Skip to content

Skip to table of contents

 ABALU CCANGTAKUA

Laephi She Thangnaw Nae Vae Tou?

Laephi She Thangnaw Nae Vae Tou?

1. Malang she kong kha paw kyatemou ny kho lang?

CCAHDINGCCAW na ria na do vae ze, ‘Hoyleinaw mawcci kha zaw na muih hua? E laephi vaw kya-e ngaethya lungronaw te hoyleinaw houhhouh a lung keiccuze abang ccungccaw hae tuh laephi she hynh thangnaw a nae vae cite a zyn hae. Tuh-e tuh me tou? Malang she kya pawmou yng cyih kuh cih cipaw ny kho naw ung tou? A ung. Malang yng cyih kuh lang paw hynh hung ccungccaw nynh mah ny kho ung khyh ze mah Zahova Pachia nynh tuh phe a ny kou. Laephi te ah malang she kya yng cyih kuh langpaw kong kha Baebu kyate yn ho pya.—Isaiah 46:10; James 4:14.

2, 3. Zisu zuitu hae nynh pawmou la ny ry hae, te Zisu nynh pawtemou a phi pya hae?

2 Laephi she thangnaw kong Baebu kya ah ria vae oh ze, a ho ry paw tuh, laephi sasaw kha thua leite laevaw hoyleinaw hae a ro lang paw kha nynh thua. Zisu nynh ccungccaw hae kha laephi hynh Pachia Penaw nynh yng uh cih cite a la ccangpya hae. (Luka 4:43) A zuitu hae nynh Pachia Penaw yng thua lang paw ccyh kha a ny ry hae keiccuze Zisu kha hynhte a la khia hae: “Hynh e hynh hotumou nae hopya hawte oun cyikuh cih? Nae thua nawlangpaw ccyh te she thang nawlangpaw hynh muisanaw pawmou oun cyih kuh cih?” (Matthai 24:3) Zisu nynh a ccyh kha tuh hopah khyh hae, thuasalama laephi she a thangdyng ze yng cyih kuh lang hae paw kha a ho pya hae. Zisu a la hopaw kha atunin ccyh kya a cyih kuh paw a ung vae.

3 E abalu kya laephi she thangnaw ccyh kya nynh ah  hing vae oh cipaw kha hoku tua oh sih. Ccangkheihnaw, vawrang kya raw la thonaw nynh laephi vaw hoyleinaw pawccemou a ung sah cipaw thaethya kho nawlang ccangku ah hoo oh.

VAWLANG RAWTUKUNAW

4, 5. (a) Zisu Siapharang lang a tang koute vawrang kya pawmou a la cyih kuh? (b) Byaphy 12:12 nynh a ho hawte, Setan laevaw lang vua a thua tetuh pawmou a cyih kuh vae?

4 Abalu 8 kya 1914 kum kya Zisu tuh vawlang khua Siapharang lang a tang vae cipaw kha ah ccangku vae oh. (Daniel 7:13, 14) Pawmou a cyih kuh cipaw kha Byaphy kya hynhte yn ho pya: ‘Vawlang kya rawdoukunaw a ung. Mikhael [a suilang, Zisu] te a vaw hae nynh fupi [Setan] te muihsaw hoylei hae paw tuh raw a doukuh hae.’ * Te Setan te muihsaw hoylei hae paw tuh raw shung hae zah laevaw lang vua a thua vae hae. Vawccungccaw hae tuh pawcihmou mih lung apaw cih cipaw na mihmaevaw kya ung sahku tua! Thuasalama laephi ccungccaw hae soh pawtemou ung cih hae? Baebu nynh laephi ccungccaw hae tuh mih ngae athah a ci. Pawccemou? Setan tuh “ccyh dyngtari kyalya nynh ka hoi vae cipaw a ny keiccu” a thing myarya a ria a ci.—Byaphy 12:7, 9, 12

5 Setan tuh laevaw lang ruunaw a thuakhaetu paw nynh a thua. Pachia nynh a ro langpaw ccyh myarya a nae vae keiccuze ruunaw houhhouh a ung sah naw paw a thua. Nyathya nin kya yng cyihkuh langpaw kong Zisu nynh a hopaw kha do tua oh sih.—Piachihpaw 24 kya do.

