ADÁN, Eva bogwa Edén neg yeer daklegedgi onolesad sorbali, ega neg beeche guali. Ise arbaar alamaknai guer gebmala nabir mas gunned amigega. Aukine, sapimar nabir e san gullemalad anale aka ikomala geb gagan ikobimaladi ainide. We ibmar gusa Adán, Eva bogwa Bab Dummadba ibsachurmargua geb bar E aimar gala guchurmala.

Adán gekus e machibo arbanaid

Ukinbali, Adán, Eva bogwa burgwidmarbali. Be ebinsae: Bab Dummad wemarga sogsad, sapi wargwen e san guchamalale, burgwemaloye. We sapi san guchamargua aa ibagi burgwidmarsunna. ¡Bab Dummad itochurmalad bali, ibmar wichurmaladyob gusmala!

Adán, Eva bogwa neg yeer daklegedgi onolesad sorbali, e mimmigan gwalulesmala. Degisoggua, amba e mimmigan seredgusmarmoga geb burgwismarmoga.

Adán, Eva bogwa Jehová sogedba ibmar imasmalana, yeer itodii gudigumaloena geb e mimmigan amba deyob yeer itodi gudigumarmogoena. Napaneggi yeer itodii sadegu gudigumaloena. Dule wargwensaar seredguosulina, uelegosulina, geb burgosurbalina.

Bab Dummad abege dulemar sadegua yeer itodii gudigumaladi, geb anmarga soge ibagwengi deyob guoye. Unnila Napanegbii bergwable yeer dakle guosuli, ar bergwable dulemar bur san nued nikgumaloe. Geb bergwable dulemar na aimargibii gumaloe geb Bab Dummad aimarga gumarbaloe.

Eva e mimmiganbo gwichid

Eva dina bar Bab Dummad aya suli. Aaga ibgwensur ega guchuli goe nikguedi. Ibmar nunmaked abargi goe nikgusa. Nabiri, Jehová sogedba ibsachulidba nunmaked dummad ega nochunna, ¿deg be daksursi?

Adán, Eva bogwa bukidar mimmigan nikgusmala, masmala nikgusmala geb bunamala nikgusmarbali. E machi saila gined gwalulenonigua onugsasmala Caín. Geb e machi sorbalid onugsasmala Abel. ¿Be wisi wemar igi gusmala?

Génesis 3:16-23; 4:1, 2; Revelación 21:3, 4.



Egislenaid

  • ¿Igi Adánga geb Evaga neg gude Edéngi onolesmargu?
  • Adán, Evabo ¿igi gudmala, geb ibigala?
  • ¿Ibig Adán geb Eva mimmigana seredgudmaloe geb burgwidmarmogoe?
  • Adán, Evabo, Jehová bali ibmar imasmalana, ¿igi gudigudmaloena geb e mimmigan igi gudigudmogoena?
  • Bab itochulid bali, ¿ibu Eva gala ibigwensur guchuli?
  • Adán, Evabo gepe masmala warbo nikgusadi, ¿igi nugmalana?
  • Bamalad burwigan weg be dakedi, ¿adi doamarmoga?

Bamalad egislenabalid

  • Absoge Génesis 3:16-23 geb 4:1, 2.

    Napa geg sanmakgusad bali, ¿Adán igi gudigusa? (Gén. 3:17-19; Rom. 8:20, 22.)

    Hebreo gayab Eva nuga obare “duladi”. ¿Ibigala we nug ega nued gusa? (Gén. 3:20.)

    Adán, Evabo isgusad sorba, ¿igi Jehová amba bendachunna? (Gén. 3:7, 21.)

  • Absoge Revelación 21:3, 4

    ¿Ibu “ibmar iduarmaladi” bar anmar dakbisuli?