Skip to content

Skip to table of contents

 ABALU HAWLAEPALI

Innbyng Hoy Sah Kho Naw Zia

Innbyng Hoy Sah Kho Naw Zia

1, 2. Innbyng hae hanglang Zahova rynaw tuh pawmou?

INNBYNG tuh Zahova Pachia nynh a tho ty. Masaty nopi nung kha rae zah “pise paw kalang yng ccia khae” cite Baebu nynh yn ho pya. Adam tuh a lung myarya tua zah, ‘E tuh kasaw kya-e kasaw te karu kya-e karu,’ cite a ho. (Genesis 2:22, 23) E nynh innbyng tangnaw kya lungtua lungpaw te ung hae sah cite Zahova nynh a ry cipaw yn ny sah.

2 Ngaethyalang ung paw tuh, ccungccaw patae tuh innbyng kya lungpaw naw mue vae khyh hae. Tuthuazema, innbyng kya hoynaw te lungpaw naw a ung kho nawlang Baebu kya-e phunglang hae nynh milu takyh te yn bung kho.—Luka 11:28.

VAWPAW HAE KYATE PACHIA NYNH A NGAEHOI PAW

3, 4. (a) Vawpaw nynh a zu kha pawtemou ccuepe lang a ccang? (b) Zu te vaw nynh lukheih te lukheih sei ngaeethyaku lang pawccemou a zici?

3 Vawpah hoypaw lukheih nynh tuh a zu kha sungsahnaw te sawtuanawte a ccuepe cih cite Baebu nynh a ci. Thawccinawte Efesahae 5:25-29 ria. Vawpaw nynh a zu kha sungsahnawte zungzae a ccuepe cih. Hoyte athungkhaw cih, a do-oih cih zah ruunaw vawsaw mah pya lang khyh.

4 Thuasalama zu nynh cyi seinaw a rae sei ccyh kya khe vawpaw nynh pawmou cyilang a ccang? Vawpaw hae kha, ‘Vawpaw hae, nae zu hae kha sungsah oh la barete khung nang oh,’ cite a ho pya hae. (Kolosehae 3:19) Vawpaw hae, kaemah seinaw patae ka rae sei boi cipaw kha tua kuh oh. Na seinaw kha Pachia nynh ae ngaeethya sah ci na ry oh hawte nae zu hae seinaw mah ngaeethya oh. (Matthai 6:12, 14, 15) Vawpaw te zu nynh lukheih te lukheih seinaw  na ngaeethyaku kalang oh ze tuh innbyng kya lungpawnaw a ung kho nawlang solei ae bung maming cih oh.

5. Vawpaw nynh a zu kha pawccemou phute sah lang a ccang?

5 Vawpaw lukheih nynh a zu kha phutesah lang Zahova nynh a ngaehoi. Vawpaw lukheih nynh a zu ahoo abounaw miakaw kha hoyte tuapya thya lang a ccang. E-hynh myarya azici. Vawpaw lukheih nynh a zu kha hoyte a ccuepe khyh lang ze tuh a sawsangnaw kha Zahova nynh thaepya leite a ung kho. (1 Piter 3:7) Zahova nynh pawpaw laezemah amaw sungsah lang paw kha nynh a ry hua. Pise hae nynh nopi hae kha varyng husung lang hae ry khyh.

6. Zu te vaw tuh “pyngkheih” nynh a thua vae hae cipaw tuh paw suilang mou?

6 Zisu nynh vawpaw te zu tuh “luning thua vae khyh hae, thuasalama pyng kheih nynh thua vae hae” cite a ho. (Matthai 19:6, BI) Miming tuh lukheih te lukheih mih lungzi cih zah zyngku leite ung lang khyh hae. (Phungtangbya 5:15-21; Hebruhae 13:4) Vawpaw te zu nynh nopi pise tang rynaw kha lukheih te lukheih ny pyaku thya lang zah ah maw rynaw kyalya kha tuaku lang ccang khyh. (1 Korinhae 7:3-5) Vawpaw nynh, “a hung mah a pyng kha a huakuhpaw ung khyh, thuasalama a pyng kha do-oih ku zah phu a tesah ku,” cipaw kha ningnang. Tukeiccuze zu kha sungsah te do-oih lang a ccang. Tukoute, zu nynh a rynaw tuh ka vawpaw nynh thaw yng ccih sah lah yng sungsah sah ci kha nynh a ry.—Efesahae 5:29.

ZU HAE KYATE PACHIA NYNH A NGAEHOI PAW

7. Innbyng kya cciakhaetu lu pawccemou ahoo?

7 Innbyng miakaw kya cciakhaetu lu ahoo, tezethang nynh pyngkheih lang hoyte rya a hae kheih kho cih hae. 1 Korinhae 11:3 (BI) kya hynhte a ho: ‘Pise miakaw lu tuh Khrih thua zah nopi lu tuh pise nynh thua cipaw te Khrih lu tuh Pachia nynh thua cipaw kha kae nysah ry oh.’

