Skip to content

Skip to table of contents

 ABALU HAWLAENING

Pachia Vaeccaw Lang Pawtemou Tang Kho Lang?

Pachia Vaeccaw Lang Pawtemou Tang Kho Lang?

1, 2. Zahova vaeccaw hae abang tuh hung hungmou?

PAWTECIHPAW ccungccaw temou na vaeccawku ry? Lukhakheih te vaeccawku na ry maming cih. Nae lung a lokuh paw ccungccaw te nynh na vaeccawkuh ry cih. Tuh-e paw tuh thawccinaw ahoi, kha-e a ziazae kha a phu na te sah maming cih.

2 Zahova Pachia nynh ccungccaw abang kha a vaeccaw lang a la poku hae. Tousenawze, Abraham tuh Zahova vaeccaw lukheih nynh a la thua. (Isaiah 41:8; James 2:23) David mah Zahova vaeccaw nynh a la thua bua. Zahova nynh David kha “ka sungsapaw thuaza ka lawsah rypaw balyng a la langpaw nynh a thua” cite a la ci. (Zuituhae 13:22) Te profeh Daniel mah Zahova hanglang “myarya aphutepaw” nynh a la thua.—Daniel 9:23.

3. Abraham, David te Daniel hae tuh Zahova vaeccaw lang pawccemou a la tang hae?

3 Abraham, David te Daniel hae tuh Zahova vaeccaw lang pawtemou a la tang hae? Zahova nynh Abraham kha, ‘nang nynh ka kawbya na ngae keiccu nynh thua,’ a la ci. (Genesis 22:18) Zakawsangsaku te kaw ngae hae paw tuh Zahova vaeccaw lang a tang hae. Minphuin phuin kheih hae mah Zahova vaeccaw lang a la tang kho hae. Zahova nynh Israel minphuin hae kha, ‘Ka kawbya kha na ngae oh ze, nae Pachia ka thua cih zah naening mah ka ccungccaw hae lang na tang cih oh,’ a ci pya hae. (Jeremiah 7:23) Tukeiccuze a vaeccaw lang na tang ry ze nang mah Zahova kawbya ngae lang solei ahoo.

ZAHOVA NYNH A VAECCAW HAE KHA A THUNGKHAW HAE

4, 5. Zahova nynh a vaeccawkuh hae paw kha pawtemou a thungkhaw hae?

4 Baebu nynh, ‘Zahova mih tuh laephi pyngpi kha pung  muih kou zah ccaenaw ung leipaw ccungccaw hae tungvaw khe a thungnaw kha a lang sah,’ a ci. (2 Sherianaw 16:9) Sam 32:8 kya, Zahova nynh a vaeccaw hae kha, ‘Na zui lang paw langpi kha kae muih sah cih, kae ccang pah cih zah tuanaw kae pya cih,’ cite bya a la king hae.

5 Thungnaw hoipaw raw hae nynh Pachia te vaeccaw lang ah tang oh paw kha roh sah ci ary cih hae. Thuasalama Zahova nynh aening kha yn thungkhaw ry. (Sam 55:22 ria.) Zahova vaeccaw hae nynh tuh amaw rya kha thinlung ccahccing te nynh lawlang. Pawcih hawpaw ruunaw tung ze mah amaw tungvaw kya zyn vahryng tyng lang. Te Sam sazaepaw hawte zynnaw hoi lang. Zahova kong kha, ‘amaw tuh ka ranglang khe a ung keiccuze, pawpaw raw mah ka rih lang khyh,’ cite a la zei. (Sam 16:8; 63:8) Setan nynh Pachia te vaeccaw lang ah tang oh paw kha ro lang pawtemou a zuaku?

SETAN SEIBENAW

6. Setan nynh Pachia kha pawtemou sei a be?

6 Abalu 11 naw kya Setan nynh Zahova a rawsenaw, Zahova tuh hyngbya hopaw, ading leipaw cite sei a benaw kong kha ah ccangku vae oh. Adam te Evua nynh athah ahoy phiathyanaw mangte mimaw te mimaw pokunaw kaw hoi khyh hae. Job Baebu ccah-uh nynh mah Pachia vaeccaw lang a tang ry hae paw ccungccaw hae kha Setan nynh sei a la benaw hae kong yn ccangpya. Ccungccaw hae nynh Pachia kha sungsah hae zah a ryalaw hae paw thua khyh, hoynaw a pya hae keiccu nynh a rya a law hae cite Zahova kha sei pei a be. Setan nynh ccungccaw miakaw Pachia kha rawse hae sah ci a ry. Zawbah kyate pawmou lawku lang paw a ung cipaw te Zahova nynh amaw kha pawtemou a thungkhaw cipaw kha do tua oh sih.

7, 8. (a) Zawbah tuh minccang paw hae te pawccemou a loku khyh? (b) Zawbah te asekuhte Setan nynh paw bya mou a ho?

