Yaba nanaid daggega

Menú baid daggega

Índice daggega

Jehovági sunmagmalad

dule

An garda Bibliag sunmagged

62: David neg yeer gagalesa

62: David neg yeer gagalesa

JERUSALÉNGI David neg dakmai gualidgi, Jehová, David soldadomar bendakmai guali, bamalad neggweburgi obinmai gumalaga. Jehová iduale sogsa Canaán yar, Israel dorganga edega ukoye. Emisgindi, Jehová wemar bendasa, bela yar emarga urmaklesad, emargadga guega.

David nued neg idumai. Jehová sabe. Aulale, Jerusalén neggwebur susmargua ibmar soggwen imasa, Bab igar mesisad ulugwa, Jerusalénse sesa. Bab Dummad sega goled neg sobedgi binsae, we ulugwa aa neg yaba siega.

Undaradgi, dummad David yolenoniki. David wisi emar ib ibmar suedi nuechuli. Aukine, ibagwengi e neg niba gudiidgi, urbali atakargua ome yeer dakleged daksa. We ome nuga Bat-seba, geb e suidi David soldado, Uríasye nuga.

David bela bela Bat-seba binale itoali, degsoggu imasa egala e negse we ome sedamalaga. We ome suidi, dikasuli urwenai. David we ome egadga imasa, geb sorba wisgunoniki ome bonigwar gusa. David nue bukib binsae geb e soldadomar dummad, Joabye nugadga soge, Urías barmide, asabin urwelenaid abargi, Urías burgwega. Geb Urías burgwisgua, David Bat-seba nikgusa.

Jehová nue sae David abin itosa. Geb Jehová barmisa dule wargwen ega arbaedi Natán nugad, Davidga ibmar isgana imasadgi sunmakega. Be dakena Natán, Davidga sunmakgwichid. David nue bukib binsae ibmar imasadba, degsoggu Jehová, David oburgwichuli. Auki ega soge: ‘Ar be we ibmar isganamar imachoggua, be neg yagi yeer neg gagalenonikoed.’ ¡Inso David yeer nunmaked dummad nikgunoniki!

Natán Davidga binsaed ukwichid

Gepegwa, Bat-seba e mimmi burgwenoniki. Sorba, David machi saila gined Amnón nugadi, aka na e bun Tamargi aibicha. Degidgi, we ibmar wisguargu, David machi Absalón nugad, sae itoali geb Amnón oburgwisa. Aa sorba, Absalón ibmar imasadba dulemar bukib eba akasmala geb reig e imakmaladga imasa. David soldadomar Absalóngi geb Absalón soldadomargi obichamarsunna, geb agine Absalón burgwisa. Innikigwadgi, David nue gwage nunmakdi gusa.

Bela we ibmar gunagua, Bat-seba goe machi wargwen baknonibali, onuggusa Salomón. David nue sered gusadgi, geb bonigan egi yolealidgi, e machi Adonías reig mege soggali. Geb David imachunna, sacerdote Sadoc nugadi, aceite yeer yapanned Salomón e nonog eyogedi, oyogega Salomón reig megoedye. We sorbali napi iche David gudigusa, geb burgwenoniki 70 año nikadgi. Reig neg dakmai gusa 40 año. Emisgindi Salomón reig megnonisunna.

2 Samuel 11:1-27; 12:1-18; 1 Reyes 1:1-48.



Egislenaid

  • Jehová emar bendasad bali, ¿igi ibmar nabir gunoniki Canaán yargi?
  • Ibagwengi sedogidba, David e neg nib gudiidgi, ¿ibu ibmar gusa?
  • ¿Ibig Jehová nue sae David abin itoge?
  • Sobaled be dake, ¿Jehová doa dule barmisa, Davidga ibmar isgana imasadgi sunmakega, geb we dule igi David guoye sogsa?
  • ¿Igi David gala neg dummad gagalenai guali?
  • David sorbali, ¿doa reig megnoniki?

Bamalad egislenabalid

  • Absoge 2 Samuel 11:1-27.

    Jehová igargi anmar arbaed bogi gusulile, ¿igi anmar bendake?

    ¿Ibu imasa David ibmar isgana imake gala, geb emi ibag ibu mer Jehovág arbamalad imakmogadi? (2 Sam. 11:2; Mat. 5:27-29; 1 Cor. 10:12; Sant. 1:14, 15.)

  • Absoge 2 Samuel 12:1-18.

    Natán, David ounasad gine, ¿ibu gwenadgan idudimalad geb babgan nabir durdasmalale? (2 Sam. 12:1-4; Pro. 12:18; Mat. 13:34.)

    ¿Jehová ibig David wile daksa? (2 Sam. 12:13; Sal. 32:5; 2 Cor. 7:9, 10.)