Skip to content

Skip to table of contents

 ABALU CCANGTARYA

Pachia Penaw Cipaw Tuh Pawmou?

Pachia Penaw Cipaw Tuh Pawmou?

1. Paw a min thang paw sawsangnaw kong mou hoku lang?

CCUNGCCAW patae nynh a min thangpaw sawsangnaw kha Ah Paaw tukhyhze BAWIPAW sawsangnaw cite a ny hae. Zisu nynh a zuitu hae kha sawsangnaw zia a ccangpya hae lyaze e sawsangnaw hynh a mang. Paw hanglang mou saw a sang? Atunin aening hanglang soh tuh-e sawsangnaw tuh pawccemou abapi?

2. Zisu nynh paw abapi paw akong ccangthung hae hanglang mou sang lang yn ccangpya?

2 Zisu nynh hynhte a ho: “Tukeiccuze hynhte sawsang oh: ‘vawlangkhua ungpaw kaening Paw: Athyapaw na min tuh minhoy pya thua sah; na Penaw thua ccah vae sah; vawlang ze na rynaw rae a thua hawte laevaw lang ma rae bua thua sah.’” (Matthai 6:9-13 ria.) Zisu nynh tuh-e akong ccangthung hae hanglang pawccemou sang lang yn ccangpya?—Piachihpaw 20 kya do.

3. PachiaPenaw kong paw hae mou ny lang ahoo?

3 Pachia min tuh Zahova cite ah ccangku vae oh. Pachia nynh laephi te ccungccaw hae hanglang a eenaw tuh pawmou cipaw kong mah ah hoku vae oh. Thuasalama Zisu nynh, “Na Penaw thua ccah vae sah,” a cipaw tuh pawmou a ho ry? Pachia Penaw tuh pawmou, tuh-e Penaw nynh pawmou yn cyi pah cih, te tuh-e nynh Pachia min kha pawtemou a thyaa sah cih cipaw hae kong kha ccangku lang.

PACHIA PENAW CIPAW TUH PAWMOU?

4. Pachia Penaw cipaw tuh pawmou, te Siapharang soh a hungmou?

4 Zahova nynh vawlang accozah kha thahdyng sah  zah Zisu kha Siapharang lang a po vae. Baebu nynh kha-e accozah kha Pachia Penaw a ci. Zisu tuh “siangpahrang hae laku ze Siangpahrang, bawi hae laku ze Bawi a thua paw” nynh thua. (1 Timote 6:15) Zisu tuh a hung ccungccaw uhtu laeze mah rya a lah kho huapaw te a thunghua paw nynh thua.

5. Pawkyatemou Pachia accozah nynh yng uh cih? Paw hae kha mou yng uh cih?

5 Zisu tuh a thothui koute nin sungpalinaw khe vawlang bua a kaethui vae. Nyathya tuh, Zahova nynh amaw kha Penaw kya Siapharang rya a pya vae. (Zuituhae 2:33) Pachia accozah nynh vawlang te laephi pyngpi yng uh vae cih. (Byaphy 11:15) Tukeiccuze Baebu nynh Pachia Penaw kha “vawlang Penaw” a ci.—2 Timote 4:18.

6, 7. Hung ccungccaw siapharang hae lae ze Zisu nynh ahoyhua lang te pawmou yn cyi pah cih?

6 Zisu tuh hung ccungccaw siapharang lae ze alehua cite Baebu nynh a ci, pawccecize “amaw kyalya nynh a chih kho leipaw” a thua keiccuze nynh thua. (1 Timote 6:16) Ccungccaw uhtu hae miakaw hynh nyathya tuh pung a chih hae. Thuasalama Zisu tuh hotuh hotuh mah chih vae lang khyh. Atyngre hynh Zisu nynh zungzae ahoy lang te yn rae pah vae cih.

7 Baebu profeh bya nynh Zisu tuh daenaw te thawccinaw ahoipaw Siapharang nynh thua cipaw kha hynhte a hoty: ‘Hawnaw, tuathyanaw te rawthungnaw a pyatu paw muihsaw kha a tungvaw khe a ung cih. Tuh-e paw nynh Pachia raw kha a rih cih zah a mih nynh a muih thyhte a naw nynh a thae thyhte bya pae khyh zah bya pia khyh. Ryachi hae kha hoyte bya a pia pah cih hae zah noteih hae paw kha a pang khae cih hae. Laephi tuh a bya voithang te de a tah cih zah ccungccah hoylei hae paw kha a khahlang te a toi kuh paw bya te a theih cih hae.’ (Isaiah 11:2-4) E siapharang hynh na ry tou?