7 Zawbah tuh a hungmou? Amaw tuh athang vaepaw kum 3,600 lae kya a la hingpaw ccungccah hoypaw nynh thua. Laephi vaw kya amaw te a lokuh paw hung  ccungccaw mah ung khyh cite Zahova nynh kha-e ccyh lya ze a la ho. Zawbah tuh Pachia kha saw myarya tua zah, hoyleinaw miakaw kha a la hua. (Job 1:8) Zawbah tuh Zahova a vaeccaw ccahccing nynh a thua.

8 Zawbah nynh Pachia rya a law ry paw thinlung kha Setan nynh sei a la be. Setan nynh Zahova kha, ‘Na maw nynh amaw te a inn, ahoipaw uhccaw hae balyng kha kudu pya hawte na du pah khyh tou? A rya lawnaw kha hythua na pya zah a tuu te a vaetua hae, a saring hae tuh patae a pungthung vae hae. Atu vae tuh na kuih kha thua lah ahoipaw a uhccaw hae kha ty tua? Na malang ccahccei maw solei ae vua cih,’ cite a ci.—Job 1:10, 11.

9. Zahova nynh Setan kha paw cyi lang mou kaw a ua?

9 Setan nynh Zahova kha Zawbah nynh na rya a law paw tuh hythua na pya keiccu nynh thua cite sei a la be. Setan nynh Zawbah kha Zahova rya lah nang vae sah cite pei a tuh-ou. Zahova nynh Zawbah kha myarya a sungsah keiccuze Setan nynh ruunaw a pya lang paw kha ry khyh, thuasalama Zahova nynh a vaeccahpaw Zawbah kha tuh-ou lang kaw a ua.

SETAN NYNH ZAWBAH KHA A TUH-OU

10. Setan nynh Zawbah kha pawtemou tuh-ou zah Zawbah nynh so pawtemou a lia ru?

10 Ccangkheihnaw, Setan nynh Zawbah a saring awvaw hae kha marya a chii sah pya. Tukoute Setan nynh Zawbah a see hae balyng kha a lunghua a chia pya hae. Zawbah tuh a hoipaw uh-ccaw hae kha marya a shung vae. Nyathya tuh, Setan nynh Zawbah a ccaw hae luhaw kha khise tho sah te a chii sah pya hae. Thuasalama Zawbah nynh Zahova kya zyn vahryng a tyng. ‘Hynhte a tung ze mah, Zawbah tuh sei lae khyh, Zahova kha mah sei sah khyh.’—Job 1:12-19, 22.

Zawbah tuh zyn atyng keiccuze Zahova nynh hythua a pya

11. (a) Setan nynh Zawbah kha pawtemou bua a cyi? (b) Zawbah nynh pawtemou a lia ru?

11 Setan nynh ung taw khyh. Zahova kha rawse te hynhte a ho: ‘Aru te asaw kha ty tua, atu na mahlang ccahccei maw solei ae vua cih.’ Tetuh Setan nynh Zawbah kha a pyng balyng kya vaethya cciinaw a kae sah vae. (Job 2:5, 7) Thuasalama  Zawbah tuh Zahova tungvaw kya zyn a la tyng maming. ‘Ka dingnaw kha ka chii nin cia ka vua boi lang khyh’ cite a ho!—Job 27:5.

12. Setan tuh hyngbya hotu cipaw Zawbah nynh pawtemou a la lang sah?

12 Setan nynh sei abenaw kong tukhyhze ruunaw hynh pawccemou ka tung cipaw konglang kha Zawbah nynh la nyh khyh. Zahova maw nynh ruunaw hae hynh yn tung sah cite a la tua. (Job 6:4; 16:11-14) Tuthuazema, Zawbah tuh Zahova tungvaw zyn vahryng a la tyng. Rary mamaw la ung khyh. Zawbah tuh amaw hanglang kyalya tuakuh khyh. Zawbah nynh Zahova kha vahryng a sungsah keiccuze Pachia vaeccaw ccahccing thua zah Setan seibenaw tuh me khyh a hyngpaw cipaw kha a lang sah!

13. Zawbah nynh zyn atyng keiccuze paw hoynaw mou a mue?

13 Zawbah nynh vawlangkhua pawtemou a la cyiku cipaw a ny khyhzema, Setan tuh mihoy leipaw nynh thua cipaw kha lang sah zah Zahova tungvaw zyn vahryng a la tyng. Zawbah tuh zyn vahryng atyng keiccuze Zahova nynh hythua a pya.—Job 42:12-17.

NANG MAH SETAN NYNH SEI AE BE

14, 15. Nopi pise miakaw tungvaw Setan seibenaw tuh pawmou?

