Skip to content

Skip to table of contents

 ABALU CCANGTHUNG

Ccungccaw Aê Hanglang Pachia Eenaw Tuh Pawmou?

Ccungccaw Aê Hanglang Pachia Eenaw Tuh Pawmou?

1. Ccungccaw hae hanglang Pachia eenaw tuh pawmou?

PACHIA nynh ccungcaw hae hanglang ngae-ang lang ung paw a eenaw a ung. Pachia nynh a rae hae paw masaty ccungccahpaw te ccungccahnung, Adam te Evua kha kou a puithya paw khokhu kya a ung sah hae. Pachia nynh mihmaw kha ccaawsakuh hae sah, laephi pyngpi kha paradais lang tang sah hae sah, te lorang saw hae kha do-oih hae sah cite a la ee.—Genesis 1:28; 2:8, 9, 15; Piachihpaw 6 kya do.

2. (a) Pachia eenaw kha yng ccing cih cite pawtemou ah ny oh? (b) Zungzae hingnaw kong Baebu nynh a ho paw tuh pawmou?

2 Paradais kya zungzae hing lang cipaw na tua boi tou? Zahova nynh, ‘Ka eenaw kha ka ccing sah cih,’ cite yn ho pya. (Isaiah 46:9-11; 55:11) A eenaw tuh yng ccing sah cih. Pawpaw nynh mah a eenaw kha roh kho lang khyh. Zahova nynh laephi a raepaw hynh asuilang a ung. Amaw nynh, ‘laephi tuh accakaepaw lang ka rae khyh,’ a ci. (Isaiah 45:18) Amaw nynh ccungccaw hae hynh laephi vaw lang ung hae sah ci a ry. Pawcih hawpaw ccungccaw hae mou a ung sah ry hae? Hohsemou a ung sah cih hae? Baebu nynh hynhte a ho: ‘Adingpaw cungccaw hae nynh laephi ro a ccou cih hae zah, te zungzae a ung nah cih hae.’—Sam 37:29; Byaphy 21:3, 4.

3. Cciinaw te chiinaw ah tung oh paw te asekuhte paw bakhianaw mou yn lang kuh?

3 Atunin ccyh kya ccungccaw hae hynh cciinaw te chiinaw a tung hae. Rang takyh kya lukheih te lukheih ziakunaw te chiakunaw a ung. E hae hynh Pachia a eenaw thua khyh. Tuh athualangze pawmou cyih kuh, pawkeiccumou? Tuh-e hae kha Baebu rou nynh ny kho nawlang yn bung kho.

 PACHIA RAWSETU

4, 5. (a) Edin khokhu kya fupaw mangte Evua bya a hotupaw tuh a hungmou? (b) Ccungccaw lukheih nynh pawtemou mihruhpaw lang yng tang thya?

4 Baebu nynh Pachia rawsetu paw kha “Setan” cite nynh a ko. Edin khokhu kya Setan nynh fupaw mangte Evua kha bya a la ho pya. (Byaphy 12:9; Genesis 3:1) Setan nynh fupaw kha bya ahopaw lang a la tang sah.—Piachihpaw 7 kya do.

5 Te langze, Setan hynh Pachia nynh tou a la rae? Thuakhyh! Pachia nynh araepaw vawccungccah hoypaw lukheih nynh thua. Adam te Evua kha aling hae koute nynh amaw te amaw kha rawsetu lang yng tang paw a thua. (Job 38:4, 7) Pawtemou a la tang? Ccungccah hoypaw lukheih nynh mihruhpaw lang pawtemou yn tang? Mihruhpaw lang te yn puipaw thua khyh. Thuasalama ahoi leipaw uhccaw hae kha hoi rynaw thinlung yng hoi zah kha-e kha pei yng tua tuh a thinlung kya ahoy leipaw tuanaw tuh houhhouh yn lethung vae. Nyathya tuh yng ruh vae. Tetuh amaw te amaw kha mihruhpaw lang a tang sah ku vae.—James 1:13-15 ria; Piachihpaw 8 kya do

6. Vawccungccahpaw tuh Pachia rawsetu lang pawtemou yn tang?

6 Vawccungccahpaw mah tuhawte nynh a thua. Zahova nynh Adam te Evua kha ccaaw patae sah oh lah ‘laephi bia sah oh’ cite a la ci pya hae. (Genesis 1:27, 28) ‘Ccungccaw miakaw nynh Zahova beih leite kamaw yng beih hae sah’ cite vawccungccahpaw nynh a la ee ku! Pachia kyalya nynh mue lang a ccang paw kha Setan nynh mue a ry. Setan nynh ccungccaw hae kha kamaw yng beih hae sah ci a ry. Tuhkeiccuze Evua kha a hyngpya vae, aling vae. (Genesis 3:1-5 ria.) Tuhte a cyi keiccuze Pachia rawsetu, ahoy leipaw Setan lang yng tang vae.