8. Vawpaw kha saw myarya ka tua cipaw zu nynh pawtemou a lang sah cih?

8 Pise hae mah seinaw arae thya hae. Thuasalama zu  lukheih nynh a vawpaw bapaenaw kha bung zah lungtho te pyngkheih lang rya a lawkheih hae ze tuh mih innbyng kya hoynaw solei a mue cih hae. (1 Piter 3:1-6) Baebu nynh, “zu nynh avawpaw kha sawtua sah,” cite a ci. (Efesa‛ae 5:33, BI) A vawpaw nynh a zu zynnaw kha a ry khyh langze pawtemou? Zu nynh a vawpaw kha zungzae sawtua ahoo cih. Baebu nynh, ‘Nangning zu hae nynh nae vawpaw hae kaw kha ngae oh; tute nah ci oh a thua langze Pachia a zynlei hae paw nae vawpaw hae ah ung lang hae ze nae ziazae hoynaw nynh zyntulang a tangsah cih hae. Kawkheih sangma nah ho oh hoo vae khy, pawccecize thyararihlangte sawtuanaw hoite nah hing ohpaw kha ah muih cih hae,” a ci. (1 Piter 3:1, 2) A zu ziazae hoynaw nynh a zynnaw kha a vawpaw nynh thaepyathya nawlang te sawtua pya nawlang a bung.

9. (a) A vawpaw te mih tuanaw aloku khyh ze a zu nynh pawmou cyi lang a ccang? (b) Titus 2:4, 5 nynh zu hae hanglang tuanaw pyapaw tuh pawmou?

9 A vawpaw te mih tuanaw a loku khyh ccyh lya khe a zu nynh pawmou a cyi kho? A zu nynh a vawpaw kha sawtuanaw te a tuanaw kha hoyrarih te ho pya lang a ccang. Tousenawze, Sarah nynh a ho paw bya abang kha  Abraham nynh ngae ry khyh, thuasalama Zahova nynh, “A bya kha ngae pah,” a ci. (Genesis 21:9-12) Khrihccaw vawpaw nynh Baebu te a rawsekuh leipaw bya a pae vae ze, a zu nynh nawccawnaw liate kaw ngaenaw kha a lang sah kho. (Zuituhae 5:29; Efesahae 5:24) Zu hoy nynh tuh innbyng kha hoyte a do-oih. (Titus 2:4, 5 ria.) Zu nynh innbyng do-oih lang a zuakunaw kha a vawpaw te a ccaw hae nynh yng muihthya hae tuh amaw kha houh yng sungsah thya cih hae zah saw houh yng tuathya vae cih hae.—Phungtangbya 31:10, 28.

Sarah tuh zu hae hanglang pawtemou dosuinku lang ahoypaw a thua?

10. Phiakunaw te myakunaw kong Baebu nynh pawtemou a ho?

10 A ccangccang vae ze zuvaw hae nynh phiaku lang tukhyhze myaku lang a rang mawte bya a paeku hae. Thuasalama, Baebu nynh “zu nynh a vawpaw kha mahnang sah” te “a vawpaw nynh a zu kha mahnang sah” a ci. (1 Korinhae 7:10, 11) Zuvaw hae nynh lunglokunaw dangdou a ung vae khyh lang ze a phiaku kho hae, thuasalama hoyte tuaty te bya a paekuh cih hae. Paw kong keiccumou myaku kho a thua? Myaku kho a thuanaw akong ccangkheih rou nynh a ung. A vawpaw tukhyhze a zu nynh mingccang paw kya nopi pise seinaw a rae sei ze thang nynh myaku kho a thua cite Baebu nynh a ci.—Matthai 19:9.

NUNGPAW HAE KYATE PACHIA NYNH A NGAEHOI PAW

Zisu tuh innbyng kya lukheih raveih dosuinku lang ahoypaw nynh thua

11. ccaw hae nynh a ccangpaw hae lae ze pawmou a bou hua hae?

11 Nungpaaw hae, nae ccaw hae ryte a ccyh kha mangkheih oh. Nae ccaw hae nynh nangning kha naerang myarya aethua oh, e lae lang houh ahoo hua paw tuh, miming kha Zahova konglang ccangpya lang hae ahoo hua.—Deuteronomi 6:4-9.

12. Nungpaaw hae nynh ccaw hae thungkhaw lang pawmou cyi ahoo?

12 Setan laephi tuh houhhouh hoy vae khyh, ccaw hae kha ruunaw te nopi pise seinaw rae khae lang cia a ry paw ccungccaw abang a ung. Abang nungpaaw nynh kha-e kong kha ho pya lang a ruu sah kho hae. Thuasalama  nungpaaw hae nynh ccaw hae kha seinaw te hoileinaw a rae hae paw ccungccaw hae kha pawtemou sibia lang cipaw kong kha ccangpya te raeringnaw pya hae ahoo. Nungpaaw hae, nae ccaw hae kha thungkhaw oh. *1 Piter 5:8.

