Skip to content

Skip to table of contents

 ABALU HAWLAETHUNG

Hingnaw Lasung Kha Phute Sah

Hingnaw Lasung Kha Phute Sah

1. Hingnaw hynh hungnynhmou yn pya?

ZAHOVA tuh ‘a hingpaw Pachia nynh thua.’ (Jeremiah 10:10) Amaw tuh yn raetupaw te hingnaw yn pyatupaw nynh thua. Baebu nynh, “Nang tuh pawpaw balyng na rae za, na kawte raepaw te hingsapaw nynh a thua,” a ci. (Byaphy 4:11) Zahova nynh hing hae sah ci a ry. Hingnaw tuh Pachia lasung lungkhuze aphute huaccepaw nynh a thua.—Sam 36:9 ria.

2. Ah hingnaw oh kya pawtemou lungpawnaw mue kho lang?

2 Zahova nynh pou hing kho nawlang ah hoo ah bou oh paw looh te tui lasung yn pya. (Zuituhae 17:28) Thuasalama tuh-e lae ze ah hingnaw oh kya milung paw hae sa ci a ry. (Zuituhae 14:15-17) Lungpaw te ah hing ry oh ze Pachia kawbya hae kha zui lang ahoo.—Isaiah 48:17, 18.

HINGNAW KONG PACHIA A MUIHNAW

3. Kain nynh Abel a chia lya kha Zahova nynh pawtemou a la cyi?

3 Baebu nynh ah hingnaw oh te ming ccangpaw hae hingnaw hynh Zahova hanglang aphute paw nynh thua cite yn ccangpya. Tousenawze, Adam te Evua hae mih ccapaw—Kain—nynh a neihtapaw Abel tungvaw a thing a ria lya khe, Zahova nynh Kain kha na thing rianaw kha synkuh cite raeringnaw a pya. Thuasalama Kain nynh ngaepah khyh, te a thing eih ria zah ‘a neihtapaw Abel kha a chia.’ (Genesis 4:3-8) Abel kha a chia keiccu Zahova nynh Kain kha de a tah. (Genesis 4:9-11) Tukeiccuze thing rianaw te huakunaw nynh ziaku chiakunaw a ung sah kho keiccuze e-aê hynh rilang myarya a ung. E paw hawte a lokuh paw ccungccaw tuh zungzae hingnaw mue lang khyh.  (1 Johan 3:15 ria.) Zahova lungpaw sah ry ze, ccungccaw miakaw sungsah thya nawlang ccangku ah hoo oh.

4. Hingnaw lasung kong kha Pachia nynh Israel hae a pya hae paw paw kawbya nynhmou yn ccang pah?

4 Kum hynhsepi aro koute, Zahova nynh Mawsi kha Kawbya Ccanghaw a pya lyakhe hingnaw hynh hohtuhtemou phu ate sah cipaw kha a lang sah. Kawbya ccangkheihnaw tuh: ‘Ccungccaw theih nang.’ (Deuteronomi 5:17) Ccungccaw lukheih nynh lukhakheih kha eenaw te a chia lang ze, kha-e paw tukhyhze kha-e nung kha chia ru a thua cih.

5. Ccaw roku paw hynh Pachia nynh pawtemou a muih?

5 Ccaaw roku paw hynh Pachia nynh pawtemou a muih? A pui loh leipaw imua hingnaw mah Zahova nynh phu ate sah. Zahova nynh Israel hae a pya hae paw Kawbya kya ze, lukhakheih nynh ccaaw hoinung kha bua sei zah a nung te a ccaaw a chii keiccuze, kha-e paw kha chiaru a thua cih cite Zahova nynh a ci. (Exodas 21:22, 23 ria; Sam 127:3.) E nynh ccaaw roku paw tuh seinaw cite yn ccangpya.—Piachihpaw 28 kya do.

6, 7. Ah hingnaw kha phu ka te sah cipaw pawtemou lang sah lang?

