Skip to content

Skip to table of contents

 ABALU CCANGNING

Baebu—Pachia Kyate Yng Thua Paw Ccah-Uh

Baebu—Pachia Kyate Yng Thua Paw Ccah-Uh

1, 2. Baebu hynh pawcce aphu myarya atepaw lasung a thua?

TUALEIPITE na bang lukhakheih nynh lasung ae pya lya kha pawtemou na ung? A rang mawte na dotua ry maming cih. Na bang paw nynh ae peki keiccuze na lung a paw cih zah lasung hanglang amaw tungvaw na lung mah myarya a tua cih kha zaw.

2 Baebu tuh Pachia lasung ccangkheih nynh thua. A ccanglang pawpaw kya mah muih kho leipaw akonglang hae kha Baebu kya a ung. Tousenawze, Pachia nynh arae paw vawlae hae, laephi te masaty ccungccahpaw te ccungccahnung hae kong kha muih kho a thua. Piahccahnaa ah tung vae oh ze phungbya nynh aening kha yn bung kho. Baebu kya Pachia nynh laephi hynh houh ahoyhua lang te, pawte nynh yn cyi pah cih cipaw te a eenaw kong balyng kha yn ccangpya. Baebu hynh aphu myarya atepaw lasung nynh thua!

3. Baebu ccangku lang ze paw hoynaw mou mue lang?

3 Baebu na ccangku ze, Pachia nynh namaw te vaeccawku a ry cipaw kha nae nyh cih. Amaw kong houh houh na ccangkunaw liate Pachia vaeccaw lang nae thua kho cih.

4. Baebu te asekuhte nasyngtaw paw ung tou?

4 Baebu hynh byaphuin 2,600 hang te leih thua zah, ccaang patae te a tho vae hae. Laephipi ccungccaw 100 kya 90 nynh mihmaw bya te a ria kho vae hae. Nawkheih kya, Baebu ccaw hynh ccaang kheih lae te tho a thua vae! Baebu ccaw hawte accangpaw pawpaw ccah-uh mah tho paw ung khyh.

5. Baebu ccaw tuh “Pachia hysawnuapaw” cite pawccemou ho kho a thua?

 5 Baebu ccaw tuh “Pachia hysawnuapaw” nynh thua. (Timote 3:16 ria.) Thuasalama abang nynh, ‘Baebu ccaw hynh cungccaw hae nynh a zei hae paw thuakeiccuze pawtemou Pachia bya a thua kho cih?’ cite a tua hae. Baebu nynh, “Pachia kyate oun thuapaw thehooypaw ah phyvae hae ze Thya Muisaw cciakhaenaw liate nynh a ho hae,” a ci. (2 Piter 1:21) Tousenawze, paaw nynh accahpaw kha a cyi ry paw te a tuanaw hae kha a zei sah. Tuh-e ccaw tuh accahpaw ccaw thua leite a paaw ccaw nynh thua. Tuhawte Baebu ccaw mah a zeitu hae paw bya thualeite Pachia nynh a zei sah hae paw thuakeiccuze “Pachia bya” nynh a thua.—1 Thesalonhae 2:13; Piacihpaw 2 kya do.

Laephithaw Leihnaw Baebu kha baphuin patae te mue kho a thua vae

 BAEBU TUH ME ZAH KYHRARIH

6, 7. Baebu hynh nulang malang phe a lo kuh cite pawccemou ah ho kho oh?

