Yaba nanaid daggega

Menú baid daggega

Índice daggega

Jehovági sunmagmalad

dule

An garda Bibliag sunmagged

111: Machigwa gabisad

111: Machigwa gabisad

¡MANDUR, be dake! ¿Igi neg gunabali wegi? ¿Bule sabsur gusdibe machigwa napag mellediidi? ¡Be dake, dule wargwen negyab nodanikidi, Pablo gue! ¿Be daksa Timoteo danimogadi? ¿We machigwa, ventanag sii argwacha suli?

Pablo Eutico odurgusokar gunaid

Eye, deyob gusa. Pablo, Jesús sapinganga sunmakgwichina, Troasgi. Pablodi wisi bar muis emar dakosuli, ar bane sourba naoe. Degsoggu, sunmakgwichi gude neg gabigwenadse.

Geb we machigwadi, Eutico nugad, ventanag sii gabide. ¡Aila darbaag sii argwacha! Aa gala be dake dulemala bukib binsa dakle bukwa. Abga binsasmala, machigwa durguosurye. Dulemar machigwa onakwiarmargua, ¡bat machigwa burgwale!

Pablo dakargua machigwa burgwisa, gadebin imasa. Degidgi, Pablo soge: ‘Mer bukib binsamalo. ¡Akar guchuli!’ ¡Ar Pablo gannar we machigwa odulosa! ¡Weyob neg gudisulinad! Belagwable dulemar yeer itodmala.

Bela gannar nakwismar bali geb mas gunnarmarsunna. Degi Pablo sunmakgwichi gusa neg ibguedse. ¡Emidi bar Eutico gabosur an ebinsado! Degidgi, Pablo, Timoteo geb bamalad eba gudimarmogadi uryag nakwismarsunna. ¿Be wisi bia wemala namarbali?

Wes Pablo irbaa gude Bab igargi sunmakeg neggweburmarse atakdiid, emidi gannar negse nadapsunna. We ataked irbaagwadgi, Éfeso neggwebur ginbii birga baa gudigusa. Degsoggu, emisgi bur undar bipirmakdii gusa, iduale bipirmakdii gusadba.

Troasgi nodmargua, Miletog sour wis nagunoniki. Éfeso neggwebur itaka nasoggua, Éfesog gwenadgan idudimaladse Pablo gocha, Miletos dagmalaga, ega napi sunmakega. Sour nasoggargua, ¡nue wile itomala Pablo nasoggar dakarmargua!

Napis, sour gannar Cesarea owarmasa. Wegine Pablo megnoniki Felipe neggi, geb Bab Dummad gaya berbeged Agabo nugad, soggali Pablo Jerusalénse owarmas sogele eskaryag mellegoye. Geb nue deyob gusa, igi ar Agabo sogsa. Geb birgabogus Cesareag eskarya gine mellesiid sorbali, Pablo Romas barmilesa, agine Roma e dummad maid César nugad, sogega igi Pablo imaklegoe. Anmar dakoena igi gusdibe Romas nadapgua.

Hechos, capítulo 19-26 sega.



Egislenaid

  • Machigwa napa gine mellediidi, ¿doawa, geb ibig melledii?
  • ¿Ibu Pablo imasa, machigwa burgwar mai dakargua?
  • Pablo, Timoteo geb bamalad ebali gudimarmogadi, ¿bia nae soggarmala, geb Mileto gine sour nagusgua, igi ibmar gusa?
  • ¿Igi Pablog neg guoye Bab gaya berbeged Ágabo nugadi sogsa, geb igi deyob neg gunoniki?

Bamalad egislenabalid

  • Absoge Hechos 20:7-38.

    Hechos 20:26, 27 gine Pablo sogsad bali, ¿ibu anmar imaker gebe ‘dule bamalad akar gusale’ mer anmar nuggi nague gala? (Eze. 33:8; Hech. 18:6,7.)

    ¿Ibigala emar idumaladi ‘Bab Gaya Burba ginbi’ emar odurdaked abeledae? (Hech. 20:17, 29, 30; Tito 1:7-9; 2 Tim. 1:13.)

  • Absoge Hechos 26:24-32.

    Jesús, Pablog igar uksad, Bab igargi sunmaknaoye. ¿Igi Pablo, romanod bali, Jesús bali igar imasa? (Hech. 9:15; 16:37, 38; 25:11, 12; 26:32; Luc. 21:12, 13.)