Yaba nanaid daggega

Menú baid daggega

Índice daggega

Jehovági sunmagmalad

dule

An garda Bibliag sunmagged

74: Dule emar dobsulidi

74: Dule emar dobsulidi

WE DULE sunmakgwichidga dulemar oallided be dake. ¿Be wisi we dule, doawa? We dule nuga Jeremías, we dule nug nikadi, Bab Dummad gaya berbegedi.

Dulemar Jeremíasgi dodonanaid

Rei Josías neggweburgi ibmar sobarmalad ogoamakalid sorba, ichesaar gusadgi Jehová, Jeremíasga soge, An gaya berbegedgi be arbaoe. Deginigwale, Jeremías amba dogdar nuchukwa gue na itoge, Bab Dummad gaya berbegedgi arbaedga guega. Aukine, Jehová ega soge, Ani an be bendakoe.

Jeremías Israel dorganga soge, ibmar isgana imaked indakmarye. Emarga soge: ‘Bamalad neggweburmar e bab dummagandi, napirasurmalad.’ Aukine, bukidar Israel dorgan bur ibmar sobarmalad na bab dummadga imakdii sabimala, degine, Jehová dina, Bab Dummad napiragwad guedi, adi ese gorbisurmala. Jeremías soggargua we dulemarga, e isgudimalad ulale Bab Dummad sega dummad odurdaklemaloye, dulemar unnila ega alledbimala.

Birgamar namai gusa. Josías burgwenoniki, geb sorba nii warbaagi e machi Joaquim nugadi, reig megnoniki. Jeremíasdi amba neggweburga sogdii: ‘Bemar daed na ogwasurmalale, Jerusalén obelolegoye.’ Sacerdotemala Jeremías gae soggarmala, geb oimakdemala: ‘Jeremías oburgwed abelege; anmar neggweburgi ichakwa sunmakdii.’

¿Ibu Jeremías imako be binsae? ¡Edi dobed sate! Bela dulemarga soge: ‘Jehová an barmiali bemarga we ibmar sogega. Bemar ibmar isgana imaked indaksulile, Jehová, Jerusalén obelogoe. Aukine, be wisigarmar: Bemar an oburgwismalale, dule ibmar isgana imakdisulid be oburgwemaloed.’

Dummaganga gudimalad imasmala mer Jeremías oburgwemaladi, auki Israel dorgandi ibmar isgana imaked indachurmala. Sorba Nabucodonosor noniki, Babilonia e rei, geb Jerusalén neggweburbo uluali. Degidgi, Israel dorgan Nabucodonosor e maiganga gunonimala. Miliba Israel dorgan selesmala Babilonia neggweburse. ¡Igi itolle be binsae, dulemar be dakdisulidi be sesmalale, be neg dakdisuliche!

Jeremías 1:1-8; 10:1-5; 26:1-16; 2 Reyes 24:1-17.



Egislenaid

  • Sobarnaidgi sapingwa gwichi be dakedi, ¿doawa?
  • ¿Igi Jeremías binsae Bab gaya berbegedgi arbaedsik, auki Jehová igi ega soge?
  • ¿Jeremías igi neggwebur gala sunmakdii guali?
  • ¿Sacerdotemar igi Jeremías imake soggarmalana, auki igi Jeremías oyosa emar dobsuli?
  • Ibmar isgana imaked indachurmalad ulale, ¿igi Israel dorgan gusmala?

Bamalad egislenabalid

  • Absoge Jeremías 1:1-8.

    Jeremías arbadii gusad yobi, ¿igi nabir dule Jehová gala arbadii gusale? (2 Cor. 3:5, 6.)

    Jeremías arbadii gusadi, ¿igi nusgana Cristob nanaid ogannoge? (Ecl. 12:1; 1 Tim. 4:12.)

  • Absoge Jeremías 10:1-5.

    ¿Igi Jeremías innikigwadgi oyosa ibmar sobarmalad geg dulemar bendake? (Jer. 10:5; Isa. 46:7; Hab. 2:19.)

  • Absoge Jeremías 26:1-16.

    Emi ibag emar owisoarmalale, ¿igi cristianomar nibnegse naeg sulesmalad imakdidimoga, Jehová, Jeremíasga sogsa yobi, ‘mer gaya burba soggwensaale osulogoye’? (Jer. 26:2; Deu. 4:2; Hech. 20:27.)

    Jehovág sunmakmalad, ¿ibu nued Jeremías gine durdakmala neggweburmar sega Jehová ibmar owisoarmalale? (Jer. 26:8, 12, 14, 15; 2 Tim. 4:1-5.)

  • Absoge 2 Reyes 24:1-17.

    Judá neggwebur, Jehová gine bangusgu, ¿igi dummad wilesmala? (2 Rey. 24:2-4, 14.)