Skip to content

Skip to table of contents

 ABALU CCANGKHEIH

Pachia Tuh A Hungmou?

Pachia Tuh A Hungmou?

1, 2. Ccungccaw hae nynh paw bakhianaw mou leih a khiathya hae?

IMUA hae hynh bya myarya leih a khiathya hae. Bya he a hothya takaw hae mawte e-hynh pawmou, khu-e soh pawmou cite leih a khiathya hae. Phi kho nawlang na zuaku ze mah zungzae tetuh zoi khyh. Zuaku te na phi pya hae ze mah “Pawkeiccumou?” cite bua ae khia maming cih hae.

2 Imua piccang laelei te bya leih ah khiathya oh. Ae lang paw kong tukhyhze lawku lang paw uh-ccaw vaenia kong mah a thua kho. Tukhyhze atushe hingnaw te malang she te asekuhpaw azicipaw bakhianaw mah a thua kho. Thuasalama e bakhianaw hae aphi hynh ny kho ung lang khyh cite ah tua oh zah aphi mah ah ccung ry vae khyh oh.

3. Ccugccaw patae nynh azicipaw bakhianaw aphi hynh ny kho ung lang khyh cite pawccemou a tua hae?

3 Ah khiathya oh paw azicipaw bakhianaw hae aphi kha Baebu kya ung tou? Thuasalama Baebu tuh thaethya myarya aru cite abang ccungccaw nynh leih ci hae. Baebu tuh pastor tukhyhze ccangpatu hae hanglang kyalya nynh a thua cite leih a tua hae. Abang ccungccaw hae tuh aphi khia lang paw kha mih mae a thya keiccuze aphi kha nyh kho vae khyh hae. Nang so pawte na tua?

4, 5. Ah hingnaw kya azicipaw bakhianaw hae tuh paw hae mou? Tuh-e hae kha pawccemou aphi ccung lang a ccang?

4 Na ny ry paw bakhianaw aphi kha na mue kho. Tousenawlangze, pawccemou laephi vaw lang ka hing? Ka chii vae ze pawlangmou ka tang cih? Pachia tuh pawcihhaw paw mou? Ccangpatu lungkhuze a min thanghuapaw Zisu nynh hynhte a ho: “ngia oh lah pya na thua cih oh; ccungoh lah na muih cih oh; khua oh lah thuakaw hungpya na thua cih oh.” (Matthai 7:7) Aluki-e bya hawte zuilang ze tuh aphi mue kho lang.

 5 Azicipaw bakhianaw hae aphi kha Baebu kya “pei na ccung” ze tuh na muih mamimg cih. (Phungtangbya 2:1-5) E aphi hae hynh thaethya myarya arupaw thua khyh. E aphi hae thaethyanaw nynh atulya ah hingnaw kya lungpawnaw yn pya kho, apiaze malang she kya mah ngae-ang lang ung paw ngaehoinaw mah yn pya. Ccungccaw patae hae nynh mih lungria a thaekhaeku hae paw bakhianaw ccangkheih kong hoku tua oh sih.

PACHIA TUH PE YN KITU PAW TOU, VAWSAW YN PYATU PAW TOU?

6. Cccungccaw abang nynh Pachia tuh pe yn ki khyh cite pawccemou a tua hae?

6 Ccungccaw patae nynh Pachia tuh pe yn ki leipaw nynh thua cite leih a tua hae. Pachia nynh pe yn ki ccahccing langze laephi vaw lang pung loku lang kha zaw a ccang cite leih a tua hae. Pawpaw kya mah rawdoukunaw, huakunaw, lungriathaenaw, cciinaw, ruunaw te chiinaw mawcci nynh ah muih vae oh. Abang nynh, ‘Pachia nynh pe yn ki ccahccing langze pawccemou riathae vawsawnaw hynh a zo sah khyh?’ leih ci hae.

7. (a) Bu piccang hae nynh Pachia tuh ruunaw yn tungsatupaw nynh thua cite pawtemou leih a ccangpya hae? (b) Ruunaw vawsawnaw ah tung oh paw hanglang Pachia hynh pawccemou seibe lang paw a thua khyh?