14 Zawbah kya a cyih kuh paw kyate azicipaw lawku lang paw na ccangkuh kho. Atushe ze mah hoynaw mue a ry hae keiccuze nynh Zahova rya a law hae cite Setan nynh sei pei yn be. Job 2:4 kya Setan nynh, ‘Ccungccaw nynh a hingnaw hanglang hinghe ahoipaw uhccaw kha tuh a hysah ngawrei nyng,’ cite a ci. Tukeiccuze Setan nynh Zawbah kyalya thua leite, nopi pise miakaw sei marya yn be kou. Zawbah a chih koute kum a zalu a ro tuh, Zahova kha theihrya te a rya lahtu hae kha sei a be hae. Tousenawze Phungtangbya 27:11 kya, hynhte ah ria oh: ‘Ka ccahpaw, haw la, yn saryatupaw bya ka leih kho nawlang ka lung kha yng paw sah.’

15 Zahova kaw ngae lang te a vaeccaw lang tanglang na pokuh kho, tuhte na poku ze Setan tuh lingtu nynh thua cipaw na lang sah paw nynh thua. Zahova vaeccaw lang na  tang kho nawlang na hingnaw kya myarya lepaw rulaeku mah ahoo cih, tuhte cyi paw tuh ahoyhua paw bapaekunaw nynh thua! E bapaekunaw tuh myarya azicipaw nynh thua. Piahccahnaa tung ccyh vae ze Pachia tungvaw na zynnaw tyng kho lang khyh cite Setan nynh ae ci. Aening kha Pachia kya zyn ah tyng khyh nawlang oh a phuinphuin te a zuaku. Pawtemou a zuaku?

16. (a) Zahova rya law khyh nawlang Setan nynh a mangpaw zia hae tuh pawmou? (b) Zahova rya na law khyh nawlang Setan nynh pawtemou leih a zuaku?

16 Pachia vaeccaw lang ah tang oh paw kha ro nawlang Setan nynh langpi a phuinphuin kha a mang. Tupiaze ‘Setan tuh teilang cite a khiakuhpaw chiadeih hawte a khiaku.’ (1 Piter 5:8) Tukeiccuze Baebu na ccangkuh zah na ny paw zuilang na zuakupaw kha na vaeccaw hae, na innbyng hae te mingccangpaw hae nynh ae rawse hae paw kha na ngae na ang thua nang sah. Rawsenaw mah na tung kho. * (Johan 15:19, 20) Setan tuh “awnaw vawhae hawte” a rulaekuh kho. Tukeiccuze aening kha Zahova kya zyntyng khyh nawlang a phuinphuin te a zuaku. (2 Korinhae 11:14) Aening tuh ah hoy khyh oh keiccuze Zahova rya lawlang ah ngaekuh khyh oh cite yn tua sah zah Pachia rya ah law khyh nawlang oh a ccahccang paw zia mangte a zuaku.—Phungtangbya 24:10.

ZAHOVA A KAWBYA HAE KHA NGAE

17. Zahova kawbya kha pawccemou ah ngae oh?

17 Zahova bya ah ngae oh paw nynh Setan kha lingtu nynh thua cipaw ah langsah oh paw nynh thua. A kawngaenaw lang pawnynhmou yn bung cih? Baebu nynh hynhte a ho: ‘Zahova kha na thinlung balyng te, na hingnaw balyng  te, na thawzung balyng te na sungsah cih.’ (Deuteronomi 6:5) Zahova ah sungsah oh keiccuze a kaw ah ngae oh. Zahova ah sungsahnaw oh kha ah lesathung oh ze tuh amaw nynh yn law sah ry paw miakaw kha law rynaw thinlung ah hoi vae cih oh. Zuitu Zawhan nynh hynhte a zei: “Pawccecize Pachia sungsah cipaw tuh a kawpyapaw’ae kha aening nynh ah zui oh paw hynh nynh thua. Te a kawpyapaw’ae tuh phuripaw thua khyh.”—1 Johan 5:3, BI.

18, 19. (a) Zahova nynh a hua hae paw ahoy leipaw ziazae abang tuh paw hae mou? (b) Zahova nynh e tuh cyih oh, e tuh cyih nang oh cite hotuh mah yn cih boi khyh cipaw pawtemou ah ny oh?

18 Thuasalama Zahova nynh a huapaw te ahoy leipaw ziazae abang tuh paw hae mou? Tousenaw abang tuh “ Zahova nynh a hua hae paw” a cih kuh paw aki kipali kya a ung. Ccangkheihnaw, abang tuh eih mah sei lang khyh cite mah na tua kho. Thuasalama Baebu na ria zah kha-e konglang nae tua tuh, Zahova kaw ngaepaw tuh hawnaw nynh thua cipaw nae thaethya vae cih. Tetuh kae mah ka hingnaw kya rulaeku ahoo cih cipaw nae nyh vae cih. Tuhte rulaeku lang  a ru ccyh mah a ung cih, thuasalama na rulaeku lang ze daenaw te lungpawnaw na mue cih zah zyntyng paw Pachia abang lukheih lang nae tang vae cih. (Isaiah 48:17, 18) Rulaeku kho a thua cipaw pawtemou ah ny oh?