8. Zisu a mah khae te uh lang khyh cipaw pawtemou ah ny oh?

8 Pachia nynh vawlang accozah kya Zisu ryte a uh  kheih lang hae paw ccungccaw abang kha a po hae. Tousenawze, zuitu Paul nynh Timote kha “Aening a teing oh ze amaw ryte a uh bua cih oh. Amaw kha a vua oh ze a ning nynh mah aening kha yn vua cih” a ci pya. (2 Timote 2:12) Zisu te siapharang lang a tang kheih cih hae paw tuh lu hohzeih mou?

9. Zisu ryte luhohzeimou a uh kheih cih hae? Pachia nynh miming kha paw ccyh kya khate mou a la po hae?

9 Abalu 7 kya, zuitu Zawhan nynh vawlangkhua kya Zisu ryte siapharang lang a tang kheih cih hae paw 144,000 hae kong mangccang a muih paw kha ah ny vae oh. 144,000 hae tuh a hung hae mou? Zawhan nynh “mih terui kya a min te a Paaw min a zeikuh hae paw” cite a ccae sah. Te ‘Ccungccaw miakaw kyate miming kyalya nynh a po hae. Tuutaraw a ccianaw miakaw lang a zui hae paw nynh ah thua hae’ cite bua a ho chih. (Byaphy 14:1, 4 ria.) Zyntyng Khrihccaw 144,000 hae tuh Pachia nynh a po hae paw thua zah Zisu ryte “laephi ah uh cih hae paw” nynh thua. Miming tuh a chii vae hae ze muihsaw pyng te vawlang a thothui cih hae. (Byaphy 5:10) Zuitu hae she lya maw khate Pachia nynh 144,000 kya a uh bua cih hae paw zyntyng Khrihccaw hae kha a la po vae hae.

10. Zahova nynh Zisu te 144,000 hae kha laephi uhnaw kaw a pya hae paw tuh pawcce sungsahkunaw te pahccyngpaw a thua?

10 Zahova nynh Zisu ryte uh lang ccungccaw a po hae paw liate myarya pe yn ki cipaw ah ny oh. Zisu tuh aening lukheih raveih pung yn ny keiccuze uhtu hoypaw nynh a thua. Zisu tuh laephi ccungccaw a la thua boi keiccuze ah tung oh paw ruunaw kong hae kha pung a ny. Paul nynh Zisu kong kha, “Ah Silawtu Lupi tuh ah nyaanaw oh oun ny pah leipaw silawtu thua khyh. Ah maw hawte tounaw a ingpaw ah Silawtu Lupi nynh a thua,” cite a la ho. (Hebruhae 4:15; 5:8) 144,000 hae mah ah tung oh paw ruunaw konglang pung a nyh bua  hae paw nynh thua. Miming mah a ccing lei hae paw te cciihawnaw a tung bua kalang hae paw nynh thua hae. Tukeiccuze Zisu te 144,000 hae nynh ah tung oh paw ruunaw hae kha yn ny pyathya hae apiaze ahoy lang te mah yn phishing pah vae cih hae cite ah zyn kho oh.

PACHIA PENAW NYNH PAWMOU YN CYI PAH CIH?

11. Zisu nynh a zuitu hae kha vawlangkhua a rynaw ccing hawte laevaw lang mah Pachia rynaw ccingnaw lang pawccemou saw a sang sah hae?

11 Zisu nynh a zuitu hae kha vawlangkhua a rynaw ccing hawte laevaw lang mah Pachia rynaw a ccingnaw lang saw a sang sah hae. Pawccemou? Abalu 3 naw kya Setan nynh Zahova a rawsenaw kong kha ah ccangku vae oh. Setan nynh a rawse ze mah Zahova nynh amaw te vawccungccah hoylei hae paw, muihsaw hoylei hae paw kha vawrang kya sohsoh taraw bua la ung sah ung hae. Tukeiccuze vawlangkhua a ung hae paw miakaw nynh Pachia rynaw a lah hae cipaw thua khyh. Abalu 10 naw kya Setan te muihsaw hoylei hae paw kong kha bua ccangku lang.

12. Byaphy 12:10 kya paw azicipaw kong ccangning mou azei kuh?

12 Pachia Penaw kya Zisu Siapharang lang he a tang tetuh a romawze Setan kha a dou vae cih cite Baebu nynh yn ccae sah pya. (Byaphy 12:7-10 ria.) Adihpaw 10 kya myarya azicipaw akong ccangning a zei kuh. Pachia Penaw kya Zisu Khrih tuh Siapharang lang tang vae zah Setan tuh vawlangkhua te laevaw lang vua a thua vae. Kha-e akong hae kha phe a ccing kou vae cipaw kong kha bua ccangku lang.

