Skip to content

Skip to table of contents

 ABALU CCANGHAW

Vawccungccaw Aê Kong Amepaw

Vawccungccaw Aê Kong Amepaw

1. Vawccungccaw hae kong pawccemou ccangku lang?

ZAHOVA nynh a innbyng hae kong ny sah yn ry. Vawccungccaw hae tuh Pachia innbyng nynh thua hae. Baebu nynh miming kha “Pachia ccahpaw hae” a ci. (Job 38:7) Vawccungccaw hae nynh pawmou a cyi hae? Langmaw lya ccungccaw hae kha pawtemou a la bung hae? Atu soh miming nynh yn bung kho ung hae tou?—Piachihpaw 8 kya do.

2. Vawccungccaw hae tuh pawkyatemou yng thua hae? Hohzeihmou a cih hae?

2 Vawccungccaw hae hynh pawkyatemou yng thua hae cipaw ny lang ahoo. Kolosehae 1:16 kya Zahova nynh Zisu a rae koute nynh, “vaw te laevaw kya e uccaw balyng kha a rae,” cite a ho. Tuh-e kya tuh vawccungccaw hae mah rae bua a thua hae. Vawccungccaw hae tuh hohzeihmou a cih hae? Baebu nynh vawccungccaw hae tuh ccaang azalu a cih hae cite a ci.—Sam 103:20; Byaphy 5:11

3. Job 38:4-7 kya vawccungccaw hae te asekuhte pawmou yn ho pya?

3 Zahova nynh vawccungccaw hae hynh laephi a rae mawte a la rae vae hae cite Baebu nynh yn ccangpya. Miming nynh laephi kha he muih hae tuh pawtemou a ung hae? Job ccah-uh kya mih lung myarya tua hae a ci. Zahova te myarya a sungsah kuh hae paw innbyng hae nynh thua hae.—Job 38:4-7.

PACHIA CCUNGCCAW HAE KHA A BUNG HAE

4. Vawccungccaw hae nynh ccungccaw hae kha pe a ki hae cipaw pawtemou ah ny oh?

4 Vawccungccaw hae nynh laephi te ccungccaw hae hanglang Zahova eenaw kha ny lang zungzae pe a ki hae. (Phungtangbya 8:30, 31; 1 Piter 1:11, 12) Adam te Evua nynh Pachia a la rawse lya hae kha vawccungccaw hae tuh mih ngae  myarya a la thah. Atushe mah ccungccaw a lunghua nynh Zahova kaw a ngae khyh hae paw kha a muih hae tuh mih ngae myarya a thah. Thuasalama lukhakheih nynh Pachia kalang a lung bua yng paleiku ze vawccungccaw hae tuh mih lung kou bua a tua. (Luka 15:10) Vawccungccaw hae nynh Pachia rya lah hae paw kha pe houh a ki hae. Zahova nynh laevaw e a rya lah hae paw kha bung khylang, thungkhaw khylang vawccungccaw hae kha a mang hae. (Hebruhae 1:7, 14) E tousenaw abang kha do tua oh sih.

‘Ka Pachia nynh chiadeih mung fuu khylang a vawccungccahpaw kha yn saw pya.’—Daniel 6:22

5. Langmaw she lya Pachia rya a lah hae paw kha vawccungccaw hae nynh pawtemou a la bung hae?

 5 Zahova nynh Sodom te Kamawrah khua aro lyaze Lawh te a innbyng hae luenaw mue sah khylang a bungtu lang hae vawccungccaw luning kha a la saw pya hae. (Genesis 19:15, 16) Kum zakheih aro koute, profeh Daniel kha Chiadeih thawng kya thawng a saw hae. Thuasalama ‘Pachia nynh Chiadeih mung fuu pya khylang vawccungccahpaw kha a saw pya keiccuze ruunaw tung khyh.’ (Daniel 6:22) Tuhkoute, Zuitu Piter thawng a ccaw lya mah, Zahova nynh vawccungccahpaw saw pah zah luenaw a pya. (Zuituhae 12:6-11) Zisu laevaw a hing lya mah vawccungccaw hae nynh a la bung hae. Tousenawze, tuipi a ing koute, “vawccungccaw hae nynh a bung hae.” (Marka 1:13) Zisu a chia maw hae taraw kya mah vawccungccahpaw nynh “thawzung a pya.”—Luka 22:43.

