Yaba nanaid daggega

Menú baid daggega

Índice daggega

Jehovági sunmagmalad

dule

An garda Bibliag sunmagged

23: Faraón irbo gabdasad

23: Faraón irbo gabdasad

BIRGABO gude José amba eskaryagi mellesii. Faraónga nog daked Joségi bar binsachuli. Degiidgi ibagwengi mutikidba Faraón irbo negburgan daksa geb wisgubi guali wemar ibu obare. Be dakena, Faraón gabmaid. Oibosgu, Faraón e nerganse gocha geb e gabdasadi wemarga sogsa. Aukine wargwensaar ega sogsa suli ibu negburgan obare.

Emisgi Faraónga nog daked geb José ebinsaarsunna. Geb Faraónga soge: ‘An eskaryagi mellesigu, dule wargwen aagi mellesimogana, adina nabir soge gabdaked ibu obare.’ Degsoggu Faraón yog José onogale.

Faraón e gabdasadi José gala soggali: ‘Wargugle vacamar an daksa, warburwisuli geb nued daklemala. Degine wargugle vacamar an daksa bali, adi gara gara daklemala geb garbi daklemala. Geb gara gara daklemaladi, wardummagan gucha.

Faraón gabdakmaid

‘An baid gabdasad gindi, an daksa ibmar orosgi dakleged, aa sargwengi gugle e durbagan yeer dakleged geb bat nue gores sanmaknanai. Degidgi baid sargwengi e durbagan gugle an daksa bali adi dinna dinnagwad, gara garagwad. Geb dinna dinna daklemaladi, nued daklemalad dode.’

José, Faraónga soge: ‘We sogbo be gabdasadi nabo emala. Vacamar gugle wardummagan be daksadi geb ibmar orosgiid gugle san nue nika be daksadi birga guglegid obare, degine, moli bebe nikad ome gugle be daksadi gara garagwa, geb ibmar orosgiid gugle be daksadi e san dinna dinnagwa, baid birga guglegid obarbalid. Birga gugle Egipto neggweburgi yeer ibmar sanmakoe. Degiidgi birga gugle nagunonibaloe mas adi nue bar sanmakosuli.’

Degsoggu, José, Faraónga soge: ‘Be amigoe dule wargwen yeer ibmar wisid geb be onugsaoe birga gugle yeer mas sanmakoedgi mas onmakega. Wegiile dulemar ukudba burgosuli birga gugle isgana naguoedgi, ar aagi mas nue nikuosulid.’

Faraón daksa we binsaed nuedi. Geb José onugsalesa mas onmakega geb sabogega. Faraón yarbali Egiptogi, José bur dule nug nikadga gunoniki.

Birga baabak gudgua, geb birgagwengus ukud neg daknaidgi, José dakali machergan daniki. ¿Be wisi doamala? ¡José iamar 10 mergumaladi! Jacob, wemar baba, wemar barmisa Egipto neggweburse, ar webali Canaán neggweburgi emarga mas galakgudedba. José, e iamala mag yog dakale, aukine emardi José aku dakmala. ¿Be wisi ibigala? Ar José bat sered gusad geb mor akar dakle yobalid.

José ebinsae machigwaun gabdasgua e iamar e asabin dullu gwisgunonimarye. Be we absosad, ¿be ebinsae? Degsoggu José mag dake Bab Dummad sogedba Egiptose noniki, degine, ibmar nued ulale. ¿Ibu José imas be binsae? Anmar dakoena.

Génesis 41:1-57; 42:1-8; 50:20.



Egislenaid

  • ¿Ibagwengi mutik Faraón ibu daksa?
  • Dule Faraónga nog daked, ¿ibig geb José ebinsaali?
  • ¿Ibu Faraón sogbo gabdasad, sobaledgi oyolenai?
  • ¿Ibu we gabdaklemalad obarye José soge?
  • ¿Igi José Egiptog dule nug nikadga gunoniki, Faraón yarba?
  • ¿Ibig José iamar Egiptos nadmala, geb ibig aku José daksamala?
  • ¿José ibu ogabdasad ebinsaali, geb ibu mag ito gunoniki?

Bamalad egislenabalid

  • Absoge Génesis 41:1-57.

    ¿Igi José, Jehová e nug bur odummosa, geb igi cristianomar deyob imasmarmogale? (Gén. 41:16, 25, 28; Mat. 5:16; 1 Ped. 2:12.)

    Egiptog mas obinegwagi birga gugle nikgusadi geb birga gugle ukud neg daknai gusadi, ¿igi nue inniki anmarse oyoge ibug akala Jehová neggwebur, iglesiamarbo? (Gén. 41:29, 30; Amós 8:11, 12.)

  • Absoge Génesis 42:1-8 geb 50:20.

    Be neggweburgi dule nug nikad abin dullu imaklegele, ¿ichakwagwale Jehová gala arbamalad deyob imakmogar? (Gén. 42:6.)