Yaba nanaid daggega

Menú baid daggega

Índice daggega

Jehovági sunmagmalad

dule

An garda Bibliag sunmagged

59: Ibigala David wakite

59: Ibigala David wakite

DAVID, Goliat oburgwisad sorba, Abner, Saúl e soldadomar dummadga gudiidi, David sesa Saúlse. Geb Saúl David onugsasa, abar e soldadomar dummadga guega, ukine rei neg yagi David gudigunonibali.

Filistea dorganbo ulusad sorba soldadomar gannar negse danimargua, omegan abin namakarmala: ‘Saúldi milibali emar oburgwisa, aukine Daviddi miliambe oburgwisa.’ Saúl nobguali, ar David bur bule ebali ogannolesadba. Auki Jonatán dina, Saúl e machi, nobed egi nasuli. Adi bur David sabed, geb David amba Jonatán sabmoga. Degsoggu, na ega muchup muchup sognai guarmala, na aigwale gudii samaloye na sadegu.

Rei Saúl lanza metegwichid

David yeer arpa ogole, geb Saúl yeer itodae David arpa ogollalile. Aukine, ibagwengi nobedba Saúl, David oakaloe binsaali. Aunni David arpa ogorsiina, degidgi, Saúl lanza gadebin imasa geb Davidgi mete, degine sogbali: ‘¡Galuba mesa David anse bioklegoed!’ Aukine David nabir aibacha imasa. Sorbali, gannar Saúl nosa gusbali lanza Davidgi mete gusadgi. Emisgi David wisi, bar geg bipisaar basur binsadi gue.

¿Be ebinsae, Saúl igi sogsa gusa? Saúl sogsa, dule Goliat oburgwisale, e sisgwa nikguoye. Saúl, degsoggu Davidga soge, e sisgwa Mical nugadi nabir emisgi nikguye, aukine aa iduale Filistea dulemar 100 mergu oburgwer gebye. ¡Nue be itogena! Ar Saúldi bur abitoge Filistea dorganse David oburgwelegedi. Auki deyob ibmar guchuli, degsoggu, Saúl na sisgwa uksasunna Davidga.

Ibagwengi Saúl, Jonatánga geb bela e maiganga gudimaladga soggali, David oburgwebiye. Aukine Jonatán, Saúl abin soge: ‘Mer David oakalogo. Bipisaale Daviddi be oakalodisulid. Ar bur edi be bendasdaed. Sun burgwed amisar gusad Goliat oburgwedgi, geb sorba dakargua, be yeer itochursi.’

David lanza iduar dullu imasad

Saúl na e machi itosa, geb sogsa David akalogosurye. Degsoggu gannar David senonimala, geb David gannar Saúlga arbasbali idualeyob. Deginigwar, ibagwengi David arpa ogorsiidgi, gannar Saúl lanza Davidgi mete gusbali. David aibacha nabir imasbali, geb lanza neg galudarba yoledapi. ¡Wese ilabaa gude! ¡David emisgindi wisi, wakinner gebe!

Aa mutikidba David na e negse nade, aukine Saúl dulemar barmisa David oburgwemalaga. Mical wismoga e bab ibu ibmar imake sognai. Degsoggu Davidga wegi soge: ‘We mutiki be gwae nao; sulile, neg oibosar be burgwar maoed.’ We mutiki Mical, David bendasa, ventana bali wakinnega. Birga gugle wilup David dukudi guchunna Saúlgi, geb neg ogwas ogwas gudiguchunna.

1 Samuel 18:1-30; 19:1-18.



Egislenaid

  • ¿Ibig Saúl, Davidgi nobe, auki e machi Jonatán dina ibug ebo akala?
  • Ibagwen gine David, Saúlga arpa ogorsiidgi, ¿igi ibmar gunoniki?
  • E siskwa nikgued iduale, ¿ibu David imakgweler gebye Saúl soge, geb ibig deyob soge?
  • Sobaledgi be dakgua, ibagwengi David, Saúlga arpa ogorsiid gine, ¿ibu ibmar wese sogabaa gudedi gunoniki?
  • ¿Igi Mical, David bendasa, geb birga guglegi David ibu imake dakleali?

Bamalad egislenabalid

  • Absoge 1 Samuel 18:1-30.

    Jonatán, Davidbo na bela belad sabgusmalad gine, ¿igi oyolesa, ‘ovejamar bamalad’ geb ‘ovejamar ichegwad’ na sabgumaloedi? (1 Sam.18:1; Juan 10:16; Luc.12:32; Zac. 8:23.)

    Ar Jonatán, Saúl sorba reig sigoensoggu, ¿igi 1 Samuel 18:4 gine sognai Jonatán dule reig onugsalesad bali bela belad gudigusa?

    ¿Igi Saúl gusadgi oyolege, nobed bali dule sun ibmar isgana buled imakeche owarmake, geb ibu mer anmar imakmogadi? (1 Sam. 18:7-9, 25; Sant. 3:14-16.)

  • Absoge 1 Samuel 19:1-17.

    ¿Igi burgwed amiged naga gusa Jonatán, Saúlbo sunmasgua? (1 Sam. 19:1, 4-6; Prov. 16:14.)