Yaba nanaid daggega

Menú baid daggega

Índice daggega

Jehovági sunmagmalad

dule

An garda Bibliag sunmagged

1: Bab Dummad ibmar imade

1: Bab Dummad ibmar imade

BELA ibmar nuegana Bab Dummadgi daniki. Bab Dummad imasa Dad naidi, ibgine neg mee imakega, geb Nii geb niiskwamardi mutikidba neg mee imakega. Geb Napaneg imasbali anmar egi gudiguega.

Ar Dad naidi, Nii, niiskwamala geb Napanega, Bab Dummad we ibmar inso imachulid. ¿Be wisi ibu inso imasa? Dulemar egimalad insogi. Anmar geg we dulemar dake, ar igi anmar geg Bab Dummad dakmoga. Biblia dina angermarye we dulemar onugsae. Bab Dummadi angermar obinnisa nibneggi ebo gudisamalaga.

Bab Dummad anger gebe obinnisadi bamalad bogwa akala. We, Bab Dummad Machi gebe saila ginedi geb na e Bab bogwa arbasa. Bab Dummad bendasa bela ibmar bamalad imakedgi. Bab Dummad bendasa Dad naid imakedgi, geb Nii, niiskwamar geb amba anmar Napaneg imakedgi arbasbali.

Aunni Napaneg, ¿iginsunna? Gebe saila unni Napaneggi geg dulemar gudiguena. Ar unnila dermar matabii nainad. Ar Bab Dummad dina abegenad Napaneggi dulemar gudigued. Ar aa gala, anmarga Napanega nudakalid. ¿Ibu imasa?

Gebe unni Napaneggi neg mee gued abelegena. Degsoggua Bab Dummad imasa Dada Napaneg mee saedi. Agala neg ibgin guddaed geb neg mutik guddabalid. Geb sorbali dermar mata dummad naidgi, binna binna neg odingusa, negache noeche.

Gebe saila unni, napagi ibmar satena. Igi weg sobarnai be dake, weyob daklegena. Dutumar satena, sapimar satena, amba ibmar durgan satemarbalina. Dermar gine uamar sate balina. Bab Dummad yeer arbaed nikgusa, nabir ibmar durgana Napaneggi nued gudigumalaga, geb dulemala nued Napaneggi gudigumarmoga gala.

Jeremías 10:12; Colosenses 1:15-17; Génesis 1:1-10.

napaneggi ibmar satenad


Egislenaid

  • ¿Doa bela ibmar nuegan anmarga obinnisa? ¿Be nabir soggwen sogsale? (Sobaled be dake.)
  • ¿Ibu inso Bab Dummad obinnisa?
  • ¿Ibig anger gepe obinnilesad bamaladbo akala?
  • Be nabir sogsale Napaneg gepe sailaun, ¿igiina?
  • ¿Igi gepeun Bab Dummad Napaneg nudakali, ibmar durganga geb dulemarga?

Bamalad egislenabalid

  • Absoge Jeremías 10:12.

    Ibmar obinnisadgi, ¿igi Bab Dummad dae anmarse oyolege? (Isa. 40:26; Rom. 11:33.)

  • Absoge Colosenses 1:15-17.

    ¿Jesús ibu imasmoga ibmar obinnileargu geb igi anmar we dule gine binsae guedi ibmar obinnisadba?

  • Absoge Génesis 1:1-10.

    ¿Doa Napaneg obinnisa? (Gén. 1:1.)

    Bab Dummad ibnergwa gine ibmar imasa. Gepegwadgi, ¿ibu imasa? (Gén. 1:3-5.)

    Ibbo gine, ¿ibu ibmar imaklesbali? (Gén. 1:7, 8.)