NYATHYA NIN HAE

6, 7. Atunin ccyh kya rawtukunaw te ccakangnaw kong pawtemou leih ho hae?

6 Raw. Zisu nynh, “Rang kheih te rang kheih oun  doukuh cih hae, pekheih te pekheih oun tuhkuh cih hae” cite a la hoty. (Matthai 24:7) Langmaw lya laeze a tu she hynh rawtukunaw , chiakunaw houh alunghua vae. 1914 kum tetuh rawtukunaw keiccuze ccungccaw ccaang 100 lae a chih hae cite Laephi Ungtuzia a nyh hae paw nynh a ho hae. Kum 1900 te 2000 laku kya kum 100 lungkhu a chih hae paw kha 1900 kummaw a chih hae paw laeze lehthung a lung hua a ci hae. Raw keiccuze a chih hae paw hanglang ccungccaw patae hae tuh pawcihciatemou mih thinlung accih cih hae cipaw kha na mihmae vaw kya ung sahku tua!

7 Ccahkangnaw. Zisu nynh, “Rang takyh kya ccakang oun ccih cih” cite a la hoty. (Matthai 24:7) Aepaw niapaw houh lunglang tho hae sala ze mah ccungccaw a lunghua tuh zawlae khyh hae. Pawkeiccu mou? Abang tuh renaw langpaw phua te ccoukunaw langpaw laephi phe zaw lang hoi khyh hae. Ccungccaw ccaangkheih loukaw tuh ninkheihze dollar kiakheih sang mah muekuh kho khyh hae. Laephi Ngedangnaw Bu (WHO) cih kuh hae paw nynh aepaw niapaw a zaw khyh keiccuze imua hae tuh kum takyh a cciingcciing te a chih hae cite a ho hae.

8, 9. Zisu nynh innruisuekunaw te cciinaw yng ung cih cite a la hoty paw kha a ccing ccaccing vae cipaw paw nynh mou a lang sah?

 8 Innruisuekunaw. Zisu nynh, “Myarya a ru paw innruisuekunaw yn ung cih,” cite a la hoty. (Luka 21:11) Kum takyh myarya rilang ung paw innrui pei a sue kuh. 1900 kum te tho zah innruisuekunaw keiccuze ccungccaw ccaangning lae a chih vae hae. Langmaw she laeze atunin she tuh thyahawnaw kaethung salazema innruisuekunaw keiccuze ccungccaw patae hae tuh pei a chih maming ung hae.

9 Cciihawnaw. Zisu nynh, “khuarang cciinaw yng thua cih” cite a la hoty. Rilang ung paw cciinaw nynh laephipi kya pung a pazaeku keiccuze ccungccaw patae a chii sah vae hae. (Luka 21:11) Sibawi hae nynh cciinaw hae hynh dangsahkho nawlang a ccangku hae ze ma cciinaw hynh phe vae sah kho khyh hae. Ame, kum takyh TB cciinaw, ngeccue cciinaw te lungkhusei cciinaw keiccuze ccungccaw ccaang patae a chih hae. Tuh-e kyalya thua khyh, Sibawi hae nynh cciinaw thaw paw 30 a muih hae, te abang tuh si ung loh khyh.

 NYATHYA NIN KYA-E CCUNGCCAW HAE UNGTUZIA

10. 2 Timote 3:1-5 hynh atunin ccyh kya pawtemou a ccing?

10 2 Timote 3:1-5 kya, Baebu nynh hynhte a ho: “Nyathyakou nin tuh ruunaw vawsawnaw ccyh yng thua cih cipaw kha la nyh oh.” Zuitu Paul nynh nyathya nin kya ccungccaw hae tuh mih ozia hoy lang khyh cite a la hoty. Ccungccaw hae tuh

  • amaw kyalya a sungsakuh paw

  • phua kyalya a ry paw

  • nungpaw kaw a ngae leipaw

  • lung azi leipaw

  • a innbyng a sungsah leipaw

  • a syngkuh kho leipaw

  • are aro paw

  • Pachia laeze hoysanaw kyalya a tua paw

  • Pachia kha cceih ka sungsah cihpaw o lang te ung salazema Pachia bya a zui ry leipaw

