Yaba nanaid daggega

Menú baid daggega

Índice daggega

Jehovági sunmagmalad

dule

An garda Bibliag sunmagged

65: Reino mamaride

65: Reino mamaride

¿BE WISI ibigala we dule mor ogoamakgwichi? Jehová ega sogsa degi saoye. We dule nuga Ahías, Bab Dummad gaya burba berbegedi. ¿Be wisi ibu obare Bab Dummad gaya burba berbegedi? We dulemarga Bab Dummadi iduakwa sogsa dae, igi neg gunonikoe.

Ahías Jeroboánbo gwichid

Wegine Ahías, Jeroboánbo sunmakgwichi. Salomón, Jeroboán onugsasa abar e neg soblenanaid idugega. Igar bali Ahías, Jeroboán abinguargua, ibmar dargwen imasa. Mor binid birgi yoidi esusa, geb 12 mergu ogoamasa. Geb Jeroboánga soge: ‘10 mergu be na suo.’ ¿Be wisi ibigala 10 mergu Jeroboánga uksa?

Ahías soge Jehová, Salomón obanoye neg idumaidgi. Soge Jehová neggwebur 10 mergu Jeroboánga ukoye. Degsoggu, Salomón machi Roboam nugadga, unnila neggwebur gwabo napi beoye, idumaguega.

Salomón itoargua Ahías deyob Jeroboánga sogsa, sae itoali. Salomón, Jeroboán oburgwed soggali, aukine Jeroboán Egiptos wakite. Sorbali, Salomón burgwenoniki. Reig 40 año megwisa, emisgi e machi Roboam reig megnoniki. Egiptog mai Jeroboán itoali Salomón burgwisye, degisoggu gannar Israelse noniki.

Roboamdi rei isgana. E bab Salomón bali bur bule dulemar sabsur imakmai gusa. Jeroboán geb bamalad dulemar dummagan gudimalad bogwa, Roboam daknadmala geb ega sogmala, wis neggweburbo nued daed abeleye. Aukine Roboam itosuli. Aka bur bule isgude. Agala, neggweburmar 10 merguedi Jeroboán na e reig imasmarsunna. Negwebur gwabogwaddi, Benjamín Judá bogwadi, amba Roboam amar reig mai gusa.

Jeroboán abesuli e dulamala Jerusaléngi, Jehovás goled neg siiche nanamaladi Babse golega. Agala warbo or sobsa becerroyob daklege, geb imasa neggweburmar 10 merguedi, we na e bab dummadga imakmalad. Sanar guchuli neggweburgi na sabsur imadmalad geb ibmar isgana imaklegedi mergude.

Neggwebur gwabogwadgi amba neg undar gunamoga. Amba Roboam yoo birga atar gue reig maidgi, Egipto rei daniki dakleali Jerusalénbo urwega. Egipto rei ormar bukidar Jehovás goled neg yabali bukwad sesa. Degsoggu, igi gebe soblesgua sii gusa, Jehováse goled neg deyobi undar sii guchuli.

1 Reyes 11:26-43; 12:1-33; 14:21-31.



Egislenaid

  • Dule warbo sobaledgi gwichidi, ¿igi nugmala, geb ibu samaladi?
  • Ahías na mor yoid, ¿igi imasa, geb ibu we obarisa?
  • ¿Salomón igi Jeroboán imaked soggali?
  • ¿Ibig negwebur gwaambegi Jeroboán na reig onugsasmala?
  • ¿Ibig Jeroboán warbo or sobsa becerroyob daklege, geb sorba neggwebur igi gude?
  • ¿Igi reino neggwebur gwabo ganikidi gunoniki, geb Jerusaléngi Jehovás goled neg siiddina, igi gusmoga?

Bamalad egislenabalid

  • Absoge 1 Reyes 11:26-43.

    ¿Jeroboán dule igiid gusa, geb Jehová ibu ega imakoye sogsa E igarmar maidba daele? (1 Rey. 11:28, 38.)

  • Absoge 1 Reyes 12:1-33.

    Roboam (Rehoboam) emar idumagua sabsur dulemar imasad gine, ¿ibu nabir babgana geb gwenadgan idudimalad durdakmala, mer weyob damarmogaga? (1 Rey. 12:13; Ecl. 7:7; 1 Ped. 5:2, 3.)

    Nusganagan ibmar soggwen imakedgi binsaalile, ¿doamarse binsaed egiser nuedi? (1 Rey. 12:6, 7; Pro. 1:8, 9; 2 Tim. 3:16, 17; Heb. 13:7.)

    Dulemar becerromarse goleg, ¿ibig Jeroboán neg sogbo amisa, geb igi we ibmar oyosa Jeroboán nue Jehová gine bene? (1 Rey. 11:37; 12:26-28.)

    ¿Doa reino neggwebur gwambe ganikid idusa, napiragwad Babse gorleged gine aibinmalaga? (1 Rey. 12:32, 33.)