6. (a) Atunin ccyh kya vawccungccaw hae nynh Pachia rya lahtu hae kha a bung hae cipaw pawtemou ah ny oh? (b) Paw bakhianaw hae a phi kha mou atu ny lang?

6 Atushe tuh vawccungccaw hae hynh muih kho thua vae khyh hae. Thuasalama Pachia nynh a rya lahtu hae bungnaw lang vawccungccaw hae kha a mang ung hae. Baebu nynh, ‘Zahova raw a rih hae paw kha vawccungccaw hae nynh thungkhaw hae zah a khung hae,’ a ci. (Sam 34:7) Thungkhaw pawccemou ah hoo oh? Pawccecize thungnaw hoi hae zah ruunaw yn pya kho hae paw raw a ung hae keiccu nynh thua. Miming tuh hung hae mou? Paw kyatemou yng langku hae? Aening kha ruunaw pya lang pawtemou a zuaku hae? E bakhianaw hae a phi nythya nawlang Adam te Evua a rae kou hae te pawmou a cyih kuh cipaw kha adyngnawte dotua oh sih.

MUIH KHO LEIPAW RAW HAE

7. Setan nynh ccungccaw hae kha lu hozeihmou a la ling hae?

7 Abalu 3 kya vawccungccahpaw nynh Pachia a rawsenaw kong te ming hae kha uh a rynaw hae kong kha ah ccangku vae oh. Baebu nynh kha-e vawccungccahpaw kha Setan cite a ko. (Byaphy 12:9) Setan nynh ming hae mah Pachia rawse bua hae sah ci a ry. Evua a la ling kou tetuh, ccungccaw patae  hae kha mah a ling bua vae hae. Thuasalama, Abel, Enoh, Noah te ccungccaw abang tuh Zahova tungvaw zyn vahryng a la tyng hae.—Hebruhae 11:4, 5, 7.

8. (a) Abang vawccungccaw hae tuh pawtemou muihsaw hoyleipaw lang a tang hae? (b) Muihsaw hoylei hae paw nynh tuipa-yng kyate lue khylang pawmou a la cyi hae?

8 Noah she lyaze, rawsetu vawccungccaw abang hae nynh vawrang kya-e mih ungnaw kha cciataw te laevaw lang ccungccaw hae hawte a la ung bua hae. Pawccemou? Baebu nynh Zu a ry hae keiccu nynh thua a ci. (Genesis 6:2 ria.) Thuasalama vawccungccaw hae nynh tuhte a cyi hae paw tuh seinaw nynh a thua. (Jude 6) A sei hae paw vawccungccaw hae hawte atushe-e ccungccaw a lunghua mah mih ozia thah zah are aro vae hae. Zahova nynh ccungccah hoylei hae paw kha laephipi tuipa-yng te ro lang bya a la paeku. Thuasalama atung vaw zyntyng hae paw a see hae kha tuh a khung hae. (Genesis 7:17, 23) Tuh-e vawccungccah hoylei hae paw tuh vawlang nynh bua a la kae thui hae. Baebu nynh a sei hae paw vawccungccaw hae kha muihsaw hoylei hae paw cite a ci. Setan ryte Pachia rawse lang a poku hae keiccuze Setan tuh muihsaw hoylei hae paw uhtu lang a tang vae.—Matthai 9:34.

9. (a) Muihsaw hoylei hae paw kha vawlang bua a kae hae tuh pawmou a la cyihkuh vae? (b) Malang kya paw kong mou ccangku lang?