6 Ah hingnaw te ming ccangpaw hingnaw kha phu ka te sah cipaw Zahova malang pawtemou lang sah kho lang? Ah hingnaw tukhyhze mingccangpaw hingnaw kya ruunaw a ung sah thya paw uh-ccaw hangkhakheih cyi khyh nawlang zuaku lang. Tukeiccuze maezu, kuingza tukhyhze ahoy leipaw sii hae kha mang leilang. Pawccecize aening kha ruunaw yn pya zah chii mah yn chii sah kho keiccu nynh thua.

7 Ah pyng te ah hingnaw tuh Pachia nynh yn pyapaw a thua keiccuze amaw rynaw hawte hing lang a ccang. Tukeiccuze ah pyng hynh hoyte do-oihku ahoo. Hoyte ah do-oihku khyh oh ze, Pachia muihnaw kya a thyaa leipaw ccungccaw nynh ah thua vae cih oh. (Romhae 6:19; 12:1; 2 Korinhae 7:1) Hingnaw hynh phute langte ah muih thya khyh oh ze, hingnaw hynh hungmou yn pya cipaw  ny kho leilang zah Zahova kha mah beih kho leilang vae. Cyimae paw ahoy leipaw ziazae kha ungtaw lang cipaw tuh aruupaw thua ze mah ah hingnaw kha phute sah lang zah ziazae hoyleipaw kha vua lang ah zuaku oh ze rulaeku kho nawlang Zahova nynh yn bung cih.

8. Ah hingnaw te mingccangpaw hae hingnaw kya ruunaw a thua sei khyh nawlang pawmou hoyte cyi lang?

8 Hingnaw tuh aphute paw lasung nynh thua cipaw ah ccangku vae oh. Ah hingnaw tukhyhze mingccangpaw hingnaw kya ruunaw a thua sah lang paw kha mazii cyi khyh nawlang Zahova nynh a ngaehoi. Mawtaw tukhyhze cycle mong lang ze raeringku te mong ahoo. Rilang ung paw zuenaw hae kha mah sibia lang. (Sam 11:5) Ah inn kha mah hoyte tynkaring lang do-oih ahoo cih. Zahova nynh Israel hae kha hynhte kawbya a la pya hae: ‘Inn thaw na sah vae oh ze nae inn tungvaw khe lungrua te na koih cih oh, pawccecize inn tungvaw te ccungccaw ccahsei zah chihse luanaw seinaw nynh ae thuanuasei khyh naw lang oh nynh thua.’—Deuteronomi 22:8.

9. Lorang saw hae kha pawtemou a phute sah lang a ccang?

9 Lorang saw hae mah Zahova nynh phu myarya ate sah hae. Aelang, uhccaw hae hanglang, te ruunaw pya lang yn ci vae hae ze ah hingnaw kha thungkhawku khylang lorang saw hae kha chia kho a thua. Amaw nynh kaw yn ua. (Genesis 3:21; 9:3; Exodas 21:28) Thuasalama lorang saw hae kha zuenaw paenaw langte chia lang ze tuh Pachia nynh ry khyh.—Phungtangbya 12:10

NA HINGNAW KHA APHUTE SAH

10. Hingnaw tuh chi nynh thua cipaw pawtemou ah ny oh?

10 Chi tuh hingnaw a thua keiccuze Zahova hanglang a thyapaw nynh thua. Kain nynh Abel a theih koute, Zahova nynh Kain kha, ‘Na chiapaw na neihtapaw chi nynh lae vawlangte thaw mawte yn ko,’ a ci. (Genesis 4:10) Abel a chi tuh a hingnaw kha a ho rypaw thua zah Abel a chia keiccuze Zahova nynh Kain kha de a la tah. Noah she tuipah-yng koute mah hingnaw tuh chi nynh thua cipaw Zahova  nynh bua a lang sah. Zahova nynh Noah te a innbyng hae kha saw aenaw kaw a pya hae. Amaw nynh, ‘Rangsaw hae te thingthae, thingnaw hae tuh na ae kho oh, abalyng te looh hanglang kae pya oh, thuasalazema saw kha a lungkhu chi a ung lya tuh na ae lang khyh oh, pawccecize hingnaw tuh chi nynh thua,’ a ci.—Genesis 1:29; 9:3, 4.

