Yaba nanaid daggega

Menú baid daggega

Índice daggega

Jehovági sunmagmalad

dule

An garda Bibliag sunmagged

33: Dermar Ginnid obakmamai

33: Dermar Ginnid obakmamai

¡BE DAKE ibmar gunaidi! Moisés suar oyogwichi dermar Ginnichik. Moisésbo dulemar obaksa bukmaladi, Israel dulemala, akar guchurmarmogad. Aukine Faraón geb e soldadomarbo dina, gundulenanai. Anmar dakoena igi we ibmar gusa.

Egipto dorgan gundulenanaid

Iduar anmar durdasa yobi, boni sogambegid sorba Faraón, Israel dulemarga sogsa bemar Egiptogi nomarye. Bela Israel dulemar machergana 600.000 mergu nadmala, degine, omegan akarba geb burwigan akarba. Ukine bukidar bamalad Jehová bali nagusmarmogadi nadmarmoga. Bergwable Egiptog nodmargua na ovejamar, cabramar geb molimar sesmala.

Naed iduale, Israel dulemar Egipto dorganse mormar egichamala geb or sobarmalad, degine, mani sobarmalad. Egipto dorgan boni sogambegid emargi neg daksadba dobed yaisur itomala. Degsoggu, Israel dulemar emarse ibmar egichamalad bela emarga uksamala.

Aa ibagan sorbali Israel dulemar dermar Ginniche owarmasmala. Wegine obunnosmala. Aukine, Faraón geb e sordagana binsaarmala ibiga anmar Israel dulemar barmis dibeye. Geb soggarmala: ‘¡Anmar maigan, anmar na barmisa!’

Degsoggu, Faraón binsaed ogwasbarsunna. Yog e carro urwedgad nudakaled geb e soldadomarga yog sogaled guakwa bukumaloye. Degidgi, 600 mergu carromar bur nuegan sesa geb Israel dulemar balegitesunna geb bela bamalad carromar sesbali.

Israel dulemar dakarmargua Faraón geb e sordagan emargine danimala, nue gwakismala. Geg wakinmalana. Soggwen siki dermar Ginnid iduar naid, geb baichikdi Egipto dorgan emargi danimalad. Aukine Jehová na e neggwebur geb Egipto dorgan imbagine mogir nasisa. Degsoggu Egipto dorgana geg bar Israel dulemar oakalomala, ar daksurmalana.

Emisgi Jehová Moisésga soge suar oyogoye dermar Ginnichik. Moisés deyob imasgua, Jehová imasa dadnakwe burwa binnasuli megega. Geb dermar argade, geb dermar abin bela gales nagusa.

Degidgi Israel dulemar dermar abargi nadmarsunna, neg dinnagwadgi. Miyonba e dulemala mergusoggua geb ibdulamala bukidarbarsoggua, yeer wachi galesmala obakega. Emisgi Egipto dorgangi Israel dulemar ganar mag dakle gunonibali. ¡Emar maigan wakitemala! Geb dermar sega aidedmarmoga, Israel dulemar baleginnega.

Egipto dorgan dermargi aidesmargua, Bab Dummad emar carromar nagmar ungemamai gueg imasa. Egipto dorgana yeer gwakismala geb binnasur gotemala: ‘Jehová, Israel dulemar bina anmarbo urwenai. ¡Anmar gannar nae!’ Aukine bat sorbar gusa.

Degidgi Jehová Moisésga soge suar dermar Ginnichik oyoye, sobarnaidgi be daksa yobi. Geb dermar muralla yobi galesnaidi Egipto dorgan birgi, geb emar carromar birgi ganar aryoarsunna. Bela e soldadomar dermar yaba dogsamala. ¡Wargwensaar durguchuli!

¡Ibiyob Bab Dummad neggwebur bendaklesadba wergusa! Machergan namasmala nuedye Jehovága sogega, wegi namasmala: ‘Jehová dummad obicha. Molimar geb emar dulemar bela dermaryag barmete.’ Míriam, Moisés e buna, pandereta onosa, geb bela bamalad omegan amba ogollarmarmoga. Geb dodoar dodoar namasmala: ‘Jehová dummad obicha. Molimar geb emar dulemar bela dermaryag barmete.’

Éxodo, capítulo 12-15 sega.



Egislenaid

  • Israel dulemar e gwenadgan burakwa Egiptog nosmargua, macherganbi, ¿ebigwa nosmala? ¿Geb doamar Israel dulemarba nadmarmoga?
  • Israel dulemar barmisad sorba Faraón, ¿igi binsaali, geb ibu imasa?
  • ¿Ibu Jehová imasa, Egipto dorgan mer e neggwebur akalogega?
  • Moisés dermar Ginnid siki suar oyosgu, ¿ibu ibmar gusa, geb Israel dulemar ibu imasmala?
  • Egipto dorgan dermarse aidesmargu Israel dulemar baleginnega, ¿ibu ibmar gunoniki?
  • ¿Ibu Israel dulemar imasmala na oyogega yeer itomarye, geb Jehovág nuedye sogbimarye e bendasadba?

Bamalad egislenabalid

  • Absoge Éxodo 12:33-36.

    ¿Igi Jehová na neggweburga ibmar uklegeg imasa, undar Egipto neggweburgi emar maig wilesmaladba? (Éxo. 3:21, 22; 12:35, 36.)

  • Absoge Éxodo 14:1-31.

    Éxodo 14:13, 14 gine Moisés ibmar sogsad narmakar nai, ¿igi Armagedón urwed iba danikidgi emi ibag Jehovág arbamalad bendake? (2 Cró. 20:17; Sal. 91:8.)

  • Absoge Éxodo 15:1-8, 20, 21.

    ¿Ibig Jehovág arbamalad, ega namaked abelege e nug odummogega? (Éxo. 15:1, 2; Sal. 105:2, 3; Rev. 15:3, 4.)

    Emi ibag, ¿igi omegan Cristob nanamalad Míriamyob geb omegan bamaladyob Jehová nug odummosmarmogale? (Éxo. 15:20, 21; Sal. 68:11.)