19 Zahova nynh e tuh cyih oh, e tuh cyih nang oh cite hotuh mah yn cih boi khyh. (Deuteronomi 30:11-14) Bang hoypaw nynh tuh amaw te amaw ah nyku oh paw laeze yn ny pya hua hae. Ah cyi khonaw oh te ah nyaanaw oh kha mah yn ny pya hae. (Sam 103:14) Zuitu Paul nynh, ‘Pachia nynh tuh a bakingnaw kha zungzae ccing sah zah na te-ing kho lei oh ciate tuh-ounaw tuh thua sah lang khyh; tuh-ounaw nah tung ccyh lya oh khe na te-ing kho nawlang oh paw thawzung ae pya cih oh zah, te na lue kho nawlang ohpaw langpi ae sah pah cih oh,’ cite thaw yn pya. (1 Korinhae 10:13) Ahoypaw rya law kho nawlang Zahova nynh thawzung yn pya cih cipaw zynngang a ung. Ruunaw ccyh kya ing kho nawlang amaw nynh ‘huataw lae a thunghuapaw’ te ae bung cih. (2 Korinhae 4:7) Zahova nynh tuh-ounaw a tung lya a bung kou kha te, Paul nynh, “Khrih nynh oun  pyapaw thawngnaw thungte pawcihawpaw zema tae khonawpaw thawzung ka hoi vae,” cite a ho.—Filipihae 4:13.

PACHIA NYNH A RY PAW HAE KHA RY BUA

20. Paw ziazae kha mou dosuin ku lang, pawccemou?

20 Zahova vaeccaw lang ah tang ry oh ze, Zahova nynh a hua hae paw kha sihaeku lang, apiaze tuhlaelang houh law chih leilang vae. (Romhae 12:9) Pachia nynh a sungsah paw kha a vaeccah paw nynh tuh a sungsah bua cih. Miming kong kha Sam 15:1-5 kya a ho. (Ria.) Zahova a vaeccaw nynh tuh Pachia a ziazae hae kha dosuinku lang a ccang, te “sungsakunaw, lungtuanaw, daenaw, ngaesangnaw, thawccikunaw, hoynaw, zynlangte ungnaw, zakawsangsakunaw te amaw te amaw taeku khonaw hae” kha lang sah lang a ccang.—Galatihae 5:22, 23.

21. Pachia nynh a rypaw ziazae kha pawtemou na lang sah kho cih?

21 Paw ahoypaw ziazae kha mou lang sah lang, pawtemou ccangku kho a thua? Zahova kha na sungsathya nawlang Baebu kha riate a ccyh merarih lang bangbang na khingkhia ahoo cih. (Isaiah 30:20, 21) Tuhte na cyi naw liate Zahova na sungsahnaw kha houh yng lethung cih, na sungsanaw houh yng lethung vae tetuh a kawbya kha mah houh nae zui ry vae cih.

22. Pachia kawbya ngae lang ze paw lasung mou mue lang?

22 Ah hingnaw kya ziazae rulaeku paw kha uhccaw ryngpaw kha vua te uhccaw thawpaw lawkupaw te nynh a touse. Baebu nynh, “ziazae ryngpaw,” kha vua te “hingnaw thawpaw” kha lawku ahoo cite a ci. (Kolosehae 3:9, 10) Tuhte cyi lang paw tuh a zoipaw thua khyh, Zahova kaw ngae te ah ziazae ah rulaeku oh ze tuh, Pachia nynh aening kha ‘myarya a lepaw hythuanaw’ kae pya cih oh cite bya yn king pyaku. (Sam 19:11) Zahova kaw ngaelang na poku ze, Setan tuh lingtu cipaw langsah naw paw nynh thua. Na thinlung ccahccing te Pachia rya na lawlang ze tuh malang she kya lasung na mue cih. Tukeiccuze namaw hanglang kyalya tuakuh nang. Tuhte ze tuh Pachia vaeccaw ccaccing lang nae tang vae cih!

^ par. 16 Baebu na ccangku paw kha ccangkuh nang vae sah cite ae cih paw ccungccaw hae miakaw kha Setan nynh a mang hae paw thua khyh. Thuasalama amaw tuh “e laephi pachia thahpaw” te “laephi balyng tuh Setan nynh” a uh paw nynh thua. Zahova rya ah law khyh nawlang oh ccungccaw abang nynh a zuaku hae paw kha ngae-ang thua lang paw thua khyh.—2 Korinhae 4:4; 1 Johan 5:19.