Yaba nanaid daggega

Menú baid daggega

Índice daggega

Jehovági sunmagmalad

dule

An garda Bibliag sunmagged

55: Machi bipi Babga arbae

55: Machi bipi Babga arbae

YEER we machi bipi daklesursi, ¿nabiri? Samuelye nuga. Geb we dule, machi bipi nonogi ebu ebu sanaidi, Israel neggweburgi sacerdote e dummadi, Elíye nuga. Samuel e sergan, Elíse Samuel sesmala; Elcanaye e bab nuga geb e nandi Anaye nuga.

Samuel, Elí asabin gwichid

Samuel unnila birga bake, birga atar dibe nika. Aukine Jehová tabernáculogi gudiguoe Elíbo geb bamalad sacerdotemar bogwa. ¿Ibigar Elcana, Anabo Jehová tabernáculose Samuel sesmala, ar wed amba bipi sursi? Anmar dakoena.

We ibmar gued iduale birgamar nasadgi, Ana nue wile itodiina. Geg goe nikguedba nue wile itodiina ar nue goe nikgubimoganad. Degsoggu, ibagwengi Jehová tabernáculos nadgua, weyob Bab Dummad sega gocha: ‘¡Jehová mer be an iege! Be anga goe wargwen uksa sundibe, innikigwadgi an beg soge an beg ukoe, bela e gudiguoedgi beg arbaedga guoe.’

Jehová, Ana ese ibmar egichadi abin imasa, nii nanasadgi Samuel gwalulenoniki. Ana yaisur na mimmi binale, geb bipigwad akale odurdakdesunna Jehová igarmarsik. Degidgi weyob e suiga soggali: ‘Samuel wis yaibasaar gusale geb bar dogdar angi nai sulir, an sedoe tabernáculose, aagi Jehovág arbaega.’

Sobarnaidgi anmar dake, Ana, Elcanabo e ibmar sogsadba imaknanaid. Ar e sergan nue Samuel odurdasmarsoggua Bab igargi, we yeer itomoga Jehováse goled neggi arbaoedba. Birga irba e sergan naddamala aa negse Babse golega, geb e machi dakega. Birga irba Ana, Samuelga mor sakwa sated bini ega maksa sesdae.

Degi birgamar nadapi, Samuel Jehová tabernáculog arbadii gude, geb Jehová nued Samuel dake, neggwebur amba nued Samuel dakmoga. Elí e masmala Ofní, Finees bogwa, wemardi dule nuegan surmala. Ibmar isgana imakdamala geb amba imakdamar bali bamalad mer Jehovába ibsamalaga. Elí imake wilupuna wemar mer bar sacerdotemarga guega, deginigwar deyob imaksulid.

Auki Samueldi imachuli, tabernáculogi ibmar isgana imaklegedi, Jehovága arbaedgi e obanega. Beeche gusa Jehová dulemarbo bar sunmakmasulid akar, ar dulemar napiragwadgi Jehová sabmaladi aunni merba surmalanad. Samuel wis bipi dungusadgi we ibmar gunoniki:.

Samuel tabernáculogi gabmaina, geb dule ese gole itoargua atakali. Geb sogde: ‘An be itomai.’ Degi gwisguchunna geb abarmakde Elíse, geb ega soge: ‘Be anse gochasoggua, an noniki

Auki Elí abinsoge: ‘An bes gochasuli; camas be gannar nae.’ Degsoggu Samuel gannar camas nachunna.

Degidgi gannar ese gorlenonibali: ‘¡Samuel!’ Degsoggu Samuel gannar gwisguarbali geb gannar nadbali Elí maiche. Geb sogdapi: ‘Be anse gocha barsoggua, an noniki.’ Auki Elí abinsoge: ‘An bes gochasuli. Gannar be megnae.’ Degsoggu gannar Samuel megnadbali.

Ilabaa gude gannar ese gollearbali: ‘¡Samuel!’ Degsoggu Samuel Elíse abarmadbali. Elíga soge: ‘An noniki; ar emisgindi be anse gochar gebed.’ Emidi Elí bat mag itosa Jehová gormaidi. Samuelga soggali: ‘Gannar be megnabali, geb gannar gollarbar sundibe, weyob be sogoe: “Jehová, soge, ar beg arbaed be itomaid.”’

Deyob Samuel sogsa Jehová gannar ese gollargua. Degidgi Jehová Samuelga soggali, Elí odurdaklegoye geb amba e masmala odurdaklemarmogoye. Beeche gine, Ofní, Finees bogwa Filistea dorganbo urwenaidgi burgwismala geb Elí we ibmar gusad itoargua, argwacha, dukar bichisa geb degi burgwismoga. Degi Jehová ibmar sogsad gunoniki.

Samuel dungusa, geb we napi Israelgi juezga megisadi. Geb Samuel sered gusgua, neggwebur ega soggali: ‘Rei wargwen be sue anmar idugega.’ Auki Samuel we ibmar imakbisuli, ar Jehová emar reiga gued. Auki Jehová Samuelga soge, neggwebur soged be itoye.

1 Samuel 1:1-28; 2:11-36; 4:16-18; 8:4-9.



Egislenaid

  • Sobaledgi machi bipi oyolenaid, ¿igi nuga, geb bamalad dina doamala?
  • Ibagwen gine Ana tabernáculos nadgu, ¿ibu bin Babse gocha, geb igi Jehová we ibmar egichad abin imasa?
  • ¿Igi birga nikadgi Samuel sesmala Jehovás goled neggi arbaega, geb e nan ega ibu imasdae birga irbali?
  • Elí masmala, ¿igi nugmala, geb dule igi damaladi?
  • ¿Igi Jehová, Samuel sega gocha, geb ibu ega sogsa?
  • Samuel dungusgua, ¿ibug megnoniki, geb sered gusgu, ibu ibmar gunoniki?

Bamalad egislenabalid

  • Absoge 1 Samuel 1:1-28.

    Negya idudimalad gala, ¿ibu igar nued Elcana (Elqaná) oyoge Babse goled gine e gwenadgan idusadba? (1 Sam. 1:3, 21; Mat. 6:33; Fili. 1:10.)

    ¿Ibu ibmar anmar durdake Ana neg beechegid abin imasad gine? (1 Sam. 1:10, 11; Sal. 55:22; Rom. 12:12.)

  • Absoge 1 Samuel 2:11-36.

    ¿Igi Elí bur bule na e masmala nug odummosa Jehová nug odummoed anale, geb ibu ibmar mer imakedgi anmar odurdake? (1 Sam. 2:22-24, 27, 29; Deu. 21:18-21; Mat. 10:36, 37.)

  • Absoge 1 Samuel 4:16-18.

    Urwelenagu, ¿ibu ibmar sogbake soglenoniki, geb we ibmar itosgu, Elí igi gusa?

  • Absoge 1 Samuel 8:4-9.

    ¿Igi Israel, Jehová istar oitosa, geb igi anmar emi ibag napiragwadgi e Reino bali nai na oyosmogale? (1 Sam. 8:5, 7; Juan 17:16; Sant. 4:4.)

NABBI WISGUEGA

BAB IGARGI BE MIMMI ODURDAGGO

Samuel, Jehová sogedba ibmar imasad

Bedina ¿igi ibmar imagmogoe? ¿Samuelyobi be ibmar nuegan imagdii gumogodibe?