Yaba nanaid daggega

Menú baid daggega

Índice daggega

Jehovági sunmagmalad

dule

An garda Bibliag sunmagged

116: Igi sadegu gudigulesale

116: Igi sadegu gudigulesale

¿BE wisi e aimar burakwa bunolo ibu absosii? Be garda absosiidi absobukmarmoga… An garda Bibliag sunmaked. Bitig be absosii, aa ginsunna absobukmarmoga… “Igi sadegu gudigulesale.”

Mimmi garda absomaid

¿Be wisi ibu ibmar durdakbukmala? Gepegwad gine, sadegu gudisaega Jehovásik geb e Machi Jesús siki durdaklegweler gebye. Biblia soge: ‘We igala sadegu gudisaeche anmar semai. Bab Dummad napiragwad wargwennagwad siki be durdake geb e Machi Jesucristo siki.’

¿Igi anmar durdasale Bab Dummad Jehová siki geb e Machi Jesús siki? Soggwen gine, absogedi gepe onoded obeloged sega, An garda Bibliag sunmaked. We garda nue Jehová gine sunmaknai geb Jesús gine, ¿insoa? Geb sunmaknabali Jehová, Jesús bogwa ibmar imasadgi geb ibmar imakmaloedgi. Aukine ibmar baid absolebalir gebed.

Biblia

¿Be daksa garda baid napag mabalid? Adina Biblia. Dule baid beg absogeg be imake Bibliag sunmaked, Bibliag sulegar nanaidi. Biblia gine anmarga soglenai ibu ibmarmar abelege, napiragwadgi Jehovág arbaega, geb degi sadegu gudisaed amiega. Aa gala anmar bali bali Biblia durdaked abelege.

Auki unnila Jehová geb Jesucristo siki durdakedbi unnisuli. Sun anmar we dulemarsik nue ibmar wisi gusale geb emar ibmar odurdakmamaid siki, degin inigwale sadegu gudigued dina sun anmar nikguchulile. ¿Be wisi ibu ibmar nue abelebali?

Ibmar durdasad bali, anmar gudisabalir gebed. ¿Be Judas Iscariote ebinsae? Jesús 12 mergu apóstolmar susgua, sulesmogad. Judas nue Jehová siki geb Jesús siki ibmar wisina. Aukine, ¿igi guchuna? Ibamar nanasadgi na eginbi binsaali geb Jesúsgi aibicha, mani sibu 30 binale. Judas sadegua gudiguosuli.

¿Guejazi be ebinsabali, Sunmaknaid 69 gine anmar aa dulesik ibmar durdaksad? We dule dina mola geb mani e gad sulidi nikgubigualid. Gakansasad we ibmar nikguega, geb we dule Jehovás odurdaklesa. Amba Jehová anmar odurdakmogoed e igarmar mamaidba anmar dasulir.

Aukine bukib dule nuegan gudigusmarbalid Jehová bali nue nai na oyosmalad. Aa dulemaryob anmar gubimogad, ¿insoa? Machi bipi Samuel igar nued anmarga oyosad. Be ebinsae, igi anmar Sunmaked 55 gine daksa, we machigwa unnila birga bake, birga atardibe nikgua tabernáculo sega Jehovág arbaar gusad. Aa gala, amba be bipi gusundibe, geg soglege be bipi guye Bab Dummadga arbaega.

Nabiri, bela anmar Jesucristo yobi dabimoga. Sunmaked 87 gine oyonai, amba Jesucristo machi bipi gue unni Babse goled neggi dule bamalad odurdaksii gusa e Bab nibneg gined siki. We gudigusadyob anmar damoga. Warbigwa dulemar anmar abinguo dibe, bela aamarga anmar sunmakmogadi anmar Bab Dummad Jehová gine geb e Machi Jesucristogi. Bela anmar we ibmar imakele, nabir anmar sadegu gudisaoe Bab Dummad gannar Napaneg yeer dakle imakoed gine.

Juan 17:3; Salmo 145:1-21.



Egislenaid

  • ¿Ibu ibmar anmar durdaked abelege anmar sadegu gudi gubisundibe?
  • ¿Igi nabir anmar Jehová siki geb Jesús siki ibmar durdasale, igi sobaledgi bunolo e aimarmar imaksii?
  • Sobaled gine, ¿biti garda baid mai be dakbali, geb ibig anmar bali bali absogedi?
  • Jehová siki geb Jesús siki ibmar durdakedbi unnisulid, ¿ibu amba anmar imakbalir gebe na sadegu gudisaed amiega?
  • ¿Ibu ibmar anmar durdake, sunmaknaid 69 gine?
  • Sunmaknaid 55 gine machi bipi Samuelgi sunmake, ¿ibu ibmar nuedgi we anmar odurdake?
  • ¿Igi nabir anmar Jesucristo yobi dae gusmogale, geb deyob anmar imaksundibe, ibu ibmar nued anmar yooeche nikguoe?

Bamalad egislenabalid

  • Absoge Juan 17:3.

    ¿Igi Bibliag oyoge Jehová siki geb Jesucristo siki ibmar durdaked unnila nonog we ibmar gaed obarsuli? (Mat. 7:21; Sant. 2:18-20; 1 Juan 2:17.)

  • Absoge Salmo 145:1-21.

    ¿Ibumar ulale anmar Jehová nug odummogedi? (Sal. 145:8-11; Rev. 4:11.)

    ¿Ibu ibmar oyoge Jehová “bela dulemar gine nued dae”, geb igi we ibmar anmar bendake bur Jehová walika guega? (Sal. 145:9; Mat. 5:43-45.)

    Anmar Jehová sabsundibe, ¿ibu ibmar imakebier anmar itogoe? (Sal. 119:171, 172, 175; 145:11, 12, 21.)