahccyng pah cih.

10 Tuh-e tungkunaw kya tuh paw kong mou na ho kuh cih oh? Baebu ccangpyanaw hae kha na thaethya zah na zyn paw kong, Baebu bya kha na hingnaw kya na zui zah Zahova Ccaeccei lukheih lang na tang ry ccahccing vae cipaw hae kong kha bu piccang hae te na hokuh kheih ty cih oh. Bu piccang hae nynh namaw thuasah, abu hae mah thuasah pe a ki hae keiccuze, miming te bya hoku kheih lang rih nang. (Zuituhae 20:28; 1 Piter 5:2, 3) Na tungkuh kou oh tuh, abu te phunghonaw kya na ho bua kho vae cipaw kha bu piccang hae nynh bua ae thae sah cih hae.

11. Abu hae ryte phung na ho bua maw pawccemou rulaeku lang myarya azici?

11 Abu hae ryte phung na ho bua maw rulaeku lang ahoo paw kha bupiccang hae nynh ae ho pah cih hae. Pawccemou rulaeku lang azici? Pawccecize mingccangpaw hae Pachia kong ah ho pya vae oh ze, Zahova hangpaw  te amaw kha khing a ung sah paw ziazae te hing lang a ccang keiccu nynh a thua.—1 Korinhae 6:9, 10; Galatihae 5:19-21.

NGAESIKUH LAH RULAEKUH

12. Ccungccaw miakaw pawccemou ngaesiku ahoo?

12 Tuipi-ing kho nawlang rulaeku kyalya thua leite a ccangpaw mah ahoo ung. Zuitu Piter nynh, “Ngaesikuh ohla Pachia kalang kithui oh,” cite a ho. (Zuituhae 3:19) Ngaesikuh cipaw tuh paw suilang mou? Ah cyiseinaw oh hanglang ah ngae myarya ah thah cipaw kha nynh a thua. Tousenawze, nopi pise seinaw na rae sei vae ze, ngaesiku ahoo cih. Hoynaw rae lang na hingnaw blyngte na zuaku lang thua ze mah ngaesiku lang pei ahoo ung cih. Pawccecize a balyngte seinaw ccaw hae a thua oh zah Pachia ngaeethyanaw ngiaku lang ah hoo oh keiccu nynh thua.—Romhae 3:23; 5:1.

13. “Rulaeku” cipaw asuilang tuh pawmou?

13 Na cyiseinaw hanglang ngaesiku kyalya te zaw tou? Zaw khyh. Piter nynh “rulaeku” bia mah ahoo cite a ci. E asuilang tuh na cyiseinaw hae kha vuate adingpaw ryalaw nynh lawlang vae cinawpaw nynh thua. Thua boi leinaw kalang vaekheihnaw khycce na cceih cite na mihmaevaw kya ung sah ku tua. Tuin ccyh lya mawkhe, langpi ka vae cipaw na nyku ze, pawtemou na cyih cih? Rary mamaw ung leite na kithui cih zah amepaw langpi kalang khazaw na cceih cih. Tuhawte, Baebu kya-e na ccangkupaw hawte, na hingnaw kya na ziazae hoyleipaw kha na rulaeku ahoo cih. “Rulaeku” lang ahoo paw kha—rulaekuh lah—adingpaw rya kha la ccah vae.

NAMAW TE NAMAW NA PYNG PYAKUH

Zahova rya ka lah cih cite bya na kingkuh vae tou?

14. Pachia kalang namaw te namaw pawtemou pyng na pyakuh cih?

14 Tuipi na ing maw na cyi ty lang paw azicipaw  ccangkheih tuh Zahova kalang namaw te namaw pyng pyaku ahoo cih. Zahova kalang namaw te namaw pyng na pyakupaw tuh amaw kyalya nynh ka beih cih cite bya na kingku paw te na hingnaw kya azici huapaw tuh a rynaw raepaw nynh thua cipaw na lang sah paw nynh thua.—Deuteronomi 6:15

15, 16. Pachia kalang namaw te namaw pyng pyaku lang pawnynhmou thaw ae pya?

15 Zahova rya kyalya lawlang bya na kingku paw tuh na sungsah paw te pyngkheih lang a ccyh mangkheih lang bya na kingku oh paw tenynh a loku. Pisepaw lukheih te nopinung lukheih a sungsahkuh hae paw kha tua tua. Pisepaw nynh nopinung a ziazae hoynaw kha yng nyh tuh, houh yng sungsah zah ung kheih lang a ry vae. Pawpawte thuaze mah amaw kha eih a sungsah keiccuze hoyte tuaku te ung khae lang bya a paeku.

16 Khahawte amaw kha houh sungsah thyanaw lang te a rya kha hoyte lawthyanaw lang Zahova kong kha ccangkuh. E nynh na sawsangnaw kya na baking thyh hawte a ryalaw lang thaw ae pya cih. Baebu nynh Zisu nuh a zui ry paw miakaw nynh tuh ‘amaw te amaw kha a vuakuh cih’ a ci. (Marka 8:34, BI) Tuh-e tuh paw suilang mou? Na hingnaw kya Zahova kaw ngaepaw kha masaty lang na naung cinawpaw nynh thua. Na rynaw te na eenaw lae ze Pachia rynaw tuh azici huapaw nynh thua.—1 Piter 4:2 ria.

RINAW KHA TAE KUH

17. Abang ccungccaw hae tuh Zahova kalang pawccemou pyng a pyaku khyh hae?

17 Abang ccungccaw hae tuh Zahova rya lawlang bya kingku thyh hawte law kho ung lang khyh cite a ri hae keiccuze mimaw te mimaw pyng pyakuh vae khyh hae. Abang tuh Zahova thinlung kae cci sah sei cih, tukhyhze abang nynh Zahova kalang pyng pyaku khyh lang ze ah  cyi oh paw hanglang Zahova nynh taevue hoi vae khyh cite a tua hae.