11. Israel minphuin hae kha chi te asekuhte Pachia nynh paw kawbya mou a pya hae?

11 Zahova nynh Noah kha chi na ae lang khyh cite a ho pah koute kum 800 hang a ro te mah a ccungccaw hae kha chi na ae lang khyh oh cite kawbya bua a pya hae. ‘Israel ccungccaw thua sah, nae kya ung paw mikhia thua sah, hunghung ze mah sawdenaw kya-e saw thua sah, pavaw thua sah a mueku ze a chi kha a lae cih zah laephi te bua a theithing cih. Amaw nynh, ‘chi kha mazii na aelang khyh oh,’ a ci pya hae. (Levitikas 17:13, 14) Zahova nynh a ccungccaw hae kha chi tuh a thyapaw lang pou muih hae sah ci a ry. A saw tuh ae kho a thua, thuasalama a chi tuh ae kho thua khyh. Israel hae nynh lorang saw kha ae lang a chiaku vae hae ze, a chi kha lae hae zah laephi te a theithing hae.

12. Khrihccaw hae nynh chi kha pawtemou muih lang?

12 Zisu a chih koute Zerusalem khua kya-e zuitu hae te buu piccang hae nynh Israel hae a pya hae paw Kawbya kya-e kha Khrihccaw hae nynh pou zuilang accang paw kong byapae khylang a la tungkuh hae. (Zuituhae 15:28, 29 ria; 21:25.) Chi tuh Zahova nynh phute sah zah miming nynh mah athyaa lang te pou muih ahoo cipaw a thaethyanaw lang hae miming kha Zahova nynh a bung hae. Masaty Khrihccaw hae nynh chi kha la ae khyh hae zah la neih khyh hae. A chi lua leipaw saw mah ae khyh hae. A la ae lang hae thua ze azuh beihpaw tukhyhze nopi pise seinaw rae paw hawte nynh a loku. Tuh-e she kyate tho zah amepaw Khrihccaw hae nynh chi kha ae khyh hae, neih khyh hae. Atushe so? Zahova nynh aening mah chi hynh athyaa paw cite pou muih hae sah ci a ry.

13. Khrihccaw hae nynh pawccemou chi ruinku leilang?

 13 Khrihccaw hae nynh chi ruinku leilang cipaw a suilang thua tou? Athua, ruinku leilang. Zahova nynh chi kha na ae lang khyh oh, na neih lang khyh oh cite kawbya yn pya. Sibawipaw nynh samaw kha na neih lang khyh ae ci ze, na pyngsaw lungkhu lang so na ruinkuh cih tou? Na ruinku lang khyh kha zaw! Tuhawte, a horypaw tuh chi kha ae lang nia lang paw thua khyh zah ruinku paw mah thua khyh cinawpaw nynh thua.—Piachihpaw 29 kya do.

14, 15. Khrihccaw nynh tuh hingnaw kha a phute sah lang, Zahova kaw ngae lang pawccemou azici?

14 Sibawipaw nynh chi na ruinku khyh ze na chih vae cih yn lah ci langze pawtemou? Chi te asekuhpaw Pachia kawbya zuilang lukheih rahveih nynh byapaeku hahei lang ahoo. Khrihccaw miakaw nynh Pachia pyapaw hingnaw lasung kha phute sah lang zah ah hingnaw hanglang si te do-oihkunaw hae kha tuh lehkhang lang, thuasalama chi ruinkunaw kha tuh saungku lang.

15 Ngedangnaw do-oihkunaw hanglang ah zuaku kho oh, thuasalama Pachia hanglang hingnaw tuh myarya a phutepaw a thua keiccuze chi hynh mazii ruinku leilang. Ah hingnaw oh kya akaw ei lang zuaku paw laeze Zahova kawbya zui paw tuh azici huapaw nynh thua. Zisu nynh, ‘Hungzema amaw hingnaw a sungkhawkupaw tuh a hingnaw kha a shung ci; thuasalama hungzema kaekah keiccuze a hingnaw a shungpaw tuh hingnaw a mue ci,’ a ci. (Matthai 16:25) Zahova kha ah sungsah oh keiccuze akaw kha ngae ah ry oh. Zahova nynh aening hanglang ahoyhua ccepaw kha a ny, te Zahova nynh a muih hawte hingnaw kha a phutepaw lang, athyaa paw lang muih bua lang ahoo.—Hebruhae 11:6.

