Yaba nanaid daggega

Menú baid daggega

Índice daggega

Jehovági sunmagmalad

dule

An garda Bibliag sunmagged

73: Israelgi napi rei nued megisad

73: Israelgi napi rei nued megisad

ISRAEL reino gwabo neggweburmar ganikidgi, Josías reig megnonigua unnila birga baabak nika. Wegi birga nikale amba bipigwa reig megega. Agala, gebeun sergan neggwebur idugedgi Josías bendasmala.

Josías birga guglegus reig neg dakmaidgi, binsaali Jehová amigedgi. Rei nuegan megismalad igar bali nanasmoga, anmar sogoena: rei David, rei Josafat geb rei Ezequías. Josías amba sapingwa bipi guedgi, dulemar dobsuli ibmar soggwen imasa.

Rei Josías e sordaganmar akwa sobaled ubimaknanaid

Birga bali Israel dorgan, bukidar ibmar isgana imakmaladga gusmala. Ibmar baigan na e bab dummadga imasdae. Ibmar sobarmalad asabinn dullu dullu bukus damarbali. Degsoggu Josías geb e sordaganmala bela neggweburgi, bab igar napiragwachulid obeloarsunna. Wedi arbaed dummadid, ar bukidar dulemar ibmar baigan e bab dummadga imakmala. Sobaledgi be dakena, Josías geb e sordaganmala ibmar sobarmalad ogoamaknanaid.

Sorbali, Josías dulemar warbaa onugsasa, Jehová sega goled neg siid nudakega. Neggweburgi mani welesa, dulemar neg nudakmaloed bennukega. Geb we dulemar neg nudaknanaid ibagi, Hilcías, Israel sacerdote e dummadga gudiidi, ibmar soggwen ibidar nued gued aminoniki: garda soggwen egi igarmar narmakar naid, dikasurgus epennegi Jehová, Moisés narmakega imasgusadi, degine, we gardadi yokus gudiina.

We garda Josías sega sesmargua, Josías soge ega absomarye. Itoargua, Josías dakali neggwebur gwen Jehová igarmar mamaidba nanabuksuli. Josías nue bukib binsae, agala mor siir na imasa, igi sobaledgi be dake. Soge: ‘Jehová istar anmarbo itoge, ar anmar sergandi we gardag igarmar mamaidba nanachurmalad.’

Safán, rey Josíasbo gwissid

Geb Hilcías, Israel sacerdote e dummadga gudiidga, Josías soge, amigoye igi Jehová anmar imakedgi binsamadibeye. Degsoggu, Hilcías nachunna bunagwa Bab Dummad gaya berbegedi Hulda nugache, geb ese egisdapi. Geb we bunagwa ega soge, Josíasga be sogoye, Jehová weyobi sogye: ‘Jerusalén geb bela e neggwebur, dummad odurdaklemaloe, ar ibmar baigan e bab dummadga imakdamalad ulale, degine, ibmar isgana imaklegedi bela neg gasa gunabali. Aukine, Josías, ar bedi ibmar nued imachoggua, be wagab we dummad odurdakleged guosuli, ar be burgwisad sorba geb we ibmar gunonikoe.’

2 Crónicas 34:1-28.



Egislenaid

  • ¿Birga bigwa Josías nika reig gunonigu, geb birga guglegus reig maid gine, ibu ibmar imakali?
  • Nib sobarnaidgi, ¿Josías ibu imaknai daklege?
  • Babse goled neg nudaklenaid iba gine, sacerdote e dummad, ¿ibu amisa?
  • ¿Ibigala Josías na mor siir imasa?
  • Bunagwa Bab gaya berbeged Hulda nugadi, ¿igi Jehová sogye Josías gala soge?

Bamalad egislenabalid

  • Absoge 2 Crónicas 34:1-28.

    Dulemar neg undaradgi bipigwa dunguarmalad, ¿ibu ibmar nued Josías gine durdakmala? (2 Cró. 33:21-25; 34:1, 2; Sal. 27:10.)

    ¿Ibu ibmar nuegan Josías imasa Babse goled napiragwad onasoe gala, birga baabakgus reig maid gine, geb birga ambe gakabo gine, deginbali, birga ambe gaka baabak gine? (2 Cró. 34:3, 8.)

    ¿Ibu ibmar nuegan anmar durdake rei Josías gine, geb sacerdote e dummad, Hilcías (Hilquías) nugad gine, Babse goled neg akwed siki? (2 Cró. 34:9-13; Pro. 11:14; 1 Cor. 10:31.)