9 Zahova nynh muihsaw hoylei hae paw kha a innbyng lang tang sah bua vae khyh hae, pawccecize amaw arawse hae keiccuze nynh a thua. (2 Piter 2:4) Muihsaw hoylei hae paw tuh ccungccaw lang bua rulaekuh kho vae khyh hae, thuasalama miming nynh ‘laephipi ccungccaw haekha bangbang a ling ung hae.’ (Byaphy 12:9; 1 Johan 5:19) Pawtemou a ling hae cipaw kha ccangku tua oh sih.—2 Korinhae 2:11 ria.

MUIHSAW HOYLEI HAE PAW NYNH CCUNGCCAW HAE A LINGNAW HAE ZIA

10. Muihsaw hoylei hae paw nynh ccungccaw hae kha pawtemou a ling hae?

10 Muihsaw hoylei hae paw nynh ccungccaw hae kha a phuinphuin te a ling hae. Muihsaw hoylei hae paw nynh  ccungccaw hae kha daereih tukhyhze lukhakheih kyate thua sah a ccuepe hae. Tousenawze a bawithuapaw tukhyhze a puepaw hae kyate a ccuepe hae. Muihsaw hoylei hae paw te ccuepekunaw kha Setan thyanaw tukhyhze muihsaw hoyleipaw thyanaw a cih kuh. Thuasalama Baebu nynh Setan thyahawnaw kyate sihaekuh oh cite raeringnaw yn pya. (Galatihae 5:19-21) Pawccemou? Sawdepaw lukheih nynh rangsaw hae kha kyng kho nawlang kaang a syakhaw hawte, muihsaw hoylei hae paw nynh ccungccaw hae ling kho nawlang kaang te a lokuhpaw muihsaw hoyleipaw thyanaw a phuinphuin kha a mang hae.—Piachihpaw 26 kya do.

11. Malang e kong hothyanaw cipaw tuh pawmou, tuh-e tuh aening pawccemou sihaeku lang a ccang?

11 A lingnaw hae zia phuinkheih tuh malang-e hotypaw thyanaw a cih kuh. Malang-e yng cyihkuh lang paw kha Setan thungnaw mangte nylang azuaku hae. Abang nynh awsi do, awru do, kuih do, bung zynnaw, maang zynnaw, phe, dahphanglung citahawpaw hae muihsaw hoyleipaw thyanaw kha a mang hae. Ccungccaw patae hae nynh tuh-e thyahawnaw mang paw tuh rilang ung khyh cite a tua hae, thuasalama tuhte a tua hae paw tuh me khyh. Tuh-e hae tuh rilang myarya ung hae paw nynh thua. Tousenawze, Baebu nynh muihsaw hoylei hae paw te kuih do thya hae paw tuh pyng kheihlang rya a lahkheih hae paw nynh thua a ci. Zuituhae 16:16-18 kya, nopinung kha “malang e kong” ho kho nawlang “Setan” nynh a bung cite ah ria oh. Zuitu Paul nynh muihsaw hoyleipaw kha he a dee pah tetuh nopinung nynh malang e kong hokhonaw thyanaw kha hoi vae khyh.

12. (a) A chih hae paw te ccuepeku lang zuaku paw tuh pawcce rilang a ung? (b) Pachia rya lahtu hae nynh muihsaw hoylei hae paw te akyngkuh paw phungzae hae kha pawccemou mazi cyi leilang?

