Yaba nanaid daggega

Menú baid daggega

Índice daggega

Jehovági sunmagmalad

dule

An garda Bibliag sunmagged

7: Dule dobsur daedi

7: Dule dobsur daedi
Enoc

DULEMAR Napaneg gine mergudmargua, bur melu Caín yobi ibmar isgana imasmala. Aukine dule wargwen dina bamaladbo akar gusa. We dule nuga, Enoc. Enoc emar dobsurdae. Ar dulemar e neg nagab mamainad dina ber isganabimalana, deginigwale Enoc dina amba Bab Dummad gala arbadii gusa.

¿Be wisi ibigala we dulemar ibmar isgana imakdii gusmala? Ebinsao: Adán, Eva bogwa Bab Dummad soged bali igar imachurmala, geb sapi san mer gunnoye Bab Dummad sogsadi guchamala. ¿Doa imasa weyob damalaga? Anger isgana. Biblia gine we anger bilege Nia. Wedina alamaknai bela anmar dulemar isganag guega.

Ei ibmar atursaega oburgwisad

Ibagwen gine Bab Dummad Jehová imasa, Enoc, dulemar gala sogedi, ibmar emar itobisulidi. Emarga wegi sogsa: ‘Ibagwen gine Bab Dummad bela dule isganamar oberguoe.’ Sun sae itosar itosmala. Ar sun Enoc oburgwebi gusmalar gusmalana. Aa gala Enoc, emar dobgued abelechuli, we dulemarga Bab Dummad ibmar imakoed sogega.

Bab Dummadi imachuli Enoc undar gudiguedi dulemar isganamar abargine. Unnila 365 año gudigusa. ¿Ibigala anmar soge “unnilagwa 365 año” gudigusye? Ar aa ibagan gine dulemar bur dutusulinad anmar ibagan gined bali, geb bur undar gudigudamarbalinad. ¡Nabiri; Matusalén, Enoc machi 969 año gudigusa!

Dulemar ibmar isgana imaknanaid

Degiid gine, Enoc burgwisad sorbali dulemar aka bur bule isgude. Biblia soge ‘we dulemar unnila ibmar isgana imaked ginbii binsadimalana,’ geb ‘Napneggi dulemar na sabsur imakdii gusmala.’

¿Be wisi ibigala aa ibagangi doggus neg undarguar gusa? Ar Nia igar baid amisad bali, dulemar ibmar isgana imakeche imake gala. Anmar dakoena ibu ibmala.

Génesis 5:21-24, 27; 6:5; Hebreos 11:5; Judas 14, 15.



Egislenaid

  • ¿Ibu gine Enoc dule bamaladbo akar gusa?
  • ¿Ibig dulemar Enoc iba ginmalad doggus ibmar isgana imasmala?
  • ¿Ibu ibmar isgana dulemar imasmala? (Sobaledgi be dake.)
  • ¿Ibigala Enoc emar dobgued abelechuli?
  • Enoc burgwisad sorba, ¿igi neg gude?
  • Aaun, ¿bule undar dulemar gudigusdamala, auki Enocdi bule undar gudigusa?

Bamalad egislenabalid

  • Absoge Génesis 5:21-24, 27.

    ¿Igi Enoc na oyosa nue Jehová e aig gusye? (Gén. 5:24.)

    ¿Doa dule bur beeche gudigusye Biblia soge, geb birga bigwa nika burgwisa? (Gén. 5:27.)

  • Absoge Génesis 6:5.

    Enoc burgwisad sorba, ¿bule Napaneg isgus nagusa, geb ibu gine anmar ibabo emala? (2 Tim. 3:13.)

  • Absoge Hebreos 11:5.

    ¿Igi Enoc daedi “Bab Dummad bur nued daksa,” geb igi Bab Dummad imasa degi daedba? (Gén. 5:22.)

  • Absoge Judas 14, 15.

    ¿Igi cristianomar Enoc yobi emar dobgued abelesurmoga dulemar owisoarmalale Armagedóngi urwed noed danikidgi? (2 Tim. 4:2; Heb. 13:6.)