7 Pachia tuh ccungccaw tungvaw ruunaw yn tungsatupaw nynh thua cite bu piccang hae nynh leih a ccangpya hae. Ruunaw ccangkhakheih a tung vae hae ze Pachia rynaw nynh thua cite leih a ho hae. Hynhte tungpaw hynh Pachia nynh a rypaw cite a ho hae. Hynhte a ho hae paw tuh Pachia kha sei a be hae paw nynh thua. Thuasalama Baebu nynh Pachia tuh hoyleinaw ungsahtupaw thua khyh cite yn ccangpya. James 1:13 nynh lukhakheih hoyleinaw ccangkhakheih a tung vae ze Pachia nynh yn tung sah paw thua khyh cite yn ccangpya. Hynhte a ho: “Ruunaw vawsawnaw tuh ccungccaw nynh a tung vae hae ze, ‘Pachia nynh yn tuh-ou,’ cih nang hae sah. Pawccecize Pachia tuh hoyleinaw nynh tuh-ou kho khyh, te Pachia amaw nynh ze  mah hung sang mah tuh-ou boi khyh.” E asuilang tuh Pachia nynh hoyleinaw hae hynh a dae sah khyh ze mah a ung sah paw tuh thua khyh. (Job 34:10-12 ria.) Tousenaw kha do tua oh sih.

8, 9. Piaccahnaa ah tung oh paw hanglang pawccemou Pachia kha seibe leilang? Tousenaw ho tua.

8 Tousenawlangze ccangvaepaw tuh nungpaw hae ryte pyngkheih lang a ung hae cih oh sih. A paaw nynh myarya a sungsah, te ahoy lang te byapaekuthyanaw lang mah a ccangpya. Nya lang tuh ccangvaepaw nynh a paaw kha rawse zah inn kyate a toi kuh. Hoyleinaw a rae keiccuze vawsawnaw a tung vae. A ccapaw inn kyate a toiku paw kha a paaw nynh kang khyh, a ccapaw nynh vawsaw ruunaw a tung keiccuze a paaw kha seibe lang ccang tou? Ccang khyh! (Luka 15:11-13) Tuhawte Pachia mah ccungccaw hae nynh rawse lang te hoyleinaw rae lang a poku hae paw kha khe khyh. Tukeiccuze hoyleinaw ah tung oh paw hynh Pachia nynh yn tung sah paw thua khyh cipaw kha ning nang. Hoyleinaw ah tung oh keiccuze Pachia kha seibe nang oh sih.

9 Pachia nynh ah tung oh paw ruunaw a dae sah khyh naw paw akonglang a ung. Abalu 11 kya, e kong Baebu nynh a ho paw kha houh ny lang. Pachia nynh yn sungsah keiccuze piahccahnaa ah tung oh paw hanglang Pachia kha seibe nang. A thua, amaw Lukheih rou nynh yn phishing pah kho.—Isaiah 33:2.

10. Pachia nynh hoyleinaw miakaw a roh cih zah ahoy langte yn cyi pah thui vae cih cipaw pawccemou ah zynngang oh?

10 Pachia tuh athyaa. (Isaiah 6:3) Asuilang tuh Pachia tuh thyaa zah ahoypaw nynh thua. Tukeiccuze Pachia tuh zynngang a ung. Ccungccaw hae tuh tuhte thua khyh. Miming tuh a ccahccang vae ze hoyleinaw a rae hae. Thya hae haw hae zah aanaa ahoi hae paw uhtu hae nynh mah ccungccah hoylei hae paw keiccuze a langkuhpaw ruunaw hae kha a ung khyh nawlang yn cyi pah kho khyh hae. Ruunaw vawsawnaw miakaw hynh Pachia kyalya nynh a zo sah kho. Zo mah zungzae yng zo sah vae cih.—Sam 37:9-11 ria.

 VAWSAWNAW AH TUNG VAE OH ZE PACHIA PAWTEMOU A UNG?