16. Pachia rya lahtu hae nynh a kawbya kha pawccemou ngae lang ahoo?

16 Pachia rya kha zyntyngte a lah hae paw nynh tuh chi kawbya kha zuilang bya paeku ahoo. Miming nynh chi  kha ae lang khyh hae, neih lang khyh hae zah silang mah mang lang khyh hae. * Thuasalama, hingnaw thungkhawkunaw hanglang a ccangpaw si do-oihkunaw kha tuh a mang cih hae. Miming hanglang pawmou ahoyhua cipaw kha hingnaw te chi Raetupaw nynh a nyh hua cite a zyng hae. Nang so na hanglang ahoyhua ccepaw a ny cipaw kha na zyn tou?

ZAHOVA NYNH CHI MANGNAW CCANGKHEIH ROU NYNH KAW A UA

17. Zahova nynh Israel hae kha pawkya rou mou chi manglang kaw a ua hae?

17 Pachia nynh Mawsi Kawbya a pyapaw kya ze, Zahova nynh Israel hae kha, ‘Chi tuh pyngsaw hingnaw nynh thua, nae seinaw thyaasanaw lang sithoi nawlang chi kha kae pya vae oh. Ccungccaw seinaw thyaasatu tuh chi nynh thua,’ cite a la cipya hae. (Levitikas 17:11) Israel hae nynh seinaw a raesei vae hae ze Zahova nynh mih seinaw ngaeethyanaw lang hae saring sakheih kha theih hae zah Pachia beihnaw Inn kya khe si athoi hae. Zahova nynh Israel hae kha chi mang lang a uanaw hae paw tuh e ccangkheih rou nynh a thua.

18. Zisu sithoinaw hynh aening hanglang paw thanenaw mou a ung?

18 Zisu laevaw lang yng rung lya ze, ah seinaw ngaeethya nawlang a hingnaw tukhyhze a chi kha sithoinaw liate saring te sithoinaw kawbya hang paw a la pyaku. (Matthai 20:28; Hebruhae 10:1) Zahova nynh Zisu kha vawlang kae lang a tho sah thui koute Zisu hingnaw tuh myarya a khing ung vae. Zahova nynh ccungccaw miakaw zungzae hinglang ngaehoinaw yn pya.—Johan 3:16; Hebruhae 9:11, 12; 1 Piter 1:18, 19.

Hingnaw te chi kha phu ka te sah cipaw pawtemou lang sah lang?

19. “Ccungccaw balyng chi kyate thyaanaw lang” pawmou cyi lang?

19 Hingnaw lasung hanglang Zahova kya ah lung  myarya tua lang a ccang! Zisu kya zyn na tyng oh lang thuaze zungzae hingnaw na mue cih oh cite ccungccaw hae kha hopya ah ry oh. Ccungccaw hae kha ah sungsah oh lang thuaze hingnaw a mue kho nawlang hae ah cyi kho naw oh ciate ccangpya lang hae. (Ezekiel 3:17-21) Zuitu Paul hawte cyi lang ze tuh hynhte ho kho lang vae: “Kae tuh ccungccaw balyng chi kyate ka thya, pawccecize Pachia khuakhangnaw balyng kha nangning kalang phy lang kasyng kuh khyh.” (Locceihtu‛ae 20:26, 27, BI) Zahova kong te amaw hanglang hingnaw hynh pawcihmou a phute cipaw mingccangpaw hae ah hopya oh paw tuh hingnaw te chi kha phu myarya ka te sah cipaw ah lang sah oh paw nynh thua.

^ par. 16 Chi ruinkunaw kong kha Zahova Ccaeccei hae nynh a tho hae paw, Pachia nynh yn sungsahnaw kong a zeikuh paw, “ဘုသခင့် မေတ္တာတေ၌ တည်နေလော့” cikupaw ccah-uh, ccahkia nambah 77-79 kya do.