13. Setan laevaw lang vua a thua tetuh vawrang kya pawtemou a ung vae?

13 Baebu nynh Setan te muihsaw hoylei hae paw kha laevaw lang vua a thua kou tetuh vawccungccaw hae tuh mih lung myarya a tua vae cite a ci. Baebu kya, “Tukeiccuze vaw hae te tuinkya ung hae paw balyng nae lungtua  sah!” a cipaw kha ah ria oh. (Byaphy 12:12) Vawrang tuh daenaw a ung vae, pawccecize Pachia lungry a tung hae paw kyalya nynh ung vae hae.

Setan te muihsaw hoylei hae paw kha laevaw lang vua a thua hae tetuh ruunaw houhhouh a lung vae. Thuasalama a romaw e ruunaw hae hynh yng thang vae cih

14. Setan kha vawlang te vua a thua vae keiccuze laevaw lang pawmou a cyih ku?

14 Thuasalama laephivaw tuh houhhouh ruunaw mawcci vae. Ccungccaw hae hynh ruunaw mawcci nynh ah tung vae oh. Pawccecize Baebu nynh “Setan tuh nae kalang oun thua vae za a thin myarya ria, pawccecize ccyh dyngtari kyalya nynh ka hoi vae cipaw a ny keiccu nynh a thua” cite a ci. (Byaphy 12:12) Setan tuh vawlang te vua thua vae zah a romaw ze yn ro vae ngaw cipaw a nyku keiccuze a thin myarya a ria. Tukeiccuze laephivaw riathae vawsawnaw, cciihawnaw miakaw balyng hynh Setan nynh houhhouh a lung sah vae.

15. Laevaw lang Pachia eenaw tuh pawmou?

15 Thuasalama laephi hanglang Pachia eenaw tuh rulae kuh khyh. Laephi Paradais kya ccungccaw hae hynh a ccingpaw hingnaw te zungzae hing hae sah ci a ry ung. (Sam 37:29) A thualangze Pachia Penaw nynh a eenaw kha pawtemou yng ccing sah cih?

16, 17. Daniel 2:44 nynh Pachia Penaw kong pawtemou a ho?

16 Daniel 2:44 kya Profeh bya hynhte a ung: ‘Tuh-e siapharang hae she kya khe vawlang Pachia nynh Penaw ccangkheih a rae cih zah tuh-e Penaw tuh hohtuh hohtuh mah roh lang khyh. Tuh-e Penaw tuh ccungccaw hae kalang mah nue lang khyh. E Penaw balyng tuh pung a roh kou cih zah pung a thang sah vae cih. Thuasalama tuh-e Penaw kha tuh zungzae te a tyng cih.’ E hoty paw bya nynh Pachia Penaw te a sekuhte pawmou yn ccangpya?

17 Ccangkheihnaw, Pachia Penaw tuh “tuh-e siapharang hae she kya” a uh vae cite a ho. A suilang tuh laephi uhkunaw ccyh lya khe Pachia Penaw tuh a tho bia vae cinawpaw nynh thua. Ccangningnaw, Pachia Penaw  tuh zungzae atyng cih zah accozah ccangpaw nynh uh vae lang khyh. Ccangthungnaw, Pachia Penaw te laephi accozah hae tuh raw adou kuh cih hae. Pachia Penaw nynh phe a tae cih zah laephi a uh cih paw accozah ccangkheih kyalya nynh a thua vae cih. Te, ccungccaw hae tuh ahoyhua paw uhkunaw kya a hing vae cih hae.

18. Pachia Penaw te laephi accozah hae a tukuh cih hae paw nyathya rawpi min tuh paw cih kuh mou?

18 Pachia Penaw nynh laephi uhkunaw hae hynh pawtemou yng cyih cih? Nyathya kou-e Armakeddon rawpi a thomaw tuh, “Athung Huaccepaw Pachia kya-e kha-e alesae paw nin kya rawtuhkunaw kalang minming kha suelua khylang minming tuh laephi te laephipi kya a ung hae paw siapharang’ae kalang khe a cceih’aê.” Tuin kya, Pachia Penaw te laephi accozah hae tuh raw yng tukuh cih hae.—Byaphy 16:14, 16; Piachihpaw 10 kya do.

19, 20. Laephi hynh Pachia Penaw nynh uh lang pawccemou ahoo?

