Yaba nanaid daggega

Menú baid daggega

Índice daggega

Jehovági sunmagmalad

dule

An garda Bibliag sunmagged

76: Jerusalén obelolesa

76: Jerusalén obelolesa

REI Nabucodonosor, Israel dorgana bur nue odurdaklegarmalad Babilonias sesad akale, 10 año obite. ¡Emisgi, be dakena! Jerusalén ogummaklenai geb Israel dorgan burgwichurmaladdi Babilonias gales selesmala.

¿Be ebinsae? Bab gaya berbemaladi we ibmar guoye iduakwa sogsamala, Israel dorgan e ibmar ichakwa imakdimalad na ogwasurmalale. Aukine, Israel dorgan, Bab gaya berbemalad ega ibmar sogsamalad itochurmala. Aka ibmar baigan e bab dummadga imasmala, Jehovás goled anale. Degsoggu, odurdaklemalar gebe. Anmar nabir we ibmarmala wisi, ar Ezequiel Bab gaya berbegedi, anmarga soge ibu ibmar isganamala Israel dorgan imakdi gusmala.

¿Be wisi Ezequiel doawa? 10 año gusa, Jerusalén wegi obeloged iduale, Nabucodonosor sapingan sesa gusa Babiloniase. We sapin wargwena Ezequiel gue. Daniel geb e aimar warbaagwadi, Sadrac, Mesac geb Abednego, aunni selesgusmarmoga Babiloniase.

Ezequiel amba Babiloniag gudiidgi, Jehová ese oyosa ibu ibmar isganamala Jerusaléngi, Jehovás goled neg yagi imaklenai. Jehová we ibmar ese oyosa ibmar dakledisulid imakedgi. Nabiri, Ezequiel amba Babiloniag gudii, aukine Jehová ese belagwable oyosa, ese goled neg siid yagi, ibu ibmar gumai. ¡Ezequiel ibisgana sunsogmalad daksa!

Jehová, Ezequielga sogsa: ‘Be dake, anse goled neg yagi ibmar ima daklemalad dulemar imaknanaidi. E neg galumar be dake, egi naibe sobarnanaid, geb ibdulamar bamalad sobarnanabali. ¡Geb be dake, Israel dorgan we ibmar sobarmalad na bab dummadga imaknanaid!’ Ezequiel we ibmar daksa, geb narmasa ibu ibmarmala gunai.

Galebukmalanad wakinmamaid

Jehová, Ezequielse egicha: ‘¿Be daksa Israel dorgan e idumaladi, ibu imaknanai dukuakwagwa?’ Eye, Ezequiel amba we ibmar daksa bali. Dulemar 70 mergu gunanai, berkwable ibmar baigan na e bab dummadga imaknanai. Sogbukwa: ‘Jehová anmar dakmasuli. Bar neggweburgi gudisuli.’

Degidgi, Jehová, Ezequielse omegan oyosbali, es goled neg wagag gine bukmaladi. Tamuz sega gorbukmala, we ibmar na e bab dummadga imaknanai. ¡Be dakbalina! ¡Omegan sakwa nued siki Jehovás goled neg wagak dadnakwechik siid gindina machergan 25 mergusaar dullu dullu gunanai, Dad ganaid na bab dummadga imaknanai!

Jehová soge: ‘We dulemar angi dododidii. ¡Unnila binsa ibmar isganabi imaksurmala, anse goled neg siiche nonidamarbali, geb aagi ibmar isgana imakdamarbali!’ Agala Jehová sogsasunna: ‘An urwed e gangued itomaloe. Geb we dulemar obeloledele, an eba bukib binsao suli.’

Jehová, Ezequielse we ibmar oyosad sorba, birgabaagi Israel dorgan rei Nabucodonosor gine aibitemala. Degsoggu Nabucodonosor nachunna Israel dorganbo urwega. Degidgi, birgagwen abar gusadgi, Babilonia dorgan Jerusalén e muro maid utusmala, geb dogsamala, degine, bela neggwebur ogummasmala. Bukidar burgwismala geb bamaladdi Babilonias gales selesmala.

¿Ibigala Jehová Israel dorgan bendachuli, mer weyobi obelolemalaga? Ar Jehová itochurmalad ulale, degine, e igarmar bali nanachurmarbalid ulale. Wee anmarse oyoge, Jehová soged barbi anmar ibmar imakele bur nuedi.

Gebe unni dulemar ichesaale Israel yargi obelesa. Rei Nabucodonosor, judío wargwen Gedalías nugadi onugsasa, we dulemar dakega. Aukine, abar Israel dorgan Gedalías oburgwismala. Emisgindi Israel dorgan dobe itomala, abakale we ibmar gusad ulale Babilonia dorgan bela emar obelogega danimalarye. Degsoggu, Jeremíasgi alamaknai gusmala emar bali namogaga, geb Egiptos wakichamala.

We ulale, Israel yargi dule wargwensaale bar gudiguchuli. Wegii, 70 año wilub Israel neggwebur ollo mellenagusa. Auki Jehová soge, 70 año sorbali gannar na neggwebur e yarse sedbaloye. Wegi ibmar gunaid gine, ¿igi Bab Dummad neggweburdi, Babilonia yargi gudiguchunna? Anmar dakoena.

2 Reyes 25:1-26; Jeremías 29:10; Ezequiel 1:1-3; 8:1-18.



Egislenaid

  • Sobaled gine, ¿igi Jerusalén gunai be dake geb e dulemar dina igi gunanamoga?
  • ¿Ezequiel doawa, geb ibu ibmar isgana Jehová ese oyosa?
  • Israel dorgan Jehovág dododimarsoggu, ¿ibu Jehová imakoye sogsa?
  • ¿Ibu rei Nabucodonosor imasa, Israel dorgan egi aibitemalad sorba?
  • ¿Ibig Jehová Israel dorgan bendachuli, mer weyobi obelolemala gala?
  • ¿Ibig Israel yala dulemar sate gunoniki, geb birga bigwa deyob nagusa?

Bamalad egislenabalid

  • Absoge 2 Reyes 25:1-26.

    ¿Doawa Sedequías, geb igi gusa? We ibmar gusadi, ¿igi Biblia gine ibmar iduakwa soglesad nabirononiki? (2 Rey. 25:5-7; Eze. 12:13-15.)

    Ibmar isgana Israel dorgan imasmaladi, ¿doa nug gine gusye Jehová sogsa? (2 Rey. 25:9, 11, 12, 18, 19; 2 Cró. 36:14, 17.)

  • Absoge Ezequiel 8:1-18.

    ¿Igi iglesiamar, Israel dorgan Jehová gine bangusmaladyob damala, Dad ibe na e bab dummad gala imakbukwa gusmargu? (Eze. 8:16; Isa. 5:20, 21; Juan 3:19-21; 2 Tim. 4:3.)