6 Baebu a la zei lya hae hynh kum 1,600 lae a la ro. Baebu zeitu hae paw hynh mih she te mih hingnaw zia mah lokuh khyh hae. Abang tuh thyahawnaw hoi hae zah, abang tuh hoi khyh hae. Tousenawze, sibawi paw, lophopaw hae, ngasawkyngpaw hae, tuuringpaw hae, profeh hae, byapiatu hae te siapharang hae nynh thua hae. Baebu zeitu hae tuh mih ungtuzia lokuh khyh hae salazema a zei hae paw Baebu bya tuh marya alokuh kou. Baebu bya tuh a thonaw te a thangnaw cia rawse kuh khyh. *

7 Baebu nynh piahccahnaa pawtemou yng tho cipaw te Baebu a thangnaw kya vae tuh Pachia nynh piahccahnaa hae kha yng zo sah cih zah laephi pyngpi hynh Paradais lang yng tang sah cih cipaw yn ho pya. Baebu kya kum athung te a ro vae paw ccungccaw hae hingnaw kong te Pachia a eenaw hae kha azungzae a ccing cipaw kong kha mah a ung.

8. Baebu tuh science thyahawnaw te phe a lo kuh cipaw tousenaw hae kha ho tua.

8 Baebu tuh science thyahawnaw te zei paw a thua khyh ze mah science thyahawnaw te mah phe a lokuh. Tukeiccuze Baebu tuh Pachia kyate yng thua paw ccah-uh nynh thua cite zynngang a ung. Tousenawze, Levitikas ccah-uh kya Pachia nynh Israel hae kha cciinaw hawnaw kyate luenaw zia a la ccangpya hae paw kong a zei kuh. Baebu a la zei maw hae mawte a kaekuthya paw cciinaw kong kha a la ny ty vae hae. Baebu nynh Laephi mah pawpaw ung leipaw kya nynh a nung cite merarih te yn  ccangpya. (Job 26:7) Ccungccaw alunghua nynh laephi hynh phekadae cite la zyn hae, thuasalama Baebu nynh laephi tuh a pyng a ci.—Isaiah 40:22.

9. Baebu zeitu hae mih dingnaw nynh Baebu kong nythyanaw lang pawtemou yn bung?

9 Baebu nynh ccungccaw phungpaw konglang a hopaw hynh zungzae me zah a kyh. Ccungccaw hae nynh a zei hae paw phungpaw ccah-uh hae tuh a balyng te me kou khyh, pawccecize a zeitu hae paw tuh adinglei hae paw a thua keiccu hae nynh thua. Tousenawze, ccungccaw phungpaw zeitu hae paw tuh mih minphuin a shungnaw hae kong zei boi khyh hae. Thuasalama Baebu zeitu hae nynh tuh Israel hae a shungnaw hae kong te mimaw a cyiseinaw hae kong balyng kha phei leite nynh la zei hae. Tousenawze, Nambar ccah-uh kya, Mawsi nynh a cyiseinaw kong te Pachia nynh a thuiheinaw kong balyng kha phei leite a la zei. (Nambar 20:2-12) Baebu tuh Pachia kyate yng thua paw cipaw Baebu zeitu hae mih dingnaw nynh a lang sah. Asuilang tuh Baebu tuh zynngang a ung cinawpaw nynh thua.

AHOYPAW TUANAW TE PHE BEIHPAW CCAH-UH

10. Baebu nynh tuanaw yn pyapaw hynh atunin ccyh kyacia pawcce athane ung?

10 Baebu tuh “Pachia hysawnuapaw nynh thua. Tuh-e Ccathyaa tuh ccangpyakunaw hanglang, seimuihsakunaw hanglang, raethuinaw hanglang, dingnaw kya thuiheikunaw hanglang athanepaw nynh thua.” (2 Timote 3:16) Baebu nynh tuanaw yn pyapaw hynh atunin ccyh kyacia thanenaw a ung. Zahova tuh raetu thuakeiccuze ah tuanaw te ah konglang karyh yn ny kou. Ahmaw te ahmaw ah ny ku oh paw lae ze Zahova nynh ah konglang houh a nyh hua, amaw nynh lungpaw te ung hae sah ci a ry. Aening hanglang pawmou a hoy, pawmou hoy khyh cipaw pung a ny kou.