7. (a) Adam te Evua hynh pawccemou a la chii hae? (b) Atu soh pawccemou ataw oh zah ah chii oh?

7 Adam te Evua nynh Pachia bya kha ngae leite thingthae kha a ae vae hae. (Genesis 2:17; 3:6) Zahova nynh a  ho pya thyh hae hawte Zahova kaw ei hae zah a sei hae keiccuze nyathya tuh a chih vae hae. (Genesis 3:17-19) Adam te Evua keiccuze mihccaw hae mah seinaw ro ccou hae zah a chih vae hae. (Romhae 5:12 ria.) Adam te Evua keiccuze pawccemou mihccaw hae miakaw mah seinaw ro a ccou hae cipaw thaethyanaw lang e tousenaw hynh do tua oh sih. Sanglou thounaw paw talyng ang te sanglou ah thou oh ci oh sih. Tuh-e sanglou tuh talyng ang muinsang hawte nynh yng lo cih. Tuhawte Adam nynh Pachia bya a ngae khyh keiccuze seinaw ahoi vae. Aening mah Adam ci-hang hae ah thua oh keiccuze seinaw ah hoi bua vae oh. Tukeiccuze nynh ah taw oh zah ah chii oh.—Romhae 3:23; Piachihpaw 9 kya do.

8, 9. (a) Setan nynh Adam te Evua kha pawmou a zyn sah ry hae? (b) Zahova nynh rawsetu hae kha pawccemou palou a ro khyh hae?

8 Pachia bya ngae nang hae sah cite Adam te Evua a ling lya hae khate Setan nynh Zahova rawsenaw kha a tho vae. Adam te Evua kha Zahova tuh hyngbya hopaw, ahoy leipaw uhtu nynh a thua cipaw zyn hae sah cite Setan nynh a la ry. Nang nynh ccungccaw hae kha pawmou cyi lang cipaw ho pya hoo khyh a ci. Adam te Evua tuh pawmou ahoy, pawmou hoy khyh cipaw kha mihmaw te mihmaw bya a paekuh kho hae cite Setan nynh a ci. Tuh-e rawsenaw kha Zahova nynh pawtemou a cyih cih? Pachia nynh rawsetu hae kha rolang a ccang kha zaw. Amaw nynh Setan tuh hyngbya hopaw nynh thua cite palou lang sah tou? Langsah khyh.

9 Zahova nynh rawsetu hae kha palou roh khyh hae. Amaw nynh ccungccaw hae kha mihmaw te mihmaw uhkunaw ccyh a pya tua hae. Setan tuh hyngbya hotupaw nynh thua cipaw a ria nawlang te ccungccaw hae hanglang ahoyhua paw kha a ny keiccuze Zahova nynh a ccyh a pyatuanaw hae paw a thua. E konglang hynh akong 11 kya houh ccangku lang. Adam te Evua mih bapaekunaw te asekuhte nang pawtemou na tua? Pachia kawbya ngae leite Setan bya a zyn hae paw hynh me tou? Zahova nynh  Adam te Evua kha atyng are a pya hae. Pachia nynh phe ccing paw hingnaw, myarya puithyapaw ungnaw te ahoypaw ryalaw kha a pya hae. Setan nynh tuh miming hanglang ahoypaw pawpaw mah pya boi khyh hae. Nang na vah thua langze pawtemou na cih cih?

10. Aening lukheih raveih nynh paw azicipaw poku langpaw mou a ung?

10 Atunin, aening mah ah hingnaw kya ah cyilang oh  paw kha lukheih raveih ah poku lang oh paw a ung. Zahova tuh aening yn Uhtupaw cipaw te Setan tuh hyngbya hotu nynh thua cipaw kha lang sah lang ah pokuh kho oh. Tukhyhze Setan maw nynh yn uhtupaw cite mah ah pokuh kho oh. (Sam 73:28; Phungtangbya 27:11 ria.) Laephi vaw ccungccaw zyatari rou nynh Pachia kaw kha a ngae hae. Laephi hynh Pachia nynh uh khyh. Athualangze a hung nynh mou a uh?

LAEPHI HYNH A HUNGMOU UH?

Setan nynh e laephi hynh a uh khyh lang ze Zisu kha e penaw hynh kae pya cih cite a cih kho cih tou?

11, 12. (a) Setan nynh Zisu a soihnaw kyate pawmou lawkulangpaw a ung? (b) Laephi tuh Setan nynh a uh ccahccing cipaw paw Baebu nynh mou a lang sah?