18. Zahova rya lawlang thinphang khyh nawlang pawnynhmou ae bung cih?

18 Zahova na sungsahnaw nynh a thinlung ka cci sah sei cih cipaw phang khyh nawlang ae bung cih. Zahova kha na sungsah keiccuze amaw kya na bakingkunaw thyhte pou nae lah vae cih. (Phunghotu 5:4; Kolosehae 1:10) Zahova rynaw raelang myarya aruu cite tua nang. Zuitu Zawhan nynh, “Pachia ah sungsah oh cipaw tuh a phungbya ah zui oh cinawpaw nynh a thua. Oun pyapaw a phungbyahae tuh zuilang arupaw thua khyh,” a ci.—1 Johan 5:3.

19. Zahova kalang pyng pyaku khylang pawccemou thinphang lang a ccang khyh?

19 Zahova kalang pyng pyaku khylang accingpaw thua hoo khyh. Na law kho paw laelang lawlang ae ngaehoi boi khyh. (Sam 103:14) Adingpaw rya lawlang ae bung cih. (Isaiah 41:10) Zahova kha na thinlung balyngte dolia kuh lah, ‘amaw nynh na lang ae ua sah pah cih’.—Phungtangbya 3:5, 6.

KHUNGNAW HANGLANG ZAPI MALANG LANGSANAW

20. Zahova kalang pyng na pyakuh koute na cyilang paw tuh pawmou?

20 Zahova kalang pyng pyaku lang ka ccang vae cite na tua kuh tou? Zahova kalang pyng na pyaku kou vae ze tuh, cyilang lawlang a ccangpaw hanglang na pah ccyngkuh kho vae. Tuipi na ing lang ahoo vae cih.

21, 22. Na zynnaw kha “zapi mahlang” pawtemou na lang sah cih?

21 Zahova kalang pyng na pyakuh zah tuipi-ing na rylang vae thua ze bu piccang lungkhuze atawccaw kha ho pah. Piccang hae ryte Baebu kong kha bua na ho kuh ty ung cih oh. Tuipi-ing lang a ccang vae cite mih  nawccaw ze, Zahova Ccaeccei hae civoi kya tuipi na ing kho vae cipaw kha bua ae ho pah cih hae. Civoi pungkunaw kya, tuipi-ing cipaw asuilang ccaesahnaw kong phunghonaw ccangkheih a ung. Phunghotupaw nynh tuipi a ing cih hae paw kha azoipaw bakhianaw ccangning a khia hae. E bakhianaw na phi paw hynh “zapi mahlang” na zynnaw kha na lang sah paw nynh thua.—Romhae 10:10.

 22 Tetuh tuipi na ing vae cih. Tuipi-ing paw tuh tui lungkhu lang pung phungku paw nynh thua. Tuipi na ingnaw nynh Zahova kalang namaw te namaw pyng na pyaku vae cipaw te atu tuh Zahova Ccaeccei lukheih nynh na thua vae cipaw a lang sah.

 TUIPI-INGPAW A SUILANG

23. “Paw, Ccaw, thyamuisaw min” te tuipi-ing cipaw tuh paw suilang mou?

23 Zisu nynh a zuitu hae kha “Paw, Ccaw, Thya Muisaw minte tuipi la ingsah oh” cite a ho pya hae. (Matthai 28:19 ria.) Tuh-e tuh paw suilang mou? Zahova tuh kawhoitu, Pachia eenaw kya Zisu a ryalawnaw kong te Pachia nynh a rynaw ccingsah khylang a thyamuisaw a mang paw kha kanawccah cinawpaw nynh thua.—Sam 83:18; Matthai 28:18; Galatihae 5:22, 23; 2 Peter 1:21.

Tuipi na ingpaw nynh Pachia rya ka lah ry cipaw na langsah paw nynh thua

24, 25. (a) Tuipi-ingpaw hynh paw syntawnaw mou? (b) Abalu nyathyanaw kya paw kong mou bua hoku lang?

24 Tuipi-ing paw tuh myarya azicipaw syntawnaw nynh thua. Tui lungkhu phungkupaw tuh, langmaw-e ka hing zia kha ka vua vae, tukhyhze ka chii sah vae cipaw a suilang nynh thua. Tui kyate bua poupaw tuh Pachia rynaw hawte nynh ka hing vae cih cipaw syntawnaw nynh thua. Atu kyate tuh Zahova Pachia rya nynh ka lah vae cih cipaw na langsah paw nynh thua. Ryalaw ccangkheih, ccungccaw tukhyhze a bu ccangkhakheih hanglang pyng pyakupaw thua khyh cipaw kha ningnang. Na hingnaw kha Zahova kalang na pyakupaw nynh thua.

25 Na pyng na pyakupaw nynh Pachia te vaeccaw lang tang kho naw kha a lethung nawlang ae bung cih. (Sam 25:14) Tuipi-ing keiccuze khungnaw muelang vae cipaw a suilang tuh thua khyh. Zuitu Paul nynh hynhte a la zei: “Nae khungnaw accingnaw e-lang ri bia te thyngku biate lah zungzae oh”. (Filipihae 2:12) Tuipi-ingnaw hynh masaty ryalaw thotakawnaw nynh thua. Thuasalama Zahova kalang pawtemou houhhouh na naekuh kho cih? E bakhianaw hynh e ccah-uh abalu nyathyanaw nynh yn phi pah cih.