11. Sam 92:7 nynh a ho hawte, ccungccah hoylei hae paw tuh pawtemou a cyih cih hae?

11 Na pepang kya tucihawpaw ozia ahoi hae paw ung hae tou? Laephipi kya tucihawpaw ozia hoyleipaw nynh alunghua vae. Thuasalama Pachia nynh a romaw  kha-e hae kha pung a roh vae cih hae. Amaw nynh, ‘Ccungccah hoylei hae paw tuh lonua hawte lethung hae zah hoyleinaw a rae hae paw kha hythua lang a mue hae paw nynh thua, thuasalazema zungzae ronaw a mue cih hae,’ cite bya yn king.—Sam 92:7.

NYATHYA NIN KYA THEHOYPAW

12, 13. Nyathya nin kya Zahova nynh paw thaethyanaw mou yn pya?

12 Baebu nynh nyathya nin kya tuh, laephi vawlang ruunaw vawsawnaw te ngaethyanaw hae te nynh phe yng beih cih cite a la hoty. Thuasalama Baebu nynh ahoypaw uhccaw hae mah bua yng langkuh cih cite a ho.

“Penaw Thehoy Bya kha laephi vawlang balyng khe yng ho cih hae.”—Matthai 24:14

13 Baebu thaethyanaw. Profeh Daniel nynh nyathya nin kong kha a la zei. Amaw nynh, ‘Amepaw nynaw yng kaethung cih,’ a ci. (Daniel 12:4) Pachia nynh a ccungccaw hae kha Baebu kong houh thaethya nawlang hawnaw a pya cih hae. 1914 kum kyate Zahova nynh hawnaw a la pya hae. Tousenawze, azicipaw a min, laephi hanglang a eenaw, sawnawme, chii vae ze pawlangmou ah tang oh cipaw te thothuinaw kong hae kha houh thaethya nawlang yn ccangpya. Pachia Penaw kyalya nynh ah tung oh paw ruunaw hae kha yn phishing pah kho cih cipaw ah ny oh. Pachia rynaw langpi hawte pawtemou hinglang cipaw te pawtemou lungpawnaw mue lang cipaw kha ah ccangku vae oh. Thuasalama Pachia see hae nynh paw rya mou a la law hae? A ccang paw profeh bya hae nynh aening kha aphi yn ny sah cih.—Piachihpaw 21 te 25 kya do.

14. Penaw thehoypaw kha pawkyamou a ho ae, hung hae mou a ho ae?

14 Laephipi phungho ryalawnaw. Nyathya nin te asekuhte Zisu nynh, “Penaw Thehoy Bya kha laephi vawlang balyng khe oun ho cih hae,” cite a ho. (Matthai 24:3, 14) Penaw thehoypaw bya hynh rang 230 lae kya bya 700 hangte ho a thua vae. Athua, laephi pyngpi kya, “phuin takyh, phu takyh” kya-e Zahova Ccaeccei hae nynh  Pachia Penaw tuh pawmou, tuh-e Penaw nynh ccungccaw hae hanglang pawmou yn cyi pah cih cipaw kong kha ccungccaw hae a thaethya nawlang hae pei a bung hae. (Byaphy 7:9) Miming nynh ame mue leite zuaku te lungtho te a law hae. Zisu nynh a la hoty vae hawte huanaw, rawsenaw a tung hae. Thuasalazema Phungho ryalawnaw hynh pawpaw nynh mah khe kho khyh.—Luka 21:17.

PAWMOU NA CYIH CIH?

15. (a) Nyathya nin kya nynh ah hing vae oh cipaw na zyn tou, pawccemou? (b) Zahova bya a ngae paw te a ngae leipaw hanglang pawmou yng cyih kuh vae cih?

15 Nyathya nin kya nynh ah hing vae oh cipaw na zyn tou? Nyathya nin kong hoty paw profeh bya hae tuh a ccing vae. Zahova nynh aromawze phungho ryalawnaw kha ungtaw ccah vae oh yng cih cih, tetuh “athangnaw” yng thua vae cih. (Mathai 24:14) Athangnaw cipaw tuh pawmou? E tuh Armakeddon nynh thua, Pachia nynh ahoy leipaw miakaw marya yng zo sah vae cih. Zahova nynh Amaw te a ccahpaw kawbya a ngae lei hae paw kha ro khylang Zisu te thungnaw hoi hae paw vawccungccaw hae kha yng mang cih. (2 Thesalonhae 1:6-9) Tukou tetuh, Setan te muihsaw hoylei hae paw nynh ccungccaw hae kha ling kho vae lang khyh hae. Pachia nynh akaw ngae paw te a Penaw kha nawccah hae paw hanglang a bakingnaw miakaw kha yng ccing sah vae cih.—Byaphy 20:1-3; 21:3-5.

