Skip to content

Skip to table of contents

Aening Hanglang Pachia Eenaw Tuh Pawmou?

Aening Hanglang Pachia Eenaw Tuh Pawmou?

CCAHDING ccaw na ria vae ze, TV na do vae ze, radio na ngae vae ze hoyleinaw, rawdoukunaw te chiaku baekunaw hae kong kha na muih na thae kha zaw. Na maw pyngsaw cciinaw keiccuze thua sah tukhyhze na sungsah paw lukhakheih a chii keiccuze mah thua sah vawsawnaw na tung boi cih.

Na mawte na maw hynhte khiaku tua:

  • E hynh ka maw te ka innbyng hanglang Pachia rynaw tou?

  • Ka tungpaw piahccahnaa hae phishing kho nawlang pawkyamou ka ccung kho cih?

  • Amepaw daenaw yng ung cih tou?

E bakhianaw hae hynh ngaengang phe ung lang Baebu nynh yn phi pya.

 PACHIA NYNH NGAE-ANG LANG UNGPAW LAEPHI VAW LANG YN CYI PAH VAE CIH CITE BAEBU NYNH YN CCANGPYA.

  • Ccungccaw hae tuh ngaethyanaw, tawnaw te chiinaw tung vae lang khyh hae.—Byaphy 21:4

  • ‘Accu khou paw mah sakhi hawte yng thohkuh vae cih’.—Isaish 35:6

  • ‘Mih mih mohpaw hae mah mih mih yng aw vae cih.’—Isaiah 35:5

  •  A chih hae paw mah bua yng hing thui vae cih hae.—Johan 5:28, 29

  • A hungsang mah a ccih paw ung vae lang khyh.—Isaiah 33:24

  • Laephivaw lang-e ccungccaw hae hanglang aepaw niapaw patae yng ung vae cih.—Sam 72:16

 BAEBU CCANGPYANAW KYATE THANENAW LAW KUH

E ccah-uh masaty ccahkianaw kya-e hae hung na ria pawte e ccah-uh tuh mihtuanaw huataw nynh thua cite zoibaheih lang na tua kho. Thuasalama Pachia nynh laephivaw lang-e uh-ccaw hae tuh ka rulae vae cih cite bya yn king pyaku. Baebu nynh pawtemou yn cyi pah cih cipaw kha yn ccaesah pya.

Baebu nynh e laeze houh yn ccangpya. Atulya lungpawnaw te amepaw hingnaw mue kho nawlang pawmou ny ah hoo oh cipaw balyng yn ccangpya. A ccyh sohsoh kya na lungvawsaw paw uh-ccaw hae kong kha tua tua. Tuh-e kya ze phua kong, innbyng piahccahnaa hae kong, ngedang leinaw, na sungsah paw lukhakheih a chih paw kong mah a thua kho. Baebu nynh kha-e piahccahnaa hae taeku kho nawlang ae bung kho. E bakhianaw hae ae phipyanaw liate ngaengangnaw na mue kho:

 Paw Baebu ccangpyanaw kha mou ny ahoo cipaw kha e ccah-uh na ria naw liate nae nyh cih. E ccah-uh nynh ae bung cih. Ccawrieanaw hae hanglang bakhianaw hae a ung, kha-e hae nynh Baebu houh thaethya nawlang ae bung cih. Ccungccaw ccaang patae hae tuh Zahova Ccaeccei hae ryte Baebu a hokunaw hae kyate lungpawnaw a mue hae. Nang mah tuhawte cyi bua lang kae ngaehoi. Baebu nynh pawmou yn ccangpya cipaw nythya nawlang Pachia nynh hythua ae pya vae sa!