11. Ah tung oh paw vawsawnaw hae hynh Pachia a thinlung pawtemou a ung?

11 Atulya laevaw lang a cyih kuh paw vawsawnaw hae hynh Pachia nynh a muih vae ze pawtemou a thinlung kya a ung? Baebu nynh, ‘Pachia tuh ading paw uccaw rou nynh a ry,’ cite a ci. (Sam 37:28) Tukeiccuze Pachia nynh amepaw te ame leipaw hynh pe myarya a ki. Hoyleinaw ah tung oh paw hynh Pachia nynh myarya a hua. Laevaw-e hoyleinaw hae hynh Pachia nynh a muih tuh ‘a ngae myarya a thah’ cite Baebu nynh a ci. (Genesis 6:5, 6) Pachia tuh rulae kuh khyh. (Malakhi 3:6) Pachia nynh pe yn ki ccahccing cite Baebu nynh a ci.—1 Piter 5:7 ria.

Zahova tuh atyng are hynh sungsahkunaw te Raetu nynh a thua cite Baebu nynh a ci.

12, 13. (a) Pawccemou sungsahkunaw ziazae ah hoi oh?, Vawsawnaw ah tung vae oh ze pawtemou ah ung oh? (b) Vawsawnaw te dingleinaw hae kha Pachia nynh yng zo sah cih cipaw pawcce zyn kho a thua?

12 Pachia nynh amaw muinsang lo lang te nynh yn rae cite Baebu nynh a ci. (Genesis 1:26) Ho ry paw tuh amaw nynh ahoipaw ziazae hae kha ah hoi bua oh cinawpaw nynh thua. Seinaw hoilei hae paw nynh vawsawnaw a tung vae hae ze na lung hoy khyh kha zaw, Pachia sahsing tuh a lung houh hoy vae lang khyh! Tuh-e tuh pawtemou ah ny oh?

13 Baebu nynh, “Pachia tuh sungsahkunaw nynh athua,” cite yn ccangpya. (1 Johan 4:8) Atyng are tuh Pachia sungsahnaw liate rae paw nynh thua. Tukeiccuze Pachia tuh sungsahkunaw ahoi hawte aening mah sungsahkunaw ah hoi bua oh. E hynh tua tua: Nang thungnaw, cyikhonaw na vah hoi langze laevaw-e vawsawnaw te dingleinaw hae kha na zo sah ry cih kha zaw? Ccungccaw hae kha na sungsah hae keiccuze na zo sah ry maming cih. Pachia soh pawtemou? Pachia tuh thungnaw ahoi, aening kha yn sungsah keiccuze vawsawnaw te dingleinaw hae kha yn zo sah pah maming cih. E ccah-uh a thonaw kya-e a ung paw bakingnaw hae hynh tuanaw huataw, ngaehoinaw huataw thua  khyh. Pachia bakingnaw hae tuh yng ccing maming cih! Thuasalama tuh-e bakingnaw hae yng ccing cih cipaw zyn kho nawlang bya yn king pakuh paw Pachia kong lang kha houh ny ahoo cih.

PACHIA NYNH AMAW KONG LANG KHA YN NY SAH RY

Lukhakheih te bang lang na tang ry lang ze na min kha zaw na ho pah kuh ty cih. Pachia nynh a min kha Baebu kya yn ho pyaku.

14. Pachia min tuh hungmou, tuh-e tuh pawccemou ny te mang ahoo?

14 Lukhakheih te vaeccaw na tangry lang thua ze, pawmou na cyih ty cih? Na min kha zaw na ho pah kuh ty cih. Pachia soh min hoi tou? Beihnaw patae hae nynh amaw a min tuh “Pachia” tukhyhze “Bawipaw” cite a ccangpya hae. Thuasalama tuh-e tuh a min thua khyh. Tuh-e tuh “siapharang” tukhyhze “president” cite sawtuanaw te konawpaw nynh thua. Tuhawte “Pachia” tukhyhze “Bawipaw” cipaw tuh min thua leite sawtuanaw te konawpaw te nynh a loku. Pachia min tuh Zahova nynh thua cite Baebu nynh a ci. Jeremiah 33:2 kya, ‘Atyng are rae zah atyng satu Pachia Zahova cite min ahoi paw,’ cite a zei kuh. Baebu kya Pachia min a vae 7,000 hang a zei kuh. Zahova nynh a min kha nyh hae sah, mang hae sah ci a ry. A min kha yn hopya ku keiccuze amaw te vaeccawku kho a thua.

