Yaba nanaid daggega

Índice daggega

Niamar alamagnanaid, dulemar Babgi agbinega

Niamar alamagnanaid, dulemar Babgi agbinega

Dulemar gaggan iddogedba we ibmar imagmalad, binsamaladba, burgwismalad, dulemar dagdididaye

¿Ibigala Nia sagla Satanas, geb niamar bamalad bela belad dulemar yardaggedgi alamagnanai? Ar niamar abemalad anmar Babgi agbinmarmogad. Abemarbalid anmar emarba igar imagmarbalid. Emar yardaggega gaggansadimarsoggua, abemarbalid anmar yardaglemogad; ibu ibmarmala Jehova abesuli, niamardi abemarbalid anmar aa ibmarmala imagged. Aa ibmarmala bur bule burgwismaladga imagleardaed.

Anmar gwenad wargwengusale gwage nunmagged dummad anmargi nagunonidaed, degsoggu wile iddoged issaggwasulid. Ar ‘Jesus bosmogad’ e ai Lazaro burgwisgu (Juan 11:35).

Dule burgwisale ibmar soggwenna imaglesulid, auggi bela neg dirbimaggar ibmar emarbi imaglesurbalid. Abar ibmar imaglegedi Bibliagi soglenasulid we ibmar issaggwaye. Degi inigwale, abar ibmar imagleged dulemar binsaedba, dule burgwisale gudidaye, dulemar dagdidaye. Aaga dule burgwis naile edarbebuggwa gusdamalad, abar geg na barga gusdamaladbali dogagus wile iddoddamarsunnad, geb abar dule burgwisadga yosgu ibmar imagmarbalid. Dulemar weyob ibmar imaggalid, binsamaladba, weyob ibmar imaglesulile, burgwismalad uludagoye. Ar ‘burgwismaladdina  bar ibmar abemaisurmarsoggua’, dulemar weyob ibmar imagnaile Nia sagla Satanasga ibmar imagnanaid, Nia sagla Satanas gaggansadiid onasguega (Eclesiastés 9:5).

Dulemar gaggan iddogedba we ibmar imagmalad, binsamaladba, burgwismalad bendagged abeleye

Abar dulemar ibmar imagmalad, binsalegedba, burgwismalad bendagged abeleye, sulirdi mer dule burgwisad aggar e imaggegardibe. Aagala, neggwebur bamaladsiggi, iba dulabo gus dule burgwisadgine, birgagwengindibe, ega iba dummad onosdamalad, ibmar oburgwisdamarbalid. Degi imagdamalad, binsalegedba, degiile dule burgwisadi nabir bamalad burgwismalad buggwadse owarmagmogoye. Abar dulemar, burgwismaladga mas sidamarbalid, gobed sisdamarbalid.

Burgwismaladga weyob ibmar imaglegedi igar nuedsulid. Degsoggu, dule, burgwismaladga ibmar imadmogale, Nia sagla gaggan miminamogaled. ¿Jehova nued dagsardibe, anmar wis bibbi burgwismaladga niamar abegedba ibmar imadmogar? ¡Bibbisaar nued dagsasuliled! (2 Corintios 6:14-18TNM).

Dulemar, Jehovaga arbamaladi gege Nia sagla Satanas sogedba burgwismaladga ibmar imagmalad. Jehovaga arbadimaladdina, dulemar wile daggedba bur dulemar dula gudimalad bendaggedgi alamagdimalad. Ar wismalad unnila Jehovabii nabir dulemar burgwismalad bendaggoedi (Job 14:14, 15).

 Bab Dummad, burbar neg dagmalad ibmar imagged nued dagsulid

Abar dulemar e sunnad niamarbo sunmagmalad, sulirdina dule aa igar wisidse naodibe e anar niamarbo sunmaggega. Dulemar we ibmar imagmaladi burbar neg dagmaladid. Abar we ibmar imagmaladi, ina durganad, brujomalad, burbar neg dagmalad, burbar neg daggedba yoo ibmar guoed sogmalad.

Bab Dummad we ibmarmar nued dagsulid. Bab Dummad abeged egarbi ibmar imagleged (Éxodo 20:5).

Weyob Bibliagi soglenaidbali mag iddolleged we ibmar igar nuedsuli: “Melle bemar abargi dule wargwensaale, [...] nermar igarba, dule ina isganagi arbamalad igarba, ibmar yoo guoed sogmalad igarba, niamar igargi nanamaladba, ibmar imagdii guo. Deginbali, melle sunmaggedgi dule binsaed gao, melle ibmar burbaled oyoged dulega guo, melle dule irwa burba isganase goledga guo, melle burgwarmaladse idagged dulega guo. Ar doa we igar isgana imagdii gualile, Bab Jehova we dule bela bela isgus daggoed” (Deuteronomio 18:10-12).

 ¿Ibigala Jehova anmarga sogmai we ibmarba aggaedi boni bibbisurye?

Jehova nued anmargi binsaedba anmarga sogmaid, mer bibbisaar burbar neg dagmalad ibmar ebumaloye. Ar Jehova, anmar sabed; abesurbalid anmar aggar gued; wisbalid dule, niamar ibmarba aggadele dummad niamarse waladagdii gusdae.

Nilda degi gusad, Brasilgi, we omegwa burbar neg daggedinad. Niamala dummad Nilda wiosmalad. Nilda soged: “Niamala [...] angi ubononidamalad, degsoggu an, niamarba igar imaddasunnad. An mag neg iddodbaloe, an aggu neg iddodbaloe, niamar, an imasdamarbalid. An, nono isgudedbali hospitalgi an megwisbalid. Bela belad niamar, an wiossoggu boni soggwen angi nagunonisunnad, basur iddogega, an, ina doarbalid. Sisa gobed angi nagusbalid, an gadi sigali ue gusbalid. Undar an weyob gudi gusad”.

Burbar neg dagmaladga igar nabir gussurdaed. Sun neg sadde gumalad, sun preso seledmarbalid, sunna duggin burgwed amimarbalid

Beedsegine Jehova, geb Jehova sordagan, Nilda bendasmalad un niamargi wagginnega, emidi Nilda nued gudisunnad. Nilda soged: “Bela dulemarga an soged, melle bibbisaar niamar ibmar ebumalo”.