12 Muihsaw hoylei hae paw nynh ccungccaw hae kha kyngkho nawlang a ccangpaw hyngbya kha bua a mang ung hae. Muihsaw hoylei hae paw nynh michii hae kha hangkhakheih kya pou hing ung hae zah miming te ccuepeku kho a thua ung, te ruunaw mah yn pya kho ung hae cite zyn hae sah cite a zuaku hae. Tousenawze, Ccungccaw lukhakheih nynh a bangrui tukhyhze a vaeccaw a chih  vae paw te bya hoku khylang chihhingleihpaw kalang a ccia, chihhingleihpaw nynh a chih paw kalang bya a ho kho. Chihhingleihpaw nynh a bang, a vaeccaw lukhakheih a chih paw kong kha a chih paw roi phe lolang te kha-e paw kha a hopya kho. (1 Samuel 28:3-19) Alunghua ruamuanaw phungzae hae tuh a chih paw kha sangkhakheih kya pou a hing ung cipaw zynnaw kyate nynh yng tho. Tuh-e hae tuh lawki phung hawte ruangawpaw, sawku paenaw, michii hanglang aepaw niapaw nungpyanaw, numae hae hanglang phungzae hae te mihchii kha iileite phang ngawpaw phung hae nynh thua. Khrihccaw hae nynh khacih hawpaw phungzae hae kha a ei vae hae ze, mih innbyng tukhyhze mih khua-e ccungccaw hae nynh a ccae hae, a theih rya hae, tukhyhze miming ryte pawpaw rya mah lah kheih ry vae khyh hae. Thuasalama Khrihccaw hae nynh a chih vae paw tuh pawpaw kya sang mah hing vae khyh cipaw kha a ny hae. Miming te ccuepeku kho a thua vae khyh hae hawte ruunaw mah yn pya kho vae khyh hae. (Sam 115:17) Hoyte raering kuh. Michii tukhyhze muihsaw hoylei hae paw te hotuh hotuh mah ccuepeku lang zuakuh nang, muihsaw hoyleipaw te akyngkuh paw miakaw kha mah mazi cyih nang vae.—Deuteronomi 18:10, 11 ria; Isaiah 8:19.

13. Ccungccaw patae hae tuh Muihsaw hoylei hae paw raw rinaw kyate pawtemou a ung vae hae?

13 Muihsaw hoylei hae paw nynh ccungccaw hae kha aling hae apiaze sii balyng a sii hae. Atushe, Setan te muihsaw hoylei hae paw nynh laephi kyate Pachia nynh yn ro langpaw “ccyh dyngtari kyalya nynh” kae hoi vae cipaw a nyku hae keiccuze langmaw lya laeze vawsawnaw houh yn pya vae hae. (Byaphy 12:12, 17) Thuasalama, ccungccaw athung patae hae tuh langmaw-e muihsaw hoylei hae paw raw kha rih vae khyh hae. Muihsaw hoylei hae paw raw rinaw kyate miming tuh pawtemou a lue hae?

MUIHSAW HOYLEI HAE PAW KHA DOUKHONAW

14. Shekheihnaw e Khrihccaw hae hawte, muihsaw hoylei hae paw kyate pawtemou lue kho lang?

14 Baebu nynh muihsaw hoylei hae paw kha pawtemou  dou kho lang cipaw te pawtemou lue kho lang cipaw yn ho pya. Tousenawze, Efesahae khua kya-e cungccaw abang tuh amepaw phungding a la ccangku maw hae khe muihsaw hoylei hae paw te a la ccuepekuh hae. Pawtemou tuin kyate a lue hae? Baebu nynh, ‘Mih mihleih cca-uk hae balyng kha suelua hae za zahpi malang khe mae te arua hae,’ cite a ho. (Zuituhae 19:19) Mihleih ccah-uh a rua hae paw tuh Khrihccaw lang a tang ry hae keiccu nynh a thua. Atushe ze mah tuhawte cyi ahoo. Zahova rya a lah ry paw miakaw nynh tuh muihsaw hoylei hae paw thyahawnaw miakaw kha sibia ahoo. Tuh-e hae kya ze ccah-uh hae, mekazing hae, apue hae paw, video hae, law hae, game hae te rilang ung paw muihsaw hoylei hae paw sakhung hae mah sibia lang. Muihsaw hoylei hae paw kyate thungkhawku nawlang cite lawkupaw uh-ccaw hae kha mah mang leilang.—1 Korinhae 10:21.