11 Zisu nynh laephi tuh a hungmou a uh ccahccing cipaw kha a ny. Vaekheih tuh, Setan nynh “laephi penaw hae te phu-e lesaenaw balyng kha a do sah.” Tukoute Setan nynh Zisu kha, “ccukharutungte nae beih langze hynh e balyng hynh marya kae pya cih,” cite bya a kin pya ku. (Matthai 4:8, 9; Luka 4:5, 6) Hynhte khiakutua, ‘Setan nynh e laephi hynh a uh khyh lang ze Zisu kha tuhte a cih kho cih tou?’ Cih kho lang khyh. Laephi vaw e uhccaw miakaw hynh Setan nynh a uh.

12 Na ngae-ang a thua kho: ‘Laephi uhtu lang Setan tuh pawtemang yn tang? Zahova tuh vawlaepi rae zah Athung huaccepaw Pachia thua khyh tou?’ (Byaphy 4:11) Pachia maw nynh thua. Thuasalama Zisu nynh Setan kha “hynh e laephi uhtu” cite ccaerarih lang a ho. (Johan 12:31; 14:30; 16:11) Zuitu Paul nynh mah rawsetu Setan kha ‘laephi uhtu pachia’ a ci. (2 Korinhae 4:3, 4) Zuitu Johan nynh mah “laephi balyng tuh Setan nynh a uh” cite a zei.—1 Johan 5:19.

SETAN PENAW HYNH PAWTEMOU YNG ROH CIH?

13. Laephi thawpaw pawcce ah hoo oh?

13 E laephi tuh houhhouh rilang a ung vae. Ah pepang kya do lang ze rawdoukunaw, ozia hoyleinaw, a cihruh hae paw te a rero hae paw cci nynh ah muih oh. Ccungccaw  hae nynh pawpaw te a zuaku hae ze mah e piahccahnaa hae hynh yn zo sah pah kho khyh hae. Thuasalama a romaw ze e-laephi vaw-e hoyleinaw hynh Pachia nynh Armekeddon rawpi liate marya yng roh vae cih. Tetuh dingnaw ungnaw laephi thawpaw lang yng tang sah vae cih.—Byaphy 16:14-16; Piachihpaw 10 kya do.

14. Pachia nynh a Penaw kya Siapharang lang a hungmou a po? Zisu te asekuhte Baebu nynh pawtemou a la hoty?

14 Zahova nynh vawlang accozah, thuakhyhze A Penaw kya Siapharang lang Zisu Khrih kha a po. Kum hynhsepi lya mawte, Baebu nynh laephi uhtu Zisu kong te a sekuhte “Daenaw Bawi cite ko zah a uhnaw tuh zungzae a tyng cih cite a la hoty. (Isaiah 9:6, 7) Zisu nynh a zuitu hae kha tuh-e penaw kong te asekuhte hynhte saw yng sang oh a cipya hae: “Na penaw thua ccavae sah. Vawrang kya na rynaw acyiku hawte laephi vawlang cyiku bua sah.” (Matthai 6:10, Bible International) Abalu  8, kya Pachia Penaw nynh e laephi a ccozah hynh pawtemou yng rulae cih cipaw kong bua ccangku lang. (Daniel 2:44 ria.) Pachia Penaw nynh e laephi hynh myarya a puithyapaw Paradais lang yng tang sah vae cih.—Piachihpaw 11 kya do.

LAEPHI THAWPAW A NAE VAE!

15. “Laephi thaw” cipaw tuh pawmou?

15 Baebu nynh hynhte bya yn king: “Aening tuh a byakingpyakupaw thyhte dingnaw a ungnaw athawpaw vawrang te athawpaw laephi nynh ah ngaw oh.” (2 Piter 3:13; Isaiah 65:17) A ccaccang vae ze Baebu nynh “laephi” cite a ho paw hynh laephi vawlang a hing hae paw ccungccaw hae kha nynh a ho ry. (Genesis 11:1) Tuhkeiccuze dingnaw a ungnaw “laephi thaw” cipaw tuh Pachia kawbya a ngae hae paw te Pachia nynh hythua a pya hae paw ccungccaw hae kha nynh a ho ry.

16. Laephi thawpaw kya a hing hae paw kha Pachia nynh paw lasung mou a pya cih hae?, Tuh-e lasung mue ah ry oh ze pawmou cyi lang?

16 Zisu nynh laephi thawpaw kya a hing hae paw ccungccaw  hae tuh “zungzae hingnaw” lasung a mue cih hae cite bya yn king. (Marka 10:30) Tuh-e lasung mue ah ry oh ze pawmou cyi lang? Aphi kha Johan 3:16 te 17:3 kya riatua. Paradais kya hingnaw te asekuhte Baebu nynh a ho paw kha dotua oh sih.