15. Zahova cih kuh paw min asuilang tuh pawmou?

15 Zahova cipaw Pachia min tuh asuilang a ung. Asuilang tuh bya yn kinpyaku paw miakaw ccingsah kho zah a eenaw hae kha a cyih kho paw cipaw nynh thua. A eenaw a ccing  khyh nawlang pawpaw nynh mah khe kho khyh. Tuh-e min tuh Zahova kyalya nynh a hoi. *

16, 17.(a) “Athung huaccepaw”? (b) “Zungzae Siapharang”? (c) “Raetu”? cipaw hynh paw suilang mou?

16 Sam 83:18 kya Zahova kong hynhte a zei kuh: ‘Namaw kyalya rou nynh Zahova cite min hoipaw na thua zah Laephi pyngpi uhtu Ahang Huapaw na thuanawpaw kha ccungccaw hae nynh nyh hae sah.’ Byaphy 15:3 kya ze mah  hynhte a zei kuh: “Athung huaccepaw Bawipaw Pachia na ryalaw hae tuh lesae zah ngae-ang lang ung paw nynh thua; mithyaa hae siapharang, na ccianaw langpi hae tuh ding zah ah me.” “Athung huaccepaw” cipaw hynh Zahova Pachia tuh lesae zah a ccang paw hae lae ze athunghua cinawpaw nynh thua. “Zungzae siapharang” cipaw tuh Zahova Pachia rou nynh zungzae a tyng kho cinawpaw nynh thua. Sam 90:2 kya hynhte a zei kuh: ‘Laephi te mua hae na rae mawte zungzae te, athonaw athangnaw cite ung leipaw Pachia nynh na thua.’

17 Zahova rou nynh raetu a thua. Byaphy 4:11 kya hynhte a zei kuh: “Kae Bawipaw te kae Pachia! Nang tuh phu-enaw, minhooypyanaw, te huhang hoilangte aphupaw nynh na thua. Pawccecize nang tuh pawpaw balyng na raeza, na kawte raepaw te hingsapaw nynh athua, cite a ci.” Vaw lang ung paw mih te muih kho lei hae paw vawccungccaw hae, vawlang awsi hae, thingku rohku hae te rili kya-e ngahsaw hae miakaw thua sah—Zahova nynh arae!

 ZAHOVA TE VAECCAWKU KHO THUA TOU?

18. Pachia te bang lang tang kho ung lang khyh cite ccungccaw abang nynh pawccemou a tua hae? Baebu nynh soh pawtemou a ho?

18 Ccungccaw abang tuh ngae-ang lang ung paw Zahova ziazae hae kong yng nyh hae tuh rinaw thinlung yng hoi vae hae. ‘Pachia tuh thungnaw hoi zah ahanghua keiccuze Pachia te bang lang tang kho ung lang khyh, tukhyhze Pachia hanglang paw ccung mah ah kia lang khyh oh cite a tua hae.’ Tuh-te tuapaw tuh me tou? Me khyh. Zahova nynh yng nae kuh hae sah ci a ry. Baebu nynh, “Pachia tuh ccahccing ci ze hungte sang mah ah sawkuh khyh oh,” cite yn ccangpya. (Zuituhae 17:27) Pachia nynh yn nae kuh hae sah ci a ry, te amaw nynh hynhte bya yn king: “kae nae kuh ru cih oh.”—James 4:8.

19. (a) Pachia vaeccaw lang pawtemou thua kho lang? (b) Zahova a ziazae lungkhu ze paw ziazae kha mou na ry hua?

