Yaba nanaid daggega

Menú baid daggega

Índice daggega

Jehovági sunmagmalad

dule

An garda Bibliag sunmagged

26: Job innikigwad Bab Dummadba nai

26: Job innikigwad Bab Dummadba nai

WE DULE uka biin siidi, ¿be wile daksuli? We dule nuga Job, geb ome ega sunmakgwichidi, e ome. ¿Be wisi igi Jobga soggwichi? ‘Babgi ichakwa sunmake geb burgwe.’ Anmar dakoena ibig we ome deyob soge, geb ibigala Job weyob wilesii.

Job uka biin siid

Job dule inniki dae dina geb bela Jehová bali ibmar sabalina. Neggwebur Uz nugad ginedina, we neggwebur dogdar Canaán neggweburgi bambasuli. Jehová napiragwad Job sabena, aukine dule wargwen, Job istar daked gudibalina. ¿Be wisi doa Job e istaradina?

Niana. Ebinsao, Nia, anger isgana, istar Jehová dakedi. Nia Adán, Eva bogwa, mer Jehovába ibsamalaga imasa, geb binsasbalina bela dulemar Jehovág obanoye, mer eba ibsamalaga. Aukine ¿nabir un deyob imasa? Suli. Be binsaena anmar durdasadgi machergan geb omegan bukidar inniki Bab Dummadba nanasmalachik. ¿Warbigwa mergu be nabir e nugmar sogsale?

Jacob, José bogwa Egiptogi burgwismalad sorbali, Job bur inniki Jehová bali nai gudigusa bela we Napaneggi. Jehová, Nia sega oyoge soggali geg bela dulemar oichoye, geb Jehová ega sogsa: ‘Job be dakena. Innikigwadba anba naid.’

Nia sogdemogad: ‘We dule innikgwadba be bali naid, ar be ega ibmar nuegan imakmaid, geb bukidar ibmar nuegan nikbalid. Aukine ei be osulosardi, adi beg ichakwa sunmadeled.’

Degsoggu Jehová ega sogded: ‘Be daknaena. Ei be ibmar obelonado. Bela be ibmar isgana Jobgi imakbiedi, imakdo. Anmar dako bule angi ichakwa sunmako dibe. Aukine mer oburgweddi oburgo.’

Gepedgi, Nia dulemar Job ibmar durgan atursaeg imasa geb e camellomar, degine e ovejamar bela ei oburgwilesbalid. Geb e mimmigan 10 mergued ei oburgwisbali diburwa dummadgi. Geb sorba Jobgi boni isgana yononibali. Job dummad wilesa. Aaga e ome ega sogsad: ‘Babgi ichakwa sunmake geb burgwe.’ Aukine Job deyob ibmar imachuli. Amba warbaa yamo e aiye sogmalad nonimarmogana geb ega sogsamala ar be dule isgana gudigusaddeye. Auki Job amba innikigwadba Babba nagusa.

We ibmarba Jehová yeer itosa, geb sorba Jehová, Jobga ibmar nuegan uksa, igi weg sobarnai be dake. Boni ega osulosa. Geb Job mimmigan 10 mergu nikgusbalid yeer daklemalad, geb ibdulamar, ovejamar geb camellomar idualedba ilabogwa wilup mergu nikgusbalid.

¿Be Job yobi Jehovába innikigwadba nanadii gumogoe? Be deyob damogale, Babad ibmar nuegan beg imakmogoe. Be sadegu nabir gudisaoe bela Napaneg yeer dakle gunonikir, Edényob.

Job 1:1-22; 2:1-13; 42:10-17.

Job e gwenadganmar sii


Egislenaid

  • Job, ¿doa dulena?
  • ¿Ibu Nia imaksoggalina? ¿Un imasa?
  • ¿Ibu ibmar Nia imasadi, Jehová abin bargachuli, geb ibigala?
  • ¿Ibigala Jobga e ome sogsa “Babgi ichakwa sunmake geb be burgwe”? (Sobaled be dake.)
  • Bait sobarnaid gine be dakbalina, ¿igi Jehová ibmar nuegana Jobga imas daklege, geb ibigala?
  • Anmar Job yob Jehová bali innikidgwadba nanadiile, ¿ibu ibmar nuegan anmarga dakledamogoe?

Bamalad egislenabalid

  • Absoge Job 1:1-22.

    ¿Igi emi ibag cristianomar Job yob dae na oyosmarmogale? (Job 1:1; Fili. 2:15; 2 Ped. 3:14.)

  • Absoge Job 2:1-13.

    Nia Jobga neg gagaargua, ¿igi Job, Nia abin guali geb aka e omedi deyob neg gunagu, igi guarmoga? (Job 2:9, 10; Pro. 19:3; Miq. 7:7; Mal. 3:14.)

  • Absoge Job 42:10-17.

    Jobga ibmar nuegan uklesadi, ¿igi emar gue Jesúsga ibmar uklesadbo, Babba innikigwad nai gudigusmaladba? (Job 42:12; Fili. 2:9-11.)

    Job ibmar nuegan nikgusa inniki nanasadba, ¿igi we anmar ogannoe? (Job 42:10, 12; Heb. 6:10; Sant. 1:2-4, 12; 5:11.)