11, 12. (a) Zisu nynh Matthai alepaw 5 kyate 7 cia paw tuanaw hoypaw mou yn pya? (b) Baebu kya ccangku langpaw ung ung tou?

 11 Matthai alepaw 5 kyate 7 kyacia ria langze, lungpawnaw mue khonaw zia, lukheih te lukheih ccawkuthyanaw zia, sawsang thyanaw te phua mang thyanaw zia hae kong, Zisu nynh yn ccangpyapaw kha muih kho a thua. E tuanaw pyapaw hynh kum 2,000 cia aro vae paw thuazema atunin cia ccungkia zah athane ung.

12 Baebu kya, Zahova nynh phungbya kong yn ccangpya, tuh-e nynh ahoypaw innbyng thuakhonaw lang, ryalatu hoypaw thuakhonaw lang, te lukheih te lukheih ccawkuthyanaw lang yn bung. Baebu phungbya hae nynh pawpaw minphuin ah thua oh ze mah, pawpaw kya ah ung oh ze mah, paw piahccahnaa ah tung oh ze mah zungzae yn bung kho.—Isaiah 48:17 ria; Piachihpaw 3 kya do.

BAEBU HOTY BYA ZYNNGANGNAW

Baebu zeitu Isaiah nynh Babilon a ro lang paw kong a la hoty

13. Isaiah nynh Babilon kong pawtemou a la hoty?

13 Baebu hoty bya hae tuh a ccing vae paw mah a ung. Tousenawze, Isaiah nynh Babilon kholopi a ro langpaw kong kha a la hoty. (Isaiah 13:19) Pawte nynh yng ro ngaw cipaw phe ccinglang a la hoty. Babilon kholopi tuh koikuapi te vaw nynh varyng akoih lu paw nynh thua. Thuasalama vawtui tuh karae yng kang cih zah koikua mah yng hung kuh cih cite Isaiah nynh a la hoty. Rawtuh hoo leite yng tae cih hae cite mah a la hoty. Babilon arohtu langpaw Siapharang paw min tuh Sairas nynh thua cipaw cia a la hoty.—Isaiah 44:27–45:2 ria; Piacihpaw 4 kya do.

14, 15. Profeh Isaiah bya tuh pawtemou yng ccing?

14 Tuhte hoty zah kum 200 yn ro tetuh rawkawbu bukheih nynh Babilon khua kha yn koih lu vae hae. Rawkah Bawipaw tuh a hungmou? Profeh nynh a la hoty vae hawte Pasia Siapharang Sairas nynh thua. A la hoty vae hawte marya yng ccing vae.

 15 Babilon hae puai a tuaa lya hae khuazi khe tuh yng dou vae hae. Myarya alepaw koikua te vawtui nynh mah mihmaw kha khung kho vae khyh hae. Khua te atolang khe Sairas te a rawkaw hae nynh vawtui kha a ccanglang ccahring a lua sah hae. Tui he a ky tuh Pasia rawkaw hae nynh tui kha ake kho vae hae. Thuasalama Babilon koikuapi so pawtemou a tee kho cih hae? Profeh nynh a la  hoty hawte kholopi koikuapi tuh a la hungkuty vae keiccuze rawkaw hae nynh rawtuh hoo leite a tae vae hae.

16. (a) Babilon te asekuhte Isaiah nynh pawtemou la hoty? (b) Isaiah nynh a hoty paw bya a la ccing cipaw pawtemou ah ny oh?

