Yaba nanaid daggega

Menú baid daggega

Índice daggega

Jehovági sunmagmalad

dule

An garda Bibliag sunmagged

52: Gedeón e soldadomarbo

52: Gedeón e soldadomarbo

¿BE DAKSA weg ibmar gunaid? We dulemar urwemaladi Israel soldadomar. Dullu dullu gunanai be dakedi, dii gobnanai. Juez Gedeón emar walik gwismoga. Emar dakgwichi igi dii gobmala.

Nue be dake, we dulemar galagwensur dii gobnanai. Abar dullu imasmala, wagar diise owarmakeche. Wargwendi, argangi dii wesa geb gakase dii sesa, dakega e dikarba igi neg gunai. Wegi saele bur nuedi, ar Jehová, Gedeónga sogsad unnila mia mia ataknai dii gobmaladbi be suoye. Bamaladdi gannar negse namaloye. Anmar dakoena ibigala.

Israel dulemarga gannar neg beeche guarbali, ar Jehová sogedba ibsachurmalad bali. Madián ginmaladdi bur Israel dulemar bali yeer gangumalana, aaga Israel ginmalad sabsur imaklesmalad. Degsoggu Israel dulemar Jehovág sogsamala, anmar bendakye, geb Jehová emar goled itosa.

Jehová Gedeónga soge soldadomar amigoye, urwemalaga. Degsoggu Gedeón urbisa 32.000 mergu soldadomar. Auki Israel dulemar bogwa urwemaloeddi 135.000 mergumala. Deginigwale, Jehová Gedeónga soge: ‘Be doggus bukidar dulemar nika.’ ¿Ibigar ega deyob sogsa?

Ega deyob sogsa ibigala ar Israel dulemar nakwismalale, sun binsasmalaled na e ganguedba nakwismarye, geb gwen Jehová e bendaked abesurmarye nakwega. Agala Jehová Gedeónga soge: ‘Bela dobe itomaladga be sogo, gannar bemar na negse namaloye.’ Gedeón deyob sogsagua, 22.000 mergu soldadomar gannar nadmala. Unnila 10.000 mergu dulemar melledmala urwemalaga, aukine 135.000 mergumaladbo urwemaloe.

Gedeón e sordagan wilup daknaid

Aukine, ¡be itogena! Jehová soggali: ‘Amba be doggus bukidar dulemar nika.’ Degsoggu imasa Gedeón dulemarga sogedi diangi dii gobmaloye, geb bela dulemar dullu dii gobsamalad, e wagar diise owarmakeche, bela gannar e negse barmidoye. Jehová ega soge: ‘Unnila 300 mergu dulemar mia mia dii gobsamalad urwedga be sedoe, geb unnila wemar burakwagwa nakwedga an be imakoe.’

Degidgi urwed iba owarmachunna. Gedeón 300 mergu e urwemalad sogbaa burakwa burakwa urbisa. Geb gar warwargwen dulemarga uksa ogolega, geb mete bipigwa gwagwagwen uksa bali, aa yabardi gwallu sii. Neg gabigwen gubinnedgi, e istarmalad bukwache nadmala geb bela ebirismala. Degidgi, ber na darebi gar ogotemarsunna geb mete mamarismar bali, geb binnasur gotemala: ‘¡Jehová espada geb Gedeón espada!’ E istarmalad urwemalad ataarmargua na suritomala geb gwakiarmala. Bela wakitemala, geb Israel dulemar nakwismala.

Jueces, capítulos 6-8 sega.



Egislenaid

  • ¿Igi Israel dulemarga neg beeche guali, geb ibigala?
  • ¿Ibig Jehová Gedeón gala soge, amba doggus mergu dulemar urwedga nikye?
  • Gedeón sogsagu, dobe itomalad gannar nabir negse namarye, ¿igi mergu dulemar besmala?
  • Sobaled be dake, ¿igi Jehová imasa, Gedeón e soldadomar 300 mergu gueche guega?
  • ¿Igi Gedeón 300 dulemar merguedi akar akar urbisa, geb igi Israel we urwed gine nabir nakwichunna?

Bamalad egislenabalid

  • Absoge Jueces 6:36-40.

    ¿Gedeón ibu imasa, nuekwa wisguega Bab Dummad ibu imaked e abege?

    ¿Igi nabir anmar emi ibag wisgusmogale Bab Dummad ibu imaked anmar abege? (Pro. 2:3-6; Mat. 7:7-11; 2 Tim. 3:16, 17.)

  • Absoge Jueces 7:1-25.

    ¿Ibu anmar durdake 300 mergu dulemar ise nakulegar dii gobsamaladgi, bamalad deyob gobsasurmaladbo? (Jue. 7:3, 6; Rom. 13:11, 12; Efe. 5:15-17.)

    Dulemar 300 mergu Gedeón dakedba ibmar durdasmalad yobi, ¿igi Jesucristo daked bali nabir anmar ibmar durdasmogale, we anmarga Gedeón Dummadid? (Jue. 7:17; Mat. 11:29, 30; 28:19, 20; 1 Ped. 2:21.)

    ¿Igi Jueces 7:21 anmar bendake guakwa guega, Jehová neggwebur yagine anmarga arbaed uklealir, asega arbanaega? (1 Cor. 4:2; 12:14-18; Sant. 4:10.)

  • Absoge Jueces 8:1-3.

    Gwenad wargwenbo anmar igar nudaksoggalir, ¿ibu anmar durdake Gedeón, Efraín dorganbo igar nudasadgi? (Pro. 15:1; Mat. 5:23, 24; Luc. 9:48.)