19 Pawccemou Pachia Penaw ah hoo oh? Ah hoonaw oh akong ccangthung a ung. Ccangkheihnaw, aening tuh seinaw ah hoi oh keiccuze cciinaw te chiinaw ah tung oh. Thuasalama Baebu nynh Pachia Penaw kya vae tuh zungzae hing lang vae a ci. Kha-e kong kha Johan 3:16 kya hynhte a ho: “Pawccecize Pachia nynh laephi hynh eih a sungsah keiccuze ahoithypaw a Ccapaw oun pya zah amaw a zynpaw miakaw tuh chih vae lang khyh hae zah zungzae hingnaw a hoi cih hae” a ci.

20 Pachia Penaw ah hoonaw oh akong ccangningnaw tuh ccungccah hoylei hae paw laevaw lang a ung hae keiccu nynh thua. Ccungccaw a lunghua tuh ka hyng kaleih, ling lang phe lang te nynh a seku hae. Tuh-e ziazae hae tuh aening nynh a zo sah kho lang khyh oh, thuasalama Pachia nynh tuh a zo sah kho cih. Ccungccah hoyleipaw miakaw kha Armakeddon kya pung a roh vae cih hae. (Sam 37:10 ria.) Akong ccangthungnaw tuh uhtu hae nynh laephi hynh kou hoy lang te uh kho khyh hae,  arero hae, mih ziazae ahoy khyh hae keiccu nynh thua. Uhtu hae nynh ccungccaw hae kha Pachia bya ngae lang mah bung ry khyh hae. Baebu nynh ‘lukheih te lukheih hoynaw ro pyaku lang te a uhkunaw hae ccyh nynh thua’ a ci.—Phunghotu 8:9

21. Penaw nynh Pachia rynaw kha laevaw lang pawtemou yng ccing sah cih?

21 Armakeddon kou tetuh, Pachia Penaw nynh laevaw lang Pachia rynaw kha yng ccing sah vae cih. Tousenawze, Setan te muihsaw hoylei hae paw kha yng zo sah vae cih. (Byaphy 20:1-3) Nyathya kou tuh hunghung mah cciihawnaw chiinaw ci ung vae lang khyh. Sawnawme liate zyn atyng hae paw miakaw tuh Paradais kya zungzae hingnaw a mue vae cih hae. (Byaphy 22:1-3) Penaw nynh Pachia min kha phu-enaw yng ung sah vae cih. Tuh-e tuh pawmou a ho ry? A ho ry paw tuh Pachia accozah nynh laephi yng uh tetuh, ccungccaw hae nynh Pachia min Zahova kha aphu yng e sah vae cih hae.—Piachihpaw 21 kya do.

ZISU TUH HOTUH KHEMOU SIAPHARANG LANG A TANG?

22. Zisu a thothui koute Siapharang palou tang khyh cipawtuh pawtemou ah ny oh?

22 Zisu nynh a zuitu hae kha, “Na Penaw thua ccah vae sah,” cite saw a sang sah hae. Tukeiccuze Pachia Penaw tuh malang a cyih kuh lang paw nynh a ho ry. Zahova  nynh accozah kha masaty a tyng sah cih zah Zisu kha Siapharang lang a tang sah cih. Zisu tuh vawlang he a kae te Siapharang lang palou tang vae tou? Tang loh khyh, a ccyh nynh a ngaw ung. Zisu a la thothui kou tetuh, Piter te Paul nynh Sam 110:1 kya-e profeh bya tuh Zisu kya a ccing vae cite a la ho hae. Zahova nynh a la ho paw bya tuh, “Na raw hae kha na ccu zakaw ka naung maw lae zung ka rang lang hing ha ung tua,” cite nynh thua. (Zuituhae 2:32-35; Hebruhae 10:12, 13) Zisu nynh Siapharang lang a tang cihnaw a ccyh kha hohse rya mou ngaw ahoo?

Pachia Penaw nynh Pachia a rynaw kha laevaw lang yng ccing sah vae cih

23. (a) Pachia accozah kya Zisu tuh hotuhkhe mou Siapharang lang a tang? (b) Malang abalu kya paw kong mou ccangku lang?

23 1914 kum hynh Profeh bya lungkhuze azicipaw kum nynh a thua cih cipaw kha amepaw Khrihccaw hae nynh a la ny hae. 1914 kum kya-e a cyihkuh paw nynh ame ccaccing cipaw a lang sah. Kha-e kum kya khe Zisu tuh Siapharang lang a la tang vae. (Sam 110:2) Siapharang lang a tang kou tetuh Setan kha laevaw lang hing a saw bung vae. Tetuh Setan nynh “ccyh dyngtari kyalya nynh ka hoi vae” cipaw a ny. (Byaphy 12:12) Malang abalu kya tuh ah hing lungkhu ah langkuh paw syntawnaw kong hae te a romaw laevaw lang Pachia Penaw yng thua vae cih cipaw kong hae kha bua ccangku lang.—Piachihpaw 22 kya do.