Yaba nanaid daggega

Menú baid daggega

Índice daggega

Jehovági sunmagmalad

dule

An garda Bibliag sunmagged

109: Pedro, Cornelios ataknade

109: Pedro, Cornelios ataknade

WEG apóstol Pedro nugad gwichi anmar dake, geb Pedro yarganbardi abar e aimar gwismala. Auki we duledi, ¿ibigala Pedro asabinni sindigar sisunna? ¿Weyob imaked nuedi? ¿Be wisi we dule doawa?

Pedro Cornelio omos gwichid

We dule nuga Cornelio. Roma soldadomar e dummad mogana. Cornelio wichuli Pedro doagi, aukine ega soglesa e negse sedagoye. Anmar dakoena igi weyobi ibmar gunoniki.

Gebe Jesús sordag gusmalad judiomala, aukine Corneliodi judío suli. Deginigwale, Bab Dummad sabe, ese gordae, geb bukidar ibmar nuegan dulemarga imakdae. Degidgi, ibagwengi sedogidba, anger wargwen ese ataknoniki geb ega soge: ‘Bab Dummad yeer be dake, geb be ese ibmar egisedi beg imakoe. Be dulemar barmide, dule Pedro nugad aminaega. Jopeg mai, Simón neggi, dermar nagab.’

Degsoggu, Cornelio yog deyob imakale. Bangine, Pedro sunadapmalad bat Jope neggwebur walikgusmargu, Pedrodi, Simón neg birgi gudii, ar Simón neg matargwa sobaled. Agine Bab imasa Pedro samor dummad nib aidedani daksiiyob binsaedi. We samorgi ibdulamar galagwensur bukwa. Bab igargi soglemai, we ibdulamar gulleged surye, auki dule ega soge itoali: ‘Pedro, gwisgue. Ibdula be oburgwe, be gunne.’

‘¡Suli!’ Pedro abin soge. ‘Ar bipisaar ibmar isgana an gundisulid.’ Auki dule ega soge itoarbali: ‘Mer ibmar isganaye be sogo, ar Bab emisgi ibnuedye sogmaid.’ Ilabaa we ibmar gusa. Pedro nase dukin egisgwichi guali ibu we ibmar ega obar dibeye, degidgi, Cornelio dulemar barmis gusad nonimala.

Emisgi Pedro aidesa geb soge: ‘Bemar an amidi. ¿Ibig bemar an amimala?’ Dulemar sogsamargua anger wargwen Corneliog sogsaye Pedro sedagoye e negse, Pedro soge emarba naoye. Banedgi, Pedro geb abar e aimala Cornelios ataknadmala, Cesarea neggweburse.

Cornelio na e gwenadgan geb e aimar e walikamaladi oambakgusa. Pedro nonigu, Cornelio, Pedro asabinni sindigar sigisa, igi sobarnaidgi be dake. Auki Pedro soge: ‘Gwisgue, ar an binsa dule gumogad.’ Nabiri, Biblia soge dule asabinni anmar sindigar sigwedi, Babyob imakega, nued surye. Unnila Jehová anmar Bab Dummadga anmar imakoe.

Pedro emisgi bukmaladga Bab igargi sunmakali. Soge: ‘An dakgua Bab bela dulemar nued dake, eg arbabimar sogele.’ Degi sunmakgwichidgi, Bab na burba nued barmiali, geb bela dulemar bukmalad gaya baid baid sunmakarmala. Jesús sapingan judiomalad Pedrob gudimalad geger we ibmar dakmala, ar emardi iduar binsadaena Bab unnila judiomarbi nued dakye. We ibmar gusadi emar odurdasa Jehová unnila dulemar soggwenbi nued daksurye. Bela anmar we ibmar ebinsaed abelege, ¿degsursi?

Hechos 10:1-48; 11:1-18; Revelación 19:10.



Egislenaid

  • Sobaled gine dule uni naidi, ¿doawa?
  • ¿Igi anger wargwen Corneliog soge?
  • Pedro, Simón neg matargwagwad birgine gudigua, Jopegi, ¿ibu Bab Dummad, Pedro dakega imasa?
  • ¿Ibig Pedro Corneliog soge, mer Bab Dummadyob an dakoye, mer an asabinni sindigar sigoye?
  • ¿Ibigala Jesús sapingan judíomalad Pedro bali gudimaladi, geger dakmala?
  • ¿Ibu ibmar nued anmar durdake, Pedro, Cornelio sega atakapid gine?

Bamalad egislenabalid

  • Absoge Hechos 10:1-48.

    ¿Ibu anmar sega oyoge Pedro ibmar sogsadi Hechos 10:42 gine, Reino ibmar nuegan gine sunmaklegoed siki? (Mat. 28:19; Mar. 13:10; Hech. 1:8.)

  • Absoge Hechos 11:1-18.

    Jehová, judíosurmalad e sordag gueg imas daksagua, ¿Pedro bule we ibmar nued daksa, geb igi anmar Pedro yobi daed abelemoga? (Hech. 11:17, 18; 2 Cor. 10:5; Efe. 5:17.)