15. Setan te muihsaw hoylei hae paw kha dou kho nawlang aening pawmou cyi ahoo?

15 Efesahae khua-e ccungccaw hae nynh mihleih ccah-uh a roh kou hae te kum pytari a ro te mah, zuitu Paul nynh miming kha ‘ahoy leipaw muisaw hae’ te nynh pei a douku ung oh cite ccaw a ky hae. (Efesa‛ae 6:12, BI) Thuasalama mihleih ccah-uh maete a rua kou hae te mah, muihsaw hoylei hae paw nynh ruunaw pya lang pei a zuaku ung hae. Tukeiccuze miming nynh pawmou cyi lang ahoo? Paul nynh miming kha, “Hae-ungtaw leite suaphua kha zynnaw ccanglang ccyngkuh zungzae oh; pawccecize Setan nynh mae hawte a thuapaw the te ae kaw vae oh ze tuh e phuate nah the kho cih oh,” cite a la ho pya hae. (Efesahae 6:16) Rawkaw lukheih kha suaphua nynh a khung hawte aening mah ah zynnaw nynh yn khung kho cih. Zahova nynh yn khung ccahccing cih cite zynnaw ah hoi lang oh ze, Setan te muihsaw hoylei hae paw kha ah dou kho cih oh.—Matthai 17:20.

16. Zahova ah zynnaw oh atyngnaw lang pawtemou cyi lang?

16 Zahova ah zynnaw oh atyngnaw lang pawtemou cyi lang? Zahova nynh yn thungkhaw nawlang amaw kha doliaku lang zah nintakyh Baebu rialang ahoo cih. Zahova kya ah zynnaw vahryng atyng lang ze tuh, Setan te muihsaw hoylei  hae paw nynh aening kha ruunaw yn pya kho vae lang khyh hae.—1 Johan 5:5.

17. Muihsaw hoylei hae paw kyate lue nawlang pawmou cyi lang?

17 Efesahae khua-e Khrihccaw hae nynh kha-e lae lang paw a cyi hae mou ahoo ung? Muihsaw hoyleipaw thyanaw te phe beihpaw khua kya nynh a la ung hae. Tukeiccuze Paul nynh miming kha, “Pawpaw ccyh kya zema sawsang oh,” a ci pya hae. (Efesahae 6:18) Zahova thungkhawnaw a mue nawlang hae ccyh takyh sawsangte a ngiaku hae a la hoo. Aening soh? Aening mah muihsaw hoyleipaw thyanaw te phe beihpaw laephi kya nynh ah ung oh. Tukeiccuze Zahova nynh yn thungkhaw nawlang ngiaku lang myarya ah hoo oh, te saw ah sangku vae oh ze a min kha mang ahoo. (Phungtangbya 18:10 ria.) Tuhte pei ah ngiaku oh ze tuh, Zahova nynh ah sawsangnaw kha yn thae pah cih zah Setan kyate yn lue sah cih.—Sam 145:19; Matthai 6:13.

18, 19. (a) Setan te muihsaw hoylei hae paw ah dounaw oh kya pawtemou tae kho lang? (b) Malang-e abalu nynh paw bakhianaw mou yn phi pah cih?

18 Zahova nynh yn thungkhaw nawlang amaw kha doliaku te ah hingnaw kya muihsaw hoylei hae paw thyanaw miakaw kha ah vua oh ze tuh, Setan te muihsaw hoylei hae paw kha ah dou kho cih oh. Miming kha ri hae hoo khyh. (James 4:7, 8 ria.) Zahova tuh muihsaw hoylei hae paw laeze myarya athung huapaw nynh thua. Amaw nynh miming kha Noah she lya de a la tah hae, te malang she ze mah amaw nynh miming kha a roh vae cih hae. (Jude 6) Setan te muihsaw hoylei hae paw ah dounaw oh kya ah makhae thuakhyh cipaw kha ningnang. Zahova nynh aening thungkhaw nawlang a vawccungccaw hae kha a mang. (2 Siapharang 6:15-17) Setan te muihsaw hoylei hae paw ah dounaw oh kya Zahova nynh yn bung cih zah taenaw ah mue cih oh cipaw kha ah zyn ngang oh.—1 Piter 5:6, 7; 2 Piter 2:9.

19 Ruunaw vawsawnaw hynh Setan te muihsaw hoylei hae paw keiccu ah tung oh paw thua lang ze, Pachia nynh miming kha pawccemou a ro lah khyh hae? E bakhianaw hynh malang-e abalu nynh yn phi pah cih.