17, 18. Laephi kya daenaw te lungdaenaw yng ung vae cih cipaw pawtemou a ny oh?

17 Hoyleinaw, rawdoukunaw, chiakunaw te ziaku buakunaw hae ung vae lang khyh. Tuh-e laephi kya tuh hoyleinaw arae paw hung ccungccaw mah ung vae lang khyh. (Sam 37:10, 11) Pachia nynh ‘laephi pyngpi rawdoukunaw hynh marya yng zo sah vae cih.’(Sam 46:9; Isaiah 2:4) Laephi tuh Pachia a sungsah hae paw te akaw ngae hae paw te nynh phe yng beih vae cih. Daenaw te zungzae a ung vae cih hae.—Sam 72:7.

18 Zahova a ccungccaw hae tuh lungdae te a ung vae cih hae. Baebu she lya ze, Israel hae nynh Pachia kaw la ngae lya hae tuh Pachia nynh athung khaw hae keiccuze daenaw a la mue hae. (Levitikas 25:18, 19) Paradais kya tuh rilangpaw pawpaw mah ung vae lang khyh. Zungzae lungdaenaw te ung lang vae!—Isaiah 32:18; Mikah 4:4 ria.

19. Pachia a laephi thawpaw kya tuh ae lang paw phe yng beih vae cih cipaw pawcce ah zynngang oh?

19 Aepaw niapaw yng lung vae cih. ‘Laephi vaw ccahtang patae yng lung cih zah, muavaw kya pung yng beih vae cih.’ (Sam 72:16) ‘Laephi kha sisua a pya hawte Zahova nynh mah aening kha hythuanaw yn pya vae cih.’—Sam 67:6.

20. Laephi pyngpi tuh Paradais lang yng tang cih cipaw pawtemou ah ny oh?

20 Laephi pyngpi tuh Paradais lang yng tang vae cih. Ccungccaw hae tuh myarya puithyapaw inn te khokhu yng hoi vae cih hae. (Isaiah 65:21-24; Byaphy 11:18 ria.) Laephi pyngpi tuh myarya a puithyapaw Edin khokhu lang yng tang vae cih. Zahova nynh aening ah hoo ah bou oh paw miakaw kha zungzae yn pya vae cih. Amaw te  asekuhte Baebu nynh hynhte a ho: ‘Na kuih kha na thua zah a hysuepaw miakaw kha ngaengangnaw na pya hae.’—Sam 145:16.

21. Lorangsaw hae te ccungccaw hae laku daenaw yng ung vae cih cipaw pawtemou ah ny oh?

21 Lorangsaw te ccungccaw hae laku daenaw yng ung vae cih. Lorangsaw hae nynh ccungccaw hae kha ruunaw pya vae lang khyh hae. Atushe lorangsaw hae tuh rilang ung hae ze mah, tuinkya vae tuh imua hae te nynh yng zuekheih vae cih hae.—Isaiah 11:6-9; 65:25 ria.

22. Adang lei hae paw kha Zisu nynh pawmou yng cyi pah vae cih hae?

22 A ccihpaw ung vae lang khyh. Zisu laevaw a ung lya ze, ccungccaw patae a la dang sah hae. (Matthai 9:35; Marka 1:40-42; Johan 5:5-9) Thuasalama Zisu nynh Pachia Penaw kya Siapharang lang yng tang tuh ccungccaw miakaw yng dang sah vae cih. ‘Ka ccih’ cite cih boi vae lang khyh hae!—Isaiah 33:24; 35:5, 6.

23. A chih hae paw hanglang Pachia nynh pawmou yng cyi pah vae cih hae?

23 Michii hae bua yng thothui cih hae. Riatae lei a chih hae paw ccungccaw hae kha yng thothui cih hae cite Pachia nynh bya yn kingpyaku. “Adingpaw te ading leipaw paryh chiinaw kyate thothuinaw a ung vae cih.”—Johan 5:28, 29 ria; Zuituhae 24:15.

24. Paradais kya hing lang cipaw kong te asekuhte pawtemou na thinlung kya a ung?

24 Ah balyng te ah poku lang oh paw a ung. Zahova te a rya lawlang ah poku kho oh hawte ah lung ry paw rya lawlang ah poku kho oh. Zahova ryalaw lang ah poku oh ze malangshe kya hoynaw mue lang. Ccungccahpaw lukheih nynh Zisu kha yng ning bua nang la ii cih zah Zisu nynh mah hynhte bya a kingpyaku: ‘Atunin kae ho pya, Paradais kya kae ryte pyngkheihlang ah ung cih’ a ci pya. (Luka 23:43, New World Translation) Zisu khrih kong te Pachia nynh bya yn kingpyaku paw kha pawtenynh yng ccing sah cih cipaw kong kha ccangku tua oh sih.