Yaba nanaid daggega

Menú baid daggega

Índice daggega

Jehovági sunmagmalad

dule

An garda Bibliag sunmagged

63: Rei Salomón yeer ibmar wisi

63: Rei Salomón yeer ibmar wisi

SALOMÓN reig megnonigua, amba sapingwa. Salomón, Jehová sabe, geb e bab David, ega binsaed daksad bali nanadii gusa. Jehová amba yeer Salomón dakmoga, agala ibagwengi mutikidba gabgin ega soge: ‘Salomón, ¿ibu beg an uked be an abege?’

Salomón we abin soge: ‘Bab Dummad Jehová, amba andi sapingwasoggu an wichuli igi an neg seer gebe. Degsoggu, binsaed nika dae be an imake, nabir nued an be neggwebur idugega.’

Jehová yeer itoge Salomón ese we ibmar egichadba. Agala Jehová soge: ‘Ar be binsaed nika daed egichasoggua, undar dula gudigued be egichasuli, be mani ibedga gued egichasurbarsoggu, dule bamalad Napaneggi gudigusmaladba, nue ibmar wisi guedga an be imakodo. Aukine, be ibmar egichasulidi an beg ukbaloe, an be imakbaloe be mani ibedga guedi geb be nug odummolegedi an imakbaloe.’

Sorba ichesaaledgi, warbo omegan Salomónse danimala, igar soggwen yeer gangu aburnaid nudakega. Ome wargwen soge: ‘We ome anbo, na neg mesa anmar gudii. An goe nikgusa, geb ibbogi we ome goe nikgusmoga. Degine, ibagwengi mutikidba we ome goe burgwisa. Geb an gabmagua an nagab e goe burgwaled mesisa geb an goe dulad ani sesa. An atakargua, an dakali goe burgwaled an nagab mai, aukine an yog mag dakale, an goe suli.’

Deyob soge itoargua, ome baid soggali: ‘¡Suli! ¡Goe duladi an gadi, geb burgwaledi we ome gadi!’ Degine ome gebe sunmasadi sogde bali: ‘¡Suli! ¡Burgwaled be gadi, geb dulad an gadi!’ Weyob omegan na abin abin imaknai guarmala. ¿Igi Salomón saoe?

Emisgi Salomón soggali eg espada sedamarye, geb ega senonimargua, soge: ‘Goe duladi negabar be sikmalo, geb nailig nailig we omeganga be ukmalo.’

‘¡Suli!’ e nan sunnadi gollali. ‘Mer goe oburgwemala. ¡Bur we omeg be ukmarsunna!’ Auki ome baid dina soge: ‘Mer anmar wargwenga ukmalo; bur negabar sikmala.’

Rei Salomón igar aburnaid nudaksiid

Salomón emisgi soge: ‘¡Mer goe oburgwemalo! Ome gebe sunmasadga bur be uke. We ome bur goe e nan sunnadid.’ Salomón we wisi, ar e nan sunnad na bela bela goe sabsoggua, mer e goe oburgwemalaga bur baid omeg ukedgi binsasad. Dulemar wisguargua weyob Salomón igar nudasye, yeer itoarmala rei nue ibmar wisi dakleargua.

Salomón rei gala neg dakmai gusgua, geb Bab Dummad neggwebur bendakmai gusa. Napa yeer ibmar sanmake imasa, ibmar orosgimaladi, uvamar geb higomar, geb bamalad ibmar gullemalad yeer sanmasbali. E dulemar mor nuegan yoi gudigusmala geb neg nuegan gine gudigusmar bali. Bela ibmar nuegan obinegwagi emarga nikgusa.

1 Reyes 3:3-28; 4:29-34.



Egislenaid

  • ¿Ibu Jehová, Salomón sega egicha, geb igi Salomón abin sogsa?
  • Jehová nued Salomón ibmar egichad daksadba, ¿ibu ega ukoye sogsa?
  • Omegan warbo, ¿ibu igar yeer gangu aburnaid Salomón sega senonimala?
  • Sobaled gine, ¿Salomón igi igar nudaknai?
  • Salomón neg dakmai gusgua, ¿bule nued neg dakma gusa, geb ibig nabir deyob imasa?

Bamalad egislenabalid

  • Absoge 1 Reyes 3:3-28.

    Dulemar Bab neggweburgi emar idugedga gudimalad, ¿ibu nabir durdasmalale Salomón 1 Reyes 3:7 gine ibmar sogsadgi? (Sal. 119:105; Pro. 3:5, 6.)

    ¿Ibig Salomón ibmar egichad, igar nued gue Babse ibmar egised siki? (1 Rey. 3:9, 11; Pro. 30:8, 9; 1 Juan 5:14.)

    Salomón omegan warbogwad gala igar nudasadbali, ¿igi anmar nabir Jesucristo yoogiche neg dakmai guoedgi bensurmoga, we anmarga Salomón Dummadid? (1 Rey. 3:28; Isa. 9:6, 7; 11:2-4.)

  • Absoge 1 Reyes 4:29-34.

    ¿Igi Jehová, Salomón abin imasa, ese egichagu gwage nued eg ukye? (1 Rey. 4:29.)

    Dulemar Salomón ibmar wisid wisgubierba gusmarsoggu, ¿igi anmar dina Bab Gaya Burba durdaked dakmogar gebe? (1 Rey. 4:29, 34; Juan 17:3; 2 Tim. 3:16.)