16. Athangnaw ccyh a nae vae keiccuze paw cyi lang mou na ccang?

16 E laephi Setan uhnaw tuh aromaw a roh vae cih. Tukeiccuze ‘Pawmou cyi lang ka ccang?’ cite myarya azicipaw bakhianaw kha ah maw te ah maw khiaku ahoo. Zahova nynh Baebu kha ccangkuh sah ci ae ry. Zuakute ccangku ahoo. (Johan 17:3) Zahova Ccaeccei hae nynh ccungccaw hae kha Baebu kong thaethya hae sah cite bung kho nawlang lonaw takyh te pungkunaw ahoi hae. Merarih lang pungku bua khonaw zuakuh. (Hebruhae 10:24, 25 ria.) Ozia rulaeku ahoo cite na ny ze, rulaekuh.  Tuhte na cyi ze, Zahova te na ccuepekunaw oh kha houh yng tyng vae cih.—James 4:8.

17. Thangnaw nin yng thua vae ze ccungccaw alunghua tuh pawccemou mih ngae mih ang yng thua cih?

17 Zuitu Paul nynh “khuazi ccyh ze miruh hawte” tualei roihlei ccyh kya khe nynh ronaw nin tuh yng thua cih cite a la ho. (1 Thesalonhae 5:2) Zisu nynh ccungccaw patae tuh ninthangnaw ccyh kya nynh ah hing oh cipaw kha ry lang khyh hae cite a la hoty. Zisu nynh, ‘Noah she lya a cyiku hawte nynh Ccungccaw Ccapaw thuanaw ccyh (tukhyhze, nyathya nin) tuh yng cyih kuh ci. Tuipa-yng a yngku maw tuh ccungccaw hae nynh zu te ae te, nohpi pise zudyku, tungtuh kute ung hae zah Noah lawng lungkhu lang a tee nin hae cia hoysahnaw tenynh a ung hae. Tuipa-yng nynh oun lou maw nin hae cia pawte nynh oun cyihkuh cih cipaw nyh khyh hae. Tuhawte nynh Ccungccaw Ccapaw oun thuanaw ccyh mah oun cyih kuh cih,’ cite a la ho.—Matthai 24:37-39.

18. Zisu nynh paw raeringnaw mou yn pya?

18 Zisu nynh, “eih rui lang nia paw te, ruinaw te, ah hingnaw e-lang thinphangnaw keiccuze rih nang oh,” cite raeringnaw yn pya. Athangnaw tuh “kaang hawte” tualeipi te yn thua cih cite a ho. Te, “laephi vawlang khaleih kya a ung paw ccungccaw balyng tungvaw khe yn thua cih,” cite mah a ho. Hynhte bua a ho: “Tukeiccu nangning tuh yng thua vae cih paw hynh-e uhccaw hae balyng kyate lue lang a ngaekuh hae paw na thua nawlang oh, te Ccungccaw Ccapaw malang thadyng lang a ngaekuh hae paw na thua nawlang oh zungzae sawsang oh lah la ngaw oh,” a ci. (Luka 21:34-36) Zisu nynh raeringnaw yn pyapaw bya hynh ngaelang pawccemou azici? Pawccecize ahoy leipaw Setan uhnaw hynh aronaw myarya a nae vae keiccu nynh thua. Zahova te Zisu a zyn hae paw kyalya rou nynh athangnaw nin kya khungnaw kha a mue cih hae zah laephithaw paw kya zungzae hingnaw kha a mue cih hae.—Johan 3:16; 2 Piter 3:13.

^ par. 4 Mikhael cipaw tuh Zisu Khrih min ccangkheih nynh thua. E kong houh na ny ryze, Piachihpaw 23 kya do.