16 Profeh Isaiah nynh nyalang tuh hung ccungccaw sang mah Babilon kya khua sathui vae lang khyh hae a ci. Amaw nynh, ‘Tuh-e khua kya tuh hunghung mah khua sathui vae lang khyh hae,’ cite a la hoty. (Isaiah 13:20) Tuh-e tuh ccing tou? A ccing, Babilon khorohpaw tuh Iraq rang, Baghdad khua te a lia lang Me 50 hang asawnaw kya muih kho a thua. Atunin kyacia a hung ccungccaw sang mah ung khyh hae. Zahova nynh Babilon kha ‘innphi te phi hawte ka roh cih’ cite a ci hawte phe a la ccing.—Isaiah 14:22, 23. *

Babilon khorohpaw

17. Pachia bakingnaw miakaw hynh pawcce zyn kho a thua?

17 Baebu hoty bya hae a ccingnaw liate malang ze mah yng ccing maming cih cipaw zyn kho a thua. Zahova  nynh Laephi tuh Pradais lang ka tang sah cih cite bya yn king paw kha ah zyn kho oh. (Nambar 23:19 ria.) “A hyng boileipaw Pachia nynh e hingnaw tuh laephi thotakaw mawpite oun kinvaepaw” kha ah ngaehoi oh.—Titus 1:2. *

BAEBU NYNH NA HINGNAW AE RULAE KHO

18. “Pachia bya” te asekuhte Paul nynh pawtemou a la ho?

18 Baebu tuh a ccangpaw ccawte loku khyh cipaw ah ny vae oh. Baebu tuh nulang malang e bya a loku apiaze, thyahawnaw te, ccungccaw phungpaw hae te mah a rawsekunaw ung khyh. Baebu kya ahoypaw tuanaw te a ccing vaepaw profeh bya hae a ung. Thuasalama Baebu kya, e-lae ze ahoyhua paw kong a ung ung. Zuitu Paul nynh hynhte a la zei: “Pachia bya tuh hing zah a thung.” Tuh-e tuh paw suilang mou a thua?—Hebruhae 4:12 ria.

19, 20. (a) Baebu nynh pawte cih paw ccungccaw mou ka thua cipaw nykuthyanaw lang pawtemou yn bung kho? (b) Pachia yn pya paw Baebu lasung hanglang ah lungtuanaw kha pawtemou lang sah lang?

19 Baebu nynh na hingnaw kha ae rulae kho. Pawte cih paw ccungccaw mou ka thua cipaw nykuthyanaw lang ae bung kho. Tuathya roihthyanaw lang yn bung. Tousenawze, Pachia tuh ka sungsah ci tuh mang a cih cih oh. Thuasalama Baebu nynh yn ccangpya paw kha ah zui oh ze rou nynh ah sungsahnaw oh kha lang sah paw a thua.

20 Baebu tuh Pachia kyate yng thua ccaccing paw nynh thua. Pachia nynh Baebu kha ria lang, ccangku lang zah aphute sah hae sah ci a ry. Yn pya paw e-lasung hanglang lungtua khaeku lang zah pei ccangku lang. Tuhte na cyi ze tuh ccungccaw hae hanglang Pachia eenaw kha hoyrarih lang nae thaethya vae cih. Tuh-e a eenaw kong kha malang-e abalu kya bua ccangku lang.

^ par. 6 Ccungccaw abang nynh Baebu bya tuh nulang malang e bya loku khyh a ci hae, thuasalama tuh-e tuh me khyh. Zahova Ccaeccei hae nynh a tho hae paw, Baebu tuh Pachia bya nynh thua cipaw ccae sah naw သမ္မာကျမ်းစာ—ဘုသခင့်နှုတ်မြွက်လော၊ နှုတ်ထွက်လော cihkuh paw ccah-uh abalu 7 kya do tua.

^ par. 16 Baebu hoty paw bya houh na ny ryze Zahova Ccaeccei hae nynh a tho hae paw, Baebu kong azei kuh paw လူခပ်သိမ်းအတွက် စာအုပ်တစ်အုပ် cihkuh paw ccahkia nambah 27-29 kya na ria kho.

^ par. 17 Babilon a ronaw kong hynh Baebu Profeh bya hae lungkhu ze ccangkheih nynh thua. Zisu Khrih kong Profeh bya kha Piachihpaw 5 kya do.