13. Nungpaw hae nynh ccaw hae kha pawtemou ccangpya lang hae?

13 Nungpaaw hae nynh ccaw hae kha ungtu zia kong ccangpya lang taevue ahoi hae. ccaw hae kha pawtemou ccangpya lang hae? Ccaw hae hynh ccangpya ahoo hae, thuasalama a re lang te thuihei leilang hae. (Jeremiah  30:11) Tukeiccuze na thin eih a ria lya tuh na ccaw hae kha thuihei nang hae. ‘Ccezung te thuin hawte ccii sah hae sah’ cite na thuihei ry lang khyh hae. (Phungtangbya 12:18) Nae ccaw hae kha pawccemou kawngae lang ahoo cipaw kha a thaethyanaw lang hae mah ccang pah oh.—Efesahae 6:4; Hebruhae 12:9-11; Piachihpaw 30 kya do.

CCAW HAE KYATE PACHIA NYNH A NGAEHOI PAW

14, 15. Ccaw hae nynh nungpaaw hae kaw kha pawccemou ngae lang a ccang?

14 Zisu nynh a Paaw kaw ngae lang a ruu sah lya khe ze mah zungzae a la ngae. (Luka 22:42; Johan 8:28, 29) Tuhawte ccaw hae kha nungpaaw hae kaw ngae lang Zahova nynh a ry.—Efesahae 6:1-3.

15 Ccaw hae, nungpaaw hae kaw ngae lang a ruu lya ze mah kaw na ngae keiccuze Zahova te nungpaaw hae kha mih lung myarya atua cih hae cipaw kha ningnang. *—Phungtangbya 1:8; 6:20; 23:22-25.

Seinaw rae lang tu-ounaw a tung vae hae ze Pachia kya zyntyng kho nawlang ngawphue hae kha pawnynhmou a bung cih hae?

16. (a) Ngawphue hae ahoy leipaw rya lawlang Setan nynh pawtemou a zuaku? (b) Zahova a sungsah hae paw te mungku lang pawccemou azici?

16 Seinaw kha rae sah cite Setan nynh nang kha ae tuh-ou tu lang na bang hae te ngawphue hae kha a mang kho. Kha-e tu-ounaw kha taekukhonaw myarya a ruu cipaw kha amaw nynh phe a ny. Tousenawze, Zakoh a ccanung Dinah a bang hae tuh Zahova a sungsah lei hae paw nynh thua hae. Tuh-e nynh amaw te a innbyng hae kya ruunaw patae a thua sah. (Genesis 34:1, 2) Na bang hae tuh Zahova a sungsah lei hae paw a thua hae ze, Zahova nynh a huapaw hangkhakheih cyilang haelang ae tu-ou hae paw kha na cyi vae ze tuh Pachia, na innbyng te namaw kya cia ngaethyanaw patae na tung kho. (Phungtangbya 17:21, 25) Tuh-e nynh Zahova a sungsah hae paw rou nynh  bang lang nungkulang hae ze ahoy cipaw kha a lang sah.—1 Korinhae 15:33.

INNBYNG HOY SAH KHO NAW ZIA

17. Innbyng lungkhu kya lukheih raveih nynh paw taevue mou ah hoi oh?

17 Innbyng kheih hae nynh Pachia ccangpyanaw a zui vae hae ze, ruunaw te piahccahnaa hae kha a sibia kho hae. Tukeiccuze vawpaw lukheih na thua lang ze, na zu kha sungsah lah amaw kha sungsahnaw te ccuepe. Zu lukheih na thua lang ze, na vawpaw kha sawtua lah a kawngae te Phungtangbya 31:10-31 kya-e zu hoy nung kong azeikuh paw kha dosuin kuh. Nungpaaw lukheih na thua lang ze, na ccaw hae kha Pachia a sungsahnaw lang hae ccang pah hae. (Phungtangbya 22:6) Paaw lukheih na thua lang ze, “innbyng lungkhu hoyte a uh kho paw” hawte na innbyng kha ccia khae. (1 Timote 3:4, 5; 5:8) ccaw na thua lang ze, nungpaaw hae kaw kha zungzaete ngae. (Kolosehae 3:20) Innbyng kya lukhakheih nynh seinaw na raesei vae oh ze, ngaeekuthyanaw kha zakaw sangsahkunaw te ngia kuh oh. Ame, innbyng lungkhu kya lukheih raveih hanglang Zahova cciakhaenaw kha Baebu lungkhu kya a ung.

^ par. 12 Ccaw hae kha pawtemou thungkhawnaw lang cipaw kong kha Zahova Ccaeccei hae nynh a tho hae paw, dosuinku lang hoypaw sazae kong a zeikuh paw ကြီးမြတ်သောဆရာထံမှ သင်ယူလော့ cihkuhpaw ccah-uh, abalu 32 kya na muih kho.

^ par. 15 Imua hae, nungpaaw hae nynh Pachia kawbya te arawsekuh paw ae cyi sah vae oh ze thang nynh nungpaaw bya kha ngae leilang.—Zuituhae 5:29.