Yaba nanaid daggega

Menú baid daggega

Índice daggega

Jehovági sunmagmalad

dule

An garda Bibliag sunmagged

42: Asna sunmasa

42: Asna sunmasa

¿BE ITODII asna sunmasye? Sun be soge: ‘Suli, ar ibmar durgan geg sunmaked.’ Aukine Bibliadi soge asna sunmasye. Anmar dakoena igi we ibmar gusa.

Anger

Israel dulemar bat oguchaar bukwa Canaán neggweburgi dogega. Balac, Moabgi reiga maidi, Israel dulemar dobe. Agala dule wargwen ewisid emar binsaed gaed nig gocha, Balaam nugadi, Israel dulemar nig sogega, ibig geg ibmar isgana amargi yole dibeye. Mani ichesur an beg ukoye ega sogsa, degsoggu Balaam asnagi nade Balac dakega.

Aukine Jehová abesuli Balaam E neggwebur nig sogedi ibig geg ibmar isgana amargi yole dibeye. Agala, anger wargwen barmiali espada gani Balaam idu igargi gwisguega, mer naega. Ar Balaamdi anger daksuli, aukine e asnadi anger daked. Asna nobigunaina angergi, geb napis igargi megwichunna. Balaam nue sae itoali, geb suargi asna sarsoali.

Degidgi Jehová imasa Balaam itogedi e asna eg sunmake. Asna ese egichali: ‘¿Ibig be an sarsoge, igi an be imasa?’

Balaam moli birgisiid

Balaam asna gala soge: ‘Dule binsaed satedyob be an imasa. ¡Espada an ganikina, an be oburgoena!’

Asna ese egichali: ‘¿Weyob iduar an be imasdae?’

Balaam soge: ‘Suli.’

Degidgi Jehová, Balaam anger dakeg imasa, anger espada gani gwichidi igargi. Anger ega soge: ‘¿Ibigar be, be asna sarsosa? Be idu igar edugega an noniki, ar be Israel dulemar nig sognaed suli, ibig geg ibmar isgana bemargi yole dibeye. Be asna angi be obacha sulina, an be oburgwisana, aukine asnadi an oakalogo sulina.’

Balaam soge: ‘An nue nosa. An wichulinad be igargi gwichidi.’ Anger, Balaam gachuli geb Balaam, Balac daknade. Amba Balaamdi alamaknai Israel dulemar nig sogedgi, ibig geg ibmar isgana wemargi yole dibeye, aukine Jehová imasa ilabaa sogedi Israel dulemar ibmar nuegan nikgumaloye.

Números 21:21-35; 22:1-40; 23:1-30; 24:1-25.



Egislenaid

  • ¿Balac doawa, geb ibigala Balaam nig gocha?
  • ¿Ibigala Balaam asna igar gine megwisa?
  • ¿Igi moli soge Balaam itosa?
  • Anger, Balaamga ¿igi sogsa?
  • ¿Igi ibmar gusa Balaam alamaknagu, Israel dulemar nig sogedgi, ibig geg ibmar isgana wemargi yole dibeye?

Bamalad egislenabalid

  • Absoge Números 21:21-35.

    ¿Ibig Israel dulemar nabir Sehón, amorreomar rei geb Og, Basán rei ogalakgusmala? (Núm. 21:21, 23, 33, 34.)

  • Absoge Números 22:1-40.

    ¿Ibu ulale Balaam alamasa Israel dulemar nig sogega, ibig geg ibmar isgana wemargi yole dibeye, geb ibu ibmarmala anmar weg durdake? (Núm. 22:16, 17; Pro. 6:16, 18; 2 Ped. 2:15; Jud. 11.)

  • Absoge Números 23:1-30.

    Balaam, Jehová gala arbaedyob sunmasa inigwale, ¿igi na e daed gine oyosa Jehovág arbasuli? (Núm. 23:3, 11-14; 1 Sam. 15:22.)

  • Absoge Números 24:1-25.

    Bibliag weg ibmar soglenaidi, ¿igi anmar ogannoe Jehová ibmar imakoye sogsadgi mer benguega? (Núm. 24:10; Isa. 54:17.)