Yaba nanaid daggega

Menú baid daggega

Índice daggega

Jehovági sunmagmalad

dule

An garda Bibliag sunmagged

10: Dii dummad wisad

10: Dii dummad wisad

DULEMAR arca yaba dogsasurmalad dina, amba gannar yobi na gudigusmala. Amba Dii Dummad wioye soglesad bengubukwa gudmala. Aka bur bule allismalar gebed. Aukine sanar guchuli alled iedmala.

Dii dummad winaid abargi dulemar, ibmar durganmala gwayenanaid

Ukiarmakale dii wiali. Igi dule bormo gine dii eyoge, aa yobi dii wiali. ¡Noé nue nabir sogsa! Aukine Jehová nue arca wagag edusad, aa gala geg dule wargwensaar bar yabali doged.

Sanar guchuli neg matugana dogde. Diwar dummagan nomaidyob daklegena. Sapi dummagan olamai geb akwa dummagan ebipimai geb binnasur uurmakmai gusa. Dulemar gwakidmala. Neg bur matusulidse nakwismala. ¡Mandur nabedye gotemala, ibigala an Noé bali igar sachur dibeye binsadmala, amba we arca wagag argasigua, ibigar an dogsasur dibeye! Ar emisgindi bat sorbar gusa.

Dii engumai gude. Dii 40 día wisa, winaidbii osedosdae geb oibosdabali. Yarmar dogde, amba yar dummaganse bakale dogmai gusa. Bab Dummad sogsad yobi gusa, dulemar arca yaba dogsasurmaladi geb ibmar durgan dogsasurmarmogadi, bela burgwismala. Ar bela arca yaba bukmalad dina, bendaklesmala.

We arca sobsad bali Noé e masmala bogwa arbaed nued imasmala. Dii engudgua, arca muamaknai gusa. Degiid gine, neg yorgusgua, Dad gaarsunna. ¡Ber neg daarmaksii gusa! Unnilagwa arcabii dermar yagine muamaknai daklege. Dermar matabi ber neg ebiris nai.

Arca muamaknaid

Bar dule dummagan gudisuli. Dule bamalad oakalomalaga bar nonikosurmala. Bergwable e nanganba burgwismala, geb dule bamalad isganamala burgwismarmoga. Aukine e babgandi, ¿igi gusmarsunna?

Ar dule dummagan e babgan dina dulemar anmargiid sulina. Angermar Napanegse aidenonimaladina, dulemar yobi gudigumalaga. Aa gala Dii Dummad wisgua, dule bamalad bali emar dina burgwichurmala. Bar sanar guchurmala geb gannar angerga gusa nibnegse nadmala. Aukine bar odolechurmala Bab Dummad angermar abargine. Nia e angermarga gusmala. Biblia gine niamarye we angermar onugsalemala.

Emisgi Bab Dummad burwa megeg imasa, geb dii binna binna dingumai gude. Nii walatar gusgua, arca yar birgi megnoniki. Undarad gine, arcayab bukmalad nabir neg magab atasmala, degine, yar dukumar dakarmalad. Degi, dii dingumai gude.

Degid gine Noé, sikwi sichid arca yabali siidi barmisa. We sikwi iche gukudi gusdae geb gannar nonidae ar sigwed neg amisulidba. Weyob bali bali gukudii gusa geb arca birgine gannar signonidae.

Nuugwa

Noé wisgubiena bule napa dingus dibeye, sorbali aa gala nuugwa arcayab siid barmisa. Gannar nuugwa nonimoga, sigwed neg amichulidba. Irbo gine gannar Noé nuugwa barmisbali, geb nuugwadi gannar nonibali, emisgi olivo gagan senoniki. Neg bat dingumai. Noé gannar nuugwa barmisbali, ilabaa gude, geb emisgindina nuugwa neg dinnagwad sigwega aminonisunna.

Emisgine Bab Dummad Noé gala sunmaksa. Ega sogsa: ‘Arcag noe. Bergwable be gwenadgan be bali be sede geb amba ibmar durgan sedbalo.’ Birgagwen obicha, arca yabali bukgusmala. ¡Ibiyob weligwar itosmala, burgwichur neg magab nosmaladba!

Génesis 7:10-24; 8:1-17; 1 Pedro 3:19, 20.



Egislenaid

  • Dii wiargu, ¿ibig dulemar geg bar doge gusa arca yaba?
  • ¿Ibbigwa Jehová dii owisa, geb bule dii engusa?
  • Dii engudgua, arca, ¿igi gusa?
  • Dii Dummad wisgu dule dummagan, ¿igi gusa, geb e babgandi igi gusmoga?
  • Nii waratar gudedgi, ¿igi arcadi gusmoga?
  • ¿Ibigala Noé sikwi sichid barmisa?
  • ¿Igi Noé wisgusa dii bat irisa?
  • ¿Igi Noé gala Bab Dummad sogsa, birgagwen obingus arca yab e gwenadganbo sii gusgu?

Bamalad egislenabalid

  • Absoge Génesis 7:10-24.

    ¿Bule bela ibmar dulamalad Napaneggi nikad obelolechunna? (Gén. 7:23.)

    Dii wiali dakale geb neg dingusache, ¿bule undar Napaneg dogar nai gusa? (Gén. 7:24.)

  • Absoge Génesis 8:1-17.

    Jehová gepe Napanegga ibmar abesad gwagsa suli, geb Génesis 8:17 gine, ¿igi anmarse deyob oyoge? (Gén. 1:22.)

  • Absoge 1 Pedro 3:19, 20.

    Anger isganamar nibnegse gannar owarmaksamargu, ¿igi gusmala? (Judas 6.)

    Noé ibagangi Jehová na oyosa nabir e neggwebur bendake. ¿Igi we anmar ogannomoga mer Jehová gine benguega? (2 Ped. 2:9.)