Yaba nanaid daggega

Menú baid daggega

Índice daggega

Jehovági sunmagmalad

dule

An garda Bibliag sunmagged

30: Gagan duu gagwichid

30: Gagan duu gagwichid

MOISÉS Horeb yarse owarmasa ovejamarga gagan amigega. Wegine gagan duu gagwichi daksa, ¡aukine we gagan dina gwen gummaksuli!

Moisés gagan duu gagwichid asabin siid

‘¡Neg dargwen an dake!’, Moisés binsasa. ‘An bur napi walika daknaoedde.’ Walik gusgua, gagan darba dule ega sunmake itoali, ega soge: ‘Mer bar be doggus walik gue. Be sanda yoid unge, ar napa nuedgi be gwichid.’ Dakargu anger bali Bab Dummad sunmakmai, geb Moisés na wagar gasa odukuega imasa.

Geb Bab Dummad ega sogsa: ‘An neggwebur Egiptogi sabsur imakledii an daksa. An na bendakoe, geb an be barmidoe be wemar onogega.’ Jehová na neggwebur sedoe, Canaán neg yeer daklegeche.

Aukine Moisés abin sogsa: ‘An dule nug nikad sulid. ¿Igi an we ibmar imakosunna? Ar an nadele anga sogdamaloed: “¿Doa be barmiali?” ¿Igi an sogosunna?’

Bab Dummad abin sogsa: ‘Wegi be sogoe: “JEHOVÁ, Abrahán e Bab Dummadi, Isaac e Bab Dummadi, geb Jacob e Bab Dummadi, bemarse an barmialid.”’ Ukine, Jehová sogde bali: ‘Wegi an nuga, bipisaar an nug gwago suli.’

Moisés abin sogsa: ‘Aukine be an barmiarye an soggalile an itosurmalardi, ¿igi an saoe?’

Geb Bab Dummad ese egichad: ‘¿Ibu be argangi ganiki?’

Moisés abin sogde: ‘An suar ganiki.’

Bab Dummad ega soged: ‘Be suar napag mete.’ Moisés deyob imasgua, suar naibega binnisa. Degidgi, Jehová, Moisés sega baid ibmar dakledisulid oyosbalid. Bab Dummad ega soged: ‘Be argan mor yaba be odoge.’ Moisés deyob imasa, geb argan onoargua, ¡bela sibudiki daklege, boo daklege yobi! Wagu boni nikgusayob daklege. Degiidgi Jehová, Moisésga gangued uksa baid ibmar dakledisulid imakbaliga. Napis, Jehová ega sogsa: ‘We ibmar dakledisulid be bendakoed, Israel dulemar be itomalaga inso ani an be barmiali.’

Sorbali, Moisés gannar e negse nade geb Jetro gala sogsa: ‘Wis be gannar Egiptose an barmide, an gwenadgan daknaega igi gudimar dibe.’ Degsoggu Jetro, Moisésga sogsa degimaloye geb Moisés, Egiptose nachunna.

Éxodo 3:1-22; 4:1-20.



Egislenaid

  • Sobaledgi yar siid, ¿igi nuga?
  • Moisés yargi ovejamar edarbedigu, ¿ibu ibmar dakledisulid daksa?
  • Gagan duu gagwichid yabali, ¿igi gaya burba sunmakali, geb we gaya burba, doa gachunna?
  • Bab Dummad, Moisésga sogsagua be An neggwebur Egiptog onogoye, Moisés ¿igi abin sogsa?
  • ¿Igi sogoye, Bab Dummad, Moisésga sogsa ese egicharmalar, doa be barmiarye?
  • ¿Igi Moisés oyosarsunna Bab Dummad e barmiali?

Bamalad egislenabalid

  • Absoge Éxodo 3:1-22.

    Jehová arbaed soggwen anmarga ukalile, auki anmar gwen imaked na itosulile, ¿igi Moisésga ibmar gusadi anmarse oyoge Jehová anmar bendakoe? (Éxo. 3:11, 13; 2 Cor. 3:5, 6.)

  • Absoge Éxodo 4:1-20.

    ¿Igi Moisés daedi gwaisa birga dulabo Madiangi gudigusgu, geb gwenadgan yagine idugedga gubimaladi, ibu egi durdakmala? (Éxo. 2:11, 12; 4:10, 13; Miq. 6:8; 1 Tim. 3:1, 6, 10.)

    Amba Jehová gannasaale anmar ounaeg e neggwebur ebusundibe, ¿igi Moisés gusadi anmar bendakoe, anmar Jehová gine mer benguega? (Éxo. 4:12-14; Sal. 103:14; Heb. 12:4-11.)