Yaba nanaid daggega

Menú baid daggega

Índice daggega

Jehovági sunmagmalad

dule

An garda Bibliag sunmagged

34: Mas gwapidi

34: Mas gwapidi

¿BE WISI ibu we dulemar napa gine wenanai? Hielo ubimakaled yobi daklege. We ibmar sipuu daklege, dataragwa geb burwigwa. We ibmar nabir gullege.

Israel dulemar maná wenanaid

Nigwen guchaale Israel dulemar Egipto gine nosad akale. Ukubbi yarmar bipirmaknaid bali gudimala. Wegine mas doggus sanmaksuli, geb dulemar ichakwa sunmakarmarsunna geb sogdemala: ‘Ar bur Jehová nued imasana Egipto gine gudigu anmar oburgwisan. Agindina, itoleged bali anmar mas gundidiinad.’

Degsoggu Jehová soggarsunna: ‘Mas bemar gala an obatoe.’ Geb deyobi imasa. Oibosgua Israel dulemar, we ibmar sipu sipugana batisadi dakarmala, geb egicharmala: ‘¿Ar we ibua?’

Moisés soge: ‘Jehová we mas gunne gala bemarga barmiali.’ Geb dulemar we mas onugsasmala MANÁ. Maná madu matargwa ochigwad yobi gullege.

Moisés dulemar gala soge: ‘Na warwargwen gine gunnoe wilup be sumalo.’ Degsoggu, bane bane wakdarad bali deyob imakdamala. Geb maná napa gine besad dina Dad uue gualile, daluddae.

Moisés sogsa bali: ‘Mer maná banegid gala sabomalo.’ Aukine abar dulemar sabosmalad. ¿Be wisi we igi gusdae? ¡Maná sabolesadi nus biin oiboardae geb sunnasur yapan dabali!

Aukine Jehová soge itoged irbali, ibagwena, ilabogwa wilup maná wemaloye, ibnergwagi. Geb Jehová soge sabomaloye banegid gala, ar ibgugle gine bar obatilego sulid. ¡Geb maná iba guglegid gala sabosmargua, adi nus nikguchuli geb ichakwa yapan guchur bali! ¡We ibmar dakledisulid baid gusbali!

Birga bali Israel dulemar ukubbi yarmar bipirmaknaid gine, manábi unnila gundii gusmala.

Éxodo 16:1-36; Números 11:7-9; Josué 5:10-12.



Egislenaid

  • Sobaledgi dulemar ¿ibu napag wenanai, geb igi we ibmar nuga?
  • Maná weleged siki, ¿ibu igar Moisés neggweburga uksa?
  • Ibnergwa gine, ¿ibu imakmaloye Jehová, neggweburga sogsa, geb ibigala?
  • ¿Ibu ibmar dakledisulidi Jehová imasa ibgugleg maná sabolesgu?
  • ¿Bule suiti Jehová neggweburga maná ukmai gusa?

Bamalad egislenabalid

  • Absoge Éxodo 16:1-36 geb Números 11:7-9.

    ¿Igi Éxodo 16:8 gine anmarse oyolege, Cristo sordamar yag gwenagan onugsalesmalad bali ibmar imaked abeleye? (Heb. 13:17.)

    Israel dulemar ukubbi yarmar bipirmaknaidgi gudigusmargu, ¿igi bane bane wemarse oyolesa Jehová nugginbi gudimarye? (Éxo. 16:14-16, 35; Deu. 8:2, 3.)

    Jesús maná gine sunmasgu, ¿ibu obarisa, geb igi we “madu nibneggi danikid” anmarga ibnuedga gue? (Juan 6:31-35, 40.)

  • Absoge Josúe 5:10-12.

    ¿Birga bigwa Israel dulemar maná gundigusmala, igi we ibmargi emar wilup daklesa, geb ibu we igargi anmar durdake? (Éxo. 16:35; Núm. 11:4-6; 1 Cor. 10:10, 11.)