19 Pachia vaeccaw lang pawtemou thua kho lang? Zisu nynh hynhte a ho: “Zungzae hingnaw cipaw tuh amepaw Pachia namaw ny te na sawpaw Zisu Khrih ny kha nynh athua.” (Johan 17:3) Zahova te Zisu kong houh na nythyanaw lang pou ccangkuh. Teze tuh “zungzae hingnaw” na mue kho. Tousenawze, “Pachia tuh sungsahkunaw nynh a thua,” cite ah ccangku vae oh. (1 Johan 4:16) Thuasalama Zahova tuh accangpaw ziazae hoypaw patae a hoi ung. Baebu nynh, ‘lungsaenaw, thawccinaw, lungzinaw te phe beihpaw,’ cite a ho. (Exodas 34:6) Zahova tuh “ahoypaw thinlung te seinaw ngaeethya rynaw thinlung” a hoi. (Sam 86:5) Pachia tuh a lungsae zah lungzi paw nynh thua. (2 Piter 3:9; Byaphy 15:4) Baebu kya amaw kong ria te Zahova nynh ahoipaw ziazae hoypaw hae kong kha houh ccangkuh.

20-22. (a) Pachia tuh muih kho leipaw a thuakeiccuze pawtemou naeku kho lang? (b) Baebu na ccangkupaw kha abang nynh ccangkuh nang vae sah ci ae ry hae ze pawtemou na cyih cih?

20 Pachia tuh muih kho leipaw a thua keiccuze  pawtemou naeku kho lang? (Johan 1:18; 4:24; 1 Timote 1:17) Baebu kya Zahova kong nae ria tuh phe ung ccahccing paw pyng pyngkheih hawte nae nyh thya vae cih. (Sam 27:4; Romhae 1:20) Zahova kong houh na ccangku ze, amaw kha houh nae sungsah cih zah amaw te houh nae vaeccaw kuh kho vae cih.

Paaw nynh ccaaw kha a sungsah, thuasalama vawlang khua ung paw ah Paaw nynh yn sungsahnaw tuh houh ale hua

21 Zahova tuh ah Paaw nynh thua cipaw nae nyh thya cih. (Matthai 6:9) Amaw nynh hingnaw yn pya, apiaze hoyrarih te hing hae sah ci yn ry. Tuh-e tuh a ccaaw hae a sungsahpaw Paaw te nynh alo ku. (Sam 36:9) Baebu nynh Zahova te vaeccawku kho a thua cite yn ccangpya. (James 2:23) Atyng are Raetu Zahova nynh aening yn vaeccaw rypaw kha na mih maevaw kya ung sah ku tua!

22 Ccungccaw abang nynh Baebu ccangkuh nang vae sah ci ae ry cih hae. Bu yng paleih kuh zya cite mih thing a phang hae keiccu mah a thua kho. Thuasalama Pachia te ahoypaw vaeccawkunaw kha hunghung keiccuze mah ro sah nang. Amaw tuh na banghoy huapaw thua zah, zungzae vaeccawku kho a thua.

23, 24. (a) Na ccangku paw kong te asekuhte bakhianaw hynh pawccemou pei khia lang a ccang? (b) Malang abalu kya paw kong mou ccangku lang?

23 Baebu na ccangku takaw lya tuh na thaethya leipaw akong hae a ung kho. Zakawsangsakuh lah akonglang hae kha thaethyanaw lang maethya leite bungnaw ngia kuh. Imua hae hawte zakawsangsakunaw hoipaw tuh ahoypaw cite Zisu nynh a ci. (Matthai 18:2-4) Imua hae tuh bya akhiathya hae. Na ny ry paw aphi hae kha Pachia nynh ae ny sah ry. Tukeiccuze na thae hae paw akonglang kha amepaw bya ccahccing thua tou?, thua khyh tou? cipaw kha ahoyte Baebu te do khia.—Zuituhae 17:11 ria.

24 Zahova kong ccangkunaw ahoyhua paw langpi tuh Baebu ccangkupaw nynh thua. Baebu tuh accangpaw ccah-uh hae te lokuh khyh. E kong hynh malang abalu kya bua ccang ku lang.

^ par. 15 Na Baebu kya Zahova a cih kuh paw min a ungkhyhze pawccemou a ung khyh, te Pachia min asuilang te konaw roi konglang hae kha ny na ryze thawccinawte Piachihpaw 1 kya do.