Yaba nanaid daggega

Menú baid daggega

Índice daggega

Jehovági sunmagmalad

dule

An garda Bibliag sunmagged

58: David, Goliat bogwa

58: David, Goliat bogwa

FILISTEA dorgan gannar danimarbali Israel neggweburbo urwega. Emidi David iamar warbaa Saúl soldadomarba dogsamarmoga. Agala, ibagwengi Jesé, Davidga wegi soggali: ‘Be iamarga madu sede geb bamalad ibmar gullemalad sedbalo. Geb nue dako, igi gunamar dibe.’

Goliat

David, urwemalad neg bukwache owarmakdabgua, abarmade na iamar amiega. Emisgindi dule dummad, Filistea ginedi, Goliat nugad noali, Israel dulemargi yam dodogega. Geb 40 día gude, wakdaradba, mutikidba, we dule deyobi nononidae. Binnasur gornonidae: ‘Dule wargwen amimala anbo urwega. Ar we dule an gine obichale geb ese an oburgwilesale, adi anmar bemar maig gumaloed. Auki an we duleg nakwisale geb an we dule oburgwisardi, adi bemar anmar maig gumaloed. Degsoggu, ar amimala dule wargwen anbo urwega.’

Geb David egichali abar soldadomarse: ‘Dule wargwen we Filistea dule oburgwisale geb Israel neggwebur bendasale, mer bar binge itodii guega, ¿ibu ega uklegosunna?’

Soldado wargwen ega soge: ‘Saúl ega bukidar ibmar mani saila gumalad ukoe. Geb amba e sisgwa ukbaloe.’

Auki bela Israel dulemar Goliat dobedbimala, ar we dule bipisursoggua. We dule, dule wala bogwa wilup dungue geb dule baid ega escudo yam sedidabalid.

Abar soldadomar Saúlga sognadmala, David Goliatbo urwenabiye sogye. Aukine Saúl, Davidga soge: ‘Geg be nae. Ar amba bedi machi bipigwad, we duledi gusgu dule urwed daniguad.’ David abin soge: ‘An oso oburgwisa geb an león oburgwisbalid, an bab ib oveja sesmargu. Emisgi Filistea dule wemaryob gumogoed. Jehová, an bendakoedid.’ Degsoggu, Saúl ega sogdesunna: ‘Degirdi nae, geb bitiki Jehová be bendasan gadina.’

Emisgi David diwarse aidenade geb akwa burwigan swiri daklemalad gwaatar susa geb na sagu sedid yaba ber odosa. Sorba gannar nakwidbarsunna, biombo bipirmakar mileged na semai, dule bipisulidbo urwega. Degine, Goliatdi, David ebo urwe danikidi geg dake. Ibmar ibigwensuli oburgwelegedyob David dake.

David akwa metegwichid

Goliat soge: ‘Be anse dage, ibmar durganga an be san ukoe, gunmalaga.’ Auki David abin soge: ‘Bedi an bina espada sedanikid, be lanza sedanibalid, auki andi Jehová nuggi be abinni nadapid. Emi ibag Jehová anga be ukoed, an be obelogoed.’

Emisgi David Goliatsik abarmade. Sagu sediidyab akwa onosa, geb biombo bipirmakar mileged yabali akwa sisa, geb bela belad ganguedgi Goliatgi akwa mete. Geb, ¡akwa Goliat nono yaba dogdapi; ailadgua, yog burgwaled! Filistea dorgan dakarmargua, e soldado bela emargi obinmaid amukusa, bela wakitemala. Israel dulemar balimakdemala geb weyobi Israel dulemar, Filistea dorgangi obichamala.

1 Samuel 17:1-54.



Egislenaid

  • ¿Goliat, igi Israel dulemargi agumaknoni dae?
  • ¿Bule Goliat dungue, geb dule we dule oburgwisale ibu Saúl ega ukoe?
  • ¿Igi David, Saúl abin sogsa, we ega soggargu geg Goliatbo urwenaye, ar amba machi bipigwateye?
  • David, Goliat abin sogsad gine, ¿igi David na oyosa Jehová bensuli?
  • Sobaled be dake, ¿ibu David ebusa Goliat iblogega, geb sorbali, Filistea dorgan dina, igi gudmarmoga?

Bamalad egislenabalid

  • Absoge 1 Samuel 17:1-54.

    ¿David bia gangued dakardae dobsur guega, geb igi anmar weyob dobsuli gusmogale? (1 Sam. 17:37, 45; Efe. 6:10, 11.)

    Cristianomar nabo dodonanaile, ¿ibig mer Goliat yobi nabo wilup dakmaloe, doa bur buled dibe? (1 Sam. 17:8; Gál. 5:26; 1 Tim. 4:8.)

    ¿Igi David sogsad gine na oyosa Bab e bendakoed bensuli? (1 Sam. 17:45-47; 2 Cró. 20:15.)

    Unnila belagwa neggwebur gwabo na istar dakmalad ulusmaladgi sunmaknasursoggua, ¿igi weg narmakarnaid oyonai urwed nosadi, Bab Dummad napiragwad Jehová ulusa bab dummagan napirasurmalad bogwa? (1 Sam. 17:43, 46, 47.)

    ¿Igi Cristo sordamar nibnegse namaloed, David yobi na oyomala Jehová bensulid bali? (1 Sam. 17:37; Jer